Saꞌawyꞌi Wuat Kurintiu 6:1-20
6 Karãpe toineꞌen aipyꞌasetpe wuꞌuka hap neꞌi aiwoꞌopiat iraniaꞌin Iesui mohey haria wywo. Miꞌi hap eꞌat pe yt naku i kahato watioto miꞌiria suraraꞌin yt imohey i haria kape. Poꞌog waku miꞌiria watiꞌatunug Tupana motypot yat kape Tupana mohey haria piat ikuap hamo sio waku sio yt hap kuap hamo.
2 Meiũran aru aito Iesui emiitꞌin no watopyhuꞌat wuatꞌi miitꞌin airo hamo sio wakuat sio yt e hamuaria. Miꞌi tã watunug mote aru waku mesup taꞌyn wy aiwoꞌope woꞌope watiꞌairo sio wẽtup ok tunug yt naku i sio yt hap kuap hamo e.
3 Taꞌi mekewat eꞌat pe aru Tupana ainug temiit atipy piaria airo hamo uwe waku uwe yt e hamo wahenoi kuap mekewat eꞌat pe Tupana pe. Miꞌi tã watunug kuap pote aru waku mesuwe iꞌewyte watiꞌairo kat som waku kat som yt naku i. Waku watiꞌairo aipyꞌasetpiaria uwe aiwoꞌopatꞌok hat hawyi waku watomohãpyk aiwuꞌuka hap neꞌi.
4 Yt naku i watuꞌuka aiwoꞌope maꞌato toineꞌen aiwuꞌuka hap pote yt naku i watikay kay suraraꞌin aiwuꞌuka wuꞌuka hap monik hamo aiwoꞌopiat aiwoꞌoehay uuka turan.
5 Maꞌato suraraꞌin watikay kay mesuwarotiat aiwuꞌuka wuꞌuka hap monik hamo miꞌi tã pote waku watuwemoti mekewat yt aiweꞌeg i hap neꞌi pupi yt uwe i eipyꞌasetpe iweꞌeg nakat eiwuꞌuka hap moma hamo. Maꞌato Iesui mohey haria waku watikat aipyꞌasetpe wẽtup ok iweꞌeg nakat aiwuꞌuka hap moma hamo uwe waku uwe yt naku i e hamo.
6 Maꞌato wẽtup ok eiwy ok eheinytꞌin koꞌi ewetioto suraraꞌin kape yt imohey i haria kape uwe waku uwe yt e hamo pote yt eiweꞌeg hin i eipe.
7 Maꞌato eiwoꞌoꞌatuuka hap kaipyi atikuap taꞌyn yt ihãite i eiwoꞌokyꞌe hap ete. Miꞌi hap kaipyi atikuap eipe porap te haria hap. Yt naku i ewetioto ehemiit morekuat yt Iesui mohey hat kape. Karãpe Iesui mohey hat aimaꞌat yt naku i watioto surara kape poꞌog waku imaꞌat hat no watukupteꞌen. Poꞌog waku eweikupteꞌen waku imieroꞌok wo poꞌog morekuat woꞌopyhik hawe eweikupteꞌen.
8 Koitywy yt naku i woꞌomaꞌat haria wo eweikupteꞌen. Yt naku i woꞌoeroꞌok haria wo eweikupteꞌen uhytꞌiꞌin manaꞌin.
9 Yt uwe i aru woꞌomaꞌatꞌi maꞌatꞌi hat toineꞌen aikope Tupana toineꞌen Morekuat nuat hap tote. Eweꞌeg wo o eiwemaꞌat hap pupi katupono eweikupteꞌen wuatꞌi haryporia wywo wuatꞌi ihainia wywo pote yt karãpe i putꞌok eweiꞌe Tupana etawa pe. Iꞌewyte yt uwe i mo wuat minug tupanaria motypot haria itote. Seꞌaito wywuat ieineꞌen hat seharyꞌi wywuat ieineꞌen hat yt uwe i aru itote. Haryporiaꞌin eꞌaito wo haryporia te iꞌewyte ihainiaꞌin eꞌaito wo ihainiaꞌin ne haria yt uwe i itote.
10 Seroꞌok e haria yt uwe i itote. Yt hegyiꞌat i rakaria yt uwe i. Iꞌewyte yt uwe i aru woꞌeromopusu hat miitꞌin mohit hat itote. Yt uwe i -Uiatno yn mo e hat iꞌewyte imopẽꞌã rakat.
11 Miꞌi haria miꞌi nug ewywuat haria sok aito saꞌawyꞌi maꞌato koitywy Tupana timoweityk aiminug saꞌag koꞌi aheko yt naku i nug hap saꞌawyꞌi wuat. Miꞌi hawyi ainug naꞌyn temiit sese wo. Koitywy yt kat i saꞌag Tupana tipuẽti aikai Aikaꞌiwat Iesui miehakyeraꞌat koꞌi aito pote. Aikaꞌiwat ainug naꞌyn Tupana watnuaria wo hawyi tutum Topaꞌãu ahepe hawyi.
