Saꞌawyꞌi Wuat Kurintiu 10:1-33
10 Uiꞌywania worohoꞌomuꞌe teran i raꞌyn ahaꞌaseꞌiꞌin saꞌawyꞌi wuat ete. Saꞌawyꞌi te turan ahaꞌaseꞌi Muisei upi tuwat aiꞌywania wanikaptia po pyi. Miꞌi hawyi Tupana tiꞌatupyhyp suraraꞌin iꞌatuewanikaptia iꞌatumohan haria. Miꞌi hawyi toipoꞌoro ywyhig temiitꞌin apykok hamo yahig iꞌatuewyry hap moherep hamo.
2 Miꞌi hawyi tutunug muap ihyemyiꞌa wato sakpo ihyemyiꞌa Hup e hap het rakat sakpo. Miꞌi hawyi yꞌy wehytꞌokmoĩ hap sakpo tuwat yꞌy pyꞌasetpuo Tupana puꞌap upi. Miꞌi hawyi ywyhig mekewat wanikaptia pyhyp hap hewyry iꞌatuupi. Miꞌi hawyi Tupana tiꞌatusetꞌok taꞌyn eipe Muisei upiaria e.
3 Miꞌi hawyi tuwat yahig sakpo. Iꞌatumiꞌu wuat man atipy piaria miꞌu toineꞌen itote. Teꞌerenuk kahato yne eꞌat Tupana miium man ete.
4 Iꞌewyte tutum tesaika hap wywo yꞌy wakuat nu wato kaipyi tuwẽtem ihy yne eꞌat pe. Koitywy watikuap taꞌyn mekewat Nu wato Aikaꞌiwat Iesui iãꞌãkap ewywuat.
5 Maꞌato yt naku i nug haria teꞌeropyhuꞌat yahig note e. Miꞌi hawyi Tupana yt iwepiit hin i mekewat iꞌatuminug saꞌag ete hawyi teꞌeropap kahato yahig note kowoꞌi kowoꞌi moĩ miꞌauka wo ahuu miꞌauka wo aria miꞌauka wo.
6 Miꞌi hawyi aito mesup miꞌiria emiariru koꞌi ewywuat pote yt kan hamo i watunug yt naku i kat pote Tupana tiꞌatuꞌapiheg miꞌiria ahaꞌaseꞌiꞌin aimoweꞌeg hamuat iꞌatuminug saꞌag koꞌi atoiat hamo e.
7 Waku pyno watokenꞌẽ kahato ahaꞌaseꞌiꞌin etiat Tupanaria nug hap pupi. Waku watoiat tupanaria motypot hap katupono ahaꞌaseꞌiꞌin timotypot kahato miꞌi koꞌi aikotã toꞌe miwan hap ewy. Aiꞌywania teꞌeraꞌapyk miꞌu u hamo sapo hy u hamo Tupana saꞌag Wewato ahup iãꞌãkap motypot hamo hawyi hairu nug hamo. Miꞌi hawyi iꞌatupoĩꞌam taꞌatuetupanaria motypot hamo e.
8 Miꞌi hawyi haryporiaꞌin ihainiaꞌin toꞌope toꞌope inug saꞌag. Taꞌatunug saꞌag hawyi teꞌeropap kahato sakpo 23 miu miit hewo hewo yi tote ikuꞌuro rakaria yt naku i nug haria.
9 Miꞌi hawyi yahig note taꞌatumopyꞌahak teran Tupana taꞌatuminug saꞌag wo. Taꞌatuhãꞌãg kahato Tupana. Miꞌi hawyi moĩ koꞌi tiꞌatuꞌuka kahato miꞌiria.
10 Iꞌatuehay saꞌag kahato -Emiium koꞌi man yt ikahu hin i iꞌatuꞌe Tupana pe. Miꞌi pote Tupana tipoꞌoro temiit atipy kaipyi iꞌatumoma hamo. Putꞌok e hawyi topap kahato aiꞌywania saꞌawyꞌi wuaria. Pyno waku aiweꞌeg wo kahato waku watuwehum imiium ete
11 Yne mesuwarotiat ikahuro hamuat yt pya hin i raꞌyn. Waku ahewyry iweꞌeg nakaria ewy. Waku watokenꞌẽ ahaꞌaseꞌiꞌin minug saꞌawyꞌi wuat pupi katupono aimoweꞌeg hamo Tupana tiwan ahaꞌaseꞌiꞌin minug koꞌi etiat.
