Saꞌawyꞌi Wuat Kurintiu 7:1-40
7 Haꞌawyte eipe tawa Kurintiu piaria eweipoꞌoro uhowowi miwan apo eiꞌe hamo sio waku aheharyꞌi sio yt eiꞌe hap.
2 Taꞌi waku kahato aheharyꞌi maꞌato wẽtup yn waku e. Miꞌi hawyi waku watoineꞌen iharyꞌi kahato rakatno heꞌaito kahato rakatno aheineꞌen yne hawe. Miꞌi tã ewetunug mote waku kahato eweikupteꞌen e. Miꞌi tã ewetunug mote yt ehãꞌãg kuap i ahiag yt eiweꞌeg i hap nug hamo.
3 Waku ereket eharyꞌi sese wywo yn. Waku etum epiit eharyꞌi pe yn eharyꞌi piit mikyꞌesat oktan. Iꞌewyte waku etum epiit eꞌaito pe eꞌaito piit mikyꞌesat ewy.
4 Waku toꞌe -Uipiit uheharyꞌi wat yn e. Iꞌewyte waku toꞌe -Uipiit uheꞌaito wat yn e. Yt naku i toꞌe -Uipiit yt ewat i pote yt atum i poꞌog uipiit epe yt naku i toꞌe e.
5 Yt naku i iharyꞌi waĩꞌe neꞌi teꞌaito piat ikyꞌesat turan e. Iꞌewyte yt naku i waĩꞌe neꞌi ihainia teharyꞌi piat ikyꞌesat turan e. Maꞌato ehehay teran Tupana wywo pote waku eiwoꞌopohep porapꞌi tuereto eiwoꞌopytyk hap ete e. Eiwoꞌopohep porapꞌi hawyi waku i raꞌyn eiwoꞌomowepiit katupono ahiag aru ehãꞌãg neran haype wẽtup haryporia wẽtup ihainia kyꞌesat hap ete e.
6 Pyno koitywy ahenoi teran uiwanetup hap ewy maꞌato ahenoi hap yn yt worohoꞌopoꞌoro hin i uhehay wo are.
7 Uito areineꞌen yt iharyꞌi rakat i. Uito Pauru Tupana mikyꞌesat ewy areineꞌen are. Miꞌi hap atipuẽti waku kahato. Miꞌi pote atikyꞌesat iraniaꞌin uiꞌewy yt iharyꞌi i rakat i ewy taꞌatukyꞌesat pote. Miꞌi tã Tupana tikyꞌesat uito wen toĩ iraniaꞌin yt uiꞌewy hin i katupono miꞌiria iharyꞌi kahato rakaria wo Tupana tikyꞌesat.
Waku Aiwoꞌokyiꞌat Hap Iesui Mohey Haria Wywo Yn
8 Koitywy worohoꞌonapin neran yt iharyꞌi rakat i te yt heꞌaito rakat i te iꞌewyte hiwu koꞌi. Waku eweikupteꞌen eiweran aikotã uiꞌewy eweikyꞌesat pote areꞌe. Poꞌog waku miꞌi tã areineꞌen areꞌe uiwanetup hawe.
9 Maꞌato -Atikyꞌesat kahato uheharyꞌi uheꞌaito eweiꞌe eipyꞌa pe pote waku etat ro ewary eꞌaito emikyꞌesat ewy maꞌato Iesui mohey hat yn waku etat e. Poꞌog waku etat eharyꞌi eꞌaito Iesui mohey hat epiit mikyꞌesat monik hamuat hap upi epiit mikyꞌesat haty hap mekewat kytꞌok epyꞌa piat hap kai.
10 Koitywy worohoꞌonapin heꞌaito rakaria iwary rakaria yt uito i wen maꞌato Tupana woꞌonapin hap ahenoi. Yt eweitoiat teiꞌo eꞌaito eharyꞌi e