Saꞌawyꞌi Wuat Kurintiu 11:1-34
11 Pyno waku eiwehaꞌat uhowowi uiꞌewywuat eweipyhuꞌat katupono uito Aikaꞌiwat Iesui iãꞌãkap kahato uito imikyꞌesat ewy yn atunug neran are.
2 Pywo pe ti arehum kahato ehete uipotmuꞌeria katupono yt uiwaure hin i eipe uimienoi upi kahato eweikupteꞌen. Haꞌawyte worohoꞌomuꞌe kahato Iesui moherep hap ete. Miꞌi hawyi areto raꞌyn maꞌato yt eweiwaure hin i uimiatoiat iꞌewyte yt eweiwaure hin i eimuꞌe hap.
3 Pyno wẽtup ete worohoꞌomuꞌe teran. Atikyꞌesat eweikuap Torannia Ihainiaꞌin akag no topyhuꞌat Iesui Aipotypot Poꞌog torannia Kawiat. Miꞌi hawyi haryporia akag topyhuꞌat heꞌaito. Miꞌi hawyi Aipotypot Iesui akag topyhuꞌat Tupana.
4 Yt naku i ihainia aimuꞌe Tupana ehay etiat turan sio ihainia ihay Tupana wywo aiwoꞌomuꞌe hawe yt naku i morekuat painug hap iꞌakag note katupono miꞌi pote Toꞌakag Iesui moti te hap topyhuꞌat.
5 Karãpe Tupana motypot yat pe wẽtup ok haryporia aimuꞌe teran Tupana ehay wo waku totopag taꞌakag note sokpe hit kawiat yt kat i -Uito poꞌog ihainiaꞌin kai e hap toineꞌen mekewat haryporia wanetup hawe e hap moherep hamo. Maꞌato tuwepyi aimuꞌe haryporia yt kat i paa e hap wywo pote ihainiaꞌin moti hap toineꞌen hawyi heꞌaito tuwemoti sese -Uheharyꞌi uimuꞌe hat toineꞌen mesup e hap tuwanetup hawe pote.
6 Maꞌato sokpe hit taꞌakag note pote waku aimuꞌe. Miꞌi pote waku haryporia topag taꞌakag tote teꞌog sokpe hit kawiat aimuꞌe Tupana ehay etiat turan sio ihay Tupana kape turan -Ihainiaꞌin ywytꞌokpype areineꞌen e hamo.
7 Tupana motypot kahato hat ihainiaꞌin Tupana iãꞌãkap sese ihainia haryporia iꞌewyte maꞌato ihainia motypot hat iharyꞌi.
8 Saꞌawyꞌi Tupana tunug haryporia ihainia kawiat mekewat eꞌat pe. Yt tutunug i ihainia haryporia kawiat.
9 Saꞌawyꞌi sese Tupana tunug ihainia haryporia muꞌe hamo.
10 Miꞌi pote waku haryporiaꞌin tuweꞌakag suwy sokpe wo -Uito atimotypot uheꞌaito toꞌe hamo wuatꞌi miitꞌin ehamo hamo. Iꞌewyte atipy piaria heꞌaito poꞌog ikai e hamo.
11 Karãpe watopyhuꞌat Iesui mohey haria watipowyro kahato haryporia. Yt watimohit i iꞌewyte aiwoꞌomotypot hap yn.
12 Pyno ti Tupana tunug haryporia ihainia eturuꞌokpy kawiat. Maꞌato iꞌewyte pywo kahato torannia ihainiaꞌin tuwẽtem toty ymyẽ pyi. Ainug hat sese maꞌato Tupana sio aito haryporia sio ihainia.
13 Pyno uiwesat eipe sio waku aheharyꞌi ihay Tupana kape Tupana motypot yat pe aiwaꞌatunug hap tote yt kat i hin i iꞌakag me teꞌog wywo sio yt.
14 Maꞌato ihainia tunug toꞌasap haryporia wat ewywuat pote miꞌi hawyi aiwemoti hap topyhuꞌat kat pote ihainia aito pote.
15 Taꞌi yt naku i katupono watikuap yne aito yt uwe i aimuꞌe pykai haryporia iꞌasap ywop takat waku. Watikuap taꞌyn haryporia asap hesokpe ewywuat Tupana tunug saꞌawyꞌi haryporia painug hap ewywuat topyhuꞌat.
