Saꞌawyꞌi Wuat Iuwãu 2:1-29
2 Pyno uhaꞌyruꞌin koꞌi uhakiꞌytꞌin koꞌi yt atikyꞌesat i ti eweiꞌaparap Tupana pe iꞌewyte miitꞌin me. Miꞌi hap etiatno ti mesup atiwan ehewowi. Maꞌato watiꞌaparap Tupana pe miitꞌin me pote waku wahenoi ahepiat iꞌaparap hap. Miꞌi hawyi Aikaꞌiwat timoherep Toꞌywot pe aimohãpyk hamuat toꞌe.
2 Aikaꞌiwat Iesui ti ihay kuap kahato aikawiatno hamo katupono miꞌi ti yt karãpe i iꞌaparap Tupana piat hat. Aiꞌapiheg hap tutuꞌu yne. Iꞌewyte aiꞌapiheg hap saꞌup tutum yne. Maꞌato yt aiwat ahaꞌup mo yn i tuweium maꞌato yne yi totiaria yne ywania saꞌup mo tuweium Toꞌywot pe aiꞌapiheg hap saꞌup mo are.
3 Karãpe watunug Tupana mikyꞌesat ewy ainapin hap oktan miꞌi hawyi watikuap taꞌyn aipyꞌa pe Tupana kuap haria sese wo watoineꞌen hap.
4 Maꞌato -Atikuap ti Tupana watoꞌe yt imikyꞌesat ewywuat nug hin i pykai miꞌi pote heso rakatno watoineꞌen. Mio tã watoꞌe pote yt kat i aipyꞌa pe topyhuꞌat pywo aiꞌe hap.
5 Maꞌato watunug ihay ewy imikyꞌesat ewywuat pote ikyꞌe sese hatno watoineꞌen watunug imikyꞌesat ewy pote. Miꞌi tã watunug pote watikuap kahato Tupana woꞌowese hap.
6 Uito ti Tupana wywo sese watoꞌe pote waku watoineꞌen haꞌyru ewy hakiꞌyt ewy are. Waku watunug Aikaꞌiwat Iesui minug ewywuat yn waku watunug.
7 Uhekatuwyria yt kat i einapin pakup i hap ahenoi ehepe maꞌato ahenoi saꞌawyꞌi wuat ainapin hap te aikotã saꞌawyꞌi te ainapin hap ewy yn ahenoi ehepe. Pyno Tupana e hap saꞌawyꞌi wuat ahenoi ehepe. Eiwoꞌokyꞌe ro e hap yn ahenoi ehepe.
8 Ipotꞌi rakat sehay maꞌato ti yne eꞌat pe wyti ipakup takatno topyhuꞌat aikotã Aikaꞌiwat aikyꞌe hap ewy waku watoꞌokyꞌe are. Miꞌi tã watunug hawyi pywo imohey haria miꞌiria iꞌatuꞌe aru iraniaꞌin.
9 Maꞌato uito ti Tupana mohey kahato hat hẽtyhot puo uhewyry watoꞌe wen maꞌato ti aiwyriaꞌin ete aipyꞌahak yn watoineꞌen pote iꞌypyryp we wãtym muat ewy raꞌyn watopyhuꞌat are.
10 Maꞌato uwe uwe towyriaꞌin Iesui mohey haria wywo waku kahato toineꞌen toꞌokyꞌe kahato miꞌi pote ti pywo ariãty hot puo hewyry rakat ewy topyhuꞌat. Miꞌi hat ti yt taꞌat kuap i kat pote yt iꞌypyryp we i hewyry pote. Iꞌewyte yt kat i ikai miitꞌin maꞌat hamuat neꞌi.
11 Maꞌato aiwyriaꞌin Iesui mohey haria ete aipyꞌahak miꞌi hap kaipyi iꞌypyryp wiat ewy watukupteꞌen aikotã yt ihapytig i rakaria sese wo watoineꞌen.
