Ieuwa tikyꞌesat kahato ȳwotꞌīn nyꞌīn taꞌatuhoꞌomotag̃ iꞌatumempytꞌīn waku puo hap. (Korosi 3:20) Waku ȳwotꞌīn nyꞌīn taꞌatuhoꞌomūꞌe iꞌatumempytꞌīn Tupana kyꞌe sese haria wo tukupteꞌen hamo iꞌewȳte iꞌatutag̃ turān iweꞌeg̃ nakaria wo tukupteꞌen hamo. (2 Timoteu 1:5; 3:15) Waku etikuap emempytꞌīn wanentup hap koꞌi. Etimoherep ewanentup hap wakuat koꞌi emempytꞌīn powȳro hamo. Iꞌewȳte etiꞌatumūꞌe emempytꞌīn eꞌyj̃an mete waku etomohey Tupana Ehay epyꞌa pyi. — Saumu 40:8

KAN TUPANA EHAY AIMŪꞌE — Waku ehewaure kaꞌa eweꞌeg̃ hap wo e. (Tiaku 1:19) Pȳwo etikyꞌesat kahato emempytꞌīn iꞌatuehay tuereto ewȳwo hap. Maꞌato miꞌi hamo waku erenentup kahato iꞌatuꞌe hap koꞌi kape. Etimotag̃ epiat ikyꞌe hap wȳwo pote wuatꞌi eꞌat pe iꞌatuehay emempytꞌīn ekyꞌe hap wȳwo. (Tiaku 3:18) Maꞌato ehehay saꞌag̃ hawyi ewetuꞌuka terān neꞌi pote teꞌerokenꞌẽ neꞌi raꞌyn eipupi eimempytꞌīn. Etimoherep ewese hap emempytꞌīn ete hawyi — Uimempytꞌīn uimowepīt kahato eipe waku ere iꞌatuepe. — Mateu 3:17; 1 Kurintiu 8:1

KAN ETUNUG̃ KUAP.

• Emempytꞌīn iꞌatuehay terān ewȳwo pote waku erenentup kahato kat kat iꞌatuehay ēte hap.

• Waku ehay tuereto emempytꞌīn wȳwo. Ȳt nakuꞌi ehay emempytꞌīn wȳwo niatpo iꞌatuetiat turān yn.

KAN TUPANA EHAY AIMŪꞌE — Uwe tuwanentup tuwemūꞌe hap kape. Miꞌi hat wakuap toieig̃neꞌen hap ete toipuenti e. (Porowepiu 16:20) Waku erenentup emempytꞌīn ehay kape. Maꞌato waku etunug̃ poꞌog̃ waku etikuap kahato emempyt wanentup hawiat koꞌi. Asuwe ipakuptiaria iꞌatuehay ȳt teꞌeruwanentup tokirẽꞌi. Maꞌato Tupana Ehay henoi — Uwe iwesat sehay ȳt tuwanentup tokirẽꞌi te ȳt iweꞌeg̃ꞌi nakat moherep hap e. (Porowepiu 18:13) Miꞌi pote wakuꞌi epyꞌahak neꞌi emempyt ete. — Porowepiu 19:11

KAN ETUNUG̃ KUAP.

• Emempytꞌīn ȳt kat kuapꞌi haype inug̃ saꞌag̃. Ȳt nakuꞌi epyhyp iꞌatuehay neig̃ epyꞌahak neꞌi iꞌatuete.

• Epakup te turān aikotā̃ asom erenentup. Kat asom poꞌog̃ waku epe. Miꞌi hap ete waku hotꞌokꞌe ehay emempytꞌīn wȳwo turān.

KAN TUPANA EHAY AIMŪꞌE — Uhaꞌyru erewanentup o uimienoi kape eꞌywot nãpin hap kape iꞌewȳte etoiat reiꞌo ety piat enãpin hap koꞌi e. (Porowepiu 1:8) Ieuwa toꞌe — Eweiꞌatumūꞌe ro eimempytꞌīn e. Miꞌi pote waku ȳwotꞌīn nyꞌīn taꞌatuhoꞌomūꞌe taꞌatumempytꞌīn taꞌatumontypot kahato hamo. (Ewesu 6:1-3 kape) Hirokaria teꞌerehaꞌat kuap iꞌatuꞌȳwotꞌīn toꞌoꞌewy yn tukupteꞌen wentup mikyꞌesat upi sio ȳt hap. (1 Kurintiu 1:10) Miꞌi pote erewanentup tuweupi eharyꞌi eꞌaito ete pote ȳt nakuꞌi ehay hirokaria ewakai katupono miꞌi hap etunug̃ mote kurin upi kurin upi emempytꞌīn emontypot poꞌog̃ꞌi hamo.

KAN ETUNUG̃ KUAP.

• Waku seꞌaito seharyꞌi toꞌoꞌehay aikotā̃ me taꞌatuꞌapiheg̃ taꞌatumempytꞌīn iꞌatukyꞌe hap wȳwo hamo.

• Eꞌaito eharyꞌi tuwanentup tuweupi aikotā̃ me ehoꞌomūꞌe emempytꞌīn hap ete pote waku etikuap kahato eꞌaito eharyꞌi wanentup hap koꞌi.

KAN TUPANA EHAY AIMŪꞌE — Waku etinãpin o hirokat muap wakuat upi hewyry waku puat hamo e. (Porowepiu 22:6) Pȳwo pe waku ehoꞌomūꞌe emempytꞌīn kat koꞌi kat koꞌi etiat. Waku erenentup — Aikotā̃ me asom atiꞌapiheg̃ kuap uimempytꞌīn ikyꞌe hap wȳwo ere. (Saumu 127:4; Porowepiu 29:17) Ȳt nakuꞌi etiꞌahyk ahyk kahato emempytꞌīn. Waku ehoꞌopowȳro iꞌatuepiat ewoꞌonãpin hap koꞌi kuap hamo. (Porowepiu 28:7) Iꞌewȳte ehoꞌomūꞌe emempytꞌīn taꞌatukyꞌe Ieuwa hawyi iwoꞌonãpin hap koꞌi hamo. (Saumu 1:2) Miꞌi hap iꞌatupowȳro ikuap hamo kat som waku taꞌatunug̃ sio kat som ȳt nakuꞌi taꞌatunug̃ hap. — Epereu 5:14

KAN ETUNUG̃ KUAP.

• Ehoꞌomūꞌe o emempytꞌīn teꞌeruwehik Ieuwa ete iwyꞌok sese wo tukupteꞌen hamo iꞌewȳte taꞌatupȳwo hete hamo

• Etiꞌatumūꞌe o emempytꞌīn taꞌatumitumuo hamo saꞌag̃ nug̃ haria pupi. Kotā̃ e hap. Internet pe toig̃ kahato hirokaria maꞌat terān haria hawyi woꞌosīt sīt haria. Etiꞌatumūꞌe o pya kahato tukupteꞌen iꞌatukai hap ete.