16 Maꞌato uiwanetup hawe waku haryporia topag taꞌakag tote sokpe hit taꞌatuhenoi ihainiaꞌin Tupana ehay wo turan sio taꞌatuehay Tupana kapiat turan. Yne Iesui mohey haria miꞌi seko ewy toineꞌen ahetama pe. Iꞌewyte uruto Iesui potmuꞌeria sese 12 ok takaria wy wẽtup seko yn urutukupteꞌen. Pyno waku aheko ewy watunug. -Yt naku i sokpe hit aiꞌakag toto eweiꞌe pote Iuteuria eko ewywuat urueko mohit haria wo eweikupteꞌen katupono yne Tupana motypot yat piaria uruetama pe miꞌi ewywuat nug haria tukupteꞌen.
17 Pyno worohoꞌonapin teran uito Pauru. Waku kahato ti eipe tawa Kurintiu piaria maꞌato mesup ahenoi teran ehepe yt uimowepiit i hap koꞌi eiminug. Pyno eiweꞌatunug kahato o itote Tupana motypot hamo maꞌato yt hãpyk hin i eweimotypot Iesui. Miꞌi hawyi miꞌi kaipyi miitꞌin aparap hap topyhuꞌat. Miꞌi hawyi eiweꞌatunug hawe poꞌog wuꞌuka hap topyhuꞌat itote. Kat pote som miꞌi tã.
18 Taꞌi iraniaꞌin henoi uhepe -Yt toꞌoꞌewy hin i itotiaria hawyi wuꞌuka hap yn topyhuꞌat itote iꞌatuꞌe. Pyno eipe Iesui mohey haria pykai eiwepatꞌok patꞌok itotiat hap atikuap taꞌyn. Yt atimohey i yne iꞌatuehay koꞌi ehetiat maꞌato miꞌi iꞌatuꞌe hap ehetiat hap atimohey.
19 -Waku watipatꞌok patꞌok eweiꞌe saꞌag eiwoꞌope. Waku iraniaꞌin aimuꞌe hat Peteru upiaria. Waku iraniaꞌin aimuꞌe Apauru upiaria. Waku iraniaꞌin aimuꞌe hat Pauru upiaria eweiꞌe saꞌag neꞌi eiwoꞌope. Miꞌi tã watunug hawyi meremo watikuap uwe hãpyk uwe yt hãpyk i eweiꞌe saꞌag maꞌato miꞌi tã ti yt Tupana mikyꞌesat ewy hin i.
20 -Toꞌiro watenuk Aikaꞌiwat enuk hap man pik pik hap kape eweiꞌe. Toꞌiro sapo hy u hamo Iesui kapiat kuekatu hamo waku watoꞌe maꞌato yt miꞌi tã hin i ewetunug.
21 Yt Aipotypot enuk hap ewy hin i ewetunug itote katupono yt iweꞌeg nakaria ewy i ewehenuk yt eweimoꞌẽ hin i pote. Saꞌawyꞌi wuaria tuꞌu yne miꞌi hawyi iraniaꞌin hesyꞌat topyhuꞌat. Miꞌi hawyi iraniaꞌin teꞌeruwesapo hy u yne hawyi imopẽꞌã rakaria wo tukupteꞌen.
22 Yt naku i miꞌi tã. Ehesyꞌat pote waku yian mete ewetuꞌu miꞌu eiꞌyat pe katupono iraniaꞌin yt hekat i rakaria yt terut kuap i miꞌu koꞌi. Miꞌi hawyi yt hekat i rakaria pe yt kat i ewetum kuap. Miꞌi hawyi teꞌeruwemoti kahato yt eiweꞌeg hin i hap ete. Yt arehum hin i miꞌi eminug ete paĩ.
23 Pyno waku worohoꞌomuꞌe i raꞌyn Aikaꞌiwat aimuꞌe hap ete aikotã Aikaꞌiwat Iesui enuk hap ewy. Saꞌawyꞌi Iesui maꞌat hap wãtym turan totat man teneg e.
