WEMŪꞌE HAP 50
Aikotā̃ me asom eiwoꞌomowepīt kuap eꞌaito eharyꞌi emempytꞌīn wȳwo. — Parte 2
Mempytꞌīn Ieuwa mij̃um ȳwot hawyi ny piat. Miꞌi pote toikyꞌesat taꞌatueropat kahato taꞌatumempytꞌīn hap. Miꞌi hamo Ieuwa tum tehay pe woꞌonãpin hap koꞌi ȳwot ny powȳro hamo iꞌewȳte Tupana woꞌonãpin hap hoꞌopowȳro kuap mempytꞌīn tukupteꞌen wentup ewy yn taꞌatuwepīt hap wȳwo hamo.
1. Kat e asom Ieuwa hoꞌonãpin ȳwot hawyi ny.
Ieuwa tikyꞌesat ȳwot hawyi ny taꞌatumempytꞌīn taꞌatukyꞌe kahato hap iꞌewȳte toꞌowȳwo kahato taꞌatumempytꞌīn wȳwo tukupteꞌen hap. Iꞌewȳte Ieuwa tikyꞌesat ȳwot hawyi ny taꞌatukawiano taꞌatumempytꞌīn hap hawyi taꞌatuhoꞌonãpin Tupana Ehay puo pyi hap. (Porowepiu 1:8) Ieuwa toꞌe ȳwot hawyi ny pe — Ȳt eweiwāure teiꞌo uhehay ehepiat einãpin hap. Waku eweiꞌatumūꞌe kahato eimempytꞌīn e. (Etimowempāp o Ewesu 6:4.) Karāmpe ȳwot hawyi ny taꞌatunug̃ aikotā̃ Ieuwa woꞌonãpin hap koꞌi ewy pote Ieuwa iwepīt kahato. Iꞌewȳte taꞌatuerohik kahato taꞌatumempytꞌīn ȳt taꞌatuj̃umꞌi iraniaꞌīn heropat taꞌatumempytꞌin hamo pote Ieuwa iwepīt kahato wy.
2. Kat e asom Ieuwa hoꞌonãpin mempytꞌīn.
Ieuwa toꞌe mempytꞌīn me — Eꞌywot ety montypot hatno o ereig̃neꞌen e. (Etimowempāp o Korosi 3:20.) Karāmpe mempytꞌīn tiꞌatumontypot taꞌatuty taꞌatuꞌȳwot pote taꞌatumowepīt kahato Ieuwa. Iꞌewȳte taꞌatuhoꞌomowepīt kahato taꞌatuty hawyi taꞌatuꞌȳwot. (Porowepiu 23:22-25) Karāmpe Iesui hirokat re pykai maꞌato iminug̃ koꞌi puo pyi aimuꞌe kahato miꞌi hampȳk kahato rakat pykai maꞌato toiꞌatumontypot toꞌȳwot hawyi toty miꞌiria iꞌaparap haria pykai. — Iruka 2:51, 52.
3. Aikotā̃ me asom seꞌaito seharyꞌi mempytꞌīn tukupteꞌen kuap poꞌog̃ Tupana wyꞌok wo.
Emempytꞌīn naꞌyn pote etikyꞌesat kahato emempytꞌīn tikyꞌe Ieuwa hap aikotā̃ etikyꞌe kahato Ieuwa hap ewy. Maꞌato aikotā̃ me asom miꞌi hap etunug̃ kuap. Etunug̃ kuap aikotā̃ Tupana Ehay henoi hap ewy Waku eweiꞌatumūꞌe ro mesūwat uimij̃um einãpin uhepiat hap ete. Eimempytꞌīn yne eꞌāt pe waku hupi teꞌi hupi teꞌi ewehenoi toꞌyat piat ieig̃neꞌen apyk piat turān e. (Teturonamia 6:7) Pyno eimempytꞌīn ete hotꞌokꞌe tuereto hamo waku ehenoi hupi teꞌi hupi teꞌi etiꞌatumūꞌe. Miꞌi pote mesūwat Tupana Ehay piat e hap aimūꞌe terān waku etikat kahato aikotā̃ me waku ehenoi Ieuwa etiat emempytꞌīn piat hamo hap. Miꞌi pote waku wuatꞌi semana tuereto ewetemūꞌe eimempytꞌīn wȳwo Tupana Ehay etiat. Sio eimempytꞌīn ite pykai maꞌato waku eremūꞌe Tupana Ehay ete wuatꞌi semana eweran tuereto.
EREWANENTUP O ETIKUAP POꞌOG̃ HAMO
Etikuap hamo ȳwot hawyi ny iꞌewȳte mempytꞌīn piat mowȳro hap tukupteꞌen taꞌatuwepīt hap wȳwo hamo hap iꞌewȳte teꞌeruwekawiano kuap hamo hap.
