Saꞌawyꞌi Wuat Iuwãu 4:1-21
4 Uiwyriaꞌin yt eweimohey teiꞌo yne woꞌomuꞌe haria -Uito Tupana Paꞌãu eiam iꞌatuꞌe pykai. Waku eweikat i kat i miꞌiria sio Tupana Paꞌãu eiam sio yt hap kuap hamo. Katupono iꞌatu kahato woꞌomuꞌe haria mesuwat yi totiaria yt pywo piat haria i katupono wẽtup paꞌãu iꞌatupiit pe.
2 Pyno ahenoi teran ehepe aikotã aikotã waku wahãꞌãg miꞌiria sio waku sio yt naku i hap kuap hamo sio Tupana Paꞌãu kaipyi sio yt hap kuap hamo. Miꞌi pe waku apo ere o -Mehin mana etimohey apo uhyt Tupana Mipoꞌoro Aiporekuat nuat Iesui tuwemoherep miit kawiat hap sio yt apo watoꞌe. Miꞌi pote aiwesat -Taꞌi atimohey kahato miꞌi uito e pote Tupana eiam kahato miꞌi.
3 Maꞌato -Yt atimohey i miꞌi e pote iꞌewyte yt Iesui mohey hat i mio tã e hat yt Tupana eiam hin i topyhuꞌat. Kat pote wẽtup Paꞌãu eiam pote. Aikotã toꞌe Tupana saꞌawyꞌi hap ewy koitywy topyhuꞌat raꞌyn. -Tuut aru wẽtup paꞌãu porekuat nuat ewanikap ti miꞌi. Koitywy watikuap miꞌi maꞌãu saꞌag toineꞌen naꞌyn aipyꞌasetpe hawyi aimaꞌatꞌi maꞌatꞌi raꞌyn.
4 Uimepytꞌin aito ti Tupana watnuat koꞌi sese. Yt pywo piat sehay akit hanuaria i aito. Aimuꞌe haria yt pywo piat i yt Tupana kaipywiat koꞌi akit hanuat haria aito. Maꞌato Tupana Paꞌãu aipiit piat poꞌog hesaika aimuꞌe saꞌag haria paꞌãu kai. Aito Tupana ehay moherep haria maꞌato miꞌiria mesuwarotiat seko saꞌag enoi haria.
5 Tupana ehay taꞌatuhenoi saꞌag kahato ahepe. Miꞌi hawyi iraniaꞌin yt Iesui mohey i haria -Pywo iꞌatuꞌe katupono miitꞌin eko saꞌag ewywuat waku watunug iꞌatuꞌe pote. Miꞌiria ahiag watnuaria tukupteꞌen.
6 Maꞌato aito Tupana watnuaria watoineꞌen. Miꞌi hawyi yne Tupana watnuaria teꞌeruwewaure kaꞌa kahato aimienoi kape. Maꞌato iraniaꞌin yt teꞌeruwewaure kaꞌa i aimienoi pywuat kape. Miꞌi hap kaipyi meremo watikuap uwe Tupana Paꞌãu pywuat ehay upi toineꞌen sio uwe ahiag paꞌãu saꞌag ehay upi neꞌi toineꞌen hap.
Waku Aiwoꞌokyꞌe Hap Wuatꞌi Eꞌat Pe
7 Uiwyriaꞌin toꞌiro watoꞌokyꞌe katupono aiwoꞌokyꞌe hap nug hat Tupana. Woꞌokyꞌe haria wo watoineꞌen pote Tupana mepytꞌin no watukupteꞌen. Tupana kuap sese haria wo watopyhuꞌat.
8 Maꞌato yt woꞌokyꞌe i haria aito pote yt Tupana kuap haria wo i aito katupono woꞌopotkyꞌe hat sese ti Tupana.
9 Tupana timoherep taꞌyn ahepe aikyꞌe kahato hap katupono toipoꞌoro Tosaꞌyru sese ahowawi aimoieineꞌen pakup i hap nug hamo.
10 Saꞌawyꞌi yt watikyꞌe hin i Tupana. Miꞌi pykai aikyꞌe kahato hawyi toipoꞌoro Tosaꞌyru aiminug saꞌag koꞌi atumoma yne hamo. Haꞌyru ikuꞌuro hawyi aiꞌapiheg hap tutuꞌu yne raꞌyn.
