Saꞌawyꞌi Wuat Kurintiu 12:1-31
12 Saꞌawyꞌi wuat einapin miwan miat hap ewywuat koꞌi koitywy worohoꞌonapin pakup i tawa Kurintiu piaria. Mesup worohoꞌomuꞌe teran Tupana Paꞌãu etiat aikotã tutum ahepe tesaika hap toꞌewywuat pykai sepap nug hap etiat. Yt naku i watoineꞌen yt ikuap i haria wo neꞌi Tupana Paꞌãu miium etiat haria.
2 Haꞌawyte tupanaria motypot haria mo wuat minug yt ihay i rakat motypot haria yt taꞌakasa kuap i rakaria motypot haria saꞌawyꞌi eipe. Miꞌi hap saꞌag kape yn saꞌawyꞌi eiwanetup. Iãꞌãkap upi ehewyry yt Tupana ywania ewy hin i eweikupteꞌen.
3 Karãpe watoꞌe Iesui pe -En ni Uipotypot Uikaꞌiwat watoꞌe pote Tupana Paꞌãu mimuꞌe watopyhuꞌat. Maꞌato watoꞌe -Iesui ti yt naku i watoꞌe pote yt kat i Tupana Paꞌãu aikai.
4 Pyno yt aiwoꞌoꞌewy hin i wẽtup yn Tupana Paꞌãu aipyꞌa pe pykai katupono Tupana Paꞌãu tum ahepe tesaika hap yt toꞌoꞌewyꞌewy hin i toimoꞌẽ wuatꞌi nug hamuat wẽtup yn Tupana Paꞌãu toineꞌen pykai.
5 Wẽtup yn Aipotypot toineꞌen. Miꞌi kape watuwepotpap maꞌato aipotpap hap yt aiwoꞌoꞌewy ewy hin i.
6 Aipotpap hap koꞌi yt toꞌoꞌewyꞌewy i Tupana potpap nug hap. Maꞌato miꞌi pykai wẽtup yn aimisepap koꞌi ium hat. Miꞌi hat ti Tupana are.
7 Tupana Paꞌãu toineꞌen aipiit pe. Miꞌi hawyi aiwoꞌope aiwoꞌopoityro hap ahewaku hap toineꞌen.
8 Pyno Tupana Paꞌãu timoherep wẽtup ok Iesui mohey hat piit pyi iweꞌeg hamuat miitꞌin muꞌe hat. Wẽtup ok imohey hat pe Tupana Paꞌãu timoherep ikuap wuatꞌi miitꞌin muꞌe kuap hamo.
9 Miꞌi hawyi Tupana Paꞌãu timoherep wẽtup ok imohey hat pe imohey kahato hap. Miꞌi hawyi wẽtup ok pe tutum tesaika hap iꞌahuu rakat moehãite hamo.
10 Miꞌi hawyi Tupana Paꞌãu tum tesaika hap wẽtup ok pe Tupana ewywuat yt uwe misepap i nug hamo. Wẽtup ok pe tutum tesaika hap Tupana wanetup hap moherep hamuat hawyi Tupana wẽ wo raꞌyn toineꞌen hap. Miꞌi hawyi wẽtup ok pe Tupana Paꞌãu tum tesaika hap wuatꞌi kuap hamuat pywo sio yt hap kuap hamuat sio Tupana Paꞌãu kaipyi ihay sio ahiag ihay wẽtup ok miit ete hap kuap hamo. Iꞌewyte tutum wẽtup ok miit pe tesaika hap wẽtup ywania pusu puat iꞌatumuꞌe hamuat yt toikuap pykai i hap. Wẽtup ok pe tutum tesaika hap wẽtup ywania pusu moherep hamo aipusu puat imoherep hamo.
11 Tupana Paꞌãu wẽtup yn toineꞌen pykai iꞌatu kahato tomisepap nug hap koꞌi tukupteꞌen. Tutum ahepe tomisepap nug kuap hap Topaꞌãu kaipyi. Maꞌato yt ewy hin i toimoꞌẽ ahepe. Tomikyꞌesat ewy tutum ahepe tomisepap nug kuap hap koꞌi. Wẽtup ok aipyꞌasetpiat pe tutum wẽtup tomisepap nug kuap hap hawyi wẽtup aipyꞌasetpiat pe wẽtup tomisepap nug kuap hap tutum e. Yt toꞌoꞌewyꞌewy hin i toiꞌatumoꞌẽ tomisepap nug kuap hap ahepe.
