1.  Kat hap ewyig̃ tawa wato Papironia e hap.

2.  Aikotā̃ meig̃ watikuap karāmpe Nesia tuwemoherep hap.

3.  Mohag̃ nug̃ sū wȳwo hap

4.  Seꞌaito seharyꞌi woꞌoꞌatoiat hap

5.  Hairu saꞌag̃ hap eꞌāt koꞌi

6.  Ahū wesytpok hap koꞌi

7.  Kareꞌen kyiꞌat hap etiat weneruꞌi hap etiat iꞌewȳte aiwyriaꞌīn ereto morekuaria juiz koꞌi kapiat hap

 1. Kat hap ewyig̃ tawa wato Papironia e hap.

Tupana Ehay henoi religião ȳt pȳwo piatꞌi rakaria aikotā̃ tawa wato Papironia hap ewy e. Maꞌato aikotā̃ meig̃ miꞌi hap watikuap. (Iesui Aru E Hap 17:5) Etikuap poꞌog̃ hamo erehaꞌat pyno myẽꞌym itig̃ nakat kape.

• Mesūwat yi oktān tohoꞌomoꞌakag̃ꞌia mītꞌīn. Tupana Ehay henoi tawa wato Papironia e hap taꞌapyk mekewat wuatꞌi mītꞌīn wuatꞌi pusu kuap haria ete hap ewy e. Wuatꞌi mesuwarotiat morekuaria saꞌag̃ nug̃ haria akag̃ wo taꞌapyk morekuat no. — Iesui Aru E Hap 17:15, 18.

• Tawa wato Papironia e hap ȳt morekuaria ewyꞌi neig̃ weneru haria ewy. Miꞌi hap watikuap kat pote karāmpe Tawa wato Papironia e hap momã hawyi morekuaria hawyi weneru haria teꞌeruwak hamo. — Iesui Aru E Hap 18:9, 15.

• Tohoꞌonug̃ mītꞌīn pya kahato Tupana kai. Aikotā̃ wentup ok haryporia wuatꞌi ihaig̃nia wȳwo hat ewy e Tupana Ehay kat pote Tawa wato Papironia e hap toig̃neꞌen toꞌowȳwo kahato morekuaria wȳwo dinheiro koꞌi upi tomikyꞌesat saꞌag̃ koꞌi upi. (Iesui Aru E Hap 17:1, 2) Mesūwat yi oktān tohoꞌomaꞌatꞌi maꞌatꞌi kahato raꞌyn mītꞌīn iꞌewȳte tohaꞌatuꞌuka kahato raꞌyn mītꞌīn hawyi Tupana mohey haria wy. — Iesui Aru E Hap 18:23, 24.

Etihanik eraꞌaipok wemūꞌe hap 13 sehay 6 piat kape hamo.

 2. Aikotā̃ meig̃ watikuap karāmpe Nesia tuwemoherep hap.

Tanieu miwan 69 semana e hap etiat aipowȳro hamo watikuap karāmpe Nesia tuwemoherep hap etiat. — Etimowempāp o Tanieu 9:25.

• Karāmpe asom 69 semana tesaꞌawynug̃. Miꞌi hap tesaꞌawynug̃ Iesui ūt hap eꞌyj̃an mete anu 455 pe. Miꞌi turān Morekuat Niemia toto raꞌyn Ierusarẽi mompakupꞌi hamo. — Tanieu 9:25; Niemia 2:1, 5-8.

• Karania anu koꞌi ewy asom 69 semana. Asuwe Tupana Ehay pe wentup eꞌāt e hap aikotā̃ wentup anu hawiat pe. (Numeru 14:34; Esekieu 4:6) Miꞌi pote wentup semana aikotā̃ 7 anu hap ewy. Miꞌi pote 69 semana aikotā̃ 483 anu hap ewy (69 semana x 7 eꞌāt).

• Karāmpe asom 69 semana ikahuro. Iesui ūt hap eꞌyj̃an mete anu 455 pyi watimorania toꞌokape 483 anu pote watipuenti hamo Iesui ūt hawyi anu 29 pe. a Mesūwat anu pe Iesui tuwesetꞌok hawyi toig̃neꞌen Nesia wo. — Iruka 3:1, 2, 21, 22.

Etihanik eraꞌaipok wemūꞌe hap 15 sehay 5 piat kape hamo.

 3. Mohag̃ nug̃ sū wȳwo hap

Toig̃ mohag̃ nug̃ hap mīt sū wȳwo te hap. Maꞌato yneꞌi meig̃muewuat mohag̃ nug̃ hap Iesui mohey sēse haria ikyꞌesat taꞌatupohag̃ nug̃ hamo. Kotā̃ e hap. Ȳt taꞌatukyꞌesatꞌi taꞌatuj̃um taꞌatusū mītꞌīn pe hap iꞌewȳte cirurgia turān taꞌatuhep taꞌatusū hawyi taꞌatupag̃ pakupꞌi taꞌatupīt pe hap. — Teturonamia 15:23.

