WEMŪꞌE HAP 15
Kat pote asom waku etiꞌywoporo ewemūꞌe Tupana Ehay etiat hap.
1. Kat pote asom waku etiꞌywoporo ewemūꞌe Tupana Ehay etiat hap.
Ewemūꞌe Tupana Ehay hap puo pyi etikuap kahato raꞌyn Tupana etiat iꞌewȳte etikyꞌe poꞌog̃ miꞌi. Maꞌato epiat ikyꞌe hap hesaika poꞌog̃ hamo waku etiꞌywoporo ewemūꞌe Tupana Ehay etiat hap. (1 Peteru 2:2) Wuatꞌi eꞌāt pe ereig̃neꞌen kuap Tupana wyꞌok wo ereig̃neꞌen pote yn.—Etimowempāp o Iuwãu 17:3; 1 Iuwãu 5:3.
Karāmpe etikuap poꞌog̃ Tupana etiat hawyi epiat imohey hap hesaika poꞌog̃ hamo topyhuꞌat. Epiat imohey hap epowȳro kuap Tupana mikyꞌesat nug̃ hamo. (Epereu 11:1, 6) Miꞌi hawyi etoiat terān eminug̃ saꞌag̃ koꞌi hamo hawyi etunug̃ hamo waku rakat yn.—Etimowempāp o Iesui Potmūꞌeria 3:19.
2. Aikotā̃ me asom etiꞌatupowȳro kuap iraniaꞌīn.
Torānia henoi terān sehay waku rakat hanti. Miꞌi pote Ieuwa kaipywiat sehay waku rakat ehenoi terān hamo mītꞌīn me. Etiꞌywoporo ewemūꞌe Tupana Ehay etiat hap pote etimoherep kuap iraniaꞌīn me Tupana Ehay puo pyi emikuap koꞌi.—Etimowempāp o Humanu 10:13-15.
Ehenoi kuap Tupana Ehay etiat ewyriaꞌīn pe ti. Ehenoi iꞌatuepiat turān eiwat ehe religião hoꞌomūꞌe ȳt pȳwo peꞌi ere teiꞌo maꞌato ehenoi iꞌatuepe Tupana aru e hap koꞌi yn iꞌewȳte etunug̃ o waku rakat yn kat pote teꞌerenentup kahato emienoi kape maꞌato teꞌerehaꞌat poꞌog̃ eminug̃ koꞌi kape.—Etimowempāp o 2 Timoteu 2:24, 25.
3. Aikotā̃ me asom ewemūꞌe Tupana Ehay piat hap epowȳro kuap.
Etiꞌywoporo ewemūꞌe Tupana Ehay etiat hap pote Ieuwa wyꞌok wo poꞌog̃ hamo ereig̃neꞌen iꞌewȳte ereig̃neꞌen kuap Ieuwa emītꞌīn sese haria wȳwo. Miꞌi hap waku kahato hamo hanti.—Etimowempāp o 2 Kurintiu 6:18.
4. Aikotā̃ me asom epiat Ieuwa mohey hap hesaika poꞌog̃ kuap.
Etiꞌywoporo ewemūꞌe Tupana Ehay etiat hap puo pyi. (Epereu 5:13, 14) Ehay kuap Ieuwa Ehay Enoi Haria wȳwo aremūꞌe terān Tupana Ehay ete eiwȳwo ere. Miꞌi hawyi ewetemūꞌe kuap popera Você Pode Entender a Bíblia! e hap ete. Karāmpe etikuap poꞌog̃ Tupana etiat pote ewepīt poꞌog̃ hamo ereig̃neꞌen.—Etimowempāp o Saumu 1:1-3; Tiaku 1:25.
Ieuwa wyꞌok wo poꞌog̃ ereig̃neꞌen hamo waku erewaꞌatunug̃ tuereto hemītꞌīn seseria wȳwo. (Epereu 10:24, 25) Ieuwa kaipyi ti tūt epiat sehay wakuat koꞌi e hap. Eꞌieg̃neꞌen wuatꞌi eꞌāt piat hap toikyꞌesat. Iꞌe hap ewy etunug̃ mote wuatꞌi eꞌāt pe hamo ereig̃neꞌen. Miꞌi pote poꞌog̃ waku torānia kai Ieuwa wyꞌok wo watoig̃neꞌen hap.—Etimowempāp o 1 Timoteu 1:11 TNM; 1 Iuwãu 2:17.