Waku Wẽtup Miit Ewy Watukupteꞌen Iesui Mohey Haria
12 Iꞌatu kahato aito Iesui mohey haria pykai Tupana wanetup hawe wẽtup miit ewy yn watoineꞌen aikotã aipiit wẽtup yn hap ewy. Iꞌatu kahato ahaga koꞌi. Yt toꞌoꞌewy hin i aipiit ete maꞌato miꞌi pykai wẽtup yn aipiit hap ewy ti Iesui piit toineꞌen.
13 Ipatꞌok aito Iuteu ywania ipatꞌok wẽtup ywania aito ipatꞌok aito miit emiit ipatꞌok miit akag koꞌi maꞌato aito Iesui mohey haria pote Tupana Paꞌãu eiam aito. Miꞌi pote Tupana Paꞌãu ahetꞌok taꞌyn -Iesui piit eipe e raꞌyn ahepe.
14 Aipiit yt wẽtup iaga yn i maꞌato iꞌatu kahato iaga koꞌi aipiit ete.
15 Miꞌi tupono yt naku i toꞌe aipy aipo pe -Yt kan hamo i areineꞌen mesuwe yi ete waku poꞌog areineꞌen itote aipo wo en ewy maꞌato uiwyriaꞌin yt naku i aipy topyhuꞌat aipo wo yt naku i poꞌog areineꞌen mesuwe aipy wo. Waku arẽtem aipiit pyi e. Mio tã toꞌe neꞌi pote tuꞌuka kahato tehay wo aipo ete maꞌato yt kan hamo i tuꞌuka katupono toineꞌen wuatꞌi eꞌat pe aipy wo Tupana inug aipy pote. Yt kan hamo i ihayꞌywyi aipo hap kyewi katupono aipy wo Tupana inug. Waku aipy waku aipo waku aipiit powyro hamo.
16 Yt naku i ahewaure kaꞌa toꞌe aipiit pe. -Uito yt ekawiat i katupono yt eha ewy i miitꞌin mimotypot areineꞌen mote. Miꞌi tupono waku yt areineꞌen i aipiit ete poꞌog e neꞌi. Mio tã e ahewaure kaꞌa aipiit pe pote heso rakatno topyhuꞌat.
17 Aheha tuwenug aipiit kaipyi neꞌi miꞌi pote aikotã watikuap sehay. Miꞌi hawyi aiꞌãkuat yt toineꞌen i aipiit wo yt tuwepehik i pote aikotã aru watikuap ikamhig hap.
18 Miꞌi pote Tupana yt ainug i wẽtup yn ahaga aipiit maꞌato iꞌatu kahato ahaga ainug wẽtup piit kaipyi yn pykai. Pywo ti tomikyꞌesat ewy ainug.
19 Ahaga wẽtup yn toineꞌen mote yt kat i aipiit.
20 Iꞌatu kahato aipiit ete ahaga koꞌi maꞌato miꞌi pykai wẽtup yn aipiit.
21 Miꞌi tupono yt naku i aheha yt naku i e aipo kapiat taꞌakasa hawyi -Yt kan hamo i aipo e. Iꞌewyte yt naku i aiꞌakag toꞌe aipy pe -En yt kan hamo i worokyꞌesat e.
22 Iꞌatu kahato ahaga yt hesaika rakaria i wen maꞌato toꞌoꞌewyꞌewy ahaga hesaika rakaria toꞌopowyro kuap kahato.
23 Maꞌato iꞌatu kahato ahaga aipiit pe yt waꞌakasa i hap koꞌi. Yt uwe i tuwehum iꞌatuete yt heremo i pote. Maꞌato miꞌi pykai aipowyro kahato miꞌiria. Maꞌato iꞌahuu wẽtup aipyꞌa aimeꞌen hap ewy hawyi watikyꞌesat kahato miꞌiria mog hap iꞌewyte toĩ ahaga yt ikahu rakat i maꞌato ikahu aiwanetup hawe katupono aipowyro kahato hamo waku miꞌiria.
