WEMŪꞌE HAP 43
Kat e asom Tupana Ehay henoi mahyꞌu hap koꞌi etiat.
Mesūwat yi oktān teꞌeruweupi mītꞌīn wanentup mahyꞌu hap etiat. Iraniaꞌīn teꞌeroꞌe waku neꞌi asuwe watemahyꞌu aiwyriaꞌīn wȳwo iꞌatuꞌe. Miꞌi pykai iraniaꞌīn ȳt nakuꞌi watemahyꞌu iꞌatuꞌe. Iꞌewȳte iraniaꞌīn teꞌeremahyꞌu iꞌatumompẽꞌẽ hap kape. Maꞌato kat e asom Tupana Ehay henoi mahyꞌu hap etiat.
1. Ȳt watuwemahyꞌu kuapꞌi asom.
Tupana Ehay ȳt toꞌeꞌi ȳt eremahyꞌu kuapꞌi eꞌi. Maꞌato tohenoi iꞌarōtꞌi sēse mowepīt hap mahy e aikotā̃ miꞌu hawyi iraniaꞌīn Tupana mij̃um ahepiat koꞌi aimowepīt kahato miꞌi hap ewy mahyꞌu hap aimowepīt kuap. (Ekeresiasi 10:19) Iꞌewȳte Tupana Ehay pe henoi asuwe Iesui mohey haria teꞌeremahyꞌu kurin hap etiat. — 1 Timoteu 5:23, TNM.
2. Kat e asom Tupana Ehay hoꞌonãpin mahyꞌu terān haria pe.
Ieuwa ainãpin ȳt nakuꞌi ewetemahyꞌu eimompẽꞌẽ kahato hap kape e. (Karasia 5:21) Tupana Ehay toꞌe — Ȳt erewyꞌinug̃ neiꞌo mahyꞌu kahato haria wȳwo e. (Porowepiu 23:20) Pyno watiꞌaira mahyꞌu hap pote waku aiweran pykai maꞌato watemahyꞌu kurin aiweꞌeg̃ hap wȳwo. Aimompẽꞌẽ hap kape watemahyꞌu pote watenentup hamo saꞌag̃ koꞌi kape iꞌewȳte ahehay saꞌag̃ hamo iraniaꞌīn etiat iꞌewȳte watuwewaĩ kuapꞌi hamo waku rakat nug̃ hamo. Iꞌewȳte aimoꞌahū kuap neꞌi mahyꞌu poityꞌi kahato hap. Miꞌi pote ȳt watuwewaĩ kuapꞌi mahyꞌu hap ete pote pyno waku poꞌog̃ aipohep mahyꞌu hap ete.
3. Aikotā̃ me asom watimontypot kuap iraniaꞌīn miꞌaira koꞌi mahyꞌu hap ete.
Watiꞌaira kuap watemahyꞌu hit hamo hap sio ȳt karāmpeꞌi watemahyꞌu hamo hap. Miꞌi pote ȳt ahehay saꞌag̃ kuapꞌi mahyꞌu hit haria etiat. Iꞌewȳte eremahyꞌu o eremahyꞌu o ȳt watoꞌe kuapꞌi mahyꞌu terānꞌi haria pe. (Humanu 14:10) Karāmpe aiwanentup hawe waku neꞌi aiwemahyꞌu hit hap maꞌato wentup mīt wanentup hawe wakuꞌi pote pyno iwȳwo turān waku watiꞌaira ȳt watemahyꞌuꞌi hamo hap. (Etimowempāp o Humanu 14:21.) Ȳt aimikyꞌesat ynꞌi watunug̃ waku pykai maꞌato waku poꞌog̃ iraniaꞌīn mikyꞌesat watunug̃ aiwepowȳro hap kai. — Etimowempāp o 1 Kurintiu 10:23, 24.
EREWANENTUP O ETIKUAP POꞌOG̃ HAMO
Tupana Ehay piat woꞌonãpin hap koꞌi puo pyi etikuap hamo sio waku eremahyꞌu sio ȳtꞌi hamo hap iꞌewȳte eremahyꞌu pote ȳt eremompẽꞌẽꞌi hamo hap. Iꞌewȳte etikuap hamo kat koꞌi epowȳro kuap eremahyꞌu poityꞌi kahato hap etiꞌakit hamo.
4. Waku etiꞌaira sio eremahyꞌu hamo sio ȳtꞌi hap
Aikotā̃ asom Iesui tipuenti mahyꞌu hap etiat. Watikuap hamo iwesat hap Iesui minug̃ typy ok woꞌokyiꞌat hap eꞌāt pe turān hap puo pyi. Eweimowempāp o Iuwãu 2:1-11, TNM. Miꞌi hawyi apoꞌe hap koꞌi ete eiwoꞌoꞌehay.
