Karāmpe hirokat hit tuwemoherep hawyi woꞌomenaru haria iꞌatuwepīt kahato maꞌato niatpo kahato wy. Kotā̃ e hap. Miꞌiria iꞌatupotpap kahato taꞌatueropat taꞌatumempytꞌīn hamo. Asuwe teꞌeroket kuap hinꞌi taꞌatumempȳtꞌīn erohik haype. Miꞌi hawyi iꞌatusera pote toꞌopyꞌahak kahato toꞌoꞌete. Miꞌi tupono waku woꞌomenaru haria teꞌerekoꞌywyk taꞌatueropat taꞌatumempytꞌīn iꞌewȳte taꞌatueropat woꞌomenaru hap. Miꞌi pote aikotā̃ meig̃ Tupana Ehay piat woꞌonãpin hap koꞌi hoꞌopowȳro kuap woꞌomenaru haria.

KAN TUPANA EHAY AIMŪꞌE — Woꞌokyꞌe sese haria wo watoig̃neꞌen mote watimoherep woꞌowese hap wakuap hap heg̃yiꞌat rakaria wo watoig̃neꞌen iꞌewȳte karāmpeꞌi watoig̃neꞌen marakꞌa wo e. (1 Kurintiu 13:4 hawyi 5) Emempyt toig̃ mote erewanentup kahato emempyt kape maꞌato asuwe eꞌaito wanentup hawe — Uheharyꞌi uiwaure raꞌyn e kuap. Miꞌi pote waku eterohik kahato eꞌaito iꞌewȳte perupꞌi popuo waku etipowȳro eꞌaito. Miꞌi hawyi tuwanentup — Waku ateropat uimempyt uheharyꞌi wȳwo e hamo.

— Ihaig̃niaꞌīn ereig̃neꞌen eharyꞌi wȳwo aikotā̃ iweꞌeg̃ rakat ewy e. (1 Peteru 3:7) Waku erewanentup eharyꞌi kape. Miꞌi ipotpap kahato emempytꞌīn eropat hamo miꞌi pote asuwe ipyꞌahak kuap sio isera kahato iꞌewȳte iꞌarōt kuap. Asuwe eharyꞌi ipyꞌahak kahato ēte maꞌato epyꞌahak teiꞌo en ewese naꞌyn en. Miꞌi hap waku kahato kat pote Tupana Ehay toꞌe — Paa e hatno ereig̃neꞌen mote poꞌog̃ waku wentup tawa porekuatno ereig̃neꞌen e. (Porowepiu 16:32) Miꞌi tupono etimoherep o eweꞌeg̃ hap iꞌewȳte etipowȳro kahato o eharyꞌi. — Porowepiu 14:29

KAN ETUNUG̃ KUAP.

• Ȳwotꞌīn etiat. Waku etipowȳro eharyꞌi eimempyt eropat hap ete miꞌi hap waku etunug̃ ihatꞌok puo wantym muo hawyi ihatꞌok kaꞌi kape. Waku etiꞌairo karānia hora kat koꞌi kat koꞌi nug̃ hap ereig̃neꞌen mōtꞌi eharyꞌi emempyt wȳwo hamo.

• Nyꞌīn etiat. Karāmpe eꞌaito — Moropowȳro teran uheharyꞌi e pote waku etāt ipowȳro hap. Iminug̃ koꞌi emempyt eropat hamo emikyꞌesat ewyꞌi pote ȳt nakuꞌi ehay saꞌag̃ iminug̃ koꞌi ete. Waku etimoherep eꞌaito pe aikotā̃ hirokat eropat kuap hap.

KAN TUPANA EHAY AIMŪꞌE — Ihaig̃nia teharyꞌi wȳwo wentup pīt yn naꞌyn tukupteꞌen e. (Ienesi 2:24) Emempyt tuwemoherep hawyi ȳt nakuꞌi etiwaure eꞌaito eharyꞌi maꞌato waku eiwoꞌoꞌehik kahato iheg̃ me eweikupteꞌen hamo eiwoꞌomenaru hawe.

