WEMŪꞌE HAP 8
Kat pote asom toig̃ kahato hoꞌopot hap koꞌi.
1. Karāmpe pyig̃ tuwesaꞌawynug̃ saꞌag̃ koꞌi hap.
Tuwekuap taꞌyn aj̃uwat morekuatꞌi imomã kuap saꞌag̃ koꞌi wȳwo hap
Karāmpe ahiag̃ heso saꞌawyꞌi wuat haryporia Ewa pe hawyi. Maꞌato miꞌi hap eꞌyj̃an mete miꞌi anjo hampȳk kahato rakat. Miꞌi tikuap ti raꞌyn waku Tupana yn watimontypot hap maꞌato toikyꞌesat mītꞌīn piat tomontypot hap. Miꞌi pote Tupana Ehay toꞌe karāmpe ahiag̃ tunug̃ teso hap tuwekaipyi neꞌi e. (Iuwãu 8:44) Ewa tunug̃ ahiag̃ mikyꞌesat miꞌi pote teꞌaito wȳwo ȳt taꞌatumontypotꞌi poꞌog̃ Tupana. Miꞌi pote toig̃ kahato hoꞌopot hap iꞌewȳte g̃uꞌuro hap.—Etimowempāp o Ienesi 3:1-6, 19.
Ahiag̃ ȳt tikyꞌesatꞌi Tupana toporekuatno hap neig̃ toikyꞌesat mītꞌīn tiꞌaira Tupana taꞌatuporekuatno hap. Miꞌi hap ti watikuap taꞌyn Ewa maꞌat hap puo pyi. Miꞌi pykai ti maꞌato korā̃ wuaria mītꞌīn iꞌaira ahiag̃ taꞌatuporekuatno hap. Miꞌi pote ȳt taꞌatukyꞌesatꞌi Tupana taꞌatuporekuatno hap. Miꞌi pote Tupana Ehay toꞌe — Iꞌatuporekuat mesuwarotiat ahiag̃ e.—Etimowempāp o Iuwãu 12:31; 14:30.
2. Tupana tunug̃ asom saꞌag̃ koꞌi hap.
Ȳtꞌi. Maꞌato torānia iminug̃ koꞌi hampȳk kahato miꞌi pote anjo hawyi Atão hawyi Ewa taꞌatukyꞌesat pote taꞌatumontypot irane kuap Tupana. (Teturonamia 32:4, 5) Ahepe ti Tupana tum iꞌaira koꞌi terān hap. Miꞌi pote watiꞌaira kuap waku rakat nug̃ hap sio ȳtꞌi hap. Watikyꞌe Tupana pote watiꞌaira hamo waku rakat nug̃ hap.—Etimowempāp o Tiaku 1:13-15; 1 Iuwãu 5:3.
3. Kat pote asom Tupana ȳt timomã ite hoꞌopot hap koꞌi wȳwo.
Kat pote toimoherep terān torānia pe uiat yn uiporekuat poꞌog̃ waku torānia kai e hap. Miꞌi pote Tupana tum mōtꞌi kahato te mītꞌīn piat ikuap hamo uiat yn uiporekuat eimowepīt kuap sese e hap kuap hamo maꞌato iraniaꞌīn teꞌeruwanentup hawe korā̃ wuaria morekuaria ti waku raꞌyn iꞌatuꞌe aipowȳro kahato miꞌiria iꞌatuꞌe. Taꞌatumiꞌaira puo pyi taꞌatumoherep ahiag̃ porekuat raꞌyn taꞌatuꞌaira hap. (Ekeresiasi 4:1; Isaia 1:23) Maꞌato aj̃uwat morekuatꞌi imomã kuap wuꞌuka hap koꞌi wȳwo saꞌag̃ koꞌi wȳwo hap iꞌewȳte ahū hap koꞌi wȳwo.—Etimowempāp o Ieremia 10:23; Esutu 9:16.
Tupana Porekuat tuweupi mesūwat yi totiaria morekuaria koꞌi kai kat pote toiꞌatuerohik tomikyꞌesat nug̃ haria. (Isaia 48:17, 18) Mesup epote Tupana timomã yne hamuat raꞌyn mesūwat yi totiaria morekuaria koꞌi wȳwo. Tupana Porekuat mikyꞌesat nug̃ haria yn tukupteꞌen hamuat mesūwat yi tote. — Isaia 11:9.—Etimowempāp o Saumu 110:5, 6.
Erehaꞌat o pyno video Por Que Existe Tanto Sofrimento? e hap kape
4. Korā̃ kan waku watiꞌaira.
Waku watiꞌaira Tupana Aiporekuatno hap sio mītꞌīn aiporekuatno hap. Aiminug̃ koꞌi puo pyi ti watimoherep hamo uwe aiporekuatno watiꞌaira raꞌyn hap. Nimo pyi raꞌyn ahiag̃ heso uweꞌi aru Tupana montypot topyꞌa pyi e. Ahiag̃ eso hap watimoherep kuap aiminug̃ koꞌi puo pyi.—Etimowempāp o Io 1:8-12; Porowepiu 27:11.
5. Aikotā̃ meig̃ watimoherep watikyꞌesat Tupana Aiporekuatno hap.
Watimoherep watikyꞌesat Tupana Aiporekuatno hap aimiꞌaira koꞌi puo pyi hap.
Watikyꞌesat ri raꞌyn Tupana Aiporekuatno hap pote watuwemūꞌe hamo Tupana Ehay ete iꞌewȳte watunug̃ hamo imikyꞌesat koꞌi ewy. (Iuwãu 4:23) Karāmpe Iesui toig̃neꞌen mesūwat yi tote turān totoꞌi wuꞌuka hap koꞌi kape neig̃ tuwenug̃ terān mītꞌīn porekuatno. Watunug̃ Iesui ewy pote watimoherep Tupana Aiporekuatno hap.—Etimowempāp o Iuwãu 17:14.
Ahiag̃ tikyꞌesat mītꞌīn wanentup hap aiminug̃ saꞌag̃ koꞌi ti waku neꞌi e hap. Karāmpe watoiat aiminug̃ saꞌag̃ koꞌi pote iraniaꞌīn aiwyriaꞌīn tipuenti waku kahato hamoꞌi. Miꞌi pote aimoꞌarōt tuereto terān hamo. (1 Peteru 4:3, 4) Miꞌi turān kan watiꞌaira hamo. Aiwyriaꞌīn mikyꞌesat sio Tupana mikyꞌesat nug̃ hap. Ahiag̃ toꞌe — Mītꞌīn timontypot Tupana taꞌatuetiat niatpoꞌi pote yn e. Maꞌato torānia Tupana woꞌonãpin hap koꞌi waku ahepe. Karāmpe watihaymohey Tupana pote watimoherep ahiag̃ eso hap.—Etimowempāp o 1 Kurintiu 6:9, 10; 15:33.
Tupana tiꞌatukyꞌe kahato mītꞌīn miꞌi tupono toimomã hamuat hoꞌopot hap koꞌi wȳwo. Miꞌi hap ete watimohey kuap. Tupana piat aru e hap koꞌi etiat mohey haria iꞌewȳte imontypot haria tukupteꞌen hamuat wuatꞌi eꞌāt pe mesūwat yi tote.—Etimowempāp o Iuwãu 3:16.