-
Mesūwat henoi Iesui tunug̃ vinho yꞌy kawiat e. Miꞌi hap puo pyi aikotā̃ asom Iesui tipuenti mahy koꞌi etiat iꞌewȳte mahyꞌu hit hap etiat.
-
Iesui toꞌeꞌi iꞌaparap hap mahyꞌu hit hap ȳt eꞌi. Miꞌi pote aikotā̃ asom Iesui mohey haria tipuenti mahyꞌu hit hap etiat.
Iesui mohey hat tiꞌaira kuap temahyꞌu hit hap. Miꞌitā̃ pykai maꞌato asuwe waku poꞌog̃ ȳt temahyꞌuꞌi pote. Eweimowempāp o Porowepiu 22:3. Miꞌi hawyi epowȳro hamo etiꞌaira sio waku eremahyꞌu sio ȳtꞌi hap eiwoꞌoꞌehay o 6 itig̃ nakat ete
-
Etimoewyry hamo carro moto sio yara hap eꞌyj̃an mete pote.
-
Emempytꞌa pote.
-
Ȳt eremahyꞌu teiꞌo e mohag̃ nug̃ hat epe pote.
-
Niatpo kahato erewaĩ ȳt eremahyꞌu poityꞌi kahato hamoꞌi pote.
-
Morekuaria henoi mej̃umpe mītꞌīn ȳt teꞌeremahyꞌu kuapꞌi iꞌatuꞌe pote sio nag̃nia koꞌi yn teꞌeremahyꞌu kuap iꞌatuꞌe pote wy.
-
Ereig̃neꞌen ewyꞌok ȳt mahyꞌu terānꞌi rakat wȳwo turān pote. Miꞌi ewyꞌok tiꞌaira ȳt karāmpeꞌi poꞌog̃ temahyꞌu hap kat pote saꞌawyꞌi imompẽꞌẽ kahato toig̃neꞌen tuereto.
Woꞌomenaru hap eꞌāt pe sio hairu koꞌi turān waku asom etimoꞌẽ mahy koꞌi emiwenka koꞌi pe. Kat koꞌi asom epowȳro kuap etiꞌaira poꞌog̃ waku rakat hamo. Ewetehaꞌat pyno VÍDEO kape.
Eweimowempāp o Humanu 13:13 hawyi 1 Kurintiu 10:31, 32. Eweimowempāp kahu hawyi eiwoꞌoꞌehay o apoꞌe hap etiat.
-
Etunug̃ meig̃muewuat Tupana Ehay piat woꞌonãpin hap koꞌi ewy pote aikotā̃ me asom miꞌi hap koꞌi epowȳro kuap etiꞌaira Ieuwa mowepīt hamo hap.
Ȳt uweꞌi iꞌaira kuap aheupi watemahyꞌu hamo hap sio ȳtꞌi hamo hap. Asuwe watiꞌaira watemahyꞌu hit hap maꞌato asuwe watipuenti waku poꞌog̃ ȳt watemahyꞌuꞌi hap.
5. Waku etikuap taꞌyn karānia wo mahy koꞌi etuꞌu hamo hap
Etiꞌaira eremahyꞌu hap pote waku hotꞌokꞌe ēte Ieuwa ȳt toꞌeꞌi eremahyꞌu kuapꞌi ȳt eꞌi maꞌato ainãpin ȳt nakuꞌi watemahyꞌu aimompẽꞌẽ kahato hap kape. Kat pote asom miotā̃ e. Eweimowempāp o Useia 4:11, 18. Miꞌi hawyi eiwoꞌoꞌehay o apoꞌe hap etiat.
-
Kat koꞌi asom tuwemoherep kuap mīt wȳwo temahyꞌu poityꞌi kahato tomompẽꞌẽ hap kape pote.
Kat asom aipowȳro kuap ȳt watemahyꞌu poityꞌi kahato hamoꞌi. Ȳt nakuꞌi watenentup waku neꞌi aremahyꞌu kahato watoꞌe aiwemohey kahato hap wȳwo. Eweimowempāp o Porowepiu 11:2. a Miꞌi hawyi eiwoꞌoꞌehay o apoꞌe hap etiat.
-
Eremahyꞌu hap eꞌyj̃an mete kat pote asom waku erenentup taꞌyn mirānia copo koꞌi atuꞌu hamo mahyꞌu ere waku.
6. Mowȳro hap koꞌi mahyꞌu poityꞌi rakaria piat
Etikuap hamo kat asom ihaig̃nia powȳro temahyꞌu poityꞌi kahato hap akit hamo. Ewetehaꞌat pyno VÍDEO kape. Miꞌi hawyi apoꞌe hap koꞌi ete eiwoꞌoꞌehay.
