Uwe asom Tupana tiꞌaira Aiporekuat no.
Uwe mītꞌīn Porekuat nuat hamo hap Tupana henoi tehay pe topaꞌãu puo pyi ihaig̃niaꞌīn tiwan hamo. Miꞌi hap koꞌi etiat etikuap hamo.
Tupana ti iꞌaira. Pȳwo ti rat atunug̃ aru uimiꞌairo morekuat nuat. Miꞌi pe atum aru wuatꞌi ywania toran epe e Tupana. — Saumu 2:6, 8.
Miꞌi ti aru morekuat Tawi emiariru miariru. Wentup ok hirokat tuwemoherep irane ihaig̃nia e. Miꞌi ti tutum ahepe aipotypot sēse wo hawyi mekewat woꞌowese hap ȳt karāmpeꞌi tokosap. Morekuat Tawi apyk hap tote wuatꞌi eꞌāt piat morekuat koro wo toig̃neꞌen. — Isaia 9:6, 7.
Iꞌywaĩꞌĩ aru Perẽi pe. Tawa Perẽi pe ti aru tuwemoherep wentup ok Isareu ywania porekuat sēse. Miꞌi hawyi yne mesūwat mytȳp oktān eiporekuat no toig̃neꞌen. — Mikeia 5:2, 4.
Iꞌatumikyryꞌi hawyi taꞌatuꞌauka. Ȳt uweꞌi iꞌoksatꞌi mītꞌīn mikyryꞌi wo toig̃neꞌen. Yne mītꞌīn teꞌeraꞌape morem neꞌi hewowi. Ȳt towat tominug̃ saꞌag̃ upiꞌi tohoꞌopot. Pȳwo kahato tohoꞌopot kahato ahetiatno raꞌyn aiwat aimiꞌaparap upi. — Isaia 53:3, 5.
Tupana mimoehaig̃te iꞌewȳte Tupana mimowato. Ȳt karāmpe kuapꞌi aru uheig̃neꞌen hap etoiat g̃uꞌuro hap sēse pe. Ȳt karāmpeꞌi nem hap ewy putꞌokꞌe uhete. Miꞌi hawyi uhete uiwepīt kahato hap toig̃neꞌen eipyꞌasetpe e. — Saumu 16:10, 11.
Iesui poꞌog̃ waku torānia kawiat morekuat
Nimo Tupana tunug̃ saꞌawy mītꞌīn turān hawyi korā̃ te wentup ok yn mīt wȳwo tuwemoherep yne Tupana Ehay piat e hap koꞌi ewy. Miꞌi ti Tupana saꞌyru. Iꞌewȳte anjo toꞌe Maria pe Iesui ty wuat pe — Miꞌi ti aru Tupana tunug̃ morekuat no aikotā̃ saꞌawyꞌi wuat morekuat Tawi ewy. Miꞌi ti aru ieig̃neꞌen morekuat nuat hap. Ȳt karāmpeꞌi aru ikahuro e. — Iruka 1:31-33.
Maꞌato miꞌi turān Iesui Morekuat no ite mesūwat yi tote maꞌato atipy tote pyi morekuat no hamo. Kat pote asom Iesui poꞌog̃ waku torānia morekuat koꞌi kai. Etikuap hamo miꞌi hap etiat toig̃neꞌen mesūwat yi tote turān wuat tominug̃ koꞌi puo pyi hap.
Iesui tenentup kahato mītꞌīn kape. Iesui tiꞌatupowȳro torānia mītꞌīn — ihaig̃niaꞌīn haryporiaꞌīn kurum iwasuria makuptiaria iꞌewȳte ipōro rakaria hawyi hekat kahato rakaria iꞌewȳte ȳt hekatꞌi rakaria. (Mateu 9:36; Maku 10:16) Wentup eꞌāt pe ihaig̃nia hepihi pihi rakat hentup mowȳro hap Iesui pe — Uhyt uimoehaig̃te terān mote uimoehaig̃te kuap e. Iesui tihakyꞌeꞌi raꞌyn hawyi toimoehaig̃te ihaig̃nia. — Maku 1:40-42.
Iesui aimūꞌe aikotā̃ me watimowepīt kuap Tupana hap ete. Iesui toꞌe — Tupana eweimontypot turān pykai iꞌewȳte ehekat eweimontypot pote ȳt karāmpeꞌi Tupana sēse eweikuap e. Iꞌewȳte Iesui ainãpin aikotā̃ watikyꞌesat iraniaꞌīn tunug̃ waku rakat ahepiat hap waku miꞌi hap ewy te watunug̃ iraniaꞌīn upi. Iꞌewȳte Iesui aimūꞌe Tupana tenentup kahato aiminug̃ koꞌi kapiat hap. Miꞌi pote Tupana tikuap terān kahato aikotā̃ aipyꞌa piat aiwanentup koꞌi hap. Miꞌi pote Tupana mowepīt hamo waku aiwanentup saꞌag̃ hap koꞌi watiꞌywyk. (Mateu 5:28; 6:24; 7:12) Iꞌewȳte Iesui aimūꞌe aiwepīt sēse hamo waku watikuap kat Tupana tikyꞌesat watunug̃ hap. Watikuap hawyi watihaymontypot hap. — Iruka 11:28.
Iesui aimūꞌe aikotā̃ me watiꞌatukyꞌe sēse mītꞌīn hap. Mītꞌīn tipuenti waku kahato Iesui minug̃ koꞌi iꞌewȳte Iesui mienoi koꞌi mītꞌīn pyꞌa pe kahato tuwehytꞌok. Hawyi mītꞌīn sem teꞌeroꞌe — Kat poteig̃ meiẽwat mīt ainãpin ȳt iraniaꞌīn woꞌonãpin hap ewy hinꞌi iꞌatuꞌe. Aimūꞌe kuap kahato. Ihay hampȳk kahato iꞌatuꞌe. (Mateu 7:28, 29) Iesui toꞌe — Eweiꞌatukyꞌe ro ehewanig̃kaptia e. Iesui hentup toꞌauka haria upi. Miotā̃ e — Uiꞌȳwot wāure wo o ereig̃neꞌen uhewanig̃kaptia minug̃ saꞌag̃ hap kai e. Ȳt taꞌatukuapꞌi uwe sēse uito hap taꞌatuꞌauka e. — Mateu 5:44; Iruka 23:34.
Iesui yn poꞌog̃ waku mītꞌīn porekuat no kat pote miꞌi hewaku kahato rakat tenentup kahato mītꞌīn kape rakat. Maꞌato karāmpe aru mesūwat yi Porekuat no toig̃neꞌen.