WEMŪꞌE HAP 44
Torānia waꞌatunug̃ hap koꞌi hawyi hairu hap koꞌi asom Tupana mowepīt.
Ieuwa tikyꞌesat aiwepīt hap iꞌewȳte ahehairu hap wy. Maꞌato torānia hairu hap koꞌi asom Ieuwa mowepīt. Aikotā̃ me asom watimoherep kuap watikyꞌe Ieuwa hap hairu hap koꞌi ete.
1. Kat pote asom ȳt torāniaꞌi hairu hap waꞌatunug̃ koꞌi hap ȳt Ieuwa mowepītꞌi.
Moꞌopuo etikuap ite maꞌato toig̃ kahato ȳt Tupana Ehay piatꞌi seko koꞌi. Miꞌi pote iraniaꞌīn hairu hap waꞌatunug̃ hap koꞌi ȳt Ieuwa mowepītꞌi. Irania hairu hap koꞌi religião ȳt pȳwo piatꞌi rakat piat seko koꞌi neꞌi. Miꞌi pote irania hairu hap sio waꞌatunug̃ hap pe toig̃ paig̃ni minug̃ koꞌi sio taꞌatumohey ikuꞌuro rakaria iꞌatuehaig̃te te e hap ete hap. Irania hairu hap sio waꞌatunug̃ hap saꞌag̃ nug̃ hap taꞌatunug̃ aikotā̃ tupana ran montypot haria taꞌatuhairu hap ewy sio taꞌatumohey taꞌatukuap ti raꞌyn aikotā̃ hamo aheig̃neꞌen hap ete. (Isaia 65:11) Ieuwa toꞌe tomohey haria pe — Ȳt eweikupteꞌen neiꞌo iꞌatuwȳwo. Eweikupteꞌen pya iꞌatukai ro e. — 2 Kurintiu 6:17 a
2. Irania waꞌatunug̃ hap iꞌewȳte hairu saꞌag̃ koꞌi hap pe teꞌeruwaꞌatunug̃ mītꞌīn montypot hamo neꞌi. Miꞌi pote aikotā̃ asom Ieuwa topyhuꞌat.
Ieuwa toꞌe — Uiwāure haria ti iraniaꞌīn mohey haria wo neꞌi raꞌyn tukupteꞌen e. (Etimowempāp o Ieremia 17:5.) Irania waꞌatunug̃ koꞌi hap mītꞌīn teꞌeruwaꞌatunug̃ taꞌatumontypot mītꞌīn hamo suraraꞌīn iꞌewȳte morekuaria montypot hamo. Iꞌewȳte taꞌatumontypot kahato wentup ywania poꞌog̃ iraniaꞌīn kai hamo. (1 Iuwãu 5:21) Iꞌewȳte irania waꞌatunug̃ koꞌi hap pe taꞌatumohey teꞌeruwekaipyi taꞌatumomã kuap saꞌag̃ koꞌi wȳwo hap ete hamo ȳt Tupana powȳro hap kaipyiꞌi hap ete. Meig̃muewuat waꞌatunug̃ koꞌi hap kape iꞌewȳte hairu saꞌag̃ koꞌi hap kape wato pote erewanentup hawe aikotā̃ asom Ieuwa topyhuꞌat.
3. Kat saꞌag̃ koꞌi mītꞌīn tunug̃ ȳt Ieuwa mikyꞌesatꞌi hairu saꞌag̃ koꞌi hap pe.
Tupana Ehay toꞌe — Waku watoiat mekewat wantym muat hairu saꞌag̃ nug̃ haria woꞌopytyk pytyk hap mahy wemompẽꞌẽ hap e. (Humanu 13:13) Irania hairu saꞌag̃ koꞌi hap pe mītꞌīn ȳt teꞌeruwewaĩ kuapꞌi waku rakat yn nug̃ hamo iꞌewȳte taꞌatuewaire waire. Ieuwa wyꞌok wo watoig̃neꞌen hamo waku watoiat yne meig̃muewuat saꞌag̃ koꞌi.
EREWANENTUP O ETIKUAP POꞌOG̃ HAMO
Etikuap hamo aikotā̃ me etimowepīt kuap Ieuwa waꞌatunug̃ koꞌi hap iꞌewȳte hairu koꞌi hap ete emiꞌaira koꞌi puo pyi hap.
4. Ȳt ereto teiꞌo waꞌatunug̃ saꞌag̃ hap Ieuwa mowepītꞌi rakat kape
Eweimowempāp o Ewesu 5:10. Miꞌi hawyi apoꞌe hap koꞌi ete eiwoꞌoꞌehay.
-
Watiꞌaira sio wato sio ȳtꞌi hairu hap kape hap eꞌyj̃an mete kat hag̃ waku watikat kahato.
-
Aj̃umpe eweig̃neꞌen hap tote aikowan waꞌatunug̃ koꞌi saꞌag̃ hap hairu hap koꞌi mītꞌīn taꞌatunug̃ tuereto anu upi anu upi.
-
Ewanentup hawe meig̃muewuat hairu hap koꞌi iꞌewȳte waꞌatunug̃ saꞌag̃ koꞌi hap asom Ieuwa mowepīt.