12 Uimepytꞌin eiminug saꞌag koꞌi yne Tupana timohãpyk taꞌyn watomohey Aikaꞌiwat Iesui hawyi.
13 Miꞌi pote worohoꞌonapin neran kahato uimiwan me uiꞌywotꞌin. Eipe ti wuatꞌi nug hap eꞌyian note wuat ieineꞌen haria ti eipe. Tupana kuap kahato haria eipe. Iꞌewyte miꞌi pote worohoꞌonapin uimiwan me kurumꞌin makuptiaria katupono wuatꞌi saꞌag kaꞌiwat akit haria ti eipe ahiag akit haria. Miꞌi pote worohoꞌonapin uimiwan me.
14 Uimepytꞌin eweikuap kahato Aiꞌywot sese. Miꞌi pote worohoꞌonapin eipe uimiwan me. Uiꞌywotꞌin eipe ti yi nug hap eꞌyian mete wuatꞌi woꞌomoieineꞌen hat kuap haria eipe. Tupana sese kuap haria eipe are miꞌi pote worohoꞌonapin eipe uimiwan me. Kurumꞌin ehesaika kahato katupono Tupana ehay ahyt eiam ni eipe. Miꞌi pote wuatꞌi saꞌag nug haria akag akit haria ti eipe. Miꞌi pote ti uimiwan me worohoꞌonapin.
Yt Naku I Mesuwat Rotiat Kyꞌe Haria Wo Watoineꞌen
15 Pyno yt eweikyꞌesat i raꞌyn o iraniaꞌin mikyꞌesat saꞌag koꞌi. Iꞌewyte yt eweikyꞌesat i raꞌyn o mesuwiaria yi totiaria saꞌag koꞌi. Maꞌato watikyꞌe mesuwarotiat minug saꞌag pote yt kat i raꞌyn Aiꞌywot atipy piat kyꞌe hap aikai. Pyno ahenoi teran ehepe kat koꞌi kat koꞌi yt naku i watikyꞌe mesuwarotiat koꞌi aipiit mikyꞌesat koꞌi yt nakuat i nug hap.
16 Taꞌi eheha tikyꞌesat kat koꞌi kat koꞌi yt Tupana mikyꞌesat ewy i iꞌewyte -Uito poꞌog watoꞌe hap yn watikyꞌesat. Uimotypot hap yn atikyꞌesat watoꞌe pote miꞌi hap koꞌi yt Aiꞌywot atipy kaipywiat piat yt aimuꞌe hap i.
17 Maꞌato mesuwarote pywiat kaipyi yn aimuꞌe saꞌag koꞌi miitꞌin mikyꞌesat koꞌi ti aru tuweityk yne. Maꞌato uwe uwe Tupana mikyꞌesat ewywuat nug haria ti aru teꞌeropyhuꞌat wuatꞌi eꞌat pe.
Putꞌok Iꞌatuꞌe Uito Iesui E Haria Maꞌato Heso
18 Uhakiꞌytꞌin uhaꞌyruꞌin putꞌok e irane ikahuro hap eꞌat katupono ti putꞌok e irane Aipotypot Iesui ewanikaptia are. Miꞌi ti Aipotypot Iesui pohari teran haype. Koitywy typyꞌi kahato miꞌi ewywuaria tukupteꞌen. Miꞌi hap kaipyi ti watikuap taꞌyn yt pya i raꞌyn ikahuro hap eꞌat hap.
19 Saꞌawyꞌi te ti aiꞌewy kahato tukupteꞌen tuereto aipyꞌasetpe maꞌato mesup ti aiꞌatoiat raꞌyn. Tuwat yne raꞌyn miꞌiria. Tuwat raꞌyn ahiag upi kat pote yt aimimohey ewywuat i miꞌiria pote. Maꞌato aimimoheyria pote ti teꞌeropyhuꞌat aiwywo. Miꞌi pote ahokꞌiwat raꞌyn.
