Saꞌawyꞌi Wuat Kurintiu 15:1-58
15 Uiwyriaꞌin tawa Kurintiu piaria pyno mesup uito Pauru ahenoi teran poꞌog mekewat saꞌawyꞌi wuat uimienoi hãpyk takat sehay etiat. Saꞌawyꞌi uiꞌe hap eweimohey haty wo hap ahenoi iraꞌyn teran ehepe. Uiꞌe hap saꞌawyꞌi wuat ewy yt atikyꞌesat i eweiwaure katupono miꞌi watomohey motꞌi hawyi Iesui mohey haria sese watopyhuꞌat.
2 Pyno mio tã are worohoꞌomuꞌe saꞌawyꞌi wuat sehay wakuat sese ahenoi. Miꞌi eweimohey motꞌi pote Tupana miehakyeraꞌat koꞌi eweikupteꞌen maꞌato watomohey ran neꞌi pote yt e.
3 Yt uiwekaipyi i saꞌawyꞌi worohoꞌomuꞌe maꞌato Tupana tum tesaika hap uhepe tehay wakuat moherep miitꞌin miat hamo pote sehay wakuat poꞌog torannia kai atimoherep ehepe Aipotypot Iesui ikuꞌuro ariaꞌyp posak ete aiꞌapiheg hap Tupana piat aiminug saꞌag koꞌi etiat. Aimoti hap koꞌi moma hamo ikuꞌuro itote aikawiatno aikotã Tupana toꞌe saꞌawyꞌi hap ewy aikotã miwan me toꞌe hap ewy ikuꞌuro raꞌyn.
4 Miꞌi hawyi taꞌatusyp ipiit miꞌi hawyi itote myẽꞌym eꞌat tosyp hawe ikuꞌuro sese hawyi myẽꞌym eꞌat hawyi Tupana tomoieineꞌen i raꞌyn guꞌuro pyi Tosaꞌyru aikotã Tupana toꞌe saꞌawyꞌi hap ewy aikotã Isaia tiwan 53 piat toꞌe hap ewy.
5 Tuwemoherep guꞌuro pyi hawyi tuwemoherep saꞌawyꞌi temiit Peteru kape. Miꞌi hawyi tuwemoherep temiitꞌin 12 ok takaria kape topotmuꞌeria sese kape.
6 Miꞌi hawyi meiũran Iesui tuwemoherep i raꞌyn miitꞌin sem kape temiitꞌin 500 ok takaria kape saꞌawyꞌi hewyry iwywuat rakaria kape. Miꞌiria teꞌeraꞌakasa kahato taꞌatukuap ihay. Koitywy ti miꞌiria tukupteꞌen ne aimuꞌe haria wẽtup ok wẽtup ok maꞌato ikuꞌuro raꞌyn iraniaꞌin.
7 Miꞌi hawyi ipotmuꞌe Tiaku taꞌakasa hawyi yne ipotmuꞌeria teꞌeraꞌakasa pakup i iraꞌyn 11 ok takaria.
8 Meiũran aru tuwemoherep uhowowi. Uito Pauru araꞌakasa i raꞌyn Iesui uheha wo. Uito aikotã aimepyt yt tuwemoherep i te rakat ewy areineꞌen katupono araꞌakasa uito iraniaꞌin Iesui potpoꞌororia iꞌatuewatꞌypmo maꞌato ipotpoꞌoro sese uito are. Hirokat no areineꞌen Iesui toineꞌen aipyꞌasetpe turan mote.
9 Maꞌato uhewaku hap yt putꞌok e hin i iraniaꞌin Iesui potmuꞌeria kai katupono saꞌawyꞌi Iesui mohey haria ti atiꞌatusatyꞌi satyꞌi kahato. Saꞌawyꞌi atiꞌatumoma kahato miꞌiria. Saꞌawyꞌi atiꞌatuꞌuka miꞌiria maꞌato miꞌi pykai Tupana uikyꞌe. Yt uhewaku hap upi hin i uiꞌairo topotpoꞌoro wo. Saꞌawyꞌi hewanikap nuat areineꞌen pykai uiꞌairo topotpoꞌoro wo are.
10 Hegyiꞌat kahato Tupana uhepe atikuap koitywy. Atikuap iwese hap hawyi yt atipun hin i uikyꞌe hap. Arepotpap poꞌog ipotpoꞌororia iraniaꞌin kai aikotã uikyꞌe hap oktan arepotpap uikyꞌe hap moherep hamo.
