Saꞌawyꞌi Wuat Kurintiu 4:1-21
4 Uiwyriaꞌin uruto ti Tupana potpoꞌororia pote waku ti eiwanetup urumienoi kape -Miꞌiria wyti Aipotypot eropat haria sese waku eweiꞌe. Miꞌiria wyti yt aimikuap i Tupana etiat moherep haria waku eweiꞌe uruepiat pe.
2 Karãpe watuwepotpap Aikaꞌiwat potpap nug hap ete turan waku kahato watunug iꞌe hap ewy. Waku watunug imikyꞌesat ewy. Miꞌi hawyi watoineꞌen heropat kuap sese haria wo aito.
3 Iraniaꞌin eipyꞌasetpe tukupteꞌen -Miꞌi wakuat kahato iꞌatuꞌe uhepiat pe. Iraniaꞌin -Yt naku i iꞌatuꞌe uhepiat pe. Maꞌato ti uito yt atikat i miitꞌin kaipyi -En ni waku e hap katupono -En ni waku kahato e hap Tupana kaipyi atikyꞌesat. Koitywy yt areꞌe i uiwepe uiwanetup hawe -Uito waku uito yt naku i yt areꞌe i uiwepe maꞌato atikat kahato Tupana piat uikuap hap -En waku e hap.
4 Karapeĩ yt kat i uiwemoti hawe pykai -Pyno waku kahato uito areꞌe uiwanetup hawe maꞌato Tupana yn ikuap sio uito waku sio yt hap. Sio atunug waku tope sio yt nakuap i atunug.
5 Karapeĩ Aikaꞌiwat putꞌok e atipy kaipyi miitꞌin patꞌok patꞌok hamo hap eꞌat pe ti aru Tupana tomoherep aru wuatꞌi pe aiwanetup saꞌag hap sio watunug waku tope sio yt hap sio tomotypot haria watoineꞌen sio watuwemotypot neꞌi sio miitꞌin motypot haria aito. Taꞌi mekewat eꞌat pe watikuap taꞌyn Tupana kaipyi -En ni waku e hap sio yt hap watikuap taꞌyn mekewat eꞌat pe -Uito waku aiꞌe pykai aito waku aiꞌe pykai.
Wakuat Sehay Kape Yn Eweiwanetup
6 Miꞌi hap ewy ti uruto uiwyriaꞌin. Uito Pauru eimuꞌe hat iꞌewyte Apauru toineꞌen itote eimuꞌe hat. Waku eiwanetup kahato uruehay kape katupono wẽtup ehay yn urutoꞌe Iesui etiat yn uruimuꞌe eipe. Pyno atikyꞌesat kahato uruꞌewy eweikupteꞌen wẽtup sehay yn moherep haria Iesui moherep haria uruto ewy uruhẽku ewywuat urupusu ewywuat waku eweikupteꞌen hap atikyꞌesat urupotmuꞌeria. Urumimuꞌe wẽtup ok yn uruto typy ok pykai. Yt naku i eweiꞌe Uito Pauru mimuꞌe hawyi wẽtup ok -Uito yt Pauru upi i maꞌato uito Apauru upi uito paĩ an yt naku i eweiꞌe katupono Apauru uito wẽtup miit ewy hawyi wẽtup sehay yn eimuꞌe Iesui Aimimotypot moherep hap yn uruehay. Yt naku i watimohit wẽtup ok aimuꞌe hat hawyi yt naku i watunug wẽtup ok aimuꞌe hat Tupana wo e.
7 Miꞌi pote kat hamo watoꞌe iraniaꞌin me -Uito poꞌog ekai katupono Tupana tum ahepe tomisepap kuap nug kuap hap. Yt aiwewi i watikuap wuatꞌi nug hamuat maꞌato Tupana miium kaipyi wahepap maꞌato yt pote yt kat i aikai. Pyno kat hamo ten -Uito poꞌog waku eikai watoꞌe aipyꞌa pe.
8 Koitywy -Uruto poꞌog eweiꞌe katupono uruikuap yne eweiꞌe. Taꞌi Miitꞌin muꞌe haria akag wo urutukupteꞌen eweiꞌe. Ikap kahato rakaria ewy urutukupteꞌen mesup pote yt kan hamo i urupoi poꞌog Tupana ehay mesup uruikuap yne raꞌyn mote eweiꞌe eipyꞌa pe yt iweꞌeg i haria ewy. Pywo pote waku uimuꞌe waku Apauru muꞌe haria wo eweikupteꞌen maꞌato yt pywo hin i eweiꞌe eipyꞌa pe. Hirokaria ewy te eweikupteꞌen eiwanetup hawe.
9 Uruto urutukupteꞌen wuatꞌi muꞌe hamo Tupana mipoꞌoro sese koꞌi uruto. Maꞌato miꞌi pykai eimimohit koꞌi wo urutukupteꞌen poꞌog yi kape wuatꞌi kai wuatꞌi miitꞌin wanetup hawe urutukupteꞌen. Iraniaꞌin uruꞌauka teran urukuasa teran urumohit teran wuatꞌi ehamo miitꞌin ehamo iꞌewyte atipy piaria ehamo urumohit turan.
