Waku seharyꞌi seꞌaito toꞌowȳwo iꞌatupotpap wentup yn ewy aikotā̃ yara kaꞌiwaria toꞌopowȳro hap ewy. Miꞌitā̃ mote niatpo turān ȳt teꞌeruwanentup hamoꞌi teꞌeruwewowi yn maꞌato toꞌopowȳro hamo.

TUPANA EHAY HENOI — Tupana tunug̃ miꞌiria wentup mīt ewywuat e. — Mateu 19:6.

Chistopher e hap het rakat toꞌe — Ȳt nakuꞌi seꞌaito tuwanentup tuwewowi yn sio seharyꞌi tuwanetup tuwewowi yn maꞌato waku kahato iꞌatupotpap toꞌowȳwo iꞌatuwepīt tukupteꞌen hamo e.

Karāmpe woꞌomenaru haria teꞌeruwanentup teꞌeruwewowi yn pote taꞌatuꞌakit kuap hamoꞌi niatpo hap koꞌi maꞌato tuꞌuka toꞌoꞌehay wo miꞌi pote poꞌog̃ niatpo hap koꞌi putꞌokꞌe iꞌatuete hamo.

Alexandra e hap het rakat toꞌe — Waku woꞌomenaru haria toꞌopowȳro. Atipowȳro hinꞌi uheꞌaito pote urutoꞌowyꞌok sēse hamoꞌi. Urutoꞌopowȳroꞌi pote uruiꞌaira kuapꞌi weꞌeg̃ hap wȳwo urumiꞌaira waku kahato rakat e.

WAKU APOꞌERE EWEPE

• Uhedinheiro uiat yn ere asom.

• Areig̃neꞌen waku poꞌog̃ karāmpe uheꞌaito sio uheharyꞌi pya uikai ere asom.

• Uheꞌaito sio uheharyꞌi tikyꞌe kahato towyriaꞌīn hap atikuap pykai maꞌato arewyꞌinug̃ terānꞌi iꞌatuwȳwo ere asom.

EIWOꞌOEHAY TUERETO O

• Kat hap ete eiwoꞌopowȳro raꞌyn.

• Kat hap ete eiwoꞌopowȳro kuap poꞌog̃.

• Kat waku ewetunug̃ eiwoꞌopowȳro poꞌog̃ poꞌog̃ hamo.

MOWȲRO HAP KOꞌI

• Kotā̃ e hap. Erewanentup woꞌomenaru hap aikotā̃ wemahara hap ewy maꞌato eiwemahara turān eweikupteꞌen ȳt pyaꞌi eiwoꞌokai hinꞌi. Miꞌi pote waku apoꞌeweiꞌe — Kat waku watunug̃ watemahara wentup ewy yn hamo waku apoꞌeweiꞌe.

• Ȳt nakuꞌi erewanentup hawe — Uiweran atiꞌakit kuap niatpo hap koꞌi. Maꞌato waku poꞌog̃ — Aikotā̃ meig̃ uito hawyi uheꞌaito sio uheharyꞌi wȳwo watiꞌakit kuap niatpo hap koꞌi aiwoꞌowȳwo ere waku.

Ethan e hap het rakat toꞌe — Ȳt nakuꞌi ere — Uhepap poꞌog̃ ekai ere teiꞌo maꞌato waku poꞌog̃ eweikupteꞌen wentup yn ewy woꞌowese hap wȳwo.

TUPANA EHAY HENOI — Ȳt erewanentup kaꞌap teiꞌo emikyꞌesat nug̃ hap kape emikyꞌesat koꞌi ete. Poꞌog̃ waku watuwanentup āt kaꞌap iraniaꞌīn mikyꞌesat nug̃ hap ete e. — Wiripu 2:3, 4.