Karāmpe woꞌomenaru haria toꞌomontypot pote taꞌatumoherep toꞌokyꞌe hap teꞌeruwanentup hap ȳt wentup ynꞌi pykai. Popera Dez Lições para Transformar seu Casamento e hap henoi seꞌaito seharyꞌi toꞌomontypot hap etiat — Miꞌiria ȳt teꞌeruwanentupꞌi teꞌeruwemikyꞌesat yn nug̃ hap kape. Maꞌato toꞌoꞌehay kahato iꞌewȳte teꞌeruwanentup kahato toꞌoꞌewowi. Miꞌi hawyi taꞌatuꞌaira kat poꞌog̃ waku taꞌatuepiat hamo e.

TUPANA EHAY HENOI — Ȳt karāmpeꞌi watoig̃neꞌen ȳt hegyiꞌatꞌi rakat no watiꞌatukyꞌe sēse mītꞌīn mote e. — 1 Kurintiu 13:4, 5.

Micah e hap het rakat toꞌe — Atimontypot uheharyꞌi pote ȳt atimohitꞌi neig̃ atimoꞌarōt miꞌi kat pote ȳt atikyꞌesatꞌi aiwoꞌoꞌatoiat hamo hap e.

Wemenaru haria ȳt toꞌomontypotꞌi pote iꞌatuehay saꞌag̃ toꞌoete hawyi toꞌomohit tuereto. Miꞌi hap etiat wemūꞌe haria teꞌeroꞌe — Wemenaru haria ȳt toꞌomontypotꞌi pote toꞌoꞌatoiat kuap neꞌi iꞌatuꞌe.

Brian e hap het rakat toꞌe — Ehay saꞌag̃ sio erekyryꞌi eharyꞌi ete pote miꞌi iꞌarōt hamo. Meketā̃ hap etunug̃ tuereto pote eharyꞌi ȳt emohey hamoꞌi poꞌog̃ e.

WAKU APOꞌERE EWEPE

Wentup semana turān waku erenentup kahato kat etunug̃ tuereto hap kape hawyi kat ere kat ere tuereto hap kape. Miꞌi hawyi apoꞌere ewepe te

• Karānia wo asom uhehay saꞌag̃ uheharyꞌi sio uheꞌaito ete. Karānia wo asom uhehay sē uheharyꞌi sio uheꞌaito wakuat koꞌi ete ere.

• Mesūwat semana turān aikotā̃ meig̃ atimontypot uheharyꞌi sio uheꞌaito ere.

EIWOꞌOEHAY TUERETO O

• Aikowat asom aimienoi hawyi aiminug̃ koꞌi aipowȳro watoꞌomontypot hamo eweiꞌe.

• Aikowat asom aimienoi hawyi aiminug̃ koꞌi watoꞌomohit hamo eweiꞌe.

MOWȲRO HAP KOꞌI

• Waku etiwan popera pe kat eharyꞌi sio eꞌaito tunug̃ kuap emontypot hamo 3 sehay hap ewy etiwan hawyi etum emiwan eharyꞌi pe sio eꞌaito pe hawyi waku miꞌi tunug̃ wy. Miꞌi hawyi waku etunug̃ aikotā̃ imiwan piat ewy.

• Waku etiwan eꞌaito sio eharyꞌi wakuat koꞌi etiat hawyi ehehay eiwoꞌope meig̃muewat wakuat koꞌi etiat.

Megan e hap het rakat toꞌe — Karāmpe atimontypot uheꞌaito pote atimoherep uiminug̃ koꞌi puo pyi atikyꞌe kahato hap hawyi atimowepīt terān hap. Uiminug̃ heupiat kurin pykai maꞌato miꞌi hap puo pyi atimoherep atimontypot kahato hap e.

Waku poꞌog̃ etimoherep eminug̃ koꞌi puo pyi etimontypot kahato eharyꞌi sio eꞌaito hap.

TUPANA EHAY HENOI — Waku watuwepainug̃ hap ewy waku ahesokpe pakup watopag̃ maꞌato wentup ahesokpe pakup woꞌokyꞌe hap kawiat. Wentup aipainug̃ hap woꞌowese hap. Wentup aipainug̃ hap — En poꞌog̃ waku uikai e hap aiwanentup hawe. Wentup aipainug̃ hap paa e hap. Wentup aipainug̃ hap aiperupꞌi hap. — Korosi 3:12.