12 Yt naku i watoꞌe aiwanetup hawe -Uhesaika kahato Tupana mohey hap ete pote yt karãpe i aru atiꞌaparap Tupana pe yt naku i watoꞌe. Eweꞌeg wo o mio tã eweiꞌe eipyꞌa pe pote katupono miꞌi e haria meremo taꞌatuꞌaparap taꞌatuiãꞌãg hap yt naku i nug hamo putꞌok e hawyi -Imohey kahato hat areineꞌen iꞌatuꞌe taꞌatuwanetup hawe pykai.
13 Yne aito ahiag miiãꞌãg koꞌi aiwoꞌoꞌewy ewy. Maꞌato saꞌawyꞌi Tupana toꞌe ahepe -Atipyhyp aru ehãꞌãg hap pupi e. Miꞌi pote yt karãpe sese i putꞌok e hãꞌãg hap ehete poꞌog hesaika eikai katupono areineꞌen eiwywo eimoesaika hamo ehãꞌãg hap pupi e. Miꞌi hawyi ehesaika kahato eweikupteꞌen ehãꞌãg hap sopo hamo e hawyi atum ehepe muap hatyꞌu wuat ipopywiat ewẽtem hamuat e Tupana.
Yt Naku I Iãꞌãkap Motypot Haria Wo Eweikupteꞌen
14 Miꞌi pote uiwyriaꞌin sese eipe yt eweimotypot teiꞌo iãꞌãkap koꞌi.
15 Miꞌi tã ewetunug mote weꞌeg haria wo eweikupteꞌen. Iꞌewyte atikuap uhehay upiat haria eipe sio yt hap ete e.
16 Karãpe watuweꞌatunug watuꞌu sapo hy hamo kuiꞌa piat iꞌewyte man u hamo miꞌi turan watuwehum kahato Tupana kape katupono aipoityro miꞌi hap ete. Miꞌi sapo hy Aikaꞌiwat Iesui suu iãꞌãkap kahato. Miꞌi watuꞌu huu iãꞌãkap hawyi imohey hap watimoherep kahato. Karãpe watipik mekewat man hawyi watuꞌu hawyi imohey haria watopyhuꞌat hap watimoherep miitꞌin me iꞌewyte wẽtup piit ewy watoineꞌen hap watimoherep.
17 Iꞌatu kahato aito Iesui mohey haria maꞌato miꞌi pykai wẽtup piit ewy watoineꞌen e. Miꞌi hap ewy wẽtup a yn watipik pik man hawyi watenuk. Miꞌi hawyi wẽtup a yn man watuꞌu Iesui puꞌi pikꞌe hap moherep hap.
18 Uruꞌywania Isareu ywania tum kahato taꞌatuhũ Tupana pe. Miꞌi hawyi paꞌiria tiwuk taꞌatuhũria iꞌatuwuk wuk hap heiam note. Iwyp kahato hawyi terenuk kahato raꞌyn taꞌatumiium kaipyi Tupana piat taꞌatumiium pykai.
19 Pyno ahenoi mekewat miꞌu Isareu ywania miium taꞌatuetupanaria imotypot hap yt ihãite hin i. Miꞌi pykai taꞌatuꞌu miꞌu ikuꞌuro rakat katupono ikuꞌuro rakaria tupanaria pote.
20 Taꞌatuwuk taꞌatuhũria iꞌatuiãꞌãkap pyꞌasetpe maꞌato iãꞌãkap koꞌi iꞌatuetupanaria yt taꞌakasa hin i. Pywo ti yt Tupana sese kape hin i iꞌatumiium koꞌi maꞌato ahiagnia kape iꞌatumiwuk koꞌi. Miꞌi hawyi ahiag wyriaꞌin kahato tukupteꞌen miꞌiria. Yt naku i miꞌi tã ewetunug eipe miꞌiria eko ewy neꞌi Iesui ekuiꞌa sapo hy wo.
21 Miꞌiria iꞌewyte teꞌereꞌyꞌu ahiagnia ehamo mekewat tupanaria motypot hap yparakai totiat. Yt naku i watunug iꞌatuminug ewy te katupono wẽtup sapo hy raꞌyn aiwatnuat. Aikaꞌiwat Iesui ekuiꞌa pyi raꞌyn watenuk huu aat hap ewywuat watuꞌu waku rakat.
22 Maꞌato watuꞌu ahiagnia ekuiꞌa pyi iꞌewyte Aikaꞌiwat ekuiꞌa pyi hawyi waku aiweꞌeg wo katupono Aikaꞌiwat tikyꞌesat aito towatnuat hap yn. Ihayꞌywyi miꞌi tã watunug pote. Waku aiweꞌeg wo kahato katupono Aikaꞌiwat poꞌog hesaika aikai. Waku watokenꞌẽ Aikaꞌiwat aiꞌapiheg hap pupi uiwyriaꞌin Tupana saꞌyruꞌin sakiꞌytꞌin aito pote.
