Saꞌawyꞌi Wuat Kurintiu 14:1-40
14 Pyno waku wahẽtup torannia aipyꞌa pyi -Uinug o Tupana woꞌokyꞌe hatno waku watoꞌe. Atikyꞌesat kahato emisepap nug kuap hap koꞌi maꞌato wẽtup atikyꞌesat poꞌog torannia kai. Atikyꞌesat kahato etum o uhepe esaika hap ehay sese moherep hamo miitꞌin me waku watoꞌe.
2 Katupono karãpe ahehay Tupana wywo ipusu puo yt uwe i mesuwarotiat aikuap yt miitꞌin pusu ewywuat i pote yt aiwanetup hap kaipyi i ahehay pote maꞌato Tupana wanetup hap ewy ahehay Tupana pusu ewy ahehay pote yt uwe i mesuwe ikuap.
3 Maꞌato karãpe Tupana tum ahepe tesaika hap topusu moherep hamo miitꞌin atunapin hamo miꞌi hawyi ahehay topyhuꞌat miitꞌin powyro hamo. Aimimuꞌeria iꞌatuꞌarot neꞌi potiat watiꞌatumuꞌe Tupana Paꞌãu kaipyi hawyi Tupana mimowepiit koꞌi tukupteꞌen. Taꞌatumohey aimienoi aimimuꞌeria hatyꞌu pote miꞌi hawyi iꞌatuwepiit kahato raꞌyn.
4 Maꞌato karãpe ahehay Tupana wywo ipusu puo miꞌi hawyi aiwepowyro hap yn topyhuꞌat aiweran ahehay pote. Maꞌato karãpe uwe uwe Tupana wẽ wo timoherep Iesui hawyi yne Iesui mohey haria itote imimuꞌeria powyro hat topyhuꞌat miꞌi.
5 Waku yne aito Tupana wywo ahehay Tupana pusu puo maꞌato poꞌog waku watimoherep Tupana e hap ewywuat miitꞌin me miꞌi hap poꞌog waku topyhuꞌat ahehay Tupana pusu puo hap kai. Maꞌato toineꞌen wẽtup ok aipyꞌasetpe Tupana pusu moherep hat miitꞌin me pote waku ahehay Tupana kape ipusu puo. Saꞌawyꞌi ahehay Tupana kape mekewat ipusu puo miꞌi hawyi waku mekewat wẽtup ok Tupana pusu kuap hat imoherep iraniaꞌin me itotiaria pe kat e hap kat e hap koꞌi watoꞌe hap koꞌi.
6 Meiũran aru areto ehewowi uheꞌywytꞌin. Miꞌi hawyi atimoherep ehepe Tupana ehay Tupana yn ikuap koꞌi. Tupana Paꞌãu kaipyi aru worohoꞌomuꞌe worohoꞌonapin. Eipusu puo yn ahenoi ehepe. Yt kat hamo i Tupana pusu puo worohoꞌomuꞌe.
7 Eity pusu puo eimikuap oktan worohoꞌomuꞌe. Yt areineꞌen neran i wepy hap yt hãpyk takat i ewy. Yt areineꞌen neran i akuara pyy hat yt ikuap i hat kahato hat ewy. Yt areineꞌen neran i kawakiu yt pyy hat yt hepap kahato i hat ewy katupono miꞌiria teꞌeruwepyy hawyi yt watikuap i kat e tuwepyy hap. Maꞌato hepap hat ipy hawyi meremo ipy hap ete watikuap.
8 Surara akag tikay kay temiitꞌin taꞌatuewanikaptia wywuat tuꞌuka hamo hu hu e hap wywo. Toiꞌatukay kay maꞌato hu hu e hat yt hepap i hat pote surara koꞌi yt tikuap i -Waku mesup watuꞌuka yne ahesaika hap wywo sio yt iꞌatuꞌe neꞌi.
