Aikotā̃ aikotā̃ me neꞌi watuwemomkahu wateropat iꞌewȳte watuwesokpe pag̃ hap. Maꞌato Tupana Ehay piat woꞌonãpin hap koꞌi aipowȳro kuap watuwemomkahu Ieuwa mowepīt hap wȳwo hamo hap. Watikuap hamo irania iwoꞌonãpin hap koꞌi etiat.

1. Kat asom aipowȳro kuap weꞌeg̃ hap wȳwo watuwesokpe pag̃ watuwemomkahu hamo hap.

Aitoria Ieuwa montypot haria miꞌi tupono kat hamoꞌi aipitpit maꞌato waku aiwepainug̃ hap hampȳk iꞌewȳte woꞌomontypot hap wȳwo hawyi weꞌeg̃ hap wȳwo. Miꞌi hap watimoherep hamo Tupana montypot aipyꞌa pyi hap. (1 Timoteu 2:9, 10) Kat hap eteig̃ mesūwat aimūꞌe terān. (1) Waku ahesokpe hampȳk puo. Ieuwa montypot yat pe Ieuwa Ehay Enoi Haria teꞌeremomkahu iꞌatuesokpe teꞌeruweupi maꞌato teꞌeremomkahu waku puo teꞌeraꞌapin waku puo wy. Miꞌi hap taꞌatumoherep taꞌatumontypot Tupana Ieuwa hap. (2) Waku ahesokpe watopag̃ woꞌomontypot hap wȳwo miꞌi pote ȳt watopag̃ hamoꞌi sokpe satꞌe kahato rakat iꞌok tutꞌi rakat mītꞌīn teꞌerehaꞌat ahewowi hawyi teꞌerenentup sewaire nug̃ hap kape hamo hap. (3) Watimoherep weꞌeg̃ hap karāmpe wato merepꞌi torānia mītꞌīn upi sokpe kyiat hap ete hawyi wemomkahu hap etiat iꞌewȳte iraniaꞌīn koꞌi etiat hap. (4) Watimoherep Tupana montypot aipyꞌa pyi hap karāmpe wateropat hampȳk puo hap iꞌewȳte watuweꞌapin hap. Miꞌi hap puo pyi mītꞌīn tikuap hamo watimontypot sēse AheTupana Ieuwa hap. — 1 Kurintiu 10:31.

2. Kat pote asom waku watuwanentup kat iꞌatuꞌe hamo aiwyriaꞌīn ahesokpe etiat hap kape.

Pȳwo. Watiꞌaira kuap aiwewi aikotā̃ aikotā̃ rakat neꞌi sokpe watopag̃ hamo hap. Maꞌato waku watuwanentup kat iꞌatuꞌe hamo mītꞌīn ahesokpe etiat hap kape. Miꞌi pote watiꞌaira poꞌog̃ waku rakat hamo ȳt uweꞌi ihay saꞌag̃ tenentup saꞌag̃ ahesokpe etiat hamo. Miꞌi pote poꞌog̃ waku iraniaꞌīn mowepīt hatno watopyhuꞌat watiꞌatumotag̃ Iesui mohey hap ete iraniaꞌīn hamo. —  Etimowempāp o Humanu 15:1, 2.

3. Kat pote asom ahesokpe aiwemomkahu hap puo pyi mītꞌīn iꞌatuehay sē kuap Ieuwa etiat.

Watuweropat terān hampȳk waku puo yne hap ete maꞌato poꞌog̃ watuwemomkahu karāmpe wato waꞌatunug̃ hap kape watimontypot Tupana hamo turān iꞌewȳte wahenoi Tupana Ehay etiat hamo turān. Ȳt watikyꞌesatꞌi aimipag̃ sokpe hap puo pyi mītꞌīn iꞌatuehay saꞌag̃ AheTupana Ieuwa etiat hap miꞌi hawyi ȳt teꞌerenentup terānꞌi aimienoi Tupana Ehay etiat hap kape hap. Miꞌi pote watuwepainug̃ waku puo hamo Tupana Ehay montypot kahato hap watunug̃ miꞌi hap puo pyi mītꞌīn tikuap terān poꞌog̃ hamo Ieuwa etiat. —  Titu 2:10.