4. Woꞌokyꞌe hap wȳwo o etiꞌatumūꞌe emempytꞌīn
Niatpo kahato mempytꞌīn mūꞌe hap. Aikotā̃ me asom Tupana Ehay hoꞌopowȳro kuap ȳwot hawyi ny. Eweimowempāp o Tiaku 1:19, 20. Miꞌi hawyi apoꞌe hap koꞌi ete eiwoꞌoꞌehay.
-
Aikotā̃ me asom ȳwot hawyi ny taꞌatumoherep kuap woꞌokyꞌe hap karāmpe taꞌatuehay taꞌatumempytꞌīn wȳwo turān.
-
Kat pote asom ȳt nakuꞌi ȳwot hawyi ny taꞌatumohampȳk taꞌatumempytꞌīn taꞌatupyꞌahak turān. a
5. Etiꞌatukawiano o emempytꞌīn
Etiꞌatukawiano emempytꞌīn hamo waku ehenoi iꞌatuepe woꞌomontypot hap wȳwo sewaire hap etiat eremunti pykai. Ewetehaꞌat pyno VÍDEO kape. Miꞌi hawyi apoꞌe hap koꞌi ete eiwoꞌoꞌehay.
-
Kat pote asom niatpo ȳwot hawyi ny pe taꞌatuhenoi taꞌatumempytꞌīn me sewaire hap etiat hamo.
-
Kat koꞌi hap asom ȳwot hawyi ny powȳro kuap taꞌatuhenoi sewaire hap etiat taꞌatumempytꞌīn piat hamo.
Aikotā̃ Tupana Ehay henoi hap ewy ti raꞌyn sēse tuwemoherep poꞌog̃ poꞌog̃ mesūwarote mītꞌīn saꞌag̃ nug̃ haria. Eweimowempāp o 2 Timoteu 3:1, 13. Miꞌi hawyi eiwoꞌoꞌehay o apoꞌe hap etiat.
-
Hag̃a hit 13 henoi mītꞌīn woꞌomaꞌatꞌi maꞌatꞌi haria etiat. Miꞌi haria sēse hoꞌokup hirokaria sisīt haria. Kat pote asom waku ȳwot hawyi ny taꞌatuhenoi taꞌatumempytꞌīn me sewaire hap etiat iꞌewȳte taꞌatuhoꞌomūꞌe taꞌatumempytꞌīn aikotā̃ me teꞌerekawiano kuap taꞌatusisīt terān haria pupi hamo hap ete.
Etikuap taꞌyn apo.
Ieuwa Ehay Enoi Haria wat toig̃ kahato popera koꞌi ȳwot hawyi ny powȳro taꞌatuhenoi taꞌatumempytꞌīn me sewaire hap etiat hamo iꞌewȳte taꞌatuhoꞌomūꞌe taꞌatumempytꞌīn aikotā̃ me teꞌerekawiano kuap taꞌatusisīt haria pupi hamo hap ete. Kotā̃ e hap.
-
Etiꞌatukawiano o emempytꞌīn (vídeo)
-
Como falar com seus filhos sobre sexo (Despertai!, n.º 5 de 2016)
6. Etimontypot o eꞌȳwot hawyi ety
Hirokaria makuptiaria hawyi kurum iwasuria taꞌatumoherep kuap taꞌatuꞌȳwot taꞌatuty montypot hap iꞌatuehay iꞌatuwȳwo woꞌomontypot hap puo pyi. Ewetehaꞌat pyno VÍDEO kape. Miꞌi hawyi apoꞌe hap koꞌi ete eiwoꞌoꞌehay.
-
Kat pote asom waku makuptiaria kurum iwasuria timoherep taꞌatuꞌȳwot taꞌatuty montypot hap toꞌoꞌehay turān.
-
Aikotā̃ me asom makuptiaria hawyi kurum iwasuria timoherep kuap taꞌatumontypot taꞌatuꞌȳwot taꞌatuty toꞌoꞌehay turān hap.
Eweimowempāp o Porowepiu 1:8. Miꞌi hawyi eiwoꞌoꞌehay o apoꞌe hap etiat.
-
Karāmpe ȳwot ny tinãpin taꞌatumempytꞌīn kat nug̃ hamo pote. Miꞌi turān kat asom waku mempyt tunug̃.
7. Eweimontypot o Ieuwa eiꞌyat piaria wȳwo
Wuatꞌi semana tuereto Ieuwa Ehay Enoi haria teꞌeruwaꞌatunug̃ taꞌatuꞌeharyꞌi taꞌatumempytꞌīn wȳwo toꞌowȳwo teꞌeremūꞌe Tupana Ehay etiat hamo. Miꞌi hap set Adoração em Família e. Aikotā̃ me asom miꞌi hap taꞌatunug̃. Ewetehaꞌat pyno VÍDEO kape. Miꞌi hawyi apoꞌe hap koꞌi ete eiwoꞌoꞌehay.
-
Aikotā̃ me asom ȳwot ny hawyi mempytꞌīn teꞌeruwaꞌatunug̃ wuatꞌi semana teꞌeremūꞌe Tupana Ehay etiat hamo.
