WEMŪꞌE HAP 47
Waku raꞌyn asom eresetꞌok hamo.
Eremūꞌe Tupana Ehay ete hap puo pyi etikuap kahato raꞌyn Ieuwa etiat. Miꞌi pote erekoꞌywyk kahato imikyꞌesat ewy etunug̃ hamo. Maꞌato moꞌopuo asom etipuenti niatpo kahato etum eꞌieig̃neꞌen hap Ieuwa mikyꞌesat yn nug̃ hamo hawyi eresetꞌok hamo. Mesūwat wemūꞌe hap puo pyi etikuap hamo kat koꞌi kat koꞌi epyhyp kuap eresetꞌok hamo iꞌewȳte aikotā̃ me asom etiꞌakit kuap niatpo hap koꞌi e hap etiat.
1. Eresetꞌok hap eꞌyj̃an mete asom waku etikuap yne mītꞌīn mikuap terān Tupana Ehay etiat koꞌi.
Eresetꞌok hamo waku Tupana Ehay pȳwuat sēse hap kuap hatno ereig̃neꞌen. (1 Timoteu 2:4) Miꞌi pote asom eresetꞌok hap eꞌyj̃an mete waku etikuap yne mītꞌīn mikuap terān Tupana Ehay etiat koꞌi. Ȳtꞌi. Kat pote mītꞌīn teꞌeresetꞌok taꞌyn pykai maꞌato taꞌatuꞌywoporo teꞌeremūꞌe Ieuwa ehay etiat hap taꞌatukuap poꞌog̃ poꞌog̃ hamo. (Korosi 1:9, 10) Tupana Ehay pe toig̃ kahato woꞌomūꞌe hap koꞌi maꞌato eresetꞌok hap eꞌyj̃an mete waku etikuap kahato poꞌog̃ waku rakat woꞌomūꞌe hap koꞌi etiat. Congregação piat akag̃ koꞌi epowȳro kuap etikuap hamo sio meig̃muewuat poꞌog̃ waku rakat woꞌomūꞌe hap koꞌi etikuap kahato raꞌyn eresetꞌok hamo sio ȳt ite hap.
2. Kat koꞌi asom waku etunug̃ eresetꞌok hap eꞌyj̃an mete.
Eresetꞌok hap eꞌyj̃an mete waku paa ere Tupana kape eminug̃ saꞌag̃ koꞌi upi hawyi waku eremorem Tupana kape iraꞌyn. (Etimowempāp o Iesui Potmūꞌeria 3:19.) Miꞌi pote eꞌarōt poityꞌi kahato epyꞌa pe saꞌawyꞌi wuat eminug̃ saꞌag̃ upi iꞌewȳte ehentup kahato pyno Ieuwa etiwāure pyno uiminug̃ saꞌag̃ koꞌi ere. Iꞌewȳte eresetꞌok hap eꞌyj̃an mete waku etiꞌaira epyꞌa pyi ereig̃neꞌen Ieuwa mowepīt yn hamo hawyi etunug̃ terānꞌi poꞌog̃ saꞌag̃ koꞌi hap. Hawyi waku ereto waꞌatunug̃ hap koꞌi kape semana upi semana upi tuereto iꞌewȳte waku ehenoi Tupana Ehay etiat congregação piaria wȳwo.
3. Kat pote asom ȳt nakuꞌi erekenꞌẽ eresetꞌok hamo.
Iraniaꞌīn teꞌerokenꞌẽ kahato taꞌatuꞌaparap hap pupi hawyi ȳt taꞌatunug̃ꞌi atunug̃ aru emikyꞌesat yn Ieuwa iꞌatuꞌe hap ewy hamo. Pȳwo. Asuwe etiꞌaparap hamo wy. Maꞌato Tupana Ehay Iesui mohey haria taꞌatuꞌaparap wy. Maꞌato waku hotꞌokꞌe ēte Ieuwa tikuap iꞌaparap haria watoig̃neꞌen hap. (Etimowempāp o Saumu 103:13, 14.) Iwepīt kahato etunug̃ waku poꞌog̃ rakat tomontypot hap ete pote. Iꞌewȳte epowȳro hamo wy. Pȳwo Ieuwa toꞌe — Ȳt uweꞌi aihep kuap aikyꞌe hat po pyi e. — Etimowempāp o Humanu 8:38, 39.