11 Miꞌi hawyi uruimoherep ehepe Tupana ehay Iesui etiat sio uito sio 12 ok takaria Tupana ehay yn Iesui etiat. Taꞌi wẽtup sehay yn uruwẽ pyi tuwẽtem katupono uruto wẽtup sehay moherep haria yn uruimoherep wote. Miꞌi tupono Iesui mohey haria sok eipe mesup urupoꞌoro hat mohey haria eipe pote.
12 Urumimoherep saꞌawyꞌi wuat ehepiat wẽtup sehay yn aikotã Aipotypot Iesui tuwẽtem guꞌuro pywiat hap yn. Miꞌi hawyi eweimohey Miꞌi raꞌyn. Maꞌato mesup toineꞌen eipyꞌasetpe -Aikuꞌuro rakirẽ yt kat i aito. Yt karãpe i watoineꞌen i e haria.
13 Maꞌato yt kat i miitꞌin ieineꞌen hap tokuꞌuro hawyi miꞌi pote yt toineꞌen i tokuꞌuro hawyi Aikaꞌiwat Iesui katupono Aikaꞌiwat aipuꞌi kawiat sese toineꞌen MIIT SESE kawiat toineꞌen Iesui piit. Ikuꞌuro hawyi toineꞌen i raꞌyn guꞌuro pyi.
14 Aikaꞌiwat yt tuwẽtem i guꞌuro pyi pote yt kat hamo i watimuꞌe miitꞌin Iesui ete hawyi yt kat hamo i etimohey Iesui sio ikuꞌuro te guꞌuro pe te toineꞌen mote.
15 Haꞌawyte uruiꞌatumuꞌe eipe iꞌewyte mesup te Aikaꞌiwat Iesui tuwẽtem guꞌuro pyi urutoꞌe. Maꞌato mio tã yt watoꞌe i pote heso rakaria watoineꞌen -Heso rakat e Tupana Iro pote ahepe.
16 Tupana yt aihep i guꞌuro pyi aikuꞌuro hawyi pote yt toihep i saꞌawyꞌi Aikaꞌiwat Iesui guꞌuro pyi wy. Aikaꞌiwat yt ihãite i te pote heso hap watomohey hawyi yt kan hamo i wahekatup aheineꞌen hap wuatꞌi eꞌat piat are. Maꞌato tuwẽtem guꞌuro hawyi hap watikuap taꞌyn iꞌewyte aheineꞌen aikuꞌuro hawyi hap watikuap.
17 Uiwyriaꞌin taꞌi Tupana yt timoieineꞌen i Aikaꞌiwat guꞌuro pyi pote te neke ikuꞌuro te mio topyhuꞌat. Miꞌi hawyi Iesui toineꞌen pakup i hap mohey hamo yt kat i. Yt kat hamo i imohey hap. Aimoꞌakagꞌaia hap yn topyhuꞌat. Miꞌi hawyi watopyhuꞌat hoꞌowasat rakaria ewywuat. Miꞌi hawyi yne aiminug saꞌag topyhuꞌat ahete te iꞌewyte aiꞌapiheg hap aru topyhuꞌat ahete Iesui ikuꞌuro te pote.
18 Iꞌewyte yne aiwyriaꞌin ikuꞌuro rakaria wo tukupteꞌen ne nimuaria Iesui mohey haria. Yt kat i aheineꞌen i hap aikuꞌuro hawyi pote yne aitoria hoꞌowasat rakaria watukupteꞌen wuatꞌi eꞌat pe iꞌewyte aiwyriaꞌin ikuꞌuro rakaria iꞌatuwoꞌosyp hawe te tukupteꞌen ne. Miꞌiria yt karãpe i tuwẽtem woꞌosyp hap popyi yt kat i aheineꞌen i hap wote.
19 Uiwyriaꞌin yt watoineꞌen i aikuꞌuro hawyi miꞌi pote mesuwarote yn watukupteꞌen. Aikuꞌuro hawyi yt kat i topyhuꞌat aiwywo Iesui. Ikuꞌuro te pote heso rakaria watoineꞌen katupono watoꞌe miitꞌin me -Iesui toineꞌen ne watoꞌe.
