WEMŪꞌE HAP 14
Waku asom watuwaꞌatunug̃ iraniaꞌīn mītꞌīn wȳwo Tupana montypot hamo.
1. Kat hamo asom Tupana tiꞌaira Isareu ywaniaria.
Aparãu saipepiaria ti aru typyꞌi kahato e Tupana. Miꞌiria teꞌeruwenug̃ Isareu ywaniaria wo. Ieuwa tiꞌatuꞌaira Isareu ywaniaria tomontypot hamo. Waku miꞌiria tihaymohey Tupana woꞌonãpin hap koꞌi iꞌewȳte waku taꞌatumontypot Tupana hampȳk puo hap. (Saumu 147:19, 20) Miꞌiria puo pyi Tupana hoꞌopowȳro kuap torānia mītꞌīn.—Etimowempāp o Ienesi 22:18.
Tupana tiꞌatuꞌaira Isareu ywaniaria tehay enoi hamo. Miꞌiria puo pyi iraniaꞌīn mītꞌīn tikuap Ieuwa etiat. Iꞌatuetiat watuwemūꞌe pote watikuap hamo waku watimontypot Ieuwa woꞌonãpin hap koꞌi etiat hap. — Teturonamia 4:6.—Etimowempāp o Isaia 43:10, 12.
2. Kat hamo asom waku Iesui Mohey Sese Haria teꞌeruwaꞌatunug̃.
Karāmpe Isareu ywaniaria ȳt tihaymoheyꞌi raꞌyn Tupana woꞌonãpin hap koꞌi hawyi Ieuwa ȳt tikyꞌesatꞌi poꞌog̃ tomontyporia wo tukupteꞌen hap. Miꞌi pote tohoꞌoꞌaira iraniaꞌīn iraꞌyn tomontypot sese haria wo hamo. (Mateu 21:43; 23:37, 38) Korā̃ Ieuwa tiꞌatuꞌaira Iesui Mohey Sese Haria tehay enoi hamo.—Etimowempāp o Iesui Potmūꞌeria 15:14, 17.
Iesui tiꞌatumūꞌe topotmūꞌeria Tupana Porekuat enoi hap etiat iꞌewȳte aikotā̃ me taꞌatuhoꞌopowȳro kuap iraniaꞌīn Iesui mohey pakup haria wo tukupteꞌen hap etiat. (Mateu 10:7, 11; 24:14; 28:19, 20) Pyaꞌi raꞌyn saꞌag̃ koꞌi momã hap eꞌāt miꞌi pote Iesui Mohey Sese Haria henoi Tupana Porekuat etiat mesūwat yi oktān. Haꞌawyte hoꞌokup kahatoꞌi Ieuwa Montypot Haria maꞌato ti korā̃ typyꞌi kahato raꞌyn kat pote torānia ywania puo raꞌyn tõig Ieuwa montypot haria. (Iesui Aru E Hap 7:9, 10) Iesui Mohey Sese Haria toꞌokyꞌe sese iꞌewȳte toꞌopowȳro kahato wy. Miꞌiria mesūwat yi oktān teꞌeremūꞌe Tupana Ehay ete wentup awy yn.—Etimowempāp o Epereu 10:24, 25.
3. Aikotā̃ meig̃ korā̃ wuat Ieuwa Ehay Enoi Haria e religião tesaꞌawynug̃.
Iraniaꞌīn Tupana Ehay etiat wemūꞌe haria teꞌeremūꞌe poꞌog̃ Tupana Ehay ete anu 1870 pyi. Itote pyi taꞌatukuap poꞌog̃ pȳwuat e hap koꞌi Tupana Ehay etiat. Iesui tikyꞌesat Tomohey Sese Haria henoi Tupana Porekuat etiat e hap taꞌatukuap. Miꞌi pote taꞌatuhenoi Tupana Porekuat etiat mesūwat yi oktān. Anu 1931 pyi teꞌereset nug̃ naꞌyn Ieuwa Ehay Enoi Haria e hap wo.—Etimowempāp o Iesui Potmūꞌeria 1:8; 2:1, 4, 11; 5:42.
4. Mesūwat yi totiaria Ieuwa Ehay Enoi Haria erohik haria asom uweꞌīn.
Wuatꞌi eꞌāt pe Iesui Mohey Sese Haria Akag̃ Sese toig̃neꞌen Iesui. Saꞌawyꞌi Iesui tiꞌatuꞌaira iraniaꞌīn ihaig̃niaꞌīn congregação piaria powȳro hamo iꞌewȳte hoꞌomūꞌe hamo wy. Imiꞌairoria 12 ok takaria hawyi tomohey sese haria akag̃ koꞌi toiꞌaira. (Iesui Potmūꞌeria 16:4, 5) Korā̃ iraniaꞌīn ihaig̃niaꞌīn iweꞌeg̃ kahato rakaria herohik Ieuwa Ehay Enoi Haria koꞌi potpap hap mesūwat yi oktān. Miꞌiria set Ieuwa Ehay Enoi Haria Potyporia e. Miꞌiria hoꞌopowȳro ywaniaria pusu aputsit hap ete popera koꞌi nug̃ hap ete iꞌewȳte tawa koꞌi puo popera koꞌi poꞌoro hap koꞌi ete. Miꞌi pote Tupana Ehay pywiat popera koꞌi toig̃ 800 pusu puo. Miꞌiria hoꞌopowȳro wy 110 miu congregação koꞌi Tupana Ehay puo pyi. Congregação koꞌi puo toig̃ iraniaꞌīn ihaig̃niaꞌīn iꞌatupotpap Ieuwa Ehay Enoi Haria akag̃ koꞌi wo. Miꞌiria tunug̃ Tupana woꞌonãpin hap koꞌi ewy. Wakuaria kahato miꞌiria iꞌewȳte Tupana hũria taꞌatuꞌeropat kahato wy.—Etimowempāp o 1 Peteru 5:2, 3.
Ieuwa Ehay Enoi Haria henoi Tupana Porekuat etiat. Iesui Potmūꞌeria 12 ok takaria ewy urutuwat netap upi netap upi Tupana Ehay enoi hamo iꞌewȳte Tupana kuap terān haria uruhoꞌomūꞌe. (Iesui Potmūꞌeria 20:20) Maꞌato iraniaꞌīn kai Ieuwa Ehay Enoi Haria e religião tuweupi kahato. Kat pote wentup ewy yn urutukupteꞌen hawyi uruꞌȳwot Tupana. Miꞌi topotkyꞌe kahato. Urutoꞌopotkyꞌe kahato pote uruwyriaꞌīn Ieuwa Ehay Enoi Haria aikotā̃ uruꞌȳwot uruty iꞌewȳte urueinyt urukywyt hap ewy. (2 Tesaronika 1:3) Tupana emītꞌīn sese poꞌog̃ iꞌatuwepīt torānia kai kat pote taꞌatunug̃ Tupana mikyꞌesat ewy iꞌewȳte taꞌatuhoꞌopowȳro mītꞌīn.—Etimowempāp o Saumu 33:12; Iesui Potmūꞌeria 20:35.