EREWANENTUP O ETIKUAP POꞌOG̃ HAMO
Etikuap hamo aikotā̃ me asom etiꞌakit kuap niatpo hap koꞌi eresetꞌok hamo. Etikuap poꞌog̃ Ieuwa etiat hap upi iꞌewȳte Ieuwa piat epowȳro hap upi hap.
4. Etiꞌywoporo o etikuap poꞌog̃ poꞌog̃ Ieuwa hap
Etikuap yne asom waku Ieuwa etiat eresetꞌok hap eꞌyj̃an mete. Ȳtꞌi. Maꞌato waku etikuap Ieuwa etikyꞌe yne epyꞌa pyi hap iꞌewȳte etimowepīt terān hap. Ewetehaꞌat pyno VÍDEO kape etikuap hamo kat koꞌi Tupana Ehay etiat wemūꞌe haria tunug̃ taꞌatukuap poꞌog̃ Ieuwa etiat hamo hap. Miꞌi hawyi eiwoꞌoꞌehay o apoꞌe hap etiat.
-
Mesūwat vídeo puo pyi kat koꞌi hap asom iraniaꞌīn tunug̃ teꞌeruwesetꞌok hamo.
Eweimowempāp o Iesui Potmūꞌeria 17:11. Miꞌi hawyi apoꞌe hap koꞌi ete eiwoꞌoꞌehay.
-
Etimohey kahato apo yne Tupana Ehay piat aimūꞌe hap koꞌi ete. Etipȳwo kahato apo Ieuwa Ehay Enoi Haria hoꞌomūꞌe pȳwuat e hap koꞌi ete hap.
-
Etimohey kahatoꞌi pote kat hap asom etunug̃ kuap.
5. Eresetꞌok hamo etiꞌakit kuap yne niatpo hap koꞌi
Karāmpe watum terān aheig̃neꞌen hap Ieuwa mikyꞌesat yn nug̃ hamo hawyi watuwesetꞌok terān pote sēse niatpo hap koꞌi putꞌokꞌe kuap ahete. Miꞌi hap etiat etikuap poꞌog̃ hamo ewetehaꞌat pyno VÍDEO kape. Miꞌi hawyi apoꞌe hap koꞌi ete eiwoꞌoꞌehay.
-
Vídeo piat haryporia ete aikotā̃ niatpo hap koꞌi putꞌokꞌe toimontypot Ieuwa hamo.
-
Vídeo piat haryporia kai iwato kahato Ieuwa kyꞌe hap. Aikotā̃ me asom miꞌi hap ipowȳro niatpo hap koꞌi akit hamo.
Eweimowempāp o Porowepiu 29:25 hawyi 2 Timoteu 1:7. Miꞌi hawyi eiwoꞌoꞌehay o apoꞌe hap etiat.
-
Kat koꞌi hap asom aimoesaika kuap aikenꞌẽ hap koꞌi akit hamo.
6. Etimohey o Ieuwa epowȳro hamo
Tomowepīt hawyi tomikyꞌesat koꞌi nug̃ hamo epowȳro hamo Ieuwa. Ewetehaꞌat pyno VÍDEO kape. Miꞌi hawyi apoꞌe hap koꞌi ete eiwoꞌoꞌehay.
-
Kat pote asom vídeo piat ihaig̃nia uito waku ite aresetꞌok hamo e.
-
Kat asom ipowȳro toimohey poꞌog̃ Ieuwa ete hamo.