Iesui Yt Iꞌaparap I Hap Upi Aikawiatno Hatno Toineꞌen
20 Pywo ti rat Aikaꞌiwat yt nem rakatno no hin i toineꞌen. Mio yt ikuꞌuro i koran katupono Tupana timoieineꞌen pakup i raꞌyn Aikaꞌiwat. Toihep Tosaꞌyru guꞌuro pyi aimuꞌe hamo -Aikotã atihep Uhaꞌyru miꞌi hap ewy worohoꞌohep eipe guꞌuro pyi e hamo toihep Tosaꞌyru.
21 Saꞌawyꞌi sese wuatꞌi miitꞌin ahaꞌaseꞌi Atãu kaipyi taꞌatuꞌaparap Tupana pe miꞌi pote ikuꞌuro rakaria tukupteꞌen. Miꞌi hawyi yne aito Atãu ewy aikuꞌuro hap toineꞌen ahaꞌaseꞌi ewywuat topyhuꞌat iꞌaparap haria aito pote. Miꞌi pote ikuꞌuro rakaria yne aito. Miꞌi hawyi wẽtup MIIT tuwemoherep. Miꞌi MIIT Iesui. Miꞌi yt iꞌaparap hin i Tupana pe. Miꞌi Tupana tihep guꞌuro pyi. Miꞌi hawyi koitywy imepytꞌin koꞌi wo aito iꞌewyte watuwẽtem guꞌuro pyi imohey haria aito pote.
22 Yne miitꞌin teꞌeropyhuꞌat taꞌatueꞌaseꞌi Atãu ewywuat toꞌoꞌewyꞌewy yt naku i nug haria sok. Miꞌi pote ti yne aito ikuꞌuro rakaria. Miꞌiria Atãu saipepiaria toꞌoꞌewyꞌewy. Karãpe watomohey Aikaꞌiwat Iesui hawyi Miꞌi MIIT ewywuat watopyhuꞌat. Miꞌi hawyi wẽtup miit ewy aito aikotã Tupana tihep Aikaꞌiwat Iesui guꞌuro pyi hap ewy iꞌewyte aihep aru aimoieineꞌen aru Tupana.
23 Nimo te ti Aikaꞌiwat Iesui tuwẽtem guꞌuro pyi wuatꞌi miitꞌin eꞌyian mete. Meiũran aito imohey haria hewatꞌypmo watuwẽtem iwywo e. Karãpe Iesui tuut turan watoineꞌen hewatꞌypmo.
24 Miꞌi hawyi ikahuro hap putꞌok e raꞌyn mekewat eꞌat pe Aikaꞌiwat tum aru torannia temiitꞌin Toꞌywot Tupana pe. Mekewat eꞌat pe topyhuꞌat wuatꞌi Porekuat no Iesui morekuaria porekuat no topyhuꞌat. Miitꞌin akag Akag wo topyhuꞌat. Imohey haria akag Akag wo topyhuꞌat. Miꞌi hawyi Iesui tum yne torannia Toꞌywot pe miꞌiria.
25 Koitywy Aikaꞌiwat Iesui topyhuꞌat Wuatꞌi Porekuat no raꞌyn maꞌato miꞌi pykai iꞌatu kahato miitꞌin -Yt atikyꞌesat i Iesui Uiporekuat no e haria. Miꞌiria ti iꞌatupyꞌahak Iesui ete. Nimo morekuaria tiꞌatuꞌakit taꞌatupy wo taꞌatuewanikaptia akag okpe tote wuatꞌi ehamo. Miꞌi hawyi iꞌatumimohit wo teꞌeropyhuꞌat. Miꞌi hap ewy ti aru Aipotypot Iesui tiꞌatuꞌakit neꞌi -Yt uruikyꞌesat i En uruporekuat no e haria aru mekewat eꞌat pe.
26 Toiꞌatumoma yne tewanikaptia hawyi hemiitꞌin yn topyhuꞌat. Miꞌi hawyi toimoma iꞌewyte aikuꞌuro hap. Guꞌuro toimoweityk yne raꞌyn hawyi yt kat i raꞌyn are.
27 Nimo Tupana toꞌe -Areineꞌen aru yne Porekuat no e. Areineꞌen aru torannia saꞌag akit hatno e saꞌawyꞌi Tupana miwan me mekewat morekuat Tawi wepy hawe miwan 8.6 piat pe. Yt tuwete i ihay morekuat Tawi maꞌato Tupana Saꞌyru ewanikaptia ete ihay. Miꞌi hap ewy Tupana tunug mesup katupono tutunug naꞌyn Tosaꞌyru Wuatꞌi Porekuat no.
