Saꞌawyꞌi Wuat Kurintiu 3:1-23
3 Uiwyriaꞌin tawa Kurintiu piaria saꞌawyꞌi Uito Pauru ahenoi teran Tupana ehay ehepe saꞌawyꞌi uheineꞌen itote turan maꞌato tig mekewat eꞌat pe yt ahenoi kuap i Tupana Paꞌãu mikyꞌesat ewywuat hãpyk poꞌog nakat katupono eipe yt Iesui mohey haria yt ewy hin i te eiwanetup hap. Mesuwarotiat wanetup hap ewy yn eipe eweikupteꞌen katupono kurin kat ewy Iesui mohey hap toineꞌen eikai mekewat eꞌat pe.
2 Saꞌawyꞌi eipe hirokat hit ewy eweikupteꞌen mi hy yn u haria ewy aikotã hirokat yt tuꞌu kuap i te ipuꞌi kãꞌã hap ewy eweikupteꞌen Tupana ehay yt ewetunug yne kuap i te pote. Miꞌi hawyi worohoꞌomuꞌe potꞌi teran Tupana mikuap eikyꞌe hap oktan. Maꞌato ahenoi hawyi yt eweikuap kuap i. Maꞌato iꞌewyte koitywy yt eweikuap i uiꞌe hap koꞌi eimuꞌe hap.
3 Katupono eweikupteꞌen mesuwarotiat wanetup haria ewy yn. Eiwuꞌuka wuꞌuka eiwoꞌope sehay hit no. Miꞌi hawyi ehaꞌywyi eweikupteꞌen eiwoꞌope aikotã mesuwarotiaria yt Iesui mohey i haria eko ewy eweikupteꞌen.
4 Mio tã eweiꞌe eiwoꞌope -Uruto ti Pauru mohey haria maꞌato iraniaꞌin -Uruto ti aimuꞌe hat Apauru mohey haria eweiꞌe. Miꞌi hawyi eiwuꞌuka wuꞌuka aat kaꞌap mio tã eiꞌe eiwoꞌopiat hamo. Yt naku i miꞌi tã eweiꞌe katupono miꞌi tã neꞌi pote mesuwarotiaria yt Iesui mohey i haria ewywuat eiwewanetup.
5 Maꞌato areꞌe ehepe -Uito ti Pauru Tupana yn eropat hat sese iꞌewyte eimuꞌe hanuat are. Apauru iꞌewyte Tupana yn eropat hat. Kat hamo pyno -Aimuꞌe hat Pauru mohey haria uruto eweiꞌe. Saꞌawyꞌi worohoꞌomuꞌe eipe miꞌi hawyi Iesui mohey haria wo eweikupteꞌen uiꞌewy eweimohey pote are. Aikaꞌiwat emiitꞌin sese uruto urutunug urupoꞌoro hap oktan yn.
6 Uito areineꞌen hãꞌỹi koi hat Tupana ehay wo ewy worohoꞌomuꞌe mekewat eꞌat pe. Miꞌi turan aimuꞌe hat Apauru putꞌok e itote eimuꞌe hamo hap ewy hawyi toihuꞌi huꞌi uimikoi iãꞌỹi hap ewy hawyi iꞌatutag naꞌyn Tupana esaika hap wywo.
7 Maꞌato Tupana yn ni aimotag kuap tomohey hamuat hap ete. Miꞌi tupono waku Tupana yn watimotypot hãꞌỹi nug hat iꞌewyte iꞌyp moehãite hat. Yt naku i watimotypot ikoi hat neꞌi are. Iꞌewyte yt naku i watimotypot ihuꞌi huꞌi hat neꞌi. Poꞌog waku imotag kuap hat watomohey haty wo.
8 Meiũran aru Tupana tum ahepe aipotpap hap saꞌup. Tutum ahepe haꞌup aikotã aipotpap hap oktan aru. Iꞌewyte iwato aipotpap pote iwato tutum yt pote kurin tutum. Pyno tukupteꞌen aitoria hãꞌỹi koi haria ewy hawyi iraniaꞌin ihuꞌi huꞌi haria ewy maꞌato saꞌup ium hat sese Tupana.