20 Maꞌato aito ti yt miꞌi tã haria hin i raꞌyn katupono ti Tupana Paꞌãu topyhuꞌat kahato raꞌyn ahete. Ahowapy kahato raꞌyn Iesui tum ahepe Topaꞌãu hawyi.
21 Miꞌi hap kaipyi watikuap yne kahato raꞌyn pywuat sese sehay Tupana Paꞌãu aimuꞌe pote. Ehepiat ikuap pykai raꞌyn ti worohoꞌomuꞌe i raꞌyn sehay pywuat sese rakatno.
22 -Iesui yt Tupana Mipoꞌoro Aiporekuat nuat i e haria ti heso yn nakaria wo teꞌeropyhuꞌat. Iesui ewanikaptia wo wyti miꞌiria.
23 Miꞌiria ti Iꞌywot Haꞌyru ewanikaptia sese miꞌiria. Uwe uwe iraniaꞌin me -U yt atimohey i ti Iesui toineꞌen Tupana Saꞌyru hap e hat. Miꞌi hat ti yt Tupana wywo i sese toineꞌen. Maꞌato uwe uwe iraniaꞌin me -Uito Iesui mohey hat e miꞌi hat ti Tupana wy sese toineꞌen. Taꞌi watipun neꞌi raꞌyn Haꞌyru pote iꞌewyte Iꞌywot pun haria wo raꞌyn watoineꞌen. Maꞌato -Iesui En nyti Tupana Saꞌyru sese watoꞌe pote Iꞌywot mohey haria wo watoineꞌen. Tupana toineꞌen aipyꞌa pe.
24 Saꞌawyꞌi wuat aimikuap aikai potꞌi toineꞌen pote miꞌi hawyi Haꞌyru Iꞌywot wywo watoineꞌen woꞌowese kahato haria wo.
25 Miꞌi tã eweikupteꞌen pote -Atum potꞌi eheineꞌen wuatꞌi eꞌat piat hamuat hap e Aipotypot ahepe.
26 Pyno arehay poꞌoro hamuat ehewowi eiweꞌeg wo o eimaꞌat sehay wuat haria pupi.
27 Aipotypot Iesui Paꞌãu aimuꞌe hap sese topyhuꞌat katupono toineꞌen Ipaꞌãu aikai pote miꞌi yn aimuꞌe. Miꞌi hawyi yt uwe i aimuꞌe pykai toineꞌen. Miꞌi ti aimuꞌe aat kaꞌap. Yne eꞌat pywo rakat etiat aimuꞌe kahato Ipaꞌãu. Yt kat i saꞌag ete aimuꞌe. -Pyno uipap eupi watoꞌe. Uimuꞌe ro watoꞌe Ipaꞌãu me. Miꞌi tã watunug mote aiwoꞌowese hap yn topyhuꞌat Aikaꞌiwat Iesui wywo.
28 Uimepytꞌin waku kahato ti aipap Aikaꞌiwat upi. Miꞌi pote ti aru karamuo Aikaꞌiwat taꞌaipok i raꞌyn meikowo miꞌi hawyi yt kat i aiwemoti hap toineꞌen ipupiat hap. Yt watuwemig hin i ipupi maꞌato watuwehum yn huut turan. Yt kat i aheha yi kape huut turan. Aipotypot ewywuat hap wahekatup kahato pote yt kat i aiꞌapiheg hap Tupana kaipyi. -Waku yn e ahepe. Miꞌi pote aito iꞌewyte waku pe yn watoineꞌen iꞌewy aito pote.
29 Taꞌi watikuap kahato raꞌyn mekewat wakuap yn nug hat Aikaꞌiwat Tupana Saꞌyru. Miꞌi hawyi Aikaꞌiwat ewy wakuap nug haria aito pote iꞌewyte Tupana mepytꞌin sese wo raꞌyn watukupteꞌen are.
