Ewepīt terān eꞌaito eharyꞌi emempytꞌīn wȳwo maꞌato asuwe putꞌokꞌe ēte niatpo hap koꞌi emoꞌarōt kahato kuap. (Ekeresiasi 9:11) Maꞌato Ieuwa ti rat aipowȳro kahato woꞌokyꞌe hap popuo wahoꞌopot turān. Miꞌi tum epe woꞌonãpin hap koꞌi. Etiꞌatumontypot pote en hawyi ewyriaꞌīn eweiꞌakīt hamo niatpo hap koꞌi.

KAN TUPANA EHAY AIMŪꞌE — Tupana aikotā̃ mītꞌīn timohy yrysakag̃ ipotyi rakat hero iꞌakag̃ ete miꞌi hap ewy etihep uhetiat uhero hap uipyꞌa piat hap e. (1 Peteru 5:7) Waku ti hotꞌokꞌe ēte ȳt Tupanaꞌi emosoꞌopot nug̃ hap. (Tiaku 1:13) Erehik poꞌog̃ poꞌog̃ Ieuwa ete pote miꞌi epowȳro poꞌog̃ hamo. (Isaia 41:10) Tupana Ehay toꞌe — Etimoherep epyꞌa piat ehaty hap Tupana kape katupono ehehakyeraꞌat hat sese toig̃neꞌen. — Saumu 62:8

Eremūꞌe hawyi etimowempāp Tupana Ehay wuatꞌi eꞌāt pe pote miꞌi hap emoesaika hamo. Iꞌewȳte erehaꞌat hamo aikotā̃ Ieuwa enãpin ehoꞌopot turān tokyꞌe hap wȳwo. (2 Kurintiu 1:3 hawyi 4; Humanu 15:4) Hawyi tutum hamuat epe towese hap ewanentup hawe woꞌowese hap yn topyhuꞌat hamo. — Wiripu 4:6 hawyi 7, 13

KAN ETUNUG̃ KUAP.

• Ehentup Ieuwa powȳro hap upi — Pyno Ieuwa uimoperupꞌi waku pe arewanentup hamo ere.

• Ehentup hawyi erewanentup o kat woꞌonãpin hap koꞌi poꞌog̃ waku rakat epe.

KAN TUPANA EHAY AIMŪꞌE — Iweꞌeg̃ nakat wanentup hawe ti toig̃neꞌen kahato weꞌeg̃ hap etiat iwemūꞌe terān hap. Iweꞌeg̃ nakaria ti ikāt kahato weꞌeg̃ kuap taꞌatuepiat hamuat hap e. (Porowepiu 18:15) Niatpo hap koꞌi putꞌokꞌe ēte pote waku erenentup kahato ewyriaꞌīn kape. Waku etikuap iꞌatupyꞌa pywiat koꞌi etiat iꞌewȳte erenentup kahato iꞌatuehay kape. — Porowepiu 20:5

Emikyꞌe ikuꞌuro pote ȳt eremonti teiꞌo etimoherep epyꞌa piat ehaty hap mītꞌīn me. Waku hotꞌokꞌe ēte Iesui wyꞌok ikuꞌuro hawyi miꞌi tuwak taꞌyn. (Iuwãu 11:35; Ekeresiasi 3:4) Pyno kat som epowȳro kuap. Waku eremohy iꞌewȳte ereket se. (Ekeresiasi 4:6) Meig̃muewat koꞌi epowȳro kahato kuap niatpo hap koꞌi puo erokosap turān.

KAN ETUNUG̃ KUAP.

• Ȳt nakuꞌi ehay ewyriaꞌīn wȳwo niatpo turān yn maꞌato waku ehay tuereto iꞌatuwȳwo. Meremo neꞌi miꞌi hap waku etunug̃. Miꞌitā̃ mote putꞌokꞌe niatpo hap koꞌi ewyriaꞌīn ete iꞌatuehay kahato terān ewȳwo miꞌi hap etiat.

• Asuwe iraniaꞌīn tokosap taꞌyn niatpo hap koꞌi aikotā̃ eꞌewy miꞌi pote ehay kahato iꞌatuwȳwo.

KAN TUPANA EHAY AIMŪꞌE — Karāmpe hoꞌopot piat ereig̃neꞌen turān ewyꞌok toig̃neꞌen epowȳro hamo e. (Porowepiu 17:17) Ewyꞌok koꞌi epowȳro kahato terān maꞌato asuwe taꞌatukuapꞌi aikotā̃ me hap. Miꞌi pote waku ehay kahato iꞌatuwȳwo kat som waku taꞌatunug̃ epowȳro hamo hap etiat. (Porowepiu 12:25) Iꞌewȳte etikāt o mowȳro hap mītꞌīn Tupana montypot sese haria pe. Miꞌiria taꞌatumoherep kuap epe Tupana Ehay piat woꞌonãpin hap koꞌi waku kahato rakaria. — Tiaku 5:14

Waku erehik mītꞌīn Tupana mohey sese haria ete miꞌiria emoesaika kahato kuap. Iꞌewȳte etiꞌatumoesaika kuap iraniaꞌīn hoꞌopot rakaria. Miꞌitā̃ etunug̃ mote emoesaika kahato wy. Etiꞌatumūꞌe kuap emohey hap etiat iꞌewȳte Tupana piat aru e hap koꞌi etiat. Waku etipowȳro ihakyꞌeꞌi rakaria iꞌewȳte ȳt pyaꞌi ereig̃neꞌen emikyꞌe koꞌi kai ewyꞌok koꞌi kai neig̃ ereig̃neꞌen eweran. — Porowepiu 18:1; 1 Kurintiu 15:58

KAN ETUNUG̃ KUAP.

• Waku ehay ewyꞌok sese wȳwo iꞌewȳte etiꞌaro epowȳro hamo.

• Ehay pȳwo pe mītꞌīn me kat koꞌi emikyꞌesat oktān hap etiat.