WEMŪꞌE HAP 3
Watimohey kuap yne asom Tupana Ehay ete.
1. Uwe wanentup hap koꞌi asom Tupana Ehay pe.
Tupana Ehay pe ti Ieuwa wanentup hap koꞌi yn. Tupana Ehay pe ti watipuenti sehay wakuat rakaria. Kotā̃ e mesūwat yi tote watukupteꞌen kuap hamuat wuatꞌi eꞌāt pe hap. (Saumu 37:29) Tupana Ehay pe ti toig̃ 66 popera ahyt. Tomohey haria ti Tupana tiꞌatuꞌaira 40 ok takaria ihaig̃niaꞌīn tehay wan hamo. Kotā̃ e hap nimo kahato raꞌyn Muisei tiwan popera Ienesi Esutu hawyi Irewitiku hawyi Numeru iꞌewȳte Teturonamia. Miꞌi hawyi nimo kahato raꞌyn wy Iuwãu tiwan Iesui Aru E Hap. Maꞌato aikotā̃ me asom Tupana Ehay wan haria ikuap Tupana wanentup hap koꞌi. Taꞌatukuap hamo ti Tupana ihay iꞌatuwȳwo topaꞌãu puo pyi. (2 Samueu 23:2) Miꞌi pote ti Tupana Ehay ȳt mītꞌīn wanentup hap koꞌi kaipyiꞌi tūt. Maꞌato Tupana wanentup hap koꞌi kaipyi yn.—Etimowempāp o 2 Timoteu 3:16; 2 Peteru 1:20, 21.
Erehaꞌat o pyno video Uwe wanentup hap koꞌi asom Tupana Ehay pe e hap kape
2. Watimohey kuap yne asom Tupana Ehay ete.
Miꞌitā̃. Watimohey kuap yne ihay ete. Kat pote tohenoi yne aikotā̃ hamuat koꞌi hap koꞌi etiat. Iꞌe hap koꞌi ewy tuwemoherep yne. Aikotā̃ hamuat hap ȳt uweꞌi ikuap. (Iusue 23:14) Maꞌato Tupana sese yn ikuap.—Etimowempāp o Isaia 42:9; 46:10.
Tupana Ehay tuweupi kahato iraniaꞌīn popera koꞌi kai. Miꞌi pote mesūwat yi oktān toig̃ Tupana Ehay. Miꞌi tupono ti 450 pusu puo toig̃ Tupana Ehay. Tupana Ehay nimuat kahato raꞌyn pykai maꞌato tohenoi hampȳk kahato ciência etiat koꞌi. Tupana Ehay wan haria ȳt toꞌoꞌyatypeꞌi tukupteꞌen pykai maꞌato taꞌatuwan Tupana Ehay wentup awy yn. * Iꞌewȳte Tupana Ehay aimūꞌe woꞌokyꞌe hap etiat. Miꞌi pote Tupana Ehay puo pyi watikuap Tupana aikyꞌe kahato hap iꞌewȳte Tupana Ehay hoꞌopowȳro kuap mītꞌīn waku puo tukupteꞌen hamo. Miꞌi hap koꞌi puo pyi mītꞌīn tipȳwo kahato Tupana Ehay ete.—Etimowempāp o 1 Tesaronika 2:13.
Erehaꞌat o pyno video Watimohey kuap yne asom Tupana Ehay ete e hap kape
3. Kat koꞌi etiag̃ Tupana Ehay henoi.
Tupana Ehay henoi sehay wakuat koꞌi etiat ahepiat hap koꞌi. Tupana tikyꞌesat kahato mītꞌīn kupteꞌen mowepīt hap wȳwo hap iꞌewȳte Tupana Ehay henoi kat pote Atãu hawyi Ewa ȳt tukupteꞌenꞌi poꞌog̃ Nusuken note hap iꞌewȳte tohenoi wy mesūwat yi Nusuken no hamuat re hap etiat. Tominug̃ wakuat koꞌi mītꞌīn upiat koꞌi Tupana Ehay henoi.—Etimowempāp o Iesui Aru E Hap 21:4, 5.
Karāmpe watimowempāp Tupana Ehay hawyi watikuap aikotā̃ me toiꞌatueropat tomohey sese haria hap. Miꞌi puo pyi watikuap aikotā̃ miꞌi hap. Miꞌi pote Tupana Ehay epowȳro kuap Tupana kuap hap ete. Tupana Ehay pe toig̃ kahato woꞌonãpin hap koꞌi. Miꞌi koꞌi epowȳro kahato hamo Tupana wyꞌok wo poꞌog̃ ereig̃neꞌen hamo.—Etimowempāp o Saumu 19:7, 11; Tiaku 2:23; 4:8.
4. Aikotā̃ meig̃ etikuap poꞌog̃ kuap Tupana Ehay ete.
Meikowat popera puo pyi etikuap poꞌog̃ hamo Tupana Ehay etiat. Tupana Ehay piat hag̃a hag̃a hit puo pyi etikuap poꞌog̃ hamo kat e terān emūꞌe terān hap. Iꞌewȳte kat e koꞌi hap koꞌi etiat etikuap hamo wy. Miꞌi hap ewy Iesui tunug̃ kahato karāmpe toiꞌatumūꞌe mītꞌīn turān.—Etimowempāp o Iruka 24:27, 45.
Sehay wakuat Tupana kaipywiat ri ihay sē kahato. Maꞌato iraniaꞌīn ȳt ikuap terānꞌi meig̃muewuat sehay wakuat koꞌi etiat. Miꞌi pote eꞌarōt reiꞌo. Maꞌato waku etiꞌywoporo ewemūꞌe Tupana Ehay etiat hap. Ewemūꞌe hap puo pyi wuatꞌi eꞌāt pe kuap ereig̃neꞌen.—Etimowempāp o Iuwãu 17:3.
^ parágrafo 3 Erehaꞌat o popera Um Livro para Todas as Pessoas e hap.