28 Meiũran aru wuatꞌi wanikaptia okpe tote topyhuꞌat. Miꞌi hawyi wuatꞌi Porekuat no topyhuꞌat hawyi yne toineꞌen yi kai. Miꞌi hawyi tuwepỹꞌãtutuk Toꞌywot kape -Uiꞌywot e aru En yn waku uruꞌakag wo e. Koitywy atum torannia uhemiit epe e Iesui Tupana pe. Miꞌi hawyi Tupana topyhuꞌat wuatꞌi akag wo i raꞌyn.
29 Uiwyriaꞌin tawa Kurintiu piaria kat pote eweiꞌe -Yt kat i aikuꞌuro hawyi aheineꞌen pakup i hap eweiꞌe. Yt eiweꞌeg hin i mio tã eiꞌe pote katupono toineꞌen wẽtup eheko itote -Karãpe wẽtup ok miꞌasyp miit toineꞌen maꞌato yt taꞌatusetꞌok i te waku wahetꞌok wẽtup ok ikuꞌuro rakat kawiatno eweiꞌe saꞌag maꞌato -Yt kat i aheineꞌen i hap eweiꞌe pote kat hamo ten etiꞌatusetꞌok miitꞌin ikuꞌuro rakaria eheko ewy areꞌe.
30 Yt kat i aheineꞌen hap aikuꞌuro hawyi pote kat hamo ten wohoꞌopot aat kaꞌap miitꞌin muꞌe Iesui etiat hamo apo are.
31 Yt karãpe i aikuꞌuro hawyi watoineꞌen mote yt kat hamo i uito atiꞌatumuꞌe aat kaꞌap wanikaptia uiꞌauka teran haria. Uiwyriaꞌin pywo ti worohoꞌokyꞌe eipe uimowepiit haria eipe. Mesuwe uimohan haria tukupteꞌen. Yt taꞌatukyꞌesat i uhehay Iesui etiat hap wote uiꞌauka teran. Maꞌato miꞌi hap ahenoi teran ehepe katupono aito wẽtup miit ewy Iesui mohey haria aito pote worohoꞌokyꞌe haype.
32 Meiũpiaria tawa Ewesu piaria haiwot rakaria teꞌeropyhuꞌat uhete. Taꞌi aikotã awyato koꞌi ewy haiwot rakaria uimienoi hap ete. Maꞌato miꞌi pykai atiꞌatumuꞌe te -Aikuꞌuro hawyi watoineꞌen i e hap ete. Maꞌato atiꞌatumuꞌe te miꞌi hap ete waĩꞌiꞌatuꞌe pykai. Uiꞌauka pote uiꞌauka are maꞌato worohoꞌomuꞌe te pywo uiꞌe hap pote. Maꞌato yt kat i aheineꞌen pakup i hap toineꞌen mote kan hamo ten uhoꞌopot mesup meiũpe tawa Ewesu pe areꞌe. Yt uiweꞌeg hin i eiꞌe hap pywo pote.
Tawa Kurintiu piaria worohoꞌomuꞌe kahato pykai yt uimohey hin i. -Yt kan hamo i worohoꞌomuꞌe kuap katupono yt eiweꞌeg hin i eiperia. -Yt watoineꞌen i aikuꞌuro hawei eweiꞌe yt pywo pe i eiwoꞌope itote. Kat pote tig mio tã eweiꞌe saꞌag are. Yt pywo pe i watoineꞌen aikuꞌuro hawyi yt kat i aheineꞌen hap toineꞌen aru pote poꞌog waku ienuk hap yn watunug aat kaꞌap mahy ete aat kaꞌap hawyi waku aisyp hawyi toran naꞌyn aheineꞌen hap.
33 -Aipap wuatꞌi eꞌat aikuꞌuro hawyi iꞌatuꞌe iraniaꞌin eimuꞌe haria. Yt naku i iꞌatuꞌe ehepe eimuꞌe haria eimaꞌat sehay wo katupono taꞌatukyꞌesat yt naku i nug haria eiperia eiãꞌãg teran haype miꞌiria. Taꞌatukyꞌesat eipe iꞌatuꞌewywuaria hap. Eiweꞌeg wo o miꞌiria pupi. Iꞌatuehay upi eweipyhuꞌat hawyi iꞌatumimaꞌat koꞌi eweikupteꞌen aru.