Kotā̃ e hap. Etikuap taꞌyn apo aikotā̃ Tupana tipuenti mīt iꞌywaĩꞌĩ hap mowepīt nug̃ hap etiat. Tupana Ehay ȳt henoiꞌi Ieuwa montypot haria taꞌatunug̃ taꞌatuꞌywaĩꞌĩ mowepīt hap. Maꞌato Tupana Ehay henoi typy ok Ieuwa ȳt montypotꞌi haria etiat taꞌatunug̃ taꞌatuꞌywaĩꞌĩ hap mowepīt hap. Eweimowempāp o Ienesi 40:20-22 hawyi Mateu 14:6-10. Miꞌi hawyi apoꞌe hap koꞌi ete eiwoꞌoꞌehay.
-
Kat koꞌi saꞌag̃ tuwemoherep iꞌatuꞌywaĩꞌĩ hap mowepīt hap eꞌāt pe turān.
-
Meig̃muewuat Tupana Ehay piat e hap koꞌi puo pyi aikotā̃ asom Ieuwa tipuenti mīt iꞌywaĩꞌĩ hap mowepīt hap etiat. Kat pote miotā̃ ere.
Moꞌopuo apoꞌere ewepe te aikotā̃ asom Ieuwa topyhuꞌat hamo areto wentup ok iꞌywaĩꞌĩ hap mowepīt hap kape pote. Eweimowempāp o Esutu 32:1-8 hawyi ewetehaꞌat pyno VÍDEO kape miꞌi hawyi apoꞌe hap koꞌi ete eiwoꞌoꞌehay.
-
Waku watikuap kahato kat koꞌi Ieuwa mowepīt sio ȳtꞌi hap iꞌewȳte waku watimohey miꞌi hap koꞌi ete. Kat pote asom.
-
Watikuap poꞌog̃ Ieuwa mikyꞌesat koꞌi etiat iꞌewȳte watimohey poꞌog̃ hamo. Maꞌato kat hap koꞌi asom waku watunug̃.
Aikotā̃ me som watikuap sio hairu Ieuwa mowepīt hap sio ȳtꞌi hap.
-
Hairu nug̃ haria waꞌatunug̃ nug̃ haria timohey asom ȳt Tupana Ehay piatꞌi koꞌi ete. Waku etikuap hairu hap iꞌewȳte waꞌatunug̃ hap tūt ȳt Tupana Ehay piatꞌi seko saꞌag̃ kaipyi sio ȳtꞌi hap.
-
Hairu nug̃ haria timontypot asom suraraꞌīn morekuaria hawyi iraniaꞌīn taꞌatuetupanaria wo sio taꞌatumontypot asom wentup ywania poꞌog̃ waku iraniaꞌīn kai. Watimontypot Ieuwa yn aheTupana sēse wo iꞌewȳte watimohey miꞌi yn imomã kuap saꞌag̃ koꞌi wȳwo hap.
-
Hairu nug̃ haria iꞌewȳte waꞌatunug̃ haria tunug̃ asom saꞌag̃ koꞌi ȳt Ieuwa mikyꞌesat ewyꞌi. Waku watoiat woꞌomompẽꞌẽ poityꞌi hap sewaire saꞌag̃ koꞌi hap iꞌewȳte saꞌag̃ koꞌi hap.
5. Etipowȳro o iraniaꞌīn emiꞌaira koꞌi montypot hamo
Karāmpe iraniaꞌīn toꞌiro waꞌatunug̃ saꞌag koꞌi hap kape iꞌewȳte hairu saꞌag̃ koꞌi hap kape iꞌatuꞌe pote niatpo kahato ȳtꞌi watoꞌe hamo. Miꞌi turān waku ahehay perupꞌi popuo iꞌatumontypot hap wȳwo. Etikuap poꞌog̃ hamo aikotā̃ miꞌi hap etunug̃ kuap hap ewetehaꞌat pyno VÍDEO kape.
Eweimowempāp o Mateu 7:12. Miꞌi hawyi apoꞌe hap koꞌi ete eiwoꞌoꞌehay.
-
Mesūwat puo pyi waku asom ȳt ereto teiꞌo mekewat waꞌatunug̃ saꞌag̃ hap kape iꞌewȳte hairu saꞌag̃ hap kape ere kuap asom ewȳriaꞌīn ȳt Ieuwa Ehay Enoi Hariaꞌi pe. Kat pote miotā̃ ere.
-
Ȳt eretoꞌi poꞌog̃ hairu saꞌag̃ hap kape iꞌewȳte waꞌatunug̃ saꞌag̃ hap kape ewyriaꞌīn wȳwo pote. Miꞌitā̃ pykai maꞌato aikotā̃ meig̃ etimoherep kuap etiꞌatukyꞌe kahato te hap.
6. Ieuwa tikyꞌesat aiwepīt kahato hap
Ieuwa tikyꞌesat aiwepīt kahato hap aiwyriaꞌīn wȳwo hap hawyi aiwyꞌokria wȳwo hap. Eweimowempāp o Ekeresiasi 3:12,13. Miꞌi hawyi eiwoꞌoꞌehay o apoꞌe hap etiat.
