Saꞌawyꞌi Wuat Iuwãu 5:1-21
5 Uwe uwe imohey Iesui Tupana Mipoꞌoro Aipotypot nuat miꞌi hat Tupana mepyt sese wo topyhuꞌat. Karãpe watikyꞌe Aiꞌywot mepytꞌin miꞌi hawyi Aiꞌywot mowepiit hatno watopyhuꞌat. Miꞌi hawyi watoineꞌen Aiꞌywot kyꞌe hatno sese.
2 Karãpe watikyꞌe Tupana iꞌewy karapeĩ watunug Tupana piat ainapin hap koꞌi miꞌi hawyi Tupana mepytꞌin kyꞌe hatno watoineꞌen.
3 Iesui Ywot kyꞌe haria ti imikyꞌesat nug haria wo tukupteꞌen. Karãpe iraniaꞌin ahãꞌãg yt naku i nug hamo Tupana mepytꞌin aito miꞌi pote Aiꞌywot ehay upi yn waku watoineꞌen.
4 Taꞌi yt niatpo hin i watunug Aiꞌywot ainapin hap koꞌi katupono Aiꞌywot mohey haria kahato aito pote. Karapeĩ iraniaꞌin ahãꞌãg yt naku i nug hamo miꞌi hawyi yt iꞌatuehay upi hin i watoineꞌen katupono Tupana mepytꞌin aito pote.
5 Karapeĩ watomohey kahato Iesui Tupana Saꞌyru e hap miꞌi hawyi Tupana aipowyro kahato miitꞌin miat ahãꞌãg hap akit hamo. Miꞌi hawyi poꞌog ahesaika watoineꞌen iꞌatueko saꞌag nug hap kai.
6 Iesui ti Tupana miꞌairo Ahehakyeraꞌat hanuat. Miꞌi pote putꞌok e hawyi Tupana mikyꞌesat oktan yne tutunug. Hãpyk kahato toineꞌen Toꞌywot ehay ewy toineꞌen. Saꞌawyꞌi toto tosetꞌok hamo. Meiũran ikuꞌuro. Miꞌi hawyi huu taꞌat yne yi tote Toꞌywot mikyꞌesat ewy. Koitywy Tupana toꞌe wuatꞌi pe -Uhaꞌyru ti uimiꞌairo wuatꞌi Porekuat nuat e. Iꞌewyte Tupana Paꞌãu mio tã e. -Yt heso hin i e Tupana Paꞌãu ahepe.
7 Toineꞌen myẽꞌym aimuꞌe haria mesuwat yi totiaria pywo Iesui Tupana Mipoꞌoro Eiporekuat nuat e haria.
8 Taꞌi Tupana Paꞌãu ihay Iesui ete. Iꞌewyte Iꞌywot ihay Tosaꞌyru setꞌok turan. Iꞌewyte Iesui suu aimuꞌe kahato. Miꞌiria myẽꞌym ok ihay te Iesui motypot haria toꞌoꞌewyꞌewy iꞌatumienoi.
9 Iꞌewyte typyꞌi kahato miitꞌin ihay Iesui etiat rakaria. Miꞌiria -Waku watomohey Tupana e hap Tosaꞌyru piat hap. Pywo pe ti Miꞌi poꞌog poꞌog hesaika miitꞌin mienoi kai -Uhaꞌyru kahato En e hap waku watomohey.
10 Maꞌato -Yt atimohey i Tupana e pote -Heso rakat En watoꞌe tope. Maꞌato watomohey Iesui Tupana Saꞌyru hawyi iꞌewyte toineꞌen aipyꞌa pe ihay rakat pywuat e hap ewy. Maꞌato aipiit yt e i pote yt kat i Tupana pywo e hap aikai -Heso heso yn watoꞌe Tupana pe.
11 Mio tã e aipyꞌa pe -Tupana tum naꞌyn uhepe Tosaꞌyru. Miꞌi pote areineꞌen naꞌyn wuatꞌi eꞌat piatno watoꞌe aiwepe.
12 Pywo pe ti rat uwe uwe topyhuꞌat Tupana Saꞌyru eiam mo miꞌi hat yn toineꞌen wuatꞌi eꞌat pe maꞌato uwe uwe yt Tupana Saꞌyru yt eiam mo i miꞌi hat yt kat i heineꞌen wuatꞌi eꞌat piat hamuat hap.
13 Eipe ti Tupana Saꞌyru mohey haria sese eipe. Miꞌi pote atikyꞌesat eweikuap eweikupteꞌen wuatꞌi eꞌat piat hamuat hap. Miꞌi hap kuap hamo atiwan mesuwat uimiwan ehepe.
Tupana Kape Hẽtup Haria Iraniaꞌin Moesaika Haria Wo Toineꞌen
14 Karapeĩ wahẽtup Tupana pe imikyꞌesat ewy hawyi watikuap taꞌyn ahehay Tupana ewaure kaꞌa pe teke raꞌyn ahehay. Miꞌi hawyi watuwehum aat howawi aimiẽtup ium hat kape.
15 Karãpe wahẽtup imikyꞌesat oktan hawyi tuwewaure kaꞌa kahato ahehay kape hawyi -Pywo watoꞌe tutum aru aimiẽtup watoꞌe aiwoꞌope.
