WEMŪꞌE HAP 11
Aikotā̃ meig̃ Tupana Ehay aipowȳro kuap.
1. Kat pote asom Tupana piat ainãpin hap waku.
Aikotā̃ meig̃ Tupana Ehay aipowȳro kuap watikawiano hamo aheig̃neꞌen hap iꞌewȳte iraniaꞌīn ieig̃neꞌen hap.— SAUMU 36:9.
Kat pote Ainug̃ Hat ri poꞌog̃ iweꞌeg̃ aikai. Miꞌi aikotā̃ ȳwot woꞌopotkyꞌe kahato Hat ewy. Miꞌi pote aheropat kahato. Aiwepīt sese hap ti Tupana kaipyi yn tūt kuap. (Ieremia 10:23) Hirokat hit tikyꞌesat kahato toꞌȳwot toty piat topowȳro hap. Miꞌi hap ewy aitoria watikyꞌesat kahato Tupana piat aipowȳro hap. (Isaia 48:17, 18) Aipowȳro terān haype ti tutum tehay.—Etimowempāp o 2 Timoteu 3:16.
Watihaymohey Ieuwa woꞌonãpin hap koꞌi pote aiwepīt poꞌog̃ hamo watukupteꞌen iꞌewȳte watikuap hamo kat waku watunug̃ aiwepīt wuatꞌi eꞌāt pe hamo hap etiat wy. Tupana ti rat Ainug̃ Hat miꞌi pote waku watihaymohey yne iwoꞌonãpin hap koꞌi.—Etimowempāp o Saumu 19:7, 11; Iesui Aru E Hap 4:11.
2. Aikotā̃ meig̃ Tupana Ehay aipowȳro kuap waku rakat aira hamo.
Tupana woꞌonãpin hap koꞌi puo pyi Tupana Ehay aipowȳro kuap kahato. Kotā̃ e hap Tupana ihay tehay puo pyi waku rakat yn o etunug̃ e. Asuwe ȳt etunug̃ neiꞌo wakuꞌi rakat e. (Teturonamia 22:8) Asuwe miotā̃ eꞌi. Kat eꞌi pote waku watuwemūꞌe poꞌog̃ iwoꞌonãpin hap koꞌi ete hawyi watikuap hamo imikyꞌesat koꞌi hawyi watiꞌaira hamo waku rakat. (Porowepiu 2:10-12) Kotā̃ e hap watikuap Tupana Ehay puo pyi Tupana tum aheig̃neꞌen hap. Miꞌi hap kape watenentup pote aiwyriaꞌīn weig̃neꞌen hap watikawiano hamo iꞌewȳte aheig̃neꞌen hap watikawiano hamo wy. Miꞌi hap watunug̃ aipotpap turān ahewyry turān iꞌewȳte aiꞌyat pe turān wy.—Etimowempāp o Iesui Potmūꞌeria 17:28.
3. Karānia asom Tupana woꞌonãpin hap torānia kawiat poꞌog̃ waku rakat.
Iesui henoi tȳpy e. Saꞌawyꞌi wuat aimūꞌe watukupteꞌen waku poꞌog̃ hamo watikuap watikyꞌe watimontypot Tupana pote yn. Miꞌi hap kape waku watenentup watiꞌaira aimiꞌaira hap koꞌi eꞌyj̃an mete. (Porowepiu 3:6) Miꞌitā̃ watunug̃ mote Tupana wyꞌok wo hamo watoig̃neꞌen aiwepīt sese hamo hawyi wuatꞌi eꞌāt pe watoig̃neꞌen hamuat.—Etimowempāp o Mateu 22:36-38.
Typuat Tupana woꞌonãpin hap poꞌog̃ waku rakat aipowȳro woꞌowese hap wȳwo watukupteꞌen mītꞌīn wȳwo hamo hap. (1 Kurintiu 13:4-7) Watiꞌatukyꞌe mītꞌīn pote watunug̃ iꞌatuꞌupi waku rakat aikotā̃ Tupana topotkyꞌe hap ewy.—Etimowempāp o Mateu 7:12; 22:39, 40.
4. Aikotā̃ meig̃ Tupana Ehay aipowȳro kuap.
Tehay puo pyi Tupana tiꞌatumūꞌe seꞌaitoꞌīn seharyꞌīn iꞌewȳte mempytꞌīn tukupteꞌen toꞌokyꞌe hap wȳwo hamo iꞌewȳte tukupteꞌen wentup ewy yn hamo. (Korosi 3:12-14) Tupana tikyꞌesatꞌi woꞌomenaru haria toꞌoꞌatoiat hap maꞌato wuatꞌi eꞌāt pe tukupteꞌen toꞌowȳwo hap toikyꞌesat. Miꞌitā̃ mote woꞌomenaru haria teꞌeruwekawiano hamo iꞌewȳte iꞌatumempytꞌīn wy.—Etimowempāp o Ienesi 2:24.
Tupana e hap ewy watunug̃ mote watuwekawiano kahato hamo kat koꞌi kat koꞌi pupi. Kotā̃ e hap. Tupana Ehay aimūꞌe ȳt nakuꞌi watopotmaꞌat wakuꞌi seroꞌokꞌawatoꞌe iꞌewȳte ȳt nakuꞌi iperup rakatno watoig̃neꞌen. Tupana e hap ewy watunug̃ mote aipuenti waku kahato hamo mītꞌīn hawyi wakuaria karaiwaria aikyꞌesat hamo taꞌatupotpap taꞌatuwȳwuat hamo. (Porowepiu 10:4, 26; Epereu 13:18) Tupana Ehay henoi Tupana wȳwuat aiwehik hap poꞌog̃ waku dinheiro koꞌi kai e. Miꞌi pote toꞌe toig̃ aimiꞌu ahesokpe aikosap hamuat miꞌi pote waku raꞌyn watoꞌe.—Etimowempāp o Mateu 6:24, 25, 33; 1 Timoteu 6:8-10.
Tupana Ehay e hap ewy watoig̃neꞌen mote watikawiano hamo aheig̃neꞌen hap. (Porowepiu 14:30; 22:24, 25) Kotā̃ e hap Tupana Ehay ȳt toꞌeꞌi ȳt eremahyꞌu teiꞌo eꞌi maꞌato ainãpin ȳt nakuꞌi watemahyꞌu aimopẽꞌẽ kahato hap kape. Tupana woꞌonãpin hap wemahyꞌu hap etiat aipowȳro kahato ȳt aiꞌahūꞌi hamo hawyi watikawiano hamo aheig̃neꞌen hap. (1 Timoteu 3:8; Porowepiu 23:20; 1 Kurintiu 6:10) Iꞌewȳte Tupana Ehay aipowȳro waku rakat yn kape watenentup hamo. Waku kahato Tupana piat ainãpin hap ewy watunug̃ mote. (Saumu 119:97-100) Miꞌitā̃ hap Tupana Mohey Haria tunug̃ kat pote taꞌatumontypot terān Ieuwa.—Etimowempāp o Mateu 5:14-16.
Etimowempāp kuap poꞌog̃
UWEꞌĪN URUTORIA
Etipoꞌoro o — Aremūꞌe terān e hap
Etikuap poꞌog̃ Tupana Ehay etiat hawyi Ieuwa Ehay Enoi Haria etiat.