34 Aikotã watoineꞌen pya hesoꞌok takaria pupi hap ewy waku watoineꞌen miꞌiria pupi. Eweiꞌaipok to eiwemoweꞌeg hamo. Ewetoiat ro saꞌag nug hap koꞌi katupono iꞌatu kahato aria kapiat wat hanuaria tawa Kurintiu piaria katupono yt karãpe i eweiꞌatumuꞌe miꞌiria Aipotypot Iesui ete. Waku eiwemoti aria kapiat ehehay pyi tuwat hap pupi.
35 Maꞌato eweiꞌe -Aikotã aru ikuꞌuro rakaria tuwẽtem guꞌuro pyi. Aikotã aru iꞌatupiit pakup eweiꞌe.
36 Mio tã eweiꞌe pote yt ikuap sese i hat ewy eweikupteꞌen. Yt eweikuap i te karãpe watikoi awati aiko pe meiũran aru aimikoi iãꞌỹi tuweityk katupono hẽtyt raꞌyn yi pyi pote.
37 Kat iãꞌỹi watikoi sio awati sio wẽtup miꞌi ti yt ipiit i te maꞌato hẽtyt hawyi ipiit itag naꞌyn. Miꞌi ti ipiit sese.
38 Miꞌi hap ewy raꞌyn Tupana tum naꞌyn yne iãꞌỹi pe tesaika hap hẽtyt hamo itag hamo. Yne watiwaure meremo aikopiat iãꞌỹi tuweupi weupi.
39 Miꞌi hap ewy aipiit yt miat piit ewy hin i yt weita piit ewy hin i yt pira piit ewy hin i. Miꞌiria ipuꞌi kawiat maꞌato yt aipiit ewy hin i.
40 Miꞌi hap ewy ti atipy piaria tukupteꞌen. Taꞌi miꞌiria yt mesuwarotiaria koꞌi yt ewy hin i raꞌyn. Taꞌi atipy piaria wyti ikahu kahato iꞌewyte mesuwarotiaria ikahu wy maꞌato ti yt toꞌoꞌewyꞌewy hin i.
41 Aat iꞌewyte ikahu. Waty miꞌi iꞌewyte ikahu maꞌato ikahu hap yt aat kahu hap ewy hin i. Waikiru koꞌi iꞌewyte ikahu wen maꞌato yt aat waty ewy i ikahu hap ewy hin i. Maꞌato yne miꞌiria ikahu kahato Tupana minug koꞌi pote.
42 Miꞌi hap ewy ti guꞌuro pywiat aheineꞌen pakup i hap. Aipiit wyti aikotã hãꞌỹi ewy. Taꞌatusyp miꞌi hawyi ti tuweityk taꞌyn aimikoi awati iãꞌỹi ewy maꞌato hẽtyt hap tuwẽtem hawyi yt saꞌawyꞌi wuat hãꞌỹi ewy i. Miꞌi hap ewy aipiit wẽtup taꞌatusyp hawyi aipiit aimikoi ikahu kahato tuwẽtem guꞌuro pyi. Tupana tum ne wuatꞌi eꞌat piat ieineꞌen hap aipiit pakup we e.
43 Taꞌi aipiit aisyp turan yt ikahu hin i. Yt kat i ahesaika hap aikuꞌuro hawyi. Maꞌato karãpe aheineꞌen hap ipakup i hawyi aipiit ikahu sese raꞌyn topyhuꞌat hesaika sese toineꞌen.
44 Aisyp hap eꞌat pe turan aipiit ipuꞌi yn toineꞌen maꞌato Tupana aimoieineꞌen i hap eꞌat pe hawyi aipiit pakup toineꞌen Ipaꞌãu minug. Miꞌi ewywuat topyhuꞌat toineꞌen aipiit ipuꞌi ikag kawiat maꞌato toineꞌen iꞌewyte mekewat piit atipy piaria ewywuat yt aiwat ewy i Tupana Paꞌãu minug.
45 Katupono saꞌawyꞌi Tupana tunug Atãu miit ihãite kahato rakat e ti miwan me. Maꞌato iꞌewyte toꞌe miwan me -Putꞌok e aru Atãu Saipepiat e Iesui piat. Miꞌi Miit poꞌog naꞌyn katupono aikotã Tupana toineꞌen hap ewy aimoieineꞌen hap toineꞌen.
46 Saꞌawyꞌi aipiit ipuꞌi kawiat ikag kawiat toineꞌen maꞌato watuwẽtem guꞌuro pyi hawyi aipiit Tupana Paꞌãu minug Iesui piit ewywuat toineꞌen.
