WEMŪꞌE HAP 9
Etimontypot ro Ieuwa eꞌaito eharyꞌi emempytꞌīn wȳwo
— Eweimontypot ro atipy nug̃ hat yi nug̃ hat e. — Iesui Aru e Hap 14:7
Mesūwat popera puo pyi erehaꞌat sese raꞌyn Tupana Ehay piat woꞌonãpin hap koꞌi. Miꞌi hap koꞌi epowȳro kuap hawyi ewyriaꞌīn. Ieuwa tikyꞌesat kahato wepīt hap wȳwo ereig̃neꞌen hap. Hawyi miꞌi tehay moheg̃ etunug̃ tomikyꞌesat oktān poꞌog̃ iraniaꞌīn kai pote miꞌi epoitȳro kahato hamo (Mateu 6:33) Tupana tikyꞌesat kahato towyꞌok sese wo ereig̃neꞌen hap. Miꞌi pote etunug̃ epo putꞌokꞌe hap oktān Tupana Ieuwa ete erehik hamo. Ieuwa wyꞌok wo ereig̃neꞌen hap ti poꞌog̃ waku torānia kai. — Mateu 22:37 hawyi 38
1 WAKU EREHIK POꞌOG̃ IEUWA ETE
KAN TUPANA EHAY AIMŪꞌE — Eiꞌȳwot sese wo areig̃neꞌen e. Miꞌi hawyi eipe uhaꞌyruꞌīn uhakiꞌytꞌīn wo e Tupana ahepe. (2 Kurintiu 6:18) Tupana tikyꞌesat kahato towyꞌok sese wo ereig̃neꞌen hap. Miꞌi hap etunug̃ kuap ehentup hap koꞌi puo pyi. Tupana toꞌe — Yne eꞌāt pe ehentup uhepe e. (1 Tesaronika 5:17) Toikuap terān epyꞌa pywiat koꞌi etiat ewanentup hawiat koꞌi etiat. (Wiripu 4:6) Karāmpe ehentup ewyriaꞌīn wȳwo turān miꞌiria taꞌatukuap Tupana wyꞌok sese wo ereig̃neꞌen hap.
Waku ehay Tupana wȳwo iꞌewȳte waku erenentup kahato hewowi. Miꞌi hamo waku eremūꞌe Tupana Ehay ete hawyi popera koꞌi Tupana Ehay puo pyi. (Saumu 1:1 hawyi 2) Miꞌi turān waku erewanentup kat emimowempāp hap kape. (Saumu 77:11 hawyi 12) Iꞌewȳte erenentup Tupana Ehay kape pote waku erehaꞌat tuereto waꞌatunug̃ hap koꞌi kape wy. — Saumu 122:1-4 kape
Ehay tuereto Ieuwa etiat iraniaꞌīn mītꞌīn me pote etimoheg̃ kuap ewyꞌok Ieuwa wȳwo hap. Miꞌitã etunug̃ mote ewoꞌowehik poꞌog̃ Ieuwa wȳwo. — Mateu 28:19 hawyi 20
KAN ETUNUG̃ KUAP.
-
Wuatꞌi eꞌāt pe etimowempāp o Tupana Ehay ete hawyi ehentup o Tupana kape.
-
Waku kahato ewyriaꞌīn wȳwo eremahara maꞌato poꞌog̃ waku iꞌatuwȳwo etimontypot Ieuwa.
2 ETIPUENTI O WAKU KAHATO ETIMONTYPOT TUPANA EWYRIAꞌĪN WȲWO TURĀN
KAN TUPANA EHAY AIMŪꞌE — Karāmpe watikyꞌesat watukupteꞌen Tupana wȳwo miꞌi pote waku watuwat Tupana kape aimikyꞌesat entup hamo e. (Tiaku 4:8) Etiꞌaira o karānia tempu etimontypot hamo Ieuwa ewyriaꞌīn wȳwo hap hawyi etunug̃ o aikotā̃ emiꞌaira hap ewy. (Ienesi 18:19) Maꞌato waku etunug̃ poꞌog̃. Wuatꞌi eꞌāt pe waku etimontypot Tupana ewyriaꞌīn wȳwo. Miꞌitā̃ etunug̃ mote ewyriaꞌīn Tupana wyꞌok sese wo tukupteꞌen hamo. Tupana Ehay henoi — Waku eweiꞌatumūꞌe ro einãpin uhepiat hap ete eimempytꞌīn yne eꞌāt pe waku hupi teꞌi hupi teꞌi e. (Teturonamia 6:6 hawyi 7) Waku etunug̃ aikotā̃ Iusue ewy. Miꞌi toꞌe — Uito ti atikyꞌesat Tupana sese uiꞌyat piaria iꞌewȳte ewy e. — Iusue 24:15
KAN ETUNUG̃ KUAP.
-
Waku erenentup aikotā̃ ewyriaꞌīn wȳwo eweiꞌatumontypot kuap Tupana hawyi etunug̃ miꞌi hap ewy.
