Saꞌawyꞌi Wuat Kurintiu 5:1-13
5 Koitywy ti wuatꞌi miitꞌin eikuap yt eiweꞌeg i hap ete meiũpiaria. Taꞌi taꞌatuhenoi henoi kahato ti aikotã aheineꞌen haryporia wywuat ihainiaꞌin wywuat hap koꞌi. Yt Iesui mohey haria ewy hin i eweikupteꞌen hap taꞌatukuap taꞌyn. Maꞌato eipe poꞌog saꞌag yt nakaria i mekewat yt Iesui mohey i haria kai. Katupono uruikuap eipyꞌasetpiat wẽtup ok toꞌywot eharyꞌi pakup toty pakup wywo toket hap.
2 Miꞌi hap ete ti yt tuwemoti hin i te maꞌato poꞌog ni uruto uruewaku toꞌe neꞌi saꞌag. Miꞌi hawyi eipe yt paa eweiꞌe hin i maꞌato -Waku miꞌi tã watunug eweiꞌe saꞌag. Uiwyriaꞌin waku waire waire nug haria eweiꞌatuꞌywyk eiweꞌatunug hap kaipyi.
3 Uipiit yt toineꞌen itote eipyꞌasetpe wen maꞌato areineꞌen eipyꞌasetpe uiwanetup hawe hap ewy miꞌi pote worohoꞌonapin aikotã areineꞌen eipyꞌasetpiat turanuat hap ewy. Taꞌi yt naku i kahato etunug ety hit eharyꞌi saꞌag wo mimi uhyt waku watoꞌe itote.
4 Miꞌi pote waku eiweꞌatunug yne eipe hawyi waku eweikay kay mekewat miit yt iweꞌeg i rakat ehewowi. Miꞌi tote ti toineꞌen aru Aipotypot Iesui eipyꞌasetpe iꞌewyte uipaꞌãu toineꞌen eiwywo. Miꞌi hawyi waku mekewat toꞌywot eharyꞌi wywuat get hat eweinapin kahato -Pyno koitywy ahiag watnuat ereineꞌen waku watoꞌe tope. Miꞌi hawyi mono etoiat ro eminug saꞌag maꞌato yt etoiat i ewaire waire hap pote ikuꞌuro rakat no ereineꞌen waku watoꞌe tope.
5 Maꞌato -Yt atoiat i uiwaire hap toꞌe pote waku watoꞌe Iesui pe -Pyno waku miꞌi miit piit ahiag miꞌauka wo topyhuꞌat maꞌato waku miꞌi miit paꞌãu topyhuꞌat epo pe Iesui wuatꞌi eꞌat pe aikope Tupana toineꞌen morekuat no hap tote waku watoꞌe.
6 Pyno yt eiwekyryꞌi teiꞌo mekewat miit minug saꞌag ete. Yt naku i kahato watuwehum miꞌi tã nug hat ete katupono mekewat miit topyhuꞌat mani puk ewywuat eipyꞌaset pe maꞌato eipe eweipyhuꞌat ipyre ewy. Miꞌi pote aikotã watopag ipyre mani puk pe hawyi toimorem yne mani puk hap ewy miꞌi hap ewy waku eweihep o mekewat miit saꞌag eipyꞌasetpyi hawyi ti aru eweipyhuꞌat miit wakuaria ewywuat. Yt naku i hap yt mig hin i haria eipe. Pyno saꞌawyꞌi wuaria Iuteuria tuwenoꞌẽ taꞌatuewanikaptia yi Esituꞌin po kaipywiat turan iꞌatumiꞌu man iteneg nakat yn iꞌatumiꞌu yt kat i nem nakat ewy.
7 Miꞌi ti yt kat i imoperup hap iꞌapuk hap nem nakat. Miꞌi yt ipyyp takat i mekewat iꞌatueman. Miꞌi hap ewy koitywy aiwat aheman yt kat i ipyyp hit hap imonem kuap hat.
