WEMŪꞌE HAP 6
Kan tuwemoherep ikuꞌuro rakaria wȳwo.
1. Kan Tupana tunug̃ hamuat ikuꞌuro rakaria wȳwo.
Irasaru toinytꞌīn Mata Maria wȳwo ȳt pyaꞌi tukupteꞌen Ierusarẽi kai. Wentup eꞌāt pe so Iesui hewyry raꞌyn Petania kape. Miꞌi turān Irasaru ikuꞌuro raꞌyn 4 eꞌāt raꞌyn misȳp we toig̃neꞌen. Putꞌokꞌe hawyi Mata Maria tioto raꞌyn Iesui Irasaru asȳp hap kape. Miꞌi hap kape typyꞌi kahato mītꞌīn teꞌeruwat. Miꞌi hap tote Iesui tihymūt raꞌyn Irasaru g̃uꞌuro pyi. Miꞌi pote ti inytꞌīn Mata Maria iꞌatuwepīt kahato raꞌyn tukupteꞌen taꞌatukywyt ihaig̃te iraꞌyn pote.—Etimowempāp o Iuwãu 11:21-24, 38-44.
Maꞌato Mata tikuap ti raꞌyn Tupana tiꞌatuhymūt kuap ikuꞌuro rakaria g̃uꞌuro pyi hap. Ieuwa tiꞌatuhymūt hamuat ikuꞌuro rakaria hawyi wuatꞌi eꞌāt pe tukupteꞌen hamo mesūwat yi tote.—Etimowempāp o Io 14:14, 15.
2. Aikotā̃ asom aikuꞌuro hawyi.
Tupana toꞌe Atãu me karāmpe ekuꞌuro hap putꞌokꞌe hawyi epīt taꞌaipok yi kape iraꞌyn e.— IENESI 3:19.
Aikuꞌuro hawyi aipaꞌãu ikuꞌuro raꞌyn wy. Ieuwa ainug̃ yi og̃ kawiat iꞌewȳte aipīt muꞌi kawiat hawyi sū kawiat wy. (Ienesi 2:7; 3:19) Karāmpe aikuꞌuro hawyi aiwanentup hap koꞌi iꞌewȳte aiwepīt hap koꞌi aiꞌarōt hap koꞌi tuweityk taꞌyn. Katꞌi poꞌog̃. Miꞌi pote Irasaru ȳt tikuapꞌi tokuꞌuro turān. Miꞌi pote ti karāmpe Iesui tihymūt g̃uꞌuro pyi hawyi ȳt tohenoi kuapꞌi towyriaꞌīn me aikotā̃ tokuꞌuro turān wuat hap.—Etimowempāp o Saumu 146:4; Ekeresiasi 9:5, 6, 10.
Tupana tiꞌatuwuk aria wato wo saꞌag̃ nug̃ haria e hap asom pȳwo. Miotā̃ e hap ti sehay ȳt pȳwo peꞌi. Tupana Ehay henoi — Mītꞌīn karāmpe iꞌatukuꞌuro hawyi ȳt katꞌi poꞌog̃ iꞌatuwoꞌokyꞌe hap iꞌatuꞌarōt hap iꞌewȳte iꞌatuwanentup hap koꞌi tuweityk yne raꞌyn e. Miꞌi pote Tupana tiꞌatuwuk mītꞌīn saꞌag̃ nug̃ haria aria wato iꞌatuꞌe hap ȳt pȳwo peꞌi maꞌato pȳwo pe sio iꞌatuꞌe. Miꞌi pote teꞌeruwanentup hawe — Tupana ti hoꞌomosoꞌopot mītꞌīn iꞌatuꞌe. Maꞌato ȳt karāmpeꞌi toiꞌatuwuk pykai. Ȳt karāmpeꞌi tohoꞌomosoꞌopot pykai.—Etimowempāp o Ieremia 7:31.
Erehaꞌat o pyno video O Que Acontece Quando Morremos? e hap kape
3. Ikuꞌuro rakaria asom iꞌatuehay kuap aiwȳwo.
Ȳtꞌi. Ikuꞌuro rakaria iꞌatuehay kuapꞌi poꞌog̃ aiwȳwo neig̃ teꞌerenentup kuap poꞌog̃. (Saumu 115:17) Maꞌato asuwe anjo saꞌag̃ koꞌi iꞌatuehay kuap mītꞌīn wȳwo. Miꞌi pote mītꞌīn teꞌeruwanentup hawe — Uiwyꞌok ikuꞌuro rakat wȳwo uhehay iꞌatuꞌe. Maꞌato ȳt pykaiꞌi. (Iuta 6) Miꞌi pote Ieuwa ainãpin ȳt nakuꞌi ahehay ikuꞌuro rakaria wȳwo e.—Etimowempāp o Teturonamia 18:10, 11.
4. Uweꞌīn aru Iesui tiꞌatuhymūt g̃uꞌuro pyi.
Iesui tiꞌatuhymūt hamo Tupana mikyꞌesat nug̃ haria hawyi iraniaꞌīn Tupana kuap ite rakaria iꞌewȳte iraniaꞌīn Tupana mikyꞌesat nug̃ꞌi haria wy.—Etimowempāp o Isaia 26:19; Iesui Potmūꞌeria 24:15.
Miꞌi pote typyꞌi kahato hamo teꞌerehymūt pakupꞌi g̃uꞌuro pyi mesūwat yi tote tukupteꞌen hamo. Ikuꞌuro rakaria teꞌerehymūt g̃uꞌuro pyi hawyi taꞌatukuap poꞌog̃ hamuat pȳwuat e hap Tupana etiat. Miꞌi hawyi taꞌatumoherep kuap taꞌatuminug̃ koꞌi puo pyi taꞌatumohey sese Iesui hap sio ȳtꞌi hap. (Iesui Aru E Hap 20:11-13) Taꞌatunug̃ Iesui mikyꞌesat pote tukupteꞌen hamuat wuatꞌi eꞌāt pe mesūwat yi Nusuken note.—Etimowempāp o Iuwãu 11:25, 26.
5. Iesui tiꞌatuhymūt hamuat ikuꞌuro rakaria. Kan miꞌi hap aimūꞌe.
Iesui tiꞌatuhymūt hamuat ikuꞌuro rakaria. Miꞌi hap ti aimūꞌe Ieuwa woꞌopotkyꞌe kahato rakat hap iꞌewȳte heg̃yiꞌat kahato rakat. Ieuwa tipoꞌoro tosaꞌyru ikuꞌuro aheupi hamo. Miꞌi hap puo pyi ikuꞌuro rakaria tukupteꞌen hamuat pakupꞌi. Nusuken note ikuꞌuro rakaria iꞌatuehaig̃te hamuat raꞌyn iꞌewȳte ewyriaꞌīn iꞌatuehaig̃te hamo raꞌyn wy. Miꞌi turān uweig̃ etipuenti terān itote.—Etimowempāp o Iuwãu 3:16; Humanu 6:23.
