WEMŪꞌE HAP 12
Aikotā̃ meig̃ Tupana wyꞌok wo watoig̃neꞌen kuap.
1. Tupana tenentup yne asom hentup haria kape.
Wahentup hap puo pyi waku kahato ahehay Tupana wȳwo. Toikyꞌesat kahato torānia hentup tewowiat hap iꞌewȳte toikyꞌesat torānia towyꞌokria wo mītꞌīn hap. (Saumu 65:2) Maꞌato Tupana ȳt tenentup yneꞌi hentup haria kape iꞌewȳte neig̃ tutunug̃ torānia iꞌatumientup koꞌi ewy. Kotā̃ e hap seꞌaito timosoꞌopot teharyꞌi miꞌi rakirẽ tohentup Tupana kape maꞌato Tupana ȳt tenentup hamoꞌi imientup koꞌi kape. (1 Peteru 3:7) Iꞌewȳte mīt tiꞌaparap tuwepyi neꞌi hupi teꞌi hupi teꞌi neꞌi. Miꞌi rakat kape Tupana ȳt tenentup hamoꞌi wy hentup hap kape. Miꞌi hap tuwemoherep Isareu ywaniaria wȳwo. Maꞌato mīt paaꞌe tominug̃ saꞌag̃ koꞌi upi Tupana pe pote Tupana tenentup hamo imientup hap koꞌi kape.—Etimowempāp o Isaia 1:15; 55:7.
Erehaꞌat o pyno Será Que Deus Escuta Todas as Orações? e hap kape
2. Aikotā̃ meig̃ wahentup kuap Tupana kape.
Waku wahentup Ainug̃ Hat Ieuwa kape yn. Miꞌi hap puo pyi watimoherep Ieuwa yn aheTupana sese hap. Miꞌi hap watimohey kahato. (Mateu 4:10; 6:9) Iꞌewȳte waku wahentup Iesui set upi kat pote miꞌi ikuꞌuro aimiꞌaparap koꞌi upi. (Iuwãu 14:6) Ieuwa ȳt tikyꞌesatꞌi wahentup tewowiat hap hupi teꞌi hupi teꞌi hap iꞌewȳte ȳt toikyꞌesatꞌi hentup hap popera piat watimowempāp hap koꞌi. Karāmpe wahentup Ieuwa kape turān waku wahentup aipyꞌa pyi.—Etimowempāp o Mateu 6:7; Wiripu 4:6, 7.
Aiwanentup hawe yn wahentup Tupana kapiat pykai tuwanentup hamo. (1 Samueu 1:12, 13) Wuatꞌi eꞌāt pe wahentup kuap Tupana kape. Ihatꞌok puo aiket hap eꞌyj̃an mete watenuk hap eꞌyj̃an mete iꞌewȳte karāmpe ahetiat niatpo koꞌi turān wy.—Etimowempāp o Saumu 55:22; Mateu 15:36.
3. Kat pote asom waku watuwaꞌatunug̃ Tupana kyꞌe haria wȳwo.
Mesūwat yi tote hoꞌokup kahato Tupana moheyꞌi haria iꞌewȳte Tupana Ehay etiat woꞌokyryꞌi haria. Miꞌiria tokpe Tupana wyꞌokria tukupteꞌen miꞌi pote niatpo kahato. (2 Timoteu 3:1, 4; 2 Peteru 3:3, 13) Miꞌi pote ti waku Tupana kyꞌe haria iꞌewȳte Tupana montypot terān haria teꞌeruwaꞌatunug̃ tuereto toꞌopowȳro hamo.—Etimowempāp o Epereu 10:24, 25.
Ieuwa Ehay Enoi haria waꞌatunug̃ hap tote watoꞌomoesaika Tupana mohey hap ete.—Etimowempāp o Humanu 1:11, 12.
Watukupteꞌen Tupana kyꞌe haria wȳwo pote Tupana wyꞌok wo poꞌog̃ hamo watoig̃neꞌen.4. Aikotā̃ meig̃ Tupana wyꞌok wo ereig̃neꞌen kuap.
Erenentup kahato ewemūꞌe Tupana Ehay etiat hap kape pote Tupana wyꞌok wo ereig̃neꞌen hamo. Erenentup kahato o eupiat Ieuwa minug̃ koꞌi kape iwoꞌonãpin hap koꞌi kape iꞌewȳte Ieuwa piat aru e hap koꞌi kape o wy. Meig̃muewuat koꞌi kape watenentup hawyi wahentup Tupana kape hap puo pyi watikuap miꞌi topotkyꞌe kahato hat iꞌewȳte iweꞌeg̃ kahato hat wy.—Etimowempāp o Iusue 1:8; Saumu 1:1-3.
Waku etimohey kahato Tupana ete wy. Epiat Tupana mohey hap aikotā̃ mikoi ewy. Etihuꞌi huꞌi tuereto mikoi pote itag̃ hamo. Miꞌi hap ewy eremūꞌe tuereto Tupana etiat miꞌi hawyi epiat imohey hap itag̃ poꞌog̃ hamo hawyi hesaika poꞌog̃ hamo wy.—Etimowempāp o Mateu 4:4; Epereu 11:1, 6.
5. Kat pote asom Tupana wyꞌok wo watoig̃neꞌen hap waku kahato.
Ieuwa tiꞌatuerohik kahato towyꞌokria. Ieuwa aipowȳro ȳt karāmpeꞌi watipun imohey hap ete hamo iꞌewȳte ȳt karāmpeꞌi watimonto wuatꞌi eꞌāt piat aheig̃neꞌen hap mohey hap ete hamo. (Saumu 91:1, 2, 7-10) Tehay puo pyi Ieuwa aimūꞌe aikotā̃ me ahehaig̃te poꞌog̃ hap etiat iꞌewȳte aiwepīt poꞌog̃ hamo hap etiat wy iꞌewȳte miꞌi ainãpin aikotā̃ me waku watukupteꞌen hap etiat wy.—Etimowempāp o Tiaku 1:25; Tiaku 4:4, 8.