8 Pyno toꞌiro Iesui enuk hap kape yt kat i ipyyp takat man aimiꞌu wywo hap ewy e. Pyno ti aimopyyp hap ewywuat toineꞌen mekewat mani puk ewywuat mekewat aiwoꞌomaꞌatꞌi maꞌatꞌi hap ewywuat toineꞌen. Iꞌewyte man teneg ewywuat toineꞌen mekewat aiwoꞌokyꞌe hap ewywuat. Miꞌi yn waku saꞌawyꞌi aimiꞌu wo watuwẽtem yi Esitu pyi turan yt kat i mani puk watioto kuap pote. Miꞌi man Tupana ehay pywo rakat yt kat i aheso hap wywo hap ewy. Miꞌi man ewywuat waku aimiꞌu wo katupono mekewat man puk aiwoꞌomopit pit hap ewywuat aiwoꞌotuꞌuka hap ewywuat watoꞌe saꞌawyꞌi. Waku poꞌog Tupana ehay sese wahenoi miitꞌin me yt kat i miitꞌin ehay heso hap wywo.
9 Saꞌawyꞌi atipoꞌoro uimiwan me einapin hamuat -Yt naku i watunug aiwy ok sese wo Iesui mohey hat yt iweꞌeg i sese rakat wuatꞌi ihainia wywuat ieineꞌen hat wuatꞌi haryporia wywo.
10 Tukupteꞌen aipyꞌasetpe mesuwat yi tote maꞌato iꞌatu kahato aiwyriaꞌin yt Iesui mohey i haria yt naku i nug haria. Miꞌiria tukupteꞌen yne eꞌat aikope aikope watoineꞌen hap tote ahewyry hap tote. Miꞌiria minug ewywuat yt naku i watunug katupono miꞌiria wuatꞌi haryporiaꞌin ihainiaꞌin wywo ieineꞌen haria. Ahekareꞌen sereꞌok takaria tukupteꞌen miꞌiria. Ahekat kyewi yn aimaꞌat maꞌat neꞌi miꞌiria wuatꞌi eꞌat pe. Miꞌiria wuatꞌi tupanaria mo wuat minug motypot haria. Yt naku i watunug miꞌiria ewywuat maꞌato waku watiꞌatuekyi miꞌiria Iesui mohey hap kape. Yt naku i watunug miꞌiria ahewanikaptia wo maꞌato poꞌog waku watiwesat miꞌiria waku hap ewy. Maꞌato karãpe Iesui mohey hat watoineꞌen hawyi yt naku i watunug ne aikotã miꞌiria minug yt naku i hap koꞌi ewywuat. Maꞌato miꞌiria ewywuat watoineꞌen yt naku i nug haria te waku -Iesui mohey haria miꞌapiheg wo watopyhuꞌat. Yt naku i watunug ne yt naku i nug hap saꞌawyꞌi wuat ewy Iesui mohey haria aito hawyi.
11 Maꞌato -Ewetoiat ro meimuẽwat koꞌi katupono miꞌi ewywuat watoiat pote watoineꞌen mesuwat yi tote waku pe.
Koitywy atipoꞌoro ewowi wẽtup sehay. Toineꞌen eipyꞌasetpe yt nakuap i nug hat -Uito Iesui mohey hat e hat maꞌato wuatꞌi wywo toineꞌen hewaire rakat miꞌi hat ewywuat yt eweiwesat wesat teiꞌo iꞌewyte yt erenuk teiꞌo iwywo. Iꞌewyte toineꞌen Iesui mohey hat maꞌato tupana iãꞌãkap kape toiwẽpap te toimohey te miitꞌin minug tupana koꞌi -Uito Iesui mohey hat wy toꞌe pykai waku miꞌi miit kai waure wo waku watukupteꞌen.
12 Iꞌewyte Iesui mohey hat maꞌato miitꞌin mohit tehay wuat hat toineꞌen ne iꞌewyte seroꞌok e hat iꞌewyte Iesui mohey hat maꞌato mahy kape toineꞌen imopẽꞌã rakat.
13 Miꞌi hat waku watinapin kahato aikotã saꞌawyꞌi Tupana toꞌe miwan me -Eweihep to eipyꞌasetpiat yt naku i nug hat uimohey toꞌe pykai e Tupana temiitꞌin me. Maꞌato iraniaꞌin mesuwarotiat yt Iesui mohey i haria yt kat hamo i miꞌiria watiꞌatuꞌapiheg katupono Tupana yn miꞌiria apiheg kuap hat. Maꞌato ti waku Iesui mohey haria yt naku i nug haria watiꞌatunapin hãpyk yn watiꞌatuꞌapiheg miꞌiria hap ewy waku e Tupana ahepe.