 EREWANENTUP O ETIKUAP POꞌOG̃ HAMO

4. Ahesokpe iꞌewȳte aiwemomkahu waku puo hap puo pyi watimoherep Ieuwa montypot hap

Uwe kape ti asom poꞌog̃ waku watuwanentup karāmpe watuwepainug̃ iꞌewȳte watuwemomkahu hap eꞌyj̃an mete. Eweimowempāp o Saumu 47:2. Miꞌi hawyi apoꞌe hap koꞌi ete eiwoꞌoꞌehay.

• Mītꞌīn aikuap Ieuwa set enoi hap upi. Miꞌi pote kat pote asom waku watuwanentup kahato aikotā̃ rakat sokpe watopag̃ hamuat hap kape.

• Karāmpe waꞌatunug̃ hap kape wato sio Tupana Ehay enoi hamo turān. Ewanentup hawe kat pote asom waku watuwanentup ahesokpe aiwepainug̃ hap kape.

 5. Aikotā̃ me watiꞌaira kuap sokpe aiwemomkahu hap weꞌeg̃ hap wȳwo hap.

Ewetehaꞌat pyno VÍDEO kape.

Ahesokpe hoꞌowoity rakatꞌi pykai maꞌato waku hun nakatꞌi ipitpit rakatꞌi hawyi aikowo wato hap upi ahesokpe tuweupi rakat hamo watopag̃ maꞌato waku sokpe watopag̃ hampȳk hap wȳwo. Eweimowempāp o 1 Kurintiu 10:24 hawyi 1 Timoteu 2:9, 10. Miꞌi hawyi eiwoꞌoꞌehay o kat pote

• Ȳt nakuꞌi watopag̃ sokpe hiot hiotꞌe rakat iꞌewȳte aimipag̃ sokpe aiꞌyat piat ipōtꞌi kahato rakat.

• Ȳt nakuꞌi watopag̃ sokpe satꞌe kahato rakat iꞌywopꞌi rakat ipewiu rakat aipīt kape mītꞌīn akasa hamo hap hawyi teꞌerenentup sewaire nug̃ hap kape hamo hap.

Nimo Ieuwa tiꞌatunãpin temītꞌīn Muisei puo pyi. Meig̃muewuat iwoꞌonãpin hap koꞌi ȳt watimontypotꞌi raꞌyn pykai maꞌato aimūꞌe kahato aikotā̃ Ieuwa wanentup hap koꞌi etiat hap. Eweimowempāp o Teturonamia 22:5. Miꞌi hawyi eiwoꞌoꞌehay o apoꞌe hap etiat.

• Kat pote asom ȳt nakuꞌi ihaig̃nia tuwemomkahu aikotā̃ haryporia wemomkahu hap ewy iꞌewȳte haryporia temomkahu ihaig̃nia wemomkahu hap ewy.

Eweimowempāp o 1 Kurintiu 10:32, 33 hawyi 1 Iuwãu 2:15, 16. Miꞌi hawyi apoꞌe hap koꞌi ete eiwoꞌoꞌehay.

• Kat pote asom waku apoꞌere ewepe te uhesokpe uimipag̃ uiwemomkahu hap ete asom iꞌatuehay saꞌag̃ kuap congregação piaria sio aj̃umpe uheig̃neꞌen hap totiaria.

• Aj̃umpe eweig̃neꞌen hap tote aikotā̃ asom mītꞌīn eko iꞌatuesokpe pag̃ hap iꞌewȳte iꞌatuwemomkahu hap.

• Ewanentup hawe waku asom Iesui mohey sēse haria tunug̃ aikotā̃ torānia mītꞌīn topag̃ sokpe sio iꞌatuwemomkahu hap ewy. Kat pote.

 WATUWEMŪꞌE RAꞌYN

Karāmpe watiꞌaira weꞌeg̃ hap wȳwo sokpe iꞌewȳte aiwemomkahu hap miꞌi pote watimoherep Ieuwa montypot hap iꞌewȳte iraniaꞌīn montypot hap.

Hotꞌokꞌe te asom

• Kat pote asom Ieuwa tikyꞌesat watuwanentup kahato watiꞌaira ahesokpe iꞌewȳte aiwemomkahu hap eꞌyj̃an mete hap.

• Aikowat Tupana woꞌonãpin hap koꞌi asom aipowȳro kuap watiꞌaira weꞌeg̃ hap wȳwo sokpe iꞌewȳte watuwemomkahu hamo hap.

• Kat pote asom ahesokpe aiwemomkahu hap puo pyi mītꞌīn iꞌatuehay sē kuap sio iꞌatuehay saꞌag̃ kuap Ieuwa etiat.