WEMŪꞌE HAP 2
Kat hag̃ waku watikuap Tupana etiat.
1. Kat pote asom waku watimontypot Tupana.
Kat pote miꞌi Torānia Saꞌawynug̃ Hat iꞌewȳte miꞌi Aheig̃neꞌen J̃um Hat wy miꞌi pote waku watimontypot miꞌi. Ȳt uweꞌi Tupana Nug̃. Wuatꞌi Eꞌāt Piat Ieig̃neꞌen Hat hawyi wuatꞌi eꞌāt pe hamo ti raꞌyn toig̃neꞌen miꞌi. (Saumu 90:2) Tehay puo pyi tohenoi tehay wakuat koꞌi ahepe.— Maku 1:14, 15.—Etimowempāp o Iesui Aru E Hap 4:11.
2. Aikotā̃ asom Tupana.
Tupana ti maꞌãu neꞌi. Atipy pe toig̃neꞌen. Ȳt wataꞌakasa kuapꞌi hewowi. (Iuwãu 1:18; 4:24) Maꞌato watehaꞌat kuap iminug̃ koꞌi kape hawyi watikuap poꞌog̃ hamo hetiat. Kotā̃ e hap tutunug̃ torānia ywa koꞌi hawyi mohyt koꞌi. Miꞌi koꞌi puo pyi toimoherep aikyꞌe kahato hap iꞌewȳte toweꞌeg̃ kahato hap wy. Karāmpe watehaꞌat āt waikiruria kape hawyi mesūwat yi kape turān watikuap miꞌi Hesaika Kahato Rakat toig̃neꞌen hap.—Etimowempāp o Humanu 1:20.
Tupana Ehay mowempāp hap puo pyi watikuap poꞌog̃ Tupana etiat. Miꞌi hawyi watikuap imikyꞌesat koꞌi hap hawyi imikyꞌesat koꞌiꞌi hap iꞌewȳte tohenoi aikotā̃ miꞌi hap.—Etimowempāp o Saumu 103:7-10.
3. Het asom Tupana.
Miꞌitā̃. Iesui toꞌe Uruꞌȳwot atipy piat eset ri poꞌog̃ ikahu torānia kai e. (Mateu 6:9) Mesūwat yi oktān mītꞌīn taꞌatuhuꞌat Tupana set taꞌatupusu puo. Miꞌi pote português suꞌat haria Jeová iꞌatuꞌe hawyi satere pusu puo Ieuwa iꞌatuꞌe maꞌato Tupana e hap Urukaꞌiwat e hap ȳt Tupana set seseꞌi.—Etimowempāp o Esutu 6:6, 7.
Waku kahato wahuꞌat Ieuwa set. Karāmpe Iesui toig̃neꞌen mesūwat yi tote turān tohenoi kahato toꞌȳwot set etiat mītꞌīn me. Karāmpe ihaig̃niaꞌīn tiwan Tupana Ehay turān taꞌatupehik het 7 miu wo maꞌato miꞌi hawyi iraniaꞌīn Ieuwa set taꞌatuhep Tupana Ehay pyi miꞌi hawyi taꞌatuwan Ieuwa set tote Aikaꞌiwat sio Tupana iꞌatuꞌe hap.—Etimowempāp o Iuwãu 12:28.
Erehaꞌat o pyno video Het asom Tupana e hap kape
4. Tenentup asom Tupana mītꞌīn kape.
Tupana tenentup kahato mītꞌīn kape aikotā̃ ȳwot woꞌopotkyꞌe hat tenentup kahato tomempyt kape hap ewy.
Korā̃ mītꞌīn hoꞌopot kahato miꞌi pote iraniaꞌīn teꞌerenentup hawe katꞌi Tupana tunug̃ ahoꞌopot turān tehaꞌat sese yn sio hoꞌopot hap puo pyi Tupana uhaꞌag̃ kahato iꞌatuꞌe maꞌato pȳwo peꞌi miotā̃ iꞌatuꞌe.—Etimowempāp o Tiaku 1:13.
Torānia pe ti Tupana tum iꞌaira hap miꞌi pote waku kahato watiꞌaira aiwewi. (Iusue 24:15) Maꞌato iraniaꞌīn iꞌaira waku rakat nug̃ hapꞌi miꞌi pote taꞌatuhoꞌopot kahato iꞌewȳte iraniaꞌīn taꞌatuhoꞌomosoꞌopot kahato wy. Miꞌi pote Ieuwa iꞌarōt kahato topyhuꞌat iꞌatumiꞌaira koꞌi upi.—Etimowempāp o Ienesi 6:5, 6.
Ieuwa tuwanentup kahato ewowi pykai. Toikyꞌesat kahato ewepīt sese hap wȳwo ereig̃neꞌen hap miꞌi pote hoꞌopot hap koꞌi sio mītꞌīn wakuariaꞌi nug̃ haria toiꞌatumomã yne hamuat. Meig̃muewuat saꞌag̃ koꞌi wȳwo toimomã ite turān mītꞌīn hoꞌopot pe te hamo tukupteꞌen. Watikuap hamo wemūꞌe hap 8 puo pyi kat pote asom Tupana ȳt timomã ite hoꞌopot hap koꞌi wȳwo e hap etiat.—Etimowempāp o 2 Peteru 2:9; 3:7, 13.
5. Kat asom waku watunug̃ Tupana wyꞌok wo watoig̃neꞌen hamo.
Waku wahentup kahato Tupana kape. Miꞌi aiwyꞌok wo terān kahato toig̃neꞌen miꞌi pote toikuap kahato terān ahetiat aiwanentup hap koꞌi. (Saumu 65:2; 145:18) Iꞌewȳte waku watunug̃ imikyꞌesat koꞌi ewy maꞌato asuwe miꞌi hap niatpo saꞌag̃ kat pote iꞌaparap haria aito. Miꞌitā̃ pykai iwyꞌok wo kuap watoig̃neꞌen kat pote aimiꞌaparap koꞌi toiwāure tuereto.—Etimowempāp o Saumu 103:12-14; Tiaku 4:8.
Waku watikyꞌe Ieuwa poꞌog̃ torānia kai. (Maku 12:30) Maꞌato aikotā̃ meig̃ etimoherep kuap etikyꞌe Tupana hap. Eremūꞌe Tupana Ehay hap puo pyi iꞌewȳte imikyꞌesat koꞌi etunug̃ hap koꞌi puo pyi wy. Miꞌi hawyi Tupana wyꞌok wo poꞌog̃ poꞌog̃ hamo ereig̃neꞌen.—Etimowempāp o 1 Timoteu 2:4; 1 Iuwãu 5:3.