-
Aikotā̃ me asom ȳwot hawyi ny taꞌatunug̃ kuap Adoração em Família taꞌatumempytꞌīn powȳro hamo iꞌewȳte torānia iꞌatuwepīt hamo. — Ewetehaꞌat pyno mesūwat wemūꞌe hap piat saꞌawyꞌi wuat iaꞌag̃kap kape.
-
Epe kat pote asom asuwe niatpo wuatꞌi semana upi etunug̃ tuereto Adoração em Família hamo.
Nimo Ieuwa tikyꞌesat Isareu ywaniaria piat taꞌatueꞌaito taꞌatueharyꞌi taꞌatumempytꞌīn wȳwo toꞌoꞌehay tuereto Tupana Ehay hap etiat hap. Eweimowempāp o Teturonamia 6:6, 7. Miꞌi hawyi eiwoꞌoꞌehay o apoꞌe hap etiat.
-
Aikotā̃ me asom mesūwat woꞌonãpin hap ewy etunug̃ kuap.
Aikotā̃ aikotā̃ me neꞌi ewetunug̃ kuap Adoração em Família. Kotā̃ e hap.
-
Ewetemūꞌe kuap aiwaꞌatunug̃ hap totiat mienoi wuat koꞌi hap etiat.
-
Eweimowempāp kuap Tupana Ehay miꞌi hawyi eiwoꞌoꞌehay kuap miꞌi hap etiat.
-
Eimempytꞌīn hirokaria te pote erehaꞌat kuap site jw.org piat Hirokaria piat nuat e hap kape hawyi etiꞌabaixaru sio etiꞌimprimiru kuap ewetemūꞌe hamo.
-
Eimempytꞌīn makuptia sio kurum iwasuria raꞌyn pote etiꞌaira kuap site jw.org piat Makuptiaria hawyi kurum iwasuria piat nuat e hap hawyi eiwoꞌoꞌehay kuap miꞌi hap etiat.
-
Eweiꞌaira kuap Tupana Ehay piat história ewehaꞌag̃ iꞌatuewy hamo.
-
Ewetehaꞌat kuap wentup vídeo site jw.org piat miꞌi hawyi eiwoꞌoꞌehay kuap vídeo e hap etiat.
IRANIAꞌĪN TEꞌEROꞌE Niatpo kahato Tupana Ehay etiat nag̃nia iꞌewȳte hirokaria tikuap hamo iꞌatuꞌe pote.
-
Kat ere aten miotā̃ e haria pe.
WATUWEMŪꞌE RAꞌYN
Ieuwa tikyꞌesat (1) torānia ȳwot ny taꞌatukyꞌe taꞌatumempytꞌīn taꞌatuhoꞌomūꞌe iꞌewȳte taꞌatuhoꞌokawiano hap (2) iꞌewȳte mempytꞌīn taꞌatuty taꞌatuꞌȳwot montypot hap (3) iꞌewȳte taꞌatumontypot toꞌowȳwo Tupana hap.
Hotꞌokꞌe te asom
-
Aikotā̃ hap puo pyi asom ȳwot hawyi ny taꞌatuhoꞌomūꞌe kuap taꞌatumempytꞌīn iꞌewȳte taꞌatuhoꞌokawiano kuap.
-
Aikotā̃ hap puo pyi asom mempytꞌīn timoherep kuap taꞌatumontypot taꞌatuꞌȳwot taꞌatuty hap.
-
Kat pote asom waku ȳwot ny hawyi mempytꞌīn wuatꞌi semana tuereto teꞌeruwaꞌatunug̃ Adoração em Família nug̃ hamo.
ETIKUAP TERĀN POꞌOG̃ POTE
Kat hap aru emempytꞌīn powȳro iꞌatutag̃ weꞌeg̃ hap wȳwo hamo.
Seis woꞌonãpin mempytꞌīn piat mūꞌe hamo hap (Despertai!, n.º 2 de 2019)
Etikuap hamo Tupana Ehay piat woꞌonãpin ȳwot ny ipōro rakaria eropat hap etiat hamo hap.
Kat e asom Tupana Ehay henoi ipōro rakat ȳwot ny eropat hamo hap etiat. (Site jw.org piat)
Etikuap hamo wentup ok ȳwot ȳt tikuapꞌi aikotā̃ me toiꞌatuerohik kuap tomempytꞌīn hap. Maꞌato toikuap hawyi toiꞌatuerohik kuap kahato raꞌyn.
Ieuwa urumūꞌe aikotā̃ me uruiꞌatumotag̃ kuap urumempytꞌīn hap (5:58)
Etikuap hamo aikotā̃ me ȳwot tomempyt wyꞌok wo poꞌog̃ toig̃neꞌen kuap hap.
a Miwan hit. Tupana Ehay pe woꞌomohampȳk e hap woꞌomūꞌe woꞌonãpin woꞌoꞌapiheg̃ hawiat pe. Maꞌato ȳt karāmpeꞌi woꞌomikyryꞌi hap neig̃ ahyk ahyk e hap wȳwo hap. — Porowepiu 4:1.