Maꞌato irānia mohag̃ nug̃ hap koꞌi Iesui mohey sēse haria tikyꞌesat pote waku neꞌi taꞌatunug̃. Kotā̃ e hap exame de sangue e hap hemodiálise e hap hemodiluição e hap iꞌewȳte recuperação intraoperatória de células e hap sio uso da máquina coração-pulmão e hap. Maꞌato teꞌeruwewi waku Iesui mohey haria tiꞌaira aikotā̃ mohag̃ nug̃ haria tunug̃ kuap cirurgia turān taꞌatusū wȳwo hap iꞌewȳte exame nug̃ turān sio terapia nug̃ turān hap. Aikotā̃ aikotā̃ me neꞌi mohag̃ nug̃ haria teꞌerepohag̃ nug̃ kuap. Miꞌi pote waku Iesui mohey haria toꞌoꞌehay kahato mohag̃ nug̃ hat wȳwo taꞌatuꞌaira cirurgia hap eꞌyj̃an mete iꞌewȳte exame sio terapia nug̃ hap eꞌyj̃an mete toikuap aikotā̃ hamo mohag̃ nug̃ hat tunug̃ tosū wȳwo hap kuap hamo. Miꞌi pote erenentup o meig̃muewuat apoꞌe hap koꞌi kape

• Mohag̃ nug̃ haria tihep uipīt pyi uisū. Miꞌi tepag̃ iꞌatuemáquina pe hawyi mōtꞌi hit máquina pe uisū. Miꞌi turān uiwanentup hawe máquina piat uisū te hamo sio ȳtꞌi raꞌyn. Sio waku poꞌog̃ atiꞌokpun yi tote aikotā̃ yꞌy ewy. — Teturonamia 12:23, 24.

• Mohag̃ nug̃ haria uipohag̃ nug̃ turān taꞌatuhep uipīt pyi sū hawyi kat kat neꞌi taꞌatunug̃ uisū wȳwo. Miꞌi kahu hawyi taꞌatueraꞌaipok pakupꞌi uipīt kape pote. Miꞌi hap atiꞌaira pote asom uiwanentup hap waku hamo sio waku poꞌog̃ atipuenti atiꞌairaꞌi miꞌi hamo hap.

Etihanik eraꞌaipok wemūꞌe hap 39 sehay 3 piat kape hamo.

 4. Seꞌaito seharyꞌi woꞌoꞌatoiat hap

Tupana Ehay hoꞌonãpin woꞌomenaru haria ȳt eiwoꞌoꞌatoiat reiꞌo maꞌato eiwoꞌoꞌatoiat pote ȳt heꞌaitoꞌi rakatno ȳt iharyꞌi rakatno eweikupteꞌen e. (1 Kurintiu 7:10, 11) Maꞌato asuwe irania Ieuwa montypot haria tiꞌaira kuap toꞌoꞌatoiat hap. Kat pote asom.

• Karāmpe seꞌaito ȳt ipotpap terānꞌi teharyꞌi tomempytꞌīn eropat hamo tehaig̃te topotpap kuap pykai. Miꞌi pote iwyriaꞌīn katꞌi iꞌatumiꞌu katꞌi iꞌatuesokpe ihakyꞌeꞌi rakaria wo tukupteꞌen iꞌatuesȳꞌat kahato. —  1 Timoteu 5:8.

• Karāmpe seꞌaito timosoꞌopot teharyꞌi sio seharyꞌi timosoꞌopot teꞌaito ihaig̃teꞌi poꞌog̃ hap kape. Miꞌi pote seꞌaito sio seharyꞌi ipoityꞌi pe toig̃neꞌen iꞌewȳte ikuꞌuro kuap. —  Karasia 5:19-21.

• Karāmpe seꞌaito sio seharyꞌi tipyhyp teꞌaito sio teharyꞌi Ieuwa montypot hamo. Miꞌi pote ȳt aikotā̃ kuap hamoꞌi seꞌaito sio seharyꞌi Ieuwa wyꞌok wo toig̃neꞌen kuap hamo. —  Iesui Potmūꞌeria 5:29.

Etihanik eraꞌaipok wemūꞌe hap 42 sehay 3 piat kape hamo.