9 Pyno aito Tupana eropat haria Aikotã wẽtup ok etiat motpap nug haria ewy aito.
10 Eipe Tupana motypot yat ewy eweikupteꞌen. Uito Tupana motypot yat ãkukag moꞌam hat ewy Uipoꞌoro hat mikyꞌesat ewy are. Hãpyk kahato atunug wuatꞌi nug kuap hat ewy. Waku yne hawyi iraniaꞌin inug ipiit. Iꞌewyte iraniaꞌin iꞌahik yi wo hap ewy. Miꞌi hap ewy atunug ehepe are. Katupono Tupana toꞌe -Eiweꞌeg wo o ewetunug uiꞌyat nug hap ete waku uiꞌe hap ewy ewetunug o e ahepe. Miꞌi pote waku watiꞌatumuꞌe miitꞌin hãpyk kahato ihay pywuat nuat yn.
11 Aikaꞌiwat Iesui iꞌapyꞌyha ewywuat kahato. Iꞌapyꞌyha watopag yi pe aiꞌyat moheg hamuat hawyi aiꞌyat yt taꞌat hin i. Miꞌi hap ewy ti Aikaꞌiwat Iesui watopag aiꞌapyꞌyha wo hawyi watoineꞌen wuatꞌi eꞌat pe. Yt karãpe i wataꞌat aria pe. Iesui yn Tupana Miꞌairo Ahehakyeraꞌat hat. Yt naku i watoꞌe iraniaꞌin me -Yt Iesui yn i ti ahehakyeraꞌat hat maꞌato toineꞌen wẽtup ok ahehakyeraꞌat hat watoꞌe neꞌi yt naku i watoꞌe.
12 Eimuꞌe haria ti aiꞌyat nug haria ewy tukupteꞌen. Toineꞌen aiꞌyat nug kuap kahato haria ewy miꞌiria aiꞌyat nug nu kawiat ewy iheg nakat nu uru kawiat nu parata kawiat getap nug haria ewywuat aimuꞌe hãpyk Tupana ehay sese etiat haria ewywuaria maꞌato iraniaꞌin aimuꞌe haria aiꞌyat nug haria yt iheg hin i nug hap ewy tutunug. Yt toineꞌen motꞌi hin i iꞌatuminug koꞌi nupiꞌa miꞌu wo hap ewy taꞌatunug aiꞌyat ikahu wen maꞌato meremo yt ikahu i hap ewy topyhuꞌat. Miꞌiria taꞌatunug aiꞌyat meremo upip kawiat hawyi ikahu wen wẽtup ewaty hawyi haatꞌe hap ewy topyhuꞌat. Miꞌiria ewywuat aimuꞌe ikahu kahato maꞌato taꞌatuwanetup hap kaipyi aimuꞌe yt Tupana ehay sese kaipyi hin i aimuꞌe hawyi watomohey iꞌatuwanetup hawyi meremo waku maꞌato wẽtup ewaty hawyi aiꞌyat nem nakat hap ewy topyhuꞌat hap ewy.
13 Karãpe putꞌok e Aipotypot Iesui hawyi toimoherep aru wuatꞌi miitꞌin me iꞌatuminug sio waku sio yt hap. Sio watunug iheg nakat sio yt e. Tohãꞌãg yne aiminug koꞌi mekewat eꞌat pe sio iheg nakat nu ewy sio ariaꞌyp kawiat neꞌi hap kuap hamo.
14 Waku watunug Tupana motypot yat iheg kahato rakatno nu kawiat ewywuat. Miꞌi hawyi aria putꞌok e itote hawyi aria yt tuꞌu kuap i. Miꞌi hawyi Tupana tuwehum aiminug iheg nakat nuat toꞌyatnug mote.