Tukupteꞌen Eipyꞌasetpe Uimikyꞌesat Ewy Yn Atunug
12 Tukupteꞌen eipyꞌasetpe -Uito atunug uimikyꞌesat ewy e haria. Uimikyꞌesat oktan yn atunug yne iꞌatuꞌe miꞌiria. Pyno eiweꞌeg wo o mio tã e haria pupi. Iꞌatu kahato -Aimikyꞌesat watunug hawyi waku topyhuꞌat wen maꞌato miꞌi kape yn watuwanetup pote aimikyꞌesat nug eropat haria yn watopyhuꞌat hawyi yt Tupana mikyꞌesat nug kuap haria hin i watopyhuꞌat.
13 Iꞌewyte iraniaꞌin eipyꞌasetpe -Uimiꞌu kat hap yn atunug neran aat kaꞌap yne eꞌat katupono miꞌu yn aimowepiit kuap hap e hat. Maꞌato eiweꞌeg wo o miꞌu mesuwarotiat wywo yn eiꞌok hap. Miꞌu waku kahato wen maꞌato miꞌu yn watikat pote aimaꞌat hap toineꞌen katupono Tupana eropat hap yt watikat hin i. Meiũran aru Tupana timoma yne ahesyꞌat hap hawyi yt kan hamo i aimiꞌu kat hap. Yt eweikuap i kat hamo Tupana tunug aipiit apo. Taꞌi toikyꞌesat aito teropat hamo iꞌewyte toikyꞌesat aito tokyꞌe haria. Toikyꞌesat aipiit towatnuat e. Yt toikyꞌesat i aipiit watum yt iweꞌeg i rakaria pe iꞌewyte yt toikyꞌesat watum aipiit miꞌu kat hap yn kape. Uiwyriaꞌin waku watuwehum kahato Tupana kape aimiꞌu ete maꞌato yt naku i watunug miꞌu ahetupana wo. Iesui Aikaꞌiwat aipoi kuap kahato. Waku iwywo watikat aimiꞌu. Yne Tupana tum teran ahepe aimowepiit hamuat.
14 Tupana tihep Aikaꞌiwat Iesui guꞌuro pyi. Miꞌi hap ewy aito aihep guꞌuro pyi tesaika hap wywo.
15 Karãpe watomohey Iesui hawyi wẽtup piit ewy aipiit Iesui piit wywo. Miꞌi pote yt naku i watuwehik haryporia yt iweꞌeg i rakat ete ihainia yt iweꞌeg i rakat ete kat pote ti watoineꞌen Iesui piit ewywuat pote.
16 Tupana yt tikyꞌesat hin i watum aipiit waire nug hamuat mesuwe watoineꞌen hap. Saꞌawyꞌi Tupana toꞌe -Uwe tuwehik haryporia ete hawyi wẽtup ok miit piit ewy topyhuꞌat iwywo e. Miꞌi pote yt naku i watuwehik haryporia ihainia yt iweꞌeg i rakat ete. Katupono miꞌi tã watunug hawyi wẽtup ok piit ewy raꞌyn watoineꞌen Iesui piit yt ewy i raꞌyn. Miꞌi hawyi yt iweꞌeg i rakat piit ewy watoineꞌen.
17 Watomohey Aikaꞌiwat imikyꞌesat oktan pote watoineꞌen Ipaꞌãu wywo iꞌewyte aipaꞌãu wẽtup maꞌãu ewywuat topyhuꞌat iwat Ipaꞌãu yn.
18 Watoineꞌen yt iweꞌeg i rakat pote o watoineꞌen pya ikai katupono aipiit minug saꞌag kyꞌesat hap toineꞌen aikaꞌiwat no. Watuwehik haryporia yt aheharyꞌi ete miꞌi hawyi aipiit iwywo wẽtup piit topyhuꞌat hawyi heremo kahato yt Iesui piit ewy i aito.
19 Yt eweikuap i te aipiit Tupana motypot yat ewywuat toineꞌen hap. Tupana Paꞌãu eiam aito hap yt eweikuap i te Tupana toineꞌen aipiit pe hap.
20 Aipiit yt aiwatnuat i katupono koitywy Tupana watnuat watopyhuꞌat toikyiꞌat raꞌyn haꞌup iwato kahato tutum toikyiꞌat aipiit hamo. Pyno Tupana wat aipiit pote waku watum aipiit Tupana motypot hamo. Tupana motypot yat sese wo watum aipiit waku.