  5. Hairu saꞌag̃ hap eꞌāt koꞌi

Iesui mohey sēse haria ȳt teꞌeruwaꞌatunug̃ꞌi hairu saꞌag̃ koꞌi ȳt Ieuwa mowepītꞌi rakat nug̃ hamo. Maꞌato kat eꞌi Tupana Ehay henoi aiminug̃ aimiꞌaira terān wuat hap ete pote waku watimūꞌe aiwanentup hap waku rakat aira Ieuwa mowepīt hamo hawyi waku watiꞌaira aiwewi. Erehaꞌat o kotā̃ e hap koꞌi kape

• Feliz Natal iꞌatuꞌe ewowi pote. Etiꞌatuwesat kuap waku sēse ere kuap hawyi taꞌatukuap terān poꞌog̃ kat pote ȳt eretoꞌi Iesui iꞌywaĩꞌĩ hap mowepīt hap kape sio kat pote ȳt eretoꞌi iraniaꞌīn hairu saꞌag̃ koꞌi kape hap ehenoi kuap iꞌatuepe.

• Eꞌaito sio eharyꞌi ȳt Ieuwa Ehay Enoi Hatꞌi ewenka ewyriaꞌīn wȳwo erenuk hamo hairu saꞌag̃ hap eꞌāt pe turān pote. Eremūꞌe kahato raꞌyn ehentup Ieuwa kape hawyi etiꞌaira raꞌyn ereto hamo hap pote waku ehenoi eꞌaito sio eharyꞌi pe karāmpe watuwaꞌatunug̃ turān aiwyriaꞌīn wȳwo taꞌatunug̃ religião ȳt pȳwo piatꞌi rakat seko saꞌag̃ koꞌi pote uito ȳt atunug̃ hamoꞌi seko saꞌag̃ koꞌi ere o.

• Ekaraiwa tum terān dinheiro miꞌu sio iraniaꞌīn tomij̃um koꞌi epe hairu saꞌag̃ hap eꞌāt pe turān pote. Waku asom etāt imij̃um sio ȳtꞌi. Etiꞌaira hap eꞌyj̃an mete waku erenentup kahato atāt pote uhekaraiwa tenentup hamo asom areto hairu saꞌag̃ hap kape hap sio uhekaraiwa timoherep sēse ti raꞌyn tohewaku uipotpap hap upi hap.

• Mīt tum terān tomij̃um epiat hap hairu saꞌag̃ hap eꞌāt pe turān pote. Miꞌi turān mīt toꞌe kuap — Atikuap ti raꞌyn ȳt erewaꞌatunug̃ꞌi iraniaꞌīn wȳwo mekat hairu nug̃ hamo miꞌitā̃ pykai maꞌato atum terān uimij̃um epiat hap e. Moꞌopuo mīt tum terān tomij̃um epiat hap teg̃yiꞌat pote maꞌato etiꞌaira hap eꞌyj̃an mete waku erenentup kahato kat pote asom tutum terān tomij̃um uhepiat hap. Uhaꞌag̃ terān asom areto hairu saꞌag̃ hap koꞌi kape hamo uipap kahato kape hamo sio ȳtꞌi ere. Miꞌi hap koꞌi kape erenentup kahu hawyi waku ewewi etiꞌaira sio etāt hamo imij̃um sio ȳt hamo hap. Yne aiminug̃ terān wuat koꞌi aimiꞌaira koꞌi ete waku watunug̃ ȳt aiwemunti hamoꞌi maꞌato Ieuwa montypot hamo. —  Iesui Potmūꞌeria 23:1.

Etihanik eraꞌaipok wemūꞌe hap 44 sehay 1 piat kape hamo.

 6. Ahū wesytpok hap koꞌi

Ekai toig̃ ahū wesytpok kuap hap pote kan waku etunug̃. Watiꞌatukyꞌe kahato mītꞌīn miꞌi pote aimitumo kahato hamo ȳt watiporerokosapꞌi aiꞌahū hap iraniaꞌīn pe hamo. Watikuapꞌi sio toig̃ ahū wesytpok hap aikai sio ȳtꞌi pykai maꞌato waku aimitumo miꞌi hap pupi kat pote Tupana Ehay henoi — Eweiꞌatukyꞌe ro iraniaꞌīn eiwekyꞌe hap oktān e ainãpin. — Humanu 13:8-10.