-
Vídeo puo pyi kat saꞌag̃ hap koꞌi eig̃ Dimitri tunug̃ tomompẽꞌẽ kahato turān.
-
Merep kahato asom totoiat temahyꞌu poityꞌi kahato hap.
-
Kat koꞌi asom tutunug̃ toiꞌakit tominug̃ saꞌag̃ temahyꞌu poityꞌi kahato hap hamo.
Eweimowempāp o 1 Kurintiu 6:10, 11. Miꞌi hawyi apoꞌe hap koꞌi ete eiwoꞌoꞌehay.
-
Aikotā̃ etipuenti iꞌaparap hap asom aimompẽꞌẽ kahato hap. Kat pote miotā̃ ere.
-
Mesūwat Tupana Ehay piat e hap puo pyi kat pote asom imompẽꞌẽ rakaria teꞌerekoꞌywyk kuap watoꞌe kuap.
Eweimowempāp o Mateu 5:30. Miꞌi hawyi eiwoꞌoꞌehay o apoꞌe hap etiat.
-
Iesui henoi haꞌag̃kap puo pyi. Miꞌi hap puo pyi aimūꞌe terān aiminug̃ koꞌi puo pyi watunug̃ terān saꞌag̃ koꞌi pote pyno waku aipohep taꞌyn aiminug̃ saꞌag̃ terān wuat ete pya iꞌatukai watoig̃neꞌen. Eremahyꞌu poityꞌi kahato pote kan waku etunug̃ etiꞌakit eremahyꞌu kahato hap hamo. b
Eweimowempāp o Prov. 13:20. Miꞌi hawyi eiwoꞌoꞌehay o apoꞌe hap etiat.
-
Ewyry kahato mahyꞌu poityꞌi rakaria wȳwo pote uweꞌīn ewyig̃ ereig̃neꞌen hamo.
IRANIAꞌĪN APOꞌIꞌATUꞌE POTE Iꞌaparap hap asom mahyꞌu hap iꞌatuꞌe pote.
-
Kat ere aten etiꞌatuwesat.
WATUWEMŪꞌE RAꞌYN
Aikotā̃ miꞌu hawyi iraniaꞌīn Tupana mij̃um ahepiat koꞌi aimowepīt kahato kuap hap ewy mahyꞌu hit hap aimowepīt kuap wy. Maꞌato Ieuwa ȳt tikyꞌesatꞌi watemahyꞌu poityꞌi kahato hap iꞌewȳte aimompẽꞌẽ kahato hap kape.
Hotꞌokꞌe te asom
-
Kat e asom Tupana Ehay henoi mahyꞌu hap etiat.
-
Kat koꞌi asom tuwemoherep kuap mīt wȳwo temahyꞌu poityꞌi kahato tomompẽꞌẽ kahato hap kape pote.
-
Aikotā̃ me asom watimontypot kuap iraniaꞌīn miꞌaira koꞌi mahyꞌu hap etiat.
ETIKUAP TERĀN POꞌOG̃ POTE
Aikotā̃ asom kurum iwasuria makuptiaria iꞌatuweꞌeg̃ kuap mahyꞌu hap ete.
Etikuap hamo kat koꞌi waku etunug̃ eremahyꞌu poityꞌi hap akit hamo hap.
Mowȳro hap koꞌi mahyꞌu poityꞌi rakaria piat hap (A Sentinela, 1.º de janeiro de 2010)
Iesui mohey haria teꞌeremahyꞌu turān asom waku teꞌerepoha taꞌatuecopo toꞌopuenti puenti hamo hawyi waku iꞌatuꞌe hamo.
Mowempāp haria apoꞌiꞌatuꞌe hap (A Sentinela, 15 de fevereiro de 2007)
Etimowempāp o sehay Arepokuap saꞌag̃ aremahyꞌu poityꞌi kahato hap wȳwo e hap. Etikuap hamo ihaig̃nia tiꞌakit temahyꞌu poityꞌi kahato hap.
a Porowepiu 11:2, TNM. Wemunti hap toto wemowato kahato hap upi. Maꞌato mīt iweꞌeg̃ kahato karāmpe tenentup ȳt nakuꞌi atunug̃ yne uimikyꞌesat koꞌi ȳt nakuꞌi aremohey kahato uhete. Atiꞌaparap kuap neꞌi e pote.
b Miwan hit. Moꞌopuo waku mahyꞌu poityꞌi rakaria taꞌatuhentup mowȳro hap mohag̃ nug̃ haria pe mahyꞌu poityꞌi hap akit hamo. Asuwe mohag̃ nug̃ haria tiꞌatunãpin kuap korā̃ pyi ti raꞌyn waku poꞌog̃ ȳt eremahyꞌuꞌi poꞌog̃ hamo iꞌatuꞌe.