10 Miꞌi pykai Aipotypot Iesui moherep hap ete yt urupohep hin i miitꞌin teꞌeruwekyryꞌi teran uruete pykai. Maꞌato ehete yt uwe i teꞌeruwekyryꞌi uruetiat ewy. Miꞌi pote -Uruto poꞌog Aipotypot emiit eweiꞌe. Uruweꞌeg poꞌog iraniaꞌin kai eweiꞌe. Uruto imohey pakup kahato haria eweiꞌe. Taꞌi uruwanetup hawe eipe ipakup kahato koꞌi. Maꞌato uruto miitꞌin mimohit koꞌi wo urutopyhuꞌat.
11 Koitywy hesyꞌat rakaria wo urutukupteꞌen. Uruteꞌyꞌu kahato uruhewyry hap upi. Uruesokpe koꞌi hiot hiotꞌe rakat. Miitꞌin miꞌahyk ahyk koꞌi uruto. Yt kat i iꞌyat rakaria uruto. Kowoꞌi kowoꞌi uruewyry yt urueꞌyni wywo i.
12 Urupotpap saꞌup hap kaipyi urutenuk. Karãpe miitꞌin urumohit taꞌatuehay wo hawyi uruiꞌatupoitynug miꞌiria uruehay wo. -Tupana Etiꞌatumoehãite no uruwanikaptia urutoꞌe aat kaꞌap. Iꞌatuehãite hap urutum urusatyꞌi satyꞌi kahato miꞌiria pykai.
13 Urutoineꞌen motꞌi Iesui mohey hap wywo uruꞌakit taꞌatuehay wo kahato pykai maꞌato uruto uruiwesat sehay iwese rakatno yn. Mesuwarotiaria mipun wuat urutopyhuꞌat. -Waku urumimohit haria wo eweikupteꞌen iꞌatuꞌe uruepe. Mio tã iꞌatuꞌe uruepe Tupana miꞌairoria sese uruto pykai.
Yt Eweimoti Wakuat Sehay Ete
14 Ahenoi yne mesup ehepe uiwyriaꞌin uimiwan me. Yt atikyꞌesat i eiwemoti neꞌi uimiwan ete uhehay ete maꞌato eimoehãite eiwanetup hawe yn worohoꞌonapin. Aikotã watinapin aimepyt ikyꞌe haype hap ewy worohoꞌonapin mesuwe.
15 Katupono uito areineꞌen eiꞌywot ewy katupono uiwẽ pyi eweikuap saꞌawyꞌi Aipotypot Iesui etiat. Miꞌi hawyi eweimohey Iesui hawyi wuatꞌi eꞌat pe gupteꞌen haria uimienoi wakuat kaipyi Uimimoherep kaipyi aikotã uimepytꞌin ewy eweikupteꞌen. Toineꞌen iꞌatu kahato eimuꞌe haria eiꞌapykok haria Tawa Kurintiu piaria wen maꞌato wẽtup yn eiꞌywot hap ewy toineꞌen. Miꞌi ti uito Pauru rat katupono wuatꞌi iraniaꞌin eimuꞌe haria yianme sehay wakuat ahenoi ehepe Iesui etiat.
16 Miꞌi hawyi uipyꞌa pyi ahẽtup ehupi eweikupteꞌen itote uiꞌewy kahato hamuat hap Aikaꞌiwat Iesui mohey hamuat hap ete.
17 Atikyꞌesat kahato eipe uito ewywuaria Iesui mohey haria. Miꞌi pote atipoꞌoro eimuꞌe hat ehewowi Uito ewywuat Timoteu. Miꞌi ti uhaꞌyru sese wo ewywuat toineꞌen uiwanetup hawe. Uikyꞌe kahato miꞌi katupono yt karãpe i uimaꞌat hatno toineꞌen. Miꞌi putꞌok e itote hawyi toimoherep ehepe eimiwaure aikotã worohoꞌomuꞌe saꞌawyꞌi wuat hap koꞌi ete. Aikotã watoineꞌen ipakup takaria ewy yn naꞌyn wẽtup piit ewy Aikaꞌiwat Iesui wywo hap ete. Aikope aikope miitꞌin tukupteꞌen hap kape uruhenoi hawyi Iesui mohey haria wo uruepiat taꞌatunapin hap ewy ipakup takaria wo raꞌyn tukupteꞌen. Wẽtup miit ewy yn Iesui piit wywo tukupteꞌen. Miꞌi hap ete eimuꞌe hamo atipoꞌoro uhaꞌyru Timoteu.
18 Saꞌawyꞌi urutuwat eipyꞌasetpyi hawyi iꞌatu kahato wemotypot haria tukupteꞌen eipyꞌasetpe -Pauru yt taꞌaipok i iꞌatuꞌe haypiat haria.
19 Maꞌato araꞌaipok irane te Tupana tum muap uhepe hawyi. Areineꞌen eipyꞌasetpe hawyi atikat eipyꞌasetpiat haria tukupteꞌen. Miꞌi hawyi atikuap irane uwe uwe eipyꞌasetpe Tupana motypot haria tukupteꞌen.
20 Tupana toineꞌen Aipotypot no yt aiwẽ kaipywiat i -Uiporekuat no En ereineꞌen Tupana yt e hap kaipyi i maꞌato aipyꞌa pyi watunug imikyꞌesat ewy hap kaipyi Tupana toineꞌen kuap Aipotypot no.
21 Waku areto eimoperupꞌi hamo sio eiꞌapiheg hap mywo. Sio waku worohoꞌomoperupꞌi eikyꞌe hap mywo uiwese hap wywo sio aikotã eweikyꞌesat hap wywo areto ehewowi.