Mīt wat toig̃ ahū wesytpok hap pote aikotā̃ me asom toimoherep kuap woꞌokyꞌe iraniaꞌīn upiat hap. Mīt wat toig̃ ahū wesytpok hap pote ȳt nakuꞌi toiꞌatuꞌahiꞌypysat iraniaꞌīn neig̃ tohoꞌoposat sio topotꞌãpysig̃. Iꞌewȳte taꞌatuwyriaꞌīn kawiano hamo ȳt taꞌatuwenkaꞌi iꞌahū rakat taꞌatuꞌyat kape pote ȳt kat hamoꞌi ipyꞌahak iꞌahū rakat. Tuwesetꞌok hap eꞌyj̃an mete iꞌahū rakat waku tohenoi congregação piat akag̃ coordenador pe. Miꞌitā̃ hawyi iraniaꞌīn woꞌosetꞌok hanuaria taꞌatuhoꞌokawiano hamo wy. Mīt ȳt tikuapꞌi sio towat toig̃ toꞌahū wesytpok hap sio ȳtꞌi pykai maꞌato waku tuwewi tutunug̃ exame de sangue tuwehik haryporia sio ihaig̃nia wȳwo hap eꞌyj̃an mete. Miꞌi hap mīt tunug̃ mote toimoherep hamo tuwanentup tewowiat ynꞌi hap maꞌato tuwanentup poꞌog̃ iraniaꞌīn mikyꞌesat kape hap. — Wiripu 2:4.

Etihanik eraꞌaipok wemūꞌe hap 56 sehay 2 piat kape hamo.

 7. Kareꞌen kyiꞌat hap etiat weneruꞌi hap etiat iꞌewȳte aiwyriaꞌīn ereto morekuaria juiz koꞌi kapiat hap

Karāmpe mītꞌīn wat watiweneru sio watikyiꞌat pote waku watiwan popera pe iꞌewȳte waku miꞌi hap watunug̃ Ieuwa Ehay Enoi Haria wȳwo pykai wy. Miꞌi hap watunug̃ pote waku kahato hamo ȳt watuꞌuka hamoꞌi sehay wo. (Ieremia 32:9-12) Maꞌato asuwe Ieuwa Ehay Enoi Haria tiwan popera piat pykai maꞌato asuwe toꞌomompyꞌahak kuap dinheiro etiat iꞌewȳte iraniaꞌīn koꞌi etiat. Toꞌomompyꞌahak kahato ite turān waku toꞌoꞌehay toꞌope yn woꞌowese hap nug̃ hamo.

Maꞌato kat asom waku watunug̃ aiwyꞌokria aipyꞌasetpiaria aimaꞌat sio kat taꞌatueroꞌok aiwat pote. (Etimowempāp o Mateu 18:15-17.) Miꞌi hap etiat Iesui aimūꞌe kat waku watunug̃ hamuat hap ete.

1. Waku eiwoꞌope yn eiwoꞌoꞌehay eweimohampȳk hamo. — Erehaꞌat pyno hag̃a hit 15.

2. Maꞌato ȳt tuwanentup terānꞌi pote waku etioto ewewȳwo typy ok congregação piaria iweꞌeg̃ kahato rakaria ehay ewyꞌok wȳwo hamo turān. — Erehaꞌat o hag̃a hit 16.

3. Miꞌi hap koꞌi etunug̃ pykai maꞌato ȳt tuwanentup terān ite pote waku ehentup mowȳro hap akag̃ koꞌi pe. — Erehaꞌat o hag̃a hit 17.

Karāmpe sehay wo watuꞌuka aiwyriaꞌīn congregação piaria wȳwo turān ȳt nakuꞌi waheꞌereto morekuaria kape juiz koꞌi kape. Miꞌi hap watunug̃ mote iꞌatuehay saꞌag̃ kuap Ieuwa etiat iꞌewȳte congregação piaria ete. (1 Kurintiu 6:1-8) Maꞌato asuwe waku neꞌi waheꞌereto aiwyriaꞌīn morekuaria kape sio juiz koꞌi kape. Kotā̃ e hap turān. Seꞌaito seharyꞌi toꞌoꞌatoiat turān guarda de filhos e hap turān pensão alimentícia e hap turān indenização de seguro e hap turān falência hawyi testamento e hap turān. Miꞌi hap koꞌi Ieuwa Ehay Enoi Hat tunug̃ woꞌowese nug̃ terān haype miꞌi hap etiat ȳt kat eꞌi Tupana Ehay henoi waku neꞌi.

Aipyꞌasetpiat Ieuwa Ehay Enoi Hat tunug̃ saꞌag̃ poityꞌi pote sio toisisit hirokat sio toiꞌahyk ahyk iraniaꞌīn sio seroꞌokꞌe sio toiꞌauka mīt pote wentup ok Ieuwa Ehay Enoi Hat henoi kuap hamo morekuaria pe sio suraraꞌīn pe iminug̃ saꞌag̃ etiat. Miꞌi hap etiat ȳt kat eꞌi Tupana Ehay henoi waku neꞌi.

Etihanik eraꞌaipok wemūꞌe hap 56 sehay 3 piat kape hamo.