24 Miꞌi hawyi waku e Tupana pe hawyi toipik pik man iꞌatuehamo -Mesuwat man uiꞌewy e katupono uipik irane ehehakyeraꞌat hamo e. Karãpe ewetuꞌu mesuwat man turan uhowowi waku eiwatetup aikotã uikuꞌuro eikawiatno hap kape e.
25 Teꞌerenuk kahu hawyi Iesui tat sapo hy kuiꞌa piat. Miꞌi hawyi toꞌe -Mesuwat sapo hy uhuu ewy e. Miꞌi atum irane saꞌup mo Tupana pe iwywuat miitꞌin woꞌowese hap pakup i nug hamuat e.
26 Pyno karapeĩ ewetuꞌu mesuwat man ewywuat iꞌewyte eiweꞌyꞌu mesuwat sapo hy wo eweimoherep wuatꞌi miitꞌin me uikuꞌuro hap iãꞌãkap uiꞌaipok hap kape e. Miꞌi ewywuat ewetunug uikuꞌuro hap moherep hamuat e Iesui imaꞌat hap eꞌat pe turan.
27 Waku hãpyk kahato watimotypot Aikaꞌiwat Iesui. Uwe uwe iꞌu iꞌewyte teꞌyꞌu yt kat i imotypot hap wywo miꞌi hat Tupana miꞌapiheg wo topyhuꞌat katupono Iesui piit etiat mikyryꞌi hat miꞌi.
28 Maꞌato waku Iesui enuk hap ewy ahenuk hamo. Eꞌyian mete waku watuwanetup kahato -Aipyꞌa pe sio waku pe watoineꞌen Tupana wywo hap kape. Maꞌato waku pe watoineꞌen Tupana wywo pote waku watuꞌu sapo hy iꞌewyte man pik pikꞌe rakat Iesui kuꞌuro hap kape aiwanetup hamuat.
29 Maꞌato watuꞌu man pik pik iꞌewyte mekewat sapo hy aiwekyryꞌi popuo neꞌi miꞌi pote Tupana miꞌapiheg wo watoineꞌen. Aimaꞌat hap topyhuꞌat Aikaꞌiwat piit pun haria neꞌi aito.
30 Miꞌi pote iꞌatu kahato eipyꞌasetpiaria iꞌahuu rakaria wo ipiit perup takaria wo get rakaria wo tukupteꞌen itote Iesui suu etiat wekyryꞌi haria eweikupteꞌen mote.
31 Pyno waku aiweꞌeg wo waku poꞌog ahepiat. Iꞌu hap eꞌyian mete waku watoꞌe Tupana pe -Waku atuꞌu sio yt watoꞌe. Miꞌi tã watunug mote yt watopyhuꞌat i Tupana miꞌapiheg wo.
32 Maꞌato yt naku i wywo watuꞌu pote miꞌi hawyi -Yt naku i eipe e aru Tupana ahepe aiꞌapiheg hap wywo katupono yt toikyꞌesat i ahoꞌowasat hap iraniaꞌin mesuwat yi totiaria ewy.
33 Uiwyriaꞌin tawa Kurintiu piaria karãpe eiwaꞌatunug mekewat Aikaꞌiwat ienuk hap ewywuat u hamo turan eiwoꞌoekatup woꞌoꞌekatup o tukupteꞌen yne itote hawyi waku ewetuꞌu.
34 Maꞌato wẽtup ok toineꞌen eipyꞌasetpe uhesyꞌat kahato e hat miꞌi hat pe -Waku mehin waku erenuk eꞌyat pe hawyi eriot meikowo eweiꞌe eꞌyian mete katupono yt naku i Tupana miꞌapiheg haria wo watopyhuꞌat. Maꞌato Iesui motypot hap upi watuꞌu man pik pikꞌe hap Uwa hy ikuꞌuro aikawiatno hap moherep hamo miꞌi watunug mote Tupana mipoityro koꞌi watopyhuꞌat e. Miꞌi pote miꞌi hap ete yt ahenoi kuap i koitywy uimiwan me. Iꞌatu kahato te yt ahenoi i ehepe maꞌato areto ehewowi hawyi ahenoi yne ehepe heĩpyt koꞌi.