23 Waku watunug yne aimikyꞌesat oktan iꞌatuꞌe toꞌope iraniaꞌin Iesui mohey haria taꞌatueso popuo. Miꞌi pote areꞌe iꞌatuepe -Aimikyꞌesat waku pote pyno waku watunug maꞌato aimikyꞌesat yt naku i pote yt naku i watunug. Aimikyꞌesat miitꞌin powyro hap pote waku watunug areꞌe iꞌatuepe.
24 Yt naku i aimikyꞌesat yn watunug waku pykai areꞌe iꞌatuepe. Waku poꞌog iraniaꞌin mikyꞌesat watunug aiwepowyro hap kai.
25 Karãpe iraniaꞌin terut ahowawi miꞌu puꞌi waku watuꞌu yne imiium. Yt naku i watoꞌe -Etiꞌauka apo mesuwat ehũ iãꞌãkap motypot hamo mehin mana sio yt watoꞌe neꞌi.
26 Yt naku i mio tã eweiꞌe miꞌu erut hat pe katupono Tupana tunug yne puꞌi mesuwat aipytyp nug hap mywo te iꞌewyte aihũria yne Tupana watnuat topyhuꞌat.
27 Miꞌi hawyi wẽtup ok yt imohey i hat toꞌe ahepe -Toꞌiro uiꞌyat kape ahenuk hamo e hawyi waku ereto etikyꞌesat pote. Maꞌato waku putꞌok ere hawyi erenuk kahato imiium oktan e. Yt ereꞌe teiꞌo tope -Etum naꞌyn apo meiũwat miꞌu iãꞌãkap motypot hamo uhyt mana yt apo ere teiꞌo maꞌato etuꞌu yt kat i haty ewanetup hawiat wywo yn waku.
28 Maꞌato erenuk turan wẽtup ok toꞌe epe -Etikuap apo Tupana iãꞌãkap motypot hamuat miꞌu puꞌi watuꞌu hap uhyt e pote -Yt atikuap hin i miꞌi hap waku eweiꞌe iꞌatuepe. Miꞌi hawyi -Pyno yt atuꞌu i poꞌog katupono yt naku i watuꞌu miꞌi tã e hat ehamo maꞌato etuꞌu pote haty kahato topyhuꞌat ewanetup hawe iꞌewyte mekewat miit itotiaria pe iꞌaparap hat wo en eropyhuꞌat ihamo etuꞌu pote.
29 Yt aiwoꞌoꞌewy hin i aimiꞌu u hap eko ete e. Maꞌato waku watuꞌu aiwanetup hawe wen maꞌato mekewat miit -Yt naku i watuꞌu e hat ehamo yt naku i watuꞌu. Maꞌato iraniaꞌin itotiaria Iesui mohey haria -Waku watuꞌu Tupana miium e haria tukupteꞌen eipyꞌasetpe pote waku yne aimiꞌu wo watuwehum kuap Tupana kape pote waku etuꞌu e Iesui Aikaꞌiwat ahepe. Pywo kahato miꞌi tã wen maꞌato yt naku i -Yt naku i watuꞌu e hat ehamo katupono yt naku i watuꞌuka ahehay wo iraniaꞌin Iesui mohey haria wywo -Waku watuꞌu yt naku i watuꞌu e hap koꞌi etiat.
30 Watenuk turan waku watoꞌe Tupana pe -Urutuwehum kahato epe Tupana emiium urumiꞌu wo waku watoꞌe Tupana pe. Miꞌi hap ewy watunug mote yt naku i watoꞌe wẽtup ok -En yt naku i katupono etuꞌu mekewat miꞌu yt naku i mio tã watoꞌe katupono tuwehum tenuk turan Tupana kape hap wywo tutuꞌu pote.
31 Pyno kat koꞌi kat koꞌi watunug waku watunug miꞌi torannia Tupana motypot hamo sio watenuk sio wateꞌyꞌu sio watuwepotpap Tupana motypot hap yn waku aiwanetup hawe. Taꞌi kat koꞌi kat koꞌi watunug turan waku watuwehum Tupana kape.
32 Waku aheineꞌen yt uwe maꞌat hatno i. Waku watopyhuꞌat yt Iuteu ywania aparap hatno i. Yt naku i Iesui mohey hap auka hat watopyhuꞌat aiminug koꞌi kaipyi. Iꞌewyte iraniaꞌin ywania aparap hatno yt naku i watopyhuꞌat. Yt naku i watoineꞌen Iesui mohey haria Tupana yat piaria maꞌat hat neꞌi.
33 Uito Pauru arewyꞌinug neran yne uiminug wakuap mo yn.