Eweimowempāp o Isaia 41:10, 13. Miꞌi hawyi eiwoꞌoꞌehay o apoꞌe hap etiat.
-
Korā̃ pyi aru atum naꞌyn uheig̃neꞌen hap emikyꞌesat yn atunug̃ hamo ere Ieuwa pe pote. Kat pote asom etimohey kuap etunug̃ yne kuap eꞌe hap ewy nug̃ hap ete hamo.
7. Etimoherep o ehewaku hap Ieuwa piat ekyꞌe kahato hap upi
Erenentup tuereto Ieuwa piat ekyꞌe kahato hap kape pote ehewaku terān poꞌog̃ hamo iꞌewȳte etimontypot terān poꞌog̃ hamo Ieuwa wuatꞌi eꞌāt pe. Eweimowempāp o Saumu 40:5. Miꞌi hawyi eiwoꞌoꞌehay o apoꞌe hap etiat.
-
Toig̃ kahato Ieuwa piat epoitȳro hap koꞌi maꞌato aikotā̃ etipuenti poꞌog̃ waku rakat.
Tupana Ehay moherep Ieremia e hat tikyꞌe kahato Ieuwa hawyi Tupana Ehay iꞌewȳte tohewaku kahato toimontypot Ieuwa hap upi. Ieremia toꞌe — Ehay uimowepīt kahato uipyꞌa pe kat pote mītꞌīn uikuap eset Ieuwa e hap enoi hap upi are e. (Ieremia 15:16, TNM) Korā̃ apoꞌe hap koꞌi ete eiwoꞌoꞌehay.
-
Kat pote asom Ieuwa Ehay Enoi Hatno areig̃neꞌen hap Ieuwa piat uipoitȳro kahato hap ewy ere kuap.
-
En apo eresetꞌok terān naꞌyn hawyi Ieuwa Ehay Enoi Hatno ereig̃neꞌen terān.
-
Eresetꞌok ite pote kat koꞌi asom epyhyp eresetꞌok hamo.
-
Ewanentup hawe kat koꞌi asom waku etunug̃ eresetꞌok raꞌyn hamo.
IRANIAꞌĪN TEꞌEROꞌE Arekenꞌẽ kahato aresetꞌok hawyi atunug̃ saꞌag̃ koꞌi hap pupi iꞌatuꞌe.
-
Miotā̃ iꞌatuꞌe hap ewy asom erenentup wy.
WATUWEMŪꞌE RAꞌYN
Ieuwa piat epowȳro hap wȳwo etiꞌakit kuap yne niatpo hap koꞌi eresetꞌok hamo.
Hotꞌokꞌe te asom
-
Eresetꞌok hap eꞌyj̃an mete asom waku etikuap yne mītꞌīn mikuap terān Tupana Ehay etiat koꞌi.
-
Kat koꞌi asom waku etunug̃ eresetꞌok hap eꞌyj̃an mete.
-
Kat pote asom ȳt nakuꞌi erekenꞌẽ eresetꞌok hamo.
ETIKUAP TERĀN POꞌOG̃ POTE
Etikuap hamo kat hap upi waku etiꞌaira eresetꞌok hamo hap.
Waku raꞌyn asom eresetꞌok hamo. (A Sentinela, março de 2020)
Etikuap hamo aikotā̃ me asom etiꞌakit kuap niatpo hap koꞌi eresetꞌok hamo e hap etiat.
Kat asom uipyhyp aresetꞌok hamo. (A Sentinela, março de 2019)
Etikuap hamo aikotā̃ me asom ihaig̃nia tiꞌakit tetiat niatpo hap koꞌi tuwesetꞌok hamo.
Saꞌawyꞌi ihaig̃nia tikuapꞌi sio waku tuwesetꞌok sio ȳtꞌi hap maꞌato kat asom ipowȳro. Miꞌi hap etiat erehaꞌat o vídeo kape.