15 Maꞌato aria tuꞌu neꞌi hawyi yt kat hamo i topyhuꞌat yt kat hamo i aipotpap. Watoineꞌen aru Tupana miehakyeraꞌat no wen maꞌato aipotpap saꞌup aipo pe yt kat i katupono aiminug aria tuꞌu yne. Yt kat i topyhuꞌat Tupana kapiat aipotpap hap watunug saꞌag neꞌi pote.
16 Eweikuap apo Tupana Paꞌãu yat sese eipe hap sio yt. Taꞌi Tupana yat sese koꞌi ti eipe. Tupana Paꞌãu eiam torannia imohey haria Iesui kaipywiat haria.
17 Maꞌato uwe uwe -Tupana yat moma teran e hat Tupana mimoma wo neꞌi aru topyhuꞌat. Katupono Tupana yat no yn waku aipiit topyhuꞌat aikotã Tupana ewaku hap ewy yn waku watopyhuꞌat. Aito ti Tupana yat sese ewy watoineꞌen.
18 Yt naku i watuwemaꞌat neꞌi Tupana yat -Uito poꞌog iraniaꞌin kai e hap mo. Miꞌi tã neꞌi watunug mote miitꞌin iraniaꞌin yt kat kuap i haria ewy neꞌi watuwanetup. Waku watipun -Uito poꞌog e hap pya aikai. Paa watoꞌe pote Tupana toꞌe ahepe -Eiweꞌeg kahato rakaria eipe e ahepe miitꞌin mikyryꞌi hamuat watoineꞌen pykai.
19 Iꞌatu kahato mesuwat yi tote -Uito poꞌog uiweꞌeg e haria maꞌato Tupana wanetup hawe yt kat i kuap haria ewy miꞌiria -Uito uiweꞌeg kahato iꞌatuꞌe pykai. Miwan me mio tã toꞌe -Uito poꞌog uiweꞌeg e haria teꞌeruwemaꞌat neꞌi taꞌatuweꞌeg saꞌag hamo hawyi taꞌatuweꞌeg poꞌog hap suki ewywuat topyhuꞌat taꞌatuꞌauka hamo pira ewy e Tupana saꞌawyꞌi miwan me.
20 Mio tã e haria pe Tupana toꞌe -Uito poꞌog uiweꞌeg iraniaꞌin kai eweiꞌe pykai yt kat hamo i eiweꞌeg hap e Tupana.
21 -Aito hekat rakaria ewy katupono Aiꞌywot Tupana sakpoꞌe hekat rakat pote. Yt kat i ahekat mesuwe pykai hekat rakaria watoineꞌen wuatꞌi eꞌat pe.
22 Yt naku i watuwemotypot -Uito poꞌog nakat e hap aiwanetup hawe. Yt naku i watuwehum miitꞌin minug teꞌeruwekaipywiat ete katupono torannia aiwat aiminug wuat koꞌi Tupana piat aipowyro hap. Uito Pauru maꞌato areineꞌen eimuꞌe eiwatnuat hamo raꞌyn. Iꞌewyte aimuꞌe hat Peteru aiwatnuat rẽ wy aimuꞌe hat Apauru aiwatnuat aimuꞌe hap tutum. Katupono yne yne Tupana minug aipowyro hamuat toineꞌen. Tutum aipowyro aikuꞌuro turanuat aipowyro hamo. Koran mukiꞌite wuatꞌi eꞌat pe aipowyro. Taꞌi iꞌewyte mesup iꞌewyte mukiꞌite eꞌihatꞌok pe turan toineꞌen kahato aipowyro hatno. Miꞌi pote hekat rakaria sese ewywuat watoineꞌen aito. Aito iꞌewyte aikuꞌuro wen iꞌewyte mesup iꞌewyte mukiꞌite iꞌewyte eꞌihatꞌok hap ewy.
23 Katupono Aikaꞌiwat Iesui watnuat watoineꞌen. Aikaꞌiwat Iesui toineꞌen Tupana watnuat. Miꞌi pote yne aito Tupana wuatnuat watukupteꞌen.
