Etikyꞌe kahato Ieuwa epyꞌa pyi iꞌewȳte etiꞌywoporo imikyꞌesat nug̃ hap pykai maꞌato asuwe etiꞌaparap tuereto hamo. Maꞌato irania miꞌaparap koꞌi ipoityꞌi poꞌog̃ iraniaꞌīn miꞌaparap koꞌi kai. (1 Kurintiu 6:9, 10) Etiꞌaparap poityꞌi kahato Ieuwa pe pote ȳt etiwāure teiꞌo Ieuwa ekyꞌe kahato te hap. Miꞌi tiwāure terān emiꞌaparap iꞌewȳte epowȳro terān kahato.

1. Kat hap koꞌi asom waku watunug̃ Ieuwa tiwāure aimiꞌaparap koꞌi hamo.

Ieuwa kyꞌe kahato hat mīt karāmpe toiꞌaparap poityꞌi kahato Ieuwa pe pote iꞌarōt kahato topyhuꞌat. Maꞌato Ieuwa aimoesaika hamo miotā̃ e — Eimiꞌaparap ȳt nakuatꞌi koꞌi eimohun hap ewy. Maꞌato miꞌi pykai uito atimomkytsig̃ kuap e. (Isaia 1:18) Aimiꞌaparap poityꞌi ete paa watoꞌe kahato Ieuwa pe pote toiwāure hamo. Aikotā̃ me asom paa watoꞌe hap watimoherep kuap. Paa watoꞌe aipyꞌa pyi pote ȳt watunug̃ terānꞌi poꞌog̃ hamo Ieuwa moꞌarōt hap iꞌewȳte wahentup hamo aipyꞌa pyi uiwepyiꞌi watoꞌe kahato hamo Ieuwa pe. Miꞌi hawyi watiꞌywyk hamo aiwanentup saꞌag̃ hap iꞌewȳte aheko saꞌag̃ kat pote miꞌi hap koꞌi puo pyi tūt ahaꞌag̃ hap koꞌi. Maꞌato miꞌi hap koꞌi watiꞌywyk pote ȳt hupiteꞌi hamoꞌi watiꞌaparap. Iꞌewȳte watimontypot hamo Ieuwa e hap koꞌi. —  Etimowempāp o Isaia 55:6, 7.

2. Aikotā me asom Ieuwa aipowȳro kuap akag̃ koꞌi puo pyi karāmpe watiꞌaparap turān.

Watiꞌaparap poityꞌi kahato Ieuwa pe pote Ieuwa toꞌe — Waku etikay kay Iesui mohey haria apykok haria e. (Etimowempāp o Tiaku 5:14, 15.) Congregação piaria akag̃ koꞌi Ieuwa kyꞌe kahato haria iꞌewȳte Ieuwa hũria kyꞌe kahato wy. Miꞌiria aipowȳro Tupana Ehay puo pyi Ieuwa wyꞌok wo pakupꞌi watoig̃neꞌen hamo. —  Karasia 6:1

Watiꞌaparap poityꞌi kahato Ieuwa pe pote aikotā̃ me asom akag̃ koꞌi aipowȳro kuap. Typy ok sio myẽꞌym ok akag̃ koꞌi iꞌatuehay hamo aiwȳwo hawyi Tupana Ehay puo pyi taꞌatumoherep hamo watiꞌaparap haty puo kahato Ieuwa pe hap iꞌewȳte akag̃ koꞌi ainãpin hawyi aipowȳro hamo kat koꞌi waku watunug̃ ȳt watiꞌaparapꞌi poꞌog̃ hamo. Maꞌato wentup ok mīt tiꞌaparap poityꞌi kahato Ieuwa pe hawyi ȳt paa eꞌi pote akag̃ koꞌi taꞌatuhep hamo mīt congregação pyi ȳt iraniaꞌīn congregação piaria ȳt moꞌakag̃ꞌia hamoꞌi.

 EREWANENTUP O ETIKUAP POꞌOG̃ HAMO

3. Wahenoi aimiꞌaparap etiat hap aipowȳro Ieuwa wyꞌok wo pakupꞌi watoig̃neꞌen hamo

Karāmpe watiꞌaparap Ieuwa pe turān sēse watimoꞌarōt kahato. Miꞌi pote waku wahenoi Ieuwa pe aimiꞌaparap hap etiat. Eweimowempāp o Saumu 32:1-5. Miꞌi hawyi eiwoꞌoꞌehay o apoꞌe hap etiat.

• Karāmpe watiꞌaparap hawyi waterewyi terān maꞌato kat pote asom waku poꞌog̃ wahenoi yne Ieuwa pe aimiꞌaparap etiat.

 4. Ieuwa timoherep woꞌokyꞌe hap iꞌaparap haria upi

Ieuwa Ehay Enoi Hat tiꞌaparap poityꞌi kahato Ieuwa pe pote iꞌewȳte ȳt toimontypot terānꞌi poꞌog̃ Ieuwa piat woꞌonãpin hap koꞌi miꞌi pote ȳt Ieuwa Ehay Enoi hatnoꞌi poꞌog̃ toig̃neꞌen kuap. Miꞌi mīt akag̃ koꞌi taꞌatuhep congregação pyi hawyi ȳt ahehayꞌi poꞌog̃ hamo iwȳwo hawyi saꞌawyꞌi wuat ewy kuapꞌi poꞌog̃ hamo watoig̃neꞌen iwȳwo. Eweimowempāp o 1 Kurintiu 5:6, 11. Miꞌi hawyi eiwoꞌoꞌehay o apoꞌe hap etiat.

• Watopag̃ mani pyre mani puk pe hawyi toimorem yne mani puk wo. Miꞌi hap ewy ahehay tuereto te mīt iꞌaparap poityꞌi rakat wȳwo pote. Aikotā̃ me asom miꞌi hap congregação piaria moꞌakag̃ꞌia kuap.

Karāmpe mīt iꞌaparap poityꞌi rakat taꞌatuputsit congregação pyi hawyi aikotā̃ me asom miꞌi hap puo pyi Ieuwa timoherep hampȳk kahato rakat hap iꞌewȳte woꞌopotkyꞌe kahato hat.

 WATUWEMŪꞌE RAꞌYN

Watiꞌaparap poityꞌi Ieuwa pe pote toiwāure kuap maꞌato toiwāure hamo waku paa watoꞌe aipyꞌa pyi iꞌewȳte watoiat aiminug̃ saꞌag̃ koꞌi ȳt watunug̃ꞌi poꞌog̃ hamo.

Hotꞌokꞌe te asom

• Kat pote asom waku wahenoi yne Ieuwa pe aimiꞌaparap etiat.

• Kat hap koꞌi asom waku watunug̃ Ieuwa tiwāure aimiꞌaparap koꞌi hamo.

• Watiꞌaparap poityꞌi Ieuwa pe pote. Kat pote asom waku wahentup mowȳro hap akag̃ koꞌi pe.