9 Miꞌi hap ewy kahato karãpe watuweꞌatunug Iesui motypot hamo hawyi wẽtup ok ihay yt uwe mikuap i pusu puo wẽtup ywania pusu puo sio atipy piaria pusu puo ihay ikahu wen maꞌato itotiaria yt ikuap hin i kat som toꞌe hap yt taꞌatupusu puo i pote. Ahehay Tupana tikuap wen maꞌato itotiaria yt hawyi ahehay yt kat hamo i. Yt wẽtup sehay i topyhuꞌat miitꞌin wanetup hawe ikuap hap.
10 Iꞌatu kahato yt aipusu ewywuat i mesuwat yi tote yt aimikuap koꞌi i. Maꞌato mekewat pusu ikuap haria taꞌatuwat taꞌatupusu pote taꞌatukuap taꞌyn kat e kat e hap.
11 Maꞌato yt watikuap i yt iꞌywania i aito pote. Miꞌi hawyi karaiwa ewy watopyhuꞌat yt ipusu kuap haria aito pote.
12 Pyno waku wahẽtup Tupana pe haty wo -Etum no uhepe esaika hap emisepap ewywuat nug hamuat waku watoꞌe Tupana Paꞌãu me. Miꞌi ewetunug mote tutum ehepe hawyi waku Tupana misepap ewywuat hap wywo watuwepotpap kahato. Waku watikat muap aiwyriaꞌin Iesui mohey haria iꞌatuepiat imohey hap moesaika hamo.
13 Karãpe ahehay Tupana kape ipusu puo yt watikuap i kat som watoꞌe hap miꞌi pote waku wahẽtup Tupana pe -Etimoherep uhepe uiꞌe hap Uhyt Mimi waku watoꞌe Tupana pe.
14 Karãpe ahehay Tupana wywo ipusu puo yt aiwanetup hap kaipyi i ahehay maꞌato aipyꞌa pyi ahehay tuwẽtem Tupana Paꞌãu ihay hap ewy. Aipyꞌa ihay haty wo sese Tupana wywo pote ahehay pywo pe.
15 Pyno aikotã waku watunug ahenoi epe. Waku ahehay Tupana kape aipyꞌa pyi Tupana pusu puo waku maꞌato poꞌog waku ahehay Tupana kape aiwanetup hawyi aipusu puo. Iꞌewyte waku watuwepy Tupana kape Tupana pusu puo maꞌato poꞌog waku watuwepy Tupana kape aiwanetup hawyi aipusu puo.
16 Pyno watuwehum Tupana kape Tupana pusu puo yt ikuap i haria pyꞌasetpe pote -Pywuat ehay mana mehin yt iꞌatuꞌe kuap i. Ahehay Tupana kapiat ipusu puo turan teke taꞌatuꞌewaure kaꞌa pe wen maꞌato kat som watoꞌe yt taꞌatukuap i. Miꞌi hawyi yt teꞌeruwehum kuap i yt taꞌatuꞌewaku kuap i yt taꞌatukuap i aimiẽtup koꞌi pote. Yt taꞌatukuap i aiwehum Tupana kapiat hap yt taꞌatupusu puat i pote.
17 Tupana kapiat aiwehum hap ikahu sese pykai watunug ipusu puo pote iraniaꞌin itotiaria yt kat hin i ikuap hap. Miꞌi hawyi yt kat hamo i ahehay se Tupana kape miꞌiria pyꞌasetpe. Yt iꞌatupowyro hap hin i ahehay Iro pote.
18 Uito Pauru arehum kahato Tupana kape katupono tutum uhepe tesaika hap topusu kuap hamuat. Miꞌi hap ete atikuap poꞌog eipe torannia kai katupono uito uhehay kuap Tupana pusu puo e.
19 Maꞌato karãpe watuweꞌatunug Tupana motypot hamo turan yt uhehay teran hin i mekewat atipy piat pusu puo neꞌi waꞌatunug haria pyꞌasetpe. Maꞌato aimikuap pusu puo yn uhehay teran. Poꞌog waku watiꞌatumuꞌe kurin kurin iraniaꞌin iꞌatumikuap sehay puo 5 sehay yn hap ewy sio ahehay aat kaꞌap wẽtup 1 miu sehay ewy yt uwe mikuap i pusu puo.
Waku Hirokaria Ewy Watopyhuꞌat Aimohey Hap Ete
20 Pyno waku watoineꞌen hirokaria ewy aikotã hirokaria yt taꞌatukuap hin i saꞌag nug hap. Miꞌi hap ewy waku watopyhuꞌat uheinytꞌin uheꞌywytꞌin. Maꞌato yt naku i watuwanetup hirokat ewy katupono yt teꞌeruwanetup kuap kahato i te wakuat sehay enoi hap kape hap ewy neꞌi.
21 Mio tã e Tupana saꞌawyꞌi miwan me -Iuteuria e meiũran worohoꞌomuꞌe eipe wẽtup ywania wẽ pyi yt eipusu kuap i haria wẽ pyi worohoꞌomuꞌe maꞌato miꞌi turan iꞌewyte uhehay pun haria eweikupteꞌen. Eiwewaure hik neꞌi aru eimuꞌe wẽtup ywania wẽ pywiat turan. Yt taꞌatukuap i eipusu pykai uhesaika hap wywo taꞌatusuꞌat eipusu pote e. Maꞌato miꞌiria mienoi yt eweimohey i aru e Tupana saꞌawyꞌi miwan me.
22 Miꞌi hap ewy topyhuꞌat mesup katupono Tupana tum tesaika hap ahepe yt imohey i haria muꞌe hamo. Yt watikuap i iꞌatupusu pykai iꞌatupusu puo Tupana ihay kahato aiwẽ pyi hawyi teꞌeruwanetup kahato Tupana e hap aiwẽ pywiat hap kape hawyi teꞌeroꞌe -Tupana waku kahato iꞌatuꞌe katupono ihay ahepe wẽtup ywania wẽ pyi iꞌatuꞌe.
23 Maꞌato karãpe aito Iesui mohey haria watuweꞌatunug waku ahehay yne aimikuap pusu puo yn. Yt naku i ahehay itote Tupana kape atipy piaria pusu puo. Maꞌato miꞌi tã watunug itote pote miꞌi hawyi putꞌok e itote wẽtup ok yt Iesui mohey i hat i te yt aheko kuap i te hat miꞌi hawyi -Are paĩ are an iꞌatuꞌe taꞌi mesuwarotiat hesoꞌok takaria iꞌatuꞌe neꞌi taꞌatuwanetup hawe katupono yt taꞌatumikuap wuo i ahehay Tupana kapiat pote atipy piaria pusu puo pote.
24 Maꞌato Tupana ehay watimoherep itote aiꞌywania pusu puo miꞌi pote -Pywo iꞌatuꞌe yt Iesui mohey i te haria. Yt aiwanetup hap ewy i te hat pykai -Pywo iꞌatuꞌe Tupana e hap aiwẽ pywiat kape. Miꞌi hawyi -Pyno eweikuap kahato urupusu pote mesup uruikuap taꞌyn Iesui moherep hap eiwẽ pywiat pote uruimohey miꞌi iꞌatuꞌe aru. Pywo ti rat uito areineꞌen yt naku i nug hat iꞌatuꞌe. Mio atikuap taꞌyn Tupana uiꞌapiheg ten uiminug yt naku i hap ete iꞌatuꞌe aru.
25 Miꞌi hawyi tuwanetup koꞌi koꞌi yt naku i yt uwe mikuap koꞌi i migꞌi wuat Tupana timoherep tope toikuap Tupana ehay topusu puo hawyi. Miꞌi hawyi meremo tuwepỹꞌãtutuk Tupana sese ewowi hawyi toꞌe -Tupana pywo kahato ti ereineꞌen mesuwe emohey haria pyꞌasetpe iꞌatuꞌe aru Tupana pe taꞌatupusu puo ahehay hawyi.
Waku Watikuap Aikotã Hãpyk Hap Upi Watimotypot Tupana
26 Uiwyriaꞌin uheinytꞌin koitywy worohoꞌomuꞌe teran aikotã aikotã waku watimotypot Tupana aiwoꞌoꞌatunug hap ete. Waku ikahu kahato watimotypot Tupana. Waku pe yn waku ahehay itote. Waku watikat Tupana mohey hat wẽtup ok aimuꞌe kahato hat itotiat Tupana motypot wepy hap ete. Miꞌi hawyi waku wẽtup ok aimuꞌe itote Tupana ehay miwan myi. Miꞌi hawyi wẽtup ok itote ihay kahato Tupana wẽ ewy Tupana ainapin hap sese moherep hamo Tupana toꞌe hap ewy. Miꞌi hawyi waku wẽtup ok aimuꞌe Tupana pusu puo sio toineꞌen itote wẽtup ok atipy piaria pusu kuap hat imoherep ahepe aipusu puo kat e kat e hap koꞌi ete. Miꞌi pote aimoesaika kahato Tupana mohey hap ete Tupana pusu puat. Atipy piaria pusu puo ihay rakat waku wẽtup ok yn hawyi waku wẽtup ok imoherep hat ihay iwywo kat toꞌe kat toꞌe e hap wuatꞌi pusu puo.
27 Maꞌato miꞌi hawyi miꞌiria aimuꞌe turan waku wẽtup ok aimuꞌe aipusu puo kat som toꞌe kat som toꞌe hap ete.
28 Maꞌato yt uwe i itote Tupana pusu moherep aipusu puat hat yt uwe i imoherep aipusu puat pote -Mehin Mana waku aipusu puo aimuꞌe mesup katupono atipy piaria pusu moherep haria yt uwe i mesuwe waku watoꞌe itote. Maꞌato waku ahehay Tupana pusu puo aiwanetup hawe ahehay Tupana kape. Waku wẽtup ok ihay Tupana pusu puo miꞌi hawyi wẽtup ok henoi ahepe kat toꞌe hap koꞌi. Miꞌi hawyi wẽtup ok ihay hawyi wẽtup ok i tuereto.
29 Waku wahenoi iraniaꞌin me kat som kat som Tupana Paꞌãu toꞌe aiwanetup hawe aiweꞌatunug hawe. Waku wẽtup ok i ihay miꞌi hawyi wẽtup ok i ihay. Miꞌi hawyi taꞌatumoherep Tupana ehay torannia. Miꞌi pote waku ahewaure kaꞌa kahato Tupana ehay iꞌatumienoi kape. Waku watoꞌe aiwanetup hawe Tupana ehay sio yt waku watoꞌe aiwanetup hawe.
30 Karãpe Tupana ihay aiwẽ pyi tomimuꞌeria pe miꞌi hawyi waku wẽtup ok ipoĩꞌam Tupana Paꞌãu e hap moherep hamo. Waku mehin watoꞌe. Miꞌi hawyi watimonik porapꞌi wẽtup ok ihay turan.
31 Waku yne aito Iesui mohey haria Tupana ehay moherep haria wo e. Yt naku i Tupana ehay wahenoi aiwoꞌoetu etu neꞌi. Waku wẽtup ok ti ihay miꞌi hawyi waku wẽtup ok i ihay tuereto. Miꞌi tã watunug mote weꞌatunug haria tikuap hãpyk Tupana ehay aiminug koꞌi. Miꞌi hawyi teꞌeroꞌe -Pywo ti rat paĩ iꞌatuꞌe hap ewy. Miꞌi hawyi iꞌatuꞌarot hap yt kat i iꞌatuwanetup hawe.
