WEMŪꞌE HAP 4
Uwe asom Iesui.
1. Aj̃umpeig̃ Iesui toig̃neꞌen mesūwat yi kape tūt hap eꞌyj̃an mete.
Kat pote asom torānia toig̃neꞌen terān Iesui wȳwo.— MATEU 11:29; MAKU 10:13-16.
Iesui tūt mesūwat yi kape hap eꞌyj̃an mete toig̃neꞌen atipy pe anjo wo. Tupana toig̃neꞌen atipy pe tuweran miꞌi hawyi saꞌawyꞌi tutunug̃ Iesui ti. (Iuwãu 8:23) Miꞌi hawyi Iesui tipowȳro toꞌȳwot kat koꞌi kat koꞌi nug̃ hap ete. Miꞌi pote Tupana Ehay toꞌe Tupana Saꞌyru wentup ok takat yn e. (Iuwãu 1:14) Tupana Ehay ete Iesui hoꞌomūꞌe kahato mītꞌīn. Miꞌi pote Tupana Ehay toꞌe Iesui pe mekewat Sehay e hap het rakat e.—Etimowempāp o Porowepiu 8:22, 23, 30; Korosi 1:15, 16.
2. Kat pote asom Iesui tūt mesūwat yi kape.
Iesui tūt mesūwat yi kape (1) toiꞌatumūꞌe torānia mītꞌīn pȳwuat e hap Tupana etiat hamo (2) iꞌewȳte toimoherep terān aikotā̃ me waku watunug̃ kuap Tupana mikyꞌesat hap aikotā̃ niatpo koꞌi pykai hap (3) iꞌewȳte tutum toweig̃neꞌen hap saꞌup mītꞌīn kyiꞌat Tupana wuatnuat hamo. Maꞌato aikotā̃ me asom Iesui tūt mesūwat yi kape. Tupana tipoꞌoro Iesui tuwemoherep Maria puo pyi hamo. Miꞌi makuptia te pykai maꞌato Tupana paꞌãu puo pyi imempytꞌa. — Iruka 1:30-35.—Etimowempāp o Mateu 20:28.
3. Kat hag̃ aipyhik.
Iꞌaparap hap g̃uꞌuro hap aipyhik hap ewy. Karāmpe Tupana tunug̃ Atãu turān Tupana ȳt tikyꞌesatꞌi mītꞌīn pōro hap neig̃ iꞌatukuꞌuro hap wy. Maꞌato Tupana tikyꞌesat Atãu weig̃neꞌen hap wuatꞌi eꞌāt piat hap iꞌewȳte tomontypot hap wy. Maꞌato Atãu toig̃neꞌen Tupana mikyꞌesat e hap ewyꞌi. (Ienesi 2:16, 17; 5:5) Torānia ti watõꞌẽ Atãu hawyi Ewa kaipyi. Miꞌi pote ti torānia aitoria iꞌaparap haria iꞌewȳte aipōro hawyi aikuꞌuro wy. Miꞌi pote g̃uꞌuro hap iꞌaparap hap aipyhik hap ewy. Meig̃muewuat koꞌi ete pyi watikyꞌesat kahato aherõtem hap. Kotā̃ e hap seroꞌokꞌe haria tāt wentup ok mempyt hawyi taꞌatuhenoi ity iꞌȳwot pe — Atāt emempyt maꞌato ateraꞌaipok hamo emempyt ewehoꞌoknug̃ miꞌirania pote yn e. Miꞌi hawyi ity iꞌȳwot hoꞌoknug̃ hawyi iꞌatumempyt seroꞌokꞌe hat teꞌeraꞌaipok iraꞌyn.— Esutu 21:29, 30.—Etimowempāp o Humanu 5:12; 6:23.
Miꞌi hap ewy. Uwe asom hoꞌoknug̃ kuap aimiꞌaparap koꞌi upi. Iꞌaparapꞌi rakat yn hoꞌoknug̃ kuap. Miꞌi ti hampȳk kahato rakat. Miꞌi Iesui.—Etimowempāp o Saumu 49:7-9.
4. Kat pote asom Iesui ikuꞌuro.
Iesui ikuꞌuro kat pote toiꞌatukyꞌe kahato mītꞌīn haype. Kat hinꞌi tutunug̃ saꞌag̃ pykai. Miꞌi hampȳk kahato rakat pykai maꞌato ikuꞌuro mītꞌīn upi. Maꞌato toimontypot kahato toꞌȳwot miꞌi pote ikuꞌuro aiminug̃ saꞌag̃ koꞌi soꞌoknug̃ hamo. Iesui kuꞌuro hap puo pyi Tupana tiwāure kuap yne mītꞌīn miꞌaparap koꞌi. Karāmpe toipoꞌoro tosaꞌyru ikuꞌuro aheupi hamo miꞌi hap puo pyi toimoherep aikyꞌe kahato hap.—Etimowempāp o Iuwãu 3:16; Humanu 5:18, 19.
Erehaꞌat o pyno video Kat pote asom Iesui ikuꞌuro e hap kape
5. Kat asom mio Iesui tunug̃.
Korā̃ Iesui toig̃neꞌen raꞌyn Morekuatno atipy pe. Karāmpe Iesui toig̃neꞌen mesūwat yi tote turān toiꞌatuhymūt ikuꞌuro rakaria iꞌewȳte toiꞌatumoehaig̃te iꞌahū rakaria hawyi hoꞌopot rakaria toiꞌatupowȳro. (Mateu 15:30, 31; Iuwãu 5:28) Iesui ikuꞌuro hawyi Tupana timoehaig̃te raꞌyn g̃uꞌuro pyi toig̃neꞌen atipy pe hamo. (1 Kurintiu 6:14) Itote apykꞌe toꞌȳwot po sese kai miꞌi hawyi tohekatup toꞌȳwot piat En Morekuatno raꞌyn e hap. (Epereu 10:12, 13) Korā̃ mītꞌīn tunug̃ Iesui e hap ewy iꞌewȳte taꞌatuhoꞌomūꞌe iraniaꞌīn Iesui Morekuatno hap etiat. Iesui toig̃neꞌen mesūwat yi tote turān tutunug̃ kahato wakuat koꞌi mītꞌīn upi miꞌi hap toimoherep — Kotā̃ aru poꞌog̃ atunug̃ ehupi e hap.—Etimowempāp o Tanieu 7:13, 14; Mateu 24:14.
Mesup tān epote ti aru Iesui timomã yne hamuat raꞌyn wakuariaꞌi miꞌi hawyi uweꞌi poꞌog̃ hamo hoꞌopot. Maꞌato Iesui Mohey Haria iꞌewȳte imontypot haria tukupteꞌen hamuat wuatꞌi eꞌāt pe mesūwat yi Nusuken note.—Etimowempāp o Saumu 37:9-11.