11 Pyno waku watoꞌokyꞌe aikotã Tupana piat aikyꞌe hap ewy waku watoꞌokyꞌe.
12 Uiwyriaꞌin yt karãpe i wataꞌakasa Tupana maꞌato miꞌi pykai watikuap kahato toineꞌen aiwywo. Miꞌi hawyi watiꞌatukyꞌe miitꞌin pote Tupana toineꞌen poꞌog aikai. Aimoesaika kahato miitꞌin kyꞌe hap hãpyk nug hamo tepiat aikyꞌe hap ewywuat nug hamo.
13 Tupana tum naꞌyn ahepe Topaꞌãu hawyi meremo watikuap Tupana wywuat aheineꞌen hap watoineꞌen hap. Iꞌewyte aipyꞌa pe Tupana toineꞌen hap.
14 Tupana tipoꞌoro raꞌyn ahepe Tosaꞌyru ahehakyeraꞌat hamo. Miꞌi kape urutaꞌakasa raꞌyn. Miꞌi hawyi uruimoherep taꞌyn wuatꞌi miitꞌin me uruehay wo.
15 Uwe uwe toꞌe iraniaꞌin me -Uito atimohey kahato Iesui toineꞌen Tupana Saꞌyru sese hap e miꞌi hat Tupana eiam mo topyhuꞌat. Iꞌewyte Tupana topyhuꞌat heiam mo.
16 Miꞌi pote watikuap taꞌyn Tupana aikyꞌe hap watomohey kahato raꞌyn hawyi. Tupana ti woꞌopotkyꞌe hat sese. Miꞌi pote uwe uwe woꞌopotkyꞌe hat sese toineꞌen Tupana wywo miꞌi pote Tupana toineꞌen iwywo ipyꞌa pe.
17 Aipotypot saipepiaria ti aito. Miꞌi pote iꞌewy sese waku watoineꞌen miitꞌin pyꞌasetpe hãpyk kahato Aikaꞌiwat ewaku hap ewy. Miꞌi tã watoineꞌen pote yt watuwemoti hin i mekewat karãpe Tupana timoherep ahewaku hap sio yt hap eꞌat pe. Miꞌi hap eꞌat pe yt watuwemoti hin i katupono woꞌokyꞌe haria wo Tupana ainug towat miitꞌin kyꞌe hap ewywuat no ainug.
18 Watikyꞌe sese iraniaꞌin pote yt watokenꞌẽ hin i iꞌatupupi katupono toineꞌen aikai iꞌatukyꞌe hap sese Tupana miium kaipywiat hawyi yt watokenꞌẽ kuap i iꞌatupupi. Maꞌato watokenꞌẽ neꞌi pote yt kat i iꞌatukyꞌe hap aikai. Miꞌi hawyi watokenꞌẽ poꞌog katupono Tupana piat aiꞌapiheg hap pupi.
19 Yt watikyꞌe i te Tupana turan aikyꞌe Miꞌi. Miꞌi hap kaipyi watikyꞌe Tupana mesup. Aikyꞌe yian mete pote mesup aito watikyꞌe Tupana.
20 Karãpe wẽtup ok toꞌe ahepe -Uito atikyꞌe Tupana e maꞌato miꞌi yt topotkyꞌe hin i pykai miꞌi watikuap taꞌyn heso rakat. Karapeĩ yt watiꞌatukyꞌe i aiwyriaꞌin miꞌi pote yt watikyꞌe hin i Tupana. Katupono yt heremo hin i Tupana maꞌato iraniaꞌin heremo kahato miꞌi pote poꞌog yt niatpo i watikyꞌe hamo miꞌiria heremo pote.
21 Pyno ahenoi i raꞌyn Aikaꞌiwat piat ainapin hap sese. Mio tã e hap -Eweiꞌatukyꞌe ro eiwyriaꞌin e. Yt eweiꞌatukyꞌe eiwyriaꞌin pote pyno yt Tupana kyꞌe haria hin i eweikupteꞌen are.
