Saꞌawyꞌi Wuat Kurintiu 2:1-16
2 Uiwyriaꞌin tawa Kurintiu piaria taꞌi mekewat eꞌat pe saꞌawyꞌi te areto ehewowi eimuꞌe hamo turan areineꞌen eipyꞌasetpe. Worohoꞌomuꞌe kahato Tupana mimoherep oktan. Tupana mikyꞌesat ewy yn worohoꞌomuꞌe yt uhehay niatpo hin i atunug eimuꞌe hap ete.
2 Mio tã are uiwepe -Mesuwe Iesui yn atimoherep miitꞌin me hawyi iraniaꞌin ehay atiwaure yne. Aipotypot ete yn aru uhehay areꞌe uipyꞌa pe. Aikotã Aikawiatno ariaꞌyp posak ete ikuꞌuro hap yn aru uhehay wo atimoherep tawa Kurintiu piaria pe areꞌe uiwepe.
3 Saꞌawyꞌi te areineꞌen eipyꞌasetpe turan uipiit yt hesaika hin i hawyi uityry popuo worohoꞌomuꞌe paa uiꞌe popuo worohoꞌomuꞌe turan.
4 Yt ihay se hin i hap ewy worohoꞌomuꞌe. Miitꞌin ehay se hap yt ewy i worohoꞌomuꞌe maꞌato Tupana Paꞌãu esaika hap kaipyi worohoꞌomuꞌe. Miꞌi hap ewy pykai ti Tupana Paꞌãu esaika hap topyhuꞌat uhehay moesaika hamo. Miꞌi pote miꞌi hawyi -Pywo pywo eweiꞌe eipyꞌa pe uhehay tyry wywo pykai.
5 Miꞌi hawyi Iesui mohey haria eweikupteꞌen Tupana esaika hap kaipyi. Yt eweipuẽti hin i eimohey Tupana piat hap miitꞌin iꞌatuehay weꞌeg hap kaipyi.
6 Maꞌato iraniaꞌin Iesui mohey haria wo topotmuꞌeria hawyi atiꞌatumuꞌe miꞌiria uhehay wo -Iweꞌeg kahato rakat iꞌatuꞌe uhetiat pe. Maꞌato uito yt mesuwarotiaria weꞌeg hap kaipyi uhehay yt ahiag weꞌeg hap kaipyi i. Mesuwarotiaria ti koitywy iꞌatuweꞌeg kahato maꞌato yt iꞌatuweꞌeg hin i Tupana wanetup hawe. Meiũran Tupana timoma yne aru iꞌatuweꞌeg hap hawyi yt topyhuꞌat hin i aru iꞌatukai.
7 Maꞌato uito atiꞌatumuꞌe Iesui mohey haria Tupana weꞌeg hamo yn. Yt miitꞌin mikuap kaipyi hin i atiꞌatumuꞌe maꞌato mekewat weꞌeg hap Tupana kaipywiat yn wo atiꞌatumuꞌe torannia miꞌiria. Maꞌato iraniaꞌin yt kuap i hap ewy mesuwat sehay uimimoherep kat pote uhehay sehay yianmiat ewywuat aikotã saꞌawyꞌi Tupana aiꞌairo mesuwat yi nug hap eꞌyian mete hap ewy.
8 Tupana poꞌog iweꞌeg morekuaria kai katupono morekuaria weꞌeg hap yt putꞌok e i Tupana Mipoꞌoro Aiporekuat nuat weꞌeg hap ete. Maꞌato teꞌeruweꞌeg pote kat pote som taꞌatuꞌauka Aipotypot ariaꞌyp posak ete.
9 Aikotã Tupana toꞌe Saꞌawyꞌi hap ewy -Mekewat uikyꞌe haria pe atum neran uiminug wakuat poꞌog ikahu torannia miitꞌin akasa hap koꞌi kai ikahu rakat e. Atum neran uhemiitꞌin me wakuat sese e. Yt teke i te iꞌatuwanetup hawe ikahu hap e. Miꞌi hap ti atum neran uikyꞌe haria pe e Tupana saꞌawyꞌi Isaia miwan 64.4 pe.