24 Pyno aipiit ahaga koꞌi Tupana minug yne torannia. Miꞌi hawyi tuwehum yne tominug koꞌi ete. Yt wẽtup ete i tuwehum poꞌog iraniaꞌin kai. Wẽtup wẽtup tutunug poꞌog yt ikahu hin i iraniaꞌin kai wen maꞌato miꞌiria aipowyro hat ikahu rakat oktan ne. Miꞌiria maꞌato yt ikahu pykai i poꞌog watipowyro tuereto aimowepiit pote.
25 Miꞌi hawyi ahaga koꞌi toꞌopowyro aat kaꞌap. Yt naku i ahaga yt toꞌopowyro i toꞌope.
26 Karãpe wẽtup ahaga ete haty raꞌyn hawyi torannia aipiit ete raꞌyn haty. Iꞌewyte karãpe ahaga wẽtup ok timotypot -Ikahu kahato eha e hap ewywuat hawyi aipiit yne raꞌyn iwepiit.
27 Maꞌato ti hãꞌãkap wuo ahenoi ahaga koꞌi etiat Iesui piit etiat. Pyno aito Iesui piit aga koꞌi ewy Iesui mohey haria aito pote.
28 Aito ti haga koꞌi ewy watopyhuꞌat maꞌato ti Tupana timowoꞌosat yne wẽtup piit ete yn torannia aito Iesui mohey haria. Wẽtup ahaga Tupana tum tesaika hap tehay sytpok wẽtup ywania kapiat hat ewy. Miꞌi hawyi Tupana tum wẽtup haga pe tesaika hap aikotã aikotã meiũran topyhuꞌat hap moherep hamo Tupana yn wyti ikuap e hap moherep hamo e. Miꞌi hawyi wẽtup ok pe tutum tesaika hap tehay wuat miitꞌin atumuꞌe hamo e. Miꞌi hawyi wẽtup ok pe tutum tesaika hap yt uwe i miitꞌin misepap ewywuat nug hamuat e. Miꞌi hawyi wẽtup ok pe tutum tesaika hap iꞌahuu rakaria moehãite hamo e. Miꞌi hawyi wẽtup ok pe tutum tesaika hap wẽtup ywania iꞌatupusu puat miitꞌin atumuꞌe tehay etiat hamo e.
29 Yt yne i aito Tupana ehay sytpok yne ywania piat hanuaria. Yt torannia pe i tutum tesaika hap iwato kahato aikotã aikotã hap moherep hamo e. Iꞌewyte yt yne pe i tutum tesaika hap miitꞌin atumuꞌe hamo e. Iꞌewyte yt yne pe i tutum tesaika hap yt uwe i misepap nug hamo e.
30 Yt yne i pe tutum tesaika hap iꞌahuu rakaria moehãite hamuat e. Yt yne pe i tutum tesaika hap wẽtup ywania pusu puat iꞌatumuꞌe hamo yt toikuap pykai i e. Iꞌewyte wẽtup ok pe tutum tesaika hap wẽtup ywania pusu moherep hamo aipusu puat hamo e.
31 Pyno Tupana aimoesaika wakuat kahato nug hamo. Waku kahato toimoherep aipiit pyi tesaika hap nug hamo. Yt watikuap i pykai waku kahato watunug Tupana mikuap hap toipag aipiit pe hawyi. Waku kahato watunug maꞌato wẽtup aimoesaika hap Tupana piat poꞌog waku iraniaꞌin kai. Miꞌi ti Tupana ehay moherep iraniaꞌin me hap poꞌog waku torannia tomiium kai. Miꞌi pote waku wahẽtup aipyꞌa pyi -Tupana uimuꞌe o ehay moherep emikuap oktan iraniaꞌin me waku watoꞌe wuatꞌi aimikyꞌesat hap wywo hawyi tutum ahepe tesaika hap tehay moherep hamo.