Haryporiaꞌīn eiꞌe hap koꞌi puo pyi eweimoherep kuap ehewaku hap eheꞌaito eipowȳro hap upi. Eiꞌe hap koꞌi imowepīt kahato kuap eheꞌaito. (Porowepiu 12:18) Ihaig̃niaꞌīn waku ehehay tuereto eiharyꞌi pe — Morokyꞌe kahato en eweiꞌe. Iꞌewȳte waku ehehay se kahato iminug̃ wakuat koꞌi etiat ewyriaꞌīn powȳro hamo. — Porowepiu 31:10 hawyi 28

Tupana Ehay toꞌe — Ȳt nakuꞌi aimikyꞌesat yn watunug̃. Waku poꞌog̃ iraniaꞌīn mikyꞌesat watunug̃ aiwepowȳro hap kai e. (1 Kurintiu 10:24) Etunug̃ tuereto o poꞌog̃ waku rakat eꞌaito eharyꞌi pe. Waku ehay se iminug̃ wakuat koꞌi etiat hawyi waku erenentup iwanentup hawiat koꞌi kape. Sewaire hap etiat Tupana Ehay hoꞌonãpin woꞌomenaru haria. Kotā̃ e — Waku ereket eharyꞌi eꞌaito wȳwo yn. Seꞌaito seharyꞌi waku ewetum eipīt eheharyꞌi eheꞌaito pe iꞌatumikyꞌesat ewy e. (1 Kurintiu 7:3-5 kape) Miꞌi hap etiat waku ehay tuereto eꞌaito eharyꞌi wȳwo. Iꞌewȳte eweꞌeg̃ wo waku etimoherep woꞌowese hap. Miꞌitā̃ etunug̃ mote etimoheg̃ hamo ewoꞌomenaru hap.

KAN ETUNUG̃ KUAP.

• Waku etiꞌaira karānia tempu ereig̃neꞌen hamo eꞌaito eharyꞌi wȳwo.

• Eminug̃ wakuat koꞌi puo pyi etimoherep kuap ikyꞌe hap eꞌaito eharyꞌi upi. Kotā̃ e hap. Etum kuap presente hit imowepīt kahato hamo.

KAN TUPANA EHAY AIMŪꞌE — Ehire pyi te etikuap Tupana Ehay miwan miat hap ete pywuat sese hap kaipyi etipuenti ekaꞌiwat Iesui etiat kuap hamuat e. (2 Timoteu 3:15) Erewanentup o kan etunug̃ kuap ehoꞌomūꞌe emempytꞌīn hamo. Teꞌeruwemoherep eyj̃an mete hirokaria teꞌeruwemūꞌe kahato ti raꞌyn. Kotā̃ e hap. Hirokat hit toty ymyẽ pe te yn pykai toikuap toty ehay iꞌewȳte toikuap karāmpe toty iꞌarōt sio iwepīt hap. Miꞌi pote ihire pyi te waku etimowempāp Tupana Ehay etiat emempytꞌīn mūꞌe hamo. Asuwe toikuap hinꞌi kat emimowempāp hap maꞌato totag̃ naꞌyn hawyi toimowempāp terān Tupana Ehay ete.

Hirokat yn ne turān waku ehay tuereto emempyt wȳwo Ieuwa etiat. Iꞌewȳte ehentup Tupana kape turān ehentup iꞌahay wo emempyt tenentup emientup koꞌi kape hamo. (Teturonamia 11:19) Eremahara emempyt wȳwo turān waku ehay tuereto Tupana minug̃ koꞌi etiat. (Saumu 78:3 hawyi 4) Miꞌitã etunug̃ mote emempyt itag̃ hawyi toikuap epiat Tupana kyꞌe sese hap iꞌewȳte toikyꞌe Ieuwa wy.

KAN ETUNUG̃ KUAP.

• Ehentup Tupana Ieuwa pe eweꞌeg̃ hamo ehoꞌomūꞌe emempyt Tupana Ehay etiat hamo.

• Waku ehuꞌat tuereto sehay koꞌi ihireꞌi pyi te ehoꞌomūꞌe emempytꞌīn hamo.