47 Saꞌawyꞌi wuat Tupana tunug Atãu yi kawiat. Mekewat Atãu Saipepiat Iesui toineꞌen.
48 Miꞌi hap ewy ti aito mesuwarote watoineꞌen ahaꞌaseꞌi Atãu ewywuat pote ti aito mesuwarotiat kape yn aiwanetup hap maꞌato mekewat wẽtup ok Miit Iesui Miit sese atipy Kaipywiat mepytꞌin no watoineꞌen mote atipy kapiat wanetup haria wo raꞌyn aito.
49 Pyno ti Atãu iãꞌãkap koꞌi aito mesup watoineꞌen maꞌato meiũran ti aru Atipy Kaipywiat Aikaꞌiwat Iesui iãꞌãkap koꞌi watopyhuꞌat e.
50 Pyno eiweꞌeg wo o uhekatuwyria katupono aipiit mesuwarotiat yt teke kuap i atipy pe katupono aipiit ipuꞌi kawiat huu kawiat ikuꞌuro iꞌokpuk takat toineꞌen. Aikope Morekuat no Tupana toineꞌen hap tote yt uwe i ikuꞌuro rakaria wo toineꞌen itote.
51 Pyno atomoherep teran mio wuat uimiwan etiat Tupana ehay ehepe.
52 Iesui uut turan ni tukupteꞌen ihãite rakaria maꞌato mekewat eꞌat pe ti aru aipiit pakup we Iesui piit ewywuat topyhuꞌat meremo. Mekewat hap eꞌat pe merep hap ewy tuut Iesui aikotã aheha mehit hap ewy meremo hap ewy e. Miꞌi hawyi Tupana hu huꞌe -Ariot raꞌyn e hamo. Miꞌi hawyi hu huꞌe hap ihay pirik pya wo hawyi ti aru meimuẽwat map haria teꞌeruwenoꞌẽ raꞌyn guꞌuro pyi e. Ipaku we watoineꞌen mekewat eꞌat pe. Aikotã Satere uut topopy kuap hap ewy mekewat eꞌat pe ikahu kahato watuwẽtem aiwoꞌosyp hawyi.
53 Maꞌato ti aru aipiit pakup hap yt ikuꞌuro rakat nuat i raꞌyn watuwenoꞌẽ. Miꞌi hawyi aito yt ikuꞌuro rakat i te rakaria iꞌewyte aipiit topyhuꞌat meremo ipakup sese.
54 Mekewat eꞌat pe aipiit meremo ipakup we toineꞌen. Mesup aipiit ikuꞌuro rakat toineꞌen maꞌato mekewat eꞌat pe ieineꞌen hat watoineꞌen aikotã Tupana toꞌe hap ewy topyhuꞌat aru -Atimoma aru guꞌuro hawyi yt karãpe i eikuꞌuro hap toineꞌen e hap ewy.
55 Watokenꞌẽ kahato aikuꞌuro hap pupi mesup aikotã moĩ ahekatuꞌu hap pupiat ewy watokenꞌẽ. Maꞌato mekewat eꞌat pe Tupana aihep guꞌuro pyi hawyi yt kat i aikenꞌẽ hap toimoma raꞌyn pote e.
56 Ikuꞌuro rakaria aito katupono yt naku i nug haria aito watopyhuꞌat pote. Karãpe Tupana ainapin hap koꞌi yt watunug i miꞌi hawyi watikuap yt naku i nug haria aito Tupana wanetup hawe watopyhuꞌat hap watikuap.
57 -Tupana urutuwehum ewowi urupyꞌa pyi. Waku kahato En katupono etum naꞌyn Esaꞌyru uruepe urupotypot no waku kahato En. Mesup Esaꞌyru urumoesaika wakuat nug hamo. Urutuwehum ewowi watoꞌe Tupana pe.
58 Urumikyꞌeria uhekatuwyria yt eweitoiat teiꞌo ehepiat Iesui mohey hap. Waku eweikupteꞌen motꞌi o iwywo e yne eꞌat pe. Poꞌog Tupana mikyꞌesat ewy ewetunug no katupono watikuap taꞌyn ahaꞌup iwato tutum aru aipotpap iwato hap oktan. Watikuap taꞌyn aiminug Tupana mikyꞌesat ewywuat hap wuatꞌi eꞌat piat topyhuꞌat.