-
Mesūwat Tupana Ehay piat e hap puo pyi kat pote asom Ieuwa tikyꞌesat kahato aiwepīt hap.
Ieuwa tikyꞌesat temītꞌīn piat toꞌowȳwo turān toꞌokyry hap hawyi toꞌomowepīt kahato hap. Miꞌi hap etiat etikuap poꞌog̃ hamo ewetehaꞌat pyno VÍDEO kape.
Eweimowempāp o Karasia 6:10. Miꞌi hawyi apoꞌe hap koꞌi ete eiwoꞌoꞌehay.
-
Watunug̃ wakuat torānia mītꞌīn upiat hamo waku asom wato hairu iꞌewȳte irania waꞌatunug̃ saꞌag̃ hap koꞌi kape iꞌatuwȳwo.
-
Kat hag̃ emowepīt poꞌog̃ hamo etum emij̃um hairu hap eꞌāt pe turān yn pote sio toig̃ hap ewy epyꞌa pyi wuatꞌi eꞌāt pe etum ewewi pote.
-
Asuwe Ieuwa Enoi Ehay Haria teꞌeruwaꞌatunug̃ wepīt hap hit nug̃ hamo. Miꞌi turān taꞌatuj̃um taꞌatupyꞌa pyi taꞌatumij̃um taꞌatumempytꞌīn me ȳt hairu saꞌag̃ hap eꞌāt peꞌi maꞌato wuatꞌi eꞌāt pe neꞌi. Emempytꞌīn pote kat wakuat koꞌi asom etunug̃ kuap iꞌatumowepīt hamo.
IRANIAꞌĪN TEꞌEROꞌE Tupana Ehay kaipyiꞌi tūt seko koꞌi hairu hap iꞌewȳte irania waꞌatunug̃ saꞌag̃ hap pote waku neꞌi kat pote hairu hap eꞌāt turān waku kahato aiwyriaꞌīn wȳwo watoig̃neꞌen iꞌatuꞌe pote.
-
Kat ere aten etiꞌatuwesat.
WATUWEMŪꞌE RAꞌYN
Ieuwa tikyꞌesat aiwepīt sēse aiwyriaꞌīn aiwyꞌokria wȳwo hap. Maꞌato ȳt toikyꞌesatꞌi wato ȳt tomowepītꞌi rakat hairu iꞌewȳte irania waꞌatunug̃ saꞌag̃ kape wato hap.
Hotꞌokꞌe te asom
-
Kat apoꞌe hap koꞌi asom aipowȳro kuap sio hairu hap iꞌewȳte irania waꞌatunug̃ saꞌag̃ hap Ieuwa mowepīt hap sio ȳtꞌi hap watikuap hamo.
-
Aikotā̃ me asom watipowȳro kuap aiwyriaꞌīn aiwyꞌokria taꞌatukuap hamo kat pote ȳt wato hamoꞌi irania waꞌatunug̃ saꞌag̃ koꞌi kape hap.
-
Aikotā̃ me asom watikuap Ieuwa tikyꞌesat sēse aiwepīt iꞌewȳte watuwemowepīt iraniaꞌīn wȳwo hap.
ETIKUAP TERĀN POꞌOG̃ POTE
Etimowempāp o etikuap iraniaꞌīn hairu saꞌag̃ koꞌi etiat hamo.
Kat pote asom Ieuwa Ehay Enoi Haria ȳt teꞌeruwatꞌi iraniaꞌīn hairu koꞌi kape. (Site jw.org piat)
Etikuap hamo kat pote watimoꞌarōt hamo Tupana watunug̃ aiꞌywaĩꞌĩ mowepīt hap pote.
Kat pote Ieuwa Ehay Enoi Haria ȳt taꞌatunug̃ꞌi taꞌatuꞌywaĩꞌĩ mowepīt hap. (Site jw.org piat)
Etikuap hamo aikotā̃ hirokaria Tupana kyꞌe haria Ieuwa mowepīt kuap karāmpe iraniaꞌīn teꞌeruwaꞌatunug̃ hairu saꞌag̃ Ieuwa mowepītꞌi rakat nug̃ turān hamo.
Ieuwa mikyꞌe kahato en. (11:35)
Iesui mohey sēse haria taꞌatuꞌaira ȳt teꞌeruwaꞌatunug̃ꞌi poꞌog̃ Iesui iꞌywaĩꞌĩ hap mowepīt nug̃ hamo. Aikotā̃ taꞌatupuenti taꞌatumiꞌaira etiat.
Taꞌatupuenti poꞌog̃ waku rakat (A Sentinela, 1.º de dezembro de 2012)
a Miwan hit. Kat asom waku etunug̃ iraniaꞌīn teꞌeruwaꞌatunug̃ hairu saꞌag̃ nug̃ hamo pote. Miꞌi hap etiat etikuap poꞌog̃ hamo erehaꞌat o Etikuap poꞌog̃ hamo e hap 5 kape.