32 Miꞌi hawyi teꞌeroꞌe -Tupana Paꞌãu kaipyi urumuꞌe pote urumoweꞌeg Tupana ehay wo. Uiwyriaꞌin Karãpe Tupana ihay aiwẽ pyi miꞌi hawyi yt ahiag ewy i ihay. Waku pe aiwanetup hap toineꞌen yt ahesoꞌok hap ewy hin i maꞌato ahehay aiwatnuat ewy toineꞌen aiwanetup hawe. Taꞌi watikuap Tupana toꞌe hap Iesui motypot hap hawyi watimoherep miitꞌin me.
33 Maꞌato Tupana Paꞌãu toineꞌen aipyꞌasetpe hawyi Tupana motypot hap hãpyk kahato watunug. Miꞌi hawyi woꞌowese haria wo raꞌyn Tupana Paꞌãu ainug.
34 Karãpe watuweꞌatunug Tupana motypot hamo yt naku i ahehay aiwoꞌope woꞌope aimuꞌe hat aimuꞌe turan. Waku watuwanetup aimuꞌe hat ehay kape yn wẽtup wanetup hap yne aito hap ewy waku are. Aheharyꞌi yt ikuap i pote waku tohẽtup ahepe taꞌaipok toꞌyat kapiat hawyi.
35 Yt naku i apo e woꞌomuꞌe hawe. Katupono waku Iuteuria eko ewy waku watunug itote. Miꞌi tã Iuteuria ywania -Yt naku i haryporia aiꞌapykok hat aiꞌakag wo iꞌatuꞌe. Miꞌi hawyi waku yne Iesui mohey haria teꞌeropyhuꞌat mesuwat seko upi.
36 Pyno yt eikaipyi tuut Tupana ehay miwan miat maꞌato Iuteu ywania kaipyi yne Tupana ehay miwan miat tuut e. Katupono saꞌawyꞌi eiperia tawa Kurintiu piaria yt kat i Tupana ehay eikai. Miꞌi turan putꞌok e Tupana ehay ehete uiwẽ kaipywiat. Miꞌi tupono yt eiwekaipyi i eweikuap Tupana ehay. Iꞌewyte yt ehepe yn i putꞌok e Tupana ehay uiwẽ kaipywiat. Katupono tukupteꞌen kahato iraniaꞌin ywania Tupana ehay kuap haria maꞌato yt eimienoi hap kaipyi i paĩ taꞌatukuap are. Yt naku i pyno eweiꞌe -Tupana ehay moherep haria kahato uruto. Yt naku i eweiꞌe uruto poꞌog Tupana ehay kuap haria iraniaꞌin kai yt naku i mio tã eweiꞌe.
37 -Pyno uito ti Tupana ehay moherep haria koro koꞌi eweiꞌe saꞌag. Taꞌi Tupana tum naꞌyn uruepe tesaika hap tomisepap nug hamuat eweiꞌe. Poꞌog waku eweiꞌe eiwoꞌope -Aimuꞌe hat sese Pauru mimuꞌeria aito waku eweiꞌe.
38 Maꞌato toineꞌen wẽtup ok eipyꞌasetpe -Taꞌi Pauru yt imoherep kuap i Tupana ehay e hat. Mio tã e hat pote yt eweiwesat teiꞌo. Mio tã toꞌe hawyi yt ewetum neiꞌo ehewaure kaꞌa howawi.
39 Uiwyriaꞌin waku wahẽtup yne aipyꞌa pyi -Tupana uinug o ewẽ wo ehay moherep miitꞌin miat hamo watoꞌe. Iꞌewyte waku watoꞌe Tupana pusu puat ihay teran nakat pe -Waku mana waku uhyt watoꞌe. Yt etipyhyp teiꞌo miꞌiria.
40 Miꞌi hawyi karãpe watiꞌatunug watuwaꞌatunug Tupana motypot hamo hawyi waku hãpyk puo watunug. Watimotypot waku pe kahato imotypot yat pe are uito Pauru.