10 Miꞌi pote koitywy watikuap taꞌyn mekewat ikahu rakat Tupana miium. Maꞌato aito yn watikuap. Taꞌi Ipaꞌãu ti ahepe imoherep taꞌyn. Katupono Tupana Paꞌãu me heremo yne minug koꞌi heremo yne raꞌyn. Iꞌewyte migꞌi wuat yt uwe mikuap i koꞌi toikuap. Iꞌewyte toikuap yne kat hamuat kat hamuat Tupana Paꞌãu minug koꞌi. Miꞌi pote aimuꞌe torannia ete tepiat ikuap hap oktan.
11 Aipotypot ti miit aipiit ewywuat sese e. Miꞌi hawyi Miꞌi Miit wanetup hap watikuap toineꞌen aipiit pe Iesui Paꞌãu pote. Miꞌi pote watuwekuap Iesui paꞌãu sese toineꞌen aipiit pe. Miꞌi hap ewy Tupana wywo Tupana toineꞌen Ipaꞌãu. Miꞌi ti ikuap yne tuwetiat.
12 Koitywy toineꞌen naꞌyn Tupana Paꞌãu aipiit pe. Miꞌi hawyi Tupana Mipoꞌoro Iesui pe -Ereke ro watoꞌe hawyi teke raꞌyn. Miꞌi hawyi Ipaꞌãu kaipyi watikuap yne Tupana Paꞌãu pya piat ewy. Maꞌato iraniaꞌin mesuwarotiaria kai wẽtup maꞌãu neꞌi yt aiwat ewy hin i raꞌyn.
13 Miꞌiria ti wẽtup maꞌãu ahiag watnuat wanetup hap ewy tukupteꞌen. Miꞌi pote wẽtup sehay iꞌatuete wuatꞌi mikuap ewy miꞌiria weꞌeg hap. Miꞌi pote iꞌatuepe uruweꞌeg kahato katupono Tupana Paꞌãu ti wẽtup sehay wo raꞌyn aimuꞌe. Miꞌi hawyi aiwẽ pyi wẽtup sehay raꞌyn tuwẽtem sehay pywuat sese yn naꞌyn. Miꞌi pote aimimuꞌeria Tupana Paꞌãu eiam kahato wo tukupteꞌen hawyi pywo iꞌatuꞌe ahehay pe.
14 Maꞌato iraniaꞌin yt Tupana Paꞌãu yt eiam i koꞌi ti -Yt iꞌatuꞌe neꞌi Tupana ehay pywuat aiwẽ piat ete katupono miꞌiria yt kat kuap i Tupana miium Topaꞌãu wakuat kaipywiat. -Yt kat hamo i ehay iꞌatuꞌe Tupana pe. Taꞌi aimienoi Tupana Paꞌãu kaipywiat ete ti teꞌeruwekyryꞌi neꞌi. Yt taꞌatukuap i kahato Tupana miium koꞌi ikahu rakat pykai katupono Tupana Paꞌãu yt toineꞌen i iꞌatupyꞌa pe ikuap hamuat.
15 Maꞌato aipiit pe toineꞌen Tupana Paꞌãu pote watikuap kahato waku sese rakat sehay pywo rakat iꞌewyte yt naku i hap watikuap yne.
16 Katupono miitꞌin mesuwarotiaria yt tikuap i kahato kat hamo Tupana tunug tomikyꞌesat koꞌi. Aikotã toꞌe iwan me hap ewy -Taꞌi yt uwe i ti ikuap Aikaꞌiwat wanetup hap. Taꞌi yt uwe i ti inapin kuap e Isaia tomiwan me. Yt uwe i Tupana wanetup hap kuap hat toineꞌen e Isaia miwan 40.13 pe. Watikuap kahato mesup katupono Aikaꞌiwat Iesui wanetup hap aikai kahato toineꞌen mesup. Iesui wanetup hap toineꞌen aipyꞌa pe aiwanetup hawe hawyi Tupana mikuap koꞌi toineꞌen wy aipyꞌa pe katupono Iesui Toꞌywot ewywuat wanetup hat toineꞌen aipaꞌãu me aipyꞌa pe e.