16 Uiwyriaꞌin karãpe wẽtup ok aiwyriaꞌin Aipotypot Iesui mohey hat yt naku i nug hat pote waku watoꞌe Tupana pe -Waku waure wo ereineꞌen aiwy minug saꞌag ete waku watoꞌe. Etihep aiwy iminug saꞌag myi watoꞌe katupono yt tuwepyi hin i tutunug saꞌag waku watoꞌe. Emohey te maꞌato yt hesaika kahato i te yt naku i nug hap akit hamo waku watoꞌe Tupana pe. Toineꞌen mekewat saꞌag nug hat sese emohey hap pun hat maꞌato miꞌi hawyi yt tutunug i miꞌi pote waku waure wo ereineꞌen aiwy minug saꞌag koꞌi kai waku watoꞌe Tupana pe. Mio tã watoꞌe pote meremo Tupana topyhuꞌat waure wo iꞌewyte tutum aiwy pe imoehãite hap imoesaika hamo are uiwyriaꞌin. Maꞌato karãpe wẽtup ok Iesui mohey hat topyhuꞌat ipyꞌahak Tupana ete Iesui ete ahete iꞌewyte -Yt atimohey i te Iesui e mio tã toꞌe haype yt imohey i hat ewy tutunug tuwepyi. Miꞌi hawyi Tupana ipyꞌahak kahato topyhuꞌat miꞌi hat ete. Yt kan hamo i watoꞌe Tupana pe -Waure wo ereineꞌen aiwy minug saꞌag kai katupono tuwepyi i ipyꞌahak toineꞌen Tupana ete watoꞌe.
17 Yne aiminug saꞌag koꞌi yt naku i topyhuꞌat Tupana wanetup hawe wen maꞌato wẽtup aiminug saꞌag poꞌog saꞌag torannia kawiat katupono karãpe aiwepywiat hap -Yt woromohey i En poꞌog watoꞌe Tupana pe Haꞌyru pe miꞌi hawyi yt kat i poꞌog paa aiꞌe hap saꞌag nug hap etiat. Miꞌi hawyi Tupana yt aimohãpyk kuap i katupono aiwepyi watipun ahehakyeraꞌat hap pote. Aiwepyi watikat aiꞌapiheg hap wuatꞌi eꞌat piat hap. Yt naku i kahato watipun imohey hap are.
18 Uiwyriaꞌin karãpe watomohey Iesui hawyi Tupana ainug tosaꞌyruꞌin tosakiꞌytꞌin wo. Miꞌi hawyi imepytꞌin koꞌi wo watopyhuꞌat. Miꞌi hawyi Aiꞌywot ewy watoineꞌen yt kat i saꞌag yt kat i yt naku i hap watunug neran. Aheko yt watunug neran i poꞌog aiminug saꞌag koꞌi saꞌawyꞌi wuat aheko saꞌag koꞌi katupono Tupana ainug tomepytꞌin no Tosaꞌyru Paꞌãu wo aipytꞌatnug hawyi. Koitywy ahowapy kahato Tupana Paꞌãu wywo. Miꞌi hawyi Tupana eiam mo kahato watoineꞌen. Miꞌi hawyi karãpe ahiag ahãꞌãg neran kat saꞌag kat saꞌag nug hamo miꞌi hawyi Tupana Paꞌãu aiꞌauka kahato ainapin kahato aihep ahiag aimaꞌatꞌi maꞌatꞌi hap po pyi. Miꞌi hawyi yt kat i ahewaure ahiag ahãꞌãg hap kape -Yt reiꞌo yt reiꞌo watoꞌe ahiag me.
19 Pywo ti rat iraniaꞌin mesuwarotiaria ahiag ehay upi yn teꞌeruwewanetup aat kaꞌap katupono ahiag emiit no teꞌeropyhuꞌat are. Maꞌato aito Tupana mepytꞌin nuat watoineꞌen pote yt iraniaꞌin ewy i aito yt kat i aikai ahiag wat.
20 Koitywy watikuap kahato Tupana saꞌyruꞌin sakiꞌytꞌin aito hap. Taꞌi watikuap Tupana Saꞌyru hawyi Tupana moherep hat sese topyhuꞌat poꞌog poꞌog mekewat pywuat etiat kuap hamo. Miꞌi tupono mekewat Tupana Mipoꞌoro Aiporekuat nuat hat watikuap hawyi topoꞌoro hat Tupana watikuap iꞌewyte. Saꞌawyꞌi watikuap teran uwe Tupana hap maꞌato yt heremo hin i Tupana ahepe. Maꞌato mesup heremo raꞌyn aheTupana katupono Haꞌyru imoherep ahepe. Tupana Haꞌyru ti Toꞌywot ewywuat wẽtup miit ewy. Karãpe wataꞌakasa Haꞌyru kape pote Iꞌywot kape ti raꞌyn wataꞌakasa wy are. Miꞌi pote mesup -Worokuap kahato En watoꞌe yn Tupana pe. Koitywy uiwyriaꞌin watoineꞌen Tupana pe aikotã Tupana eiam ewy miꞌi pe watopyhuꞌat. Saꞌawyꞌi watomohey Iesui ti Tupana Saꞌyru e hap hawyi Iesui po pe watopyhuꞌat. Ipyꞌa pe kahato watoineꞌen. Aikaꞌiwat yat piaria ewywuaria watopyhuꞌat. Iesui ti Tupana sese miꞌi pote Tupana pe watoineꞌen Iesui pe watoineꞌen pote. Iesui ti wuatꞌi eꞌat piat ieineꞌen hat iꞌewyte aito wuatꞌi eꞌat piat watoineꞌen Iesui wywo wẽtup miit piit ewywuat pote are.
21 Uimikyꞌe koꞌi uhaꞌyruꞌin uhakiꞌytꞌin uito Iuwãu ti eꞌywot uito. Uimepytꞌin ewywuat eipe miꞌi pote worohoꞌonapin. Eweiꞌatuꞌatoiat ro tupanaria yne yne aipo wuat aiminug saꞌag koi are. Miꞌi hawyi ewetunug no Tupana yn Ehetupana wo are uito Iuwãu. Pyno toran naꞌyn uimiwan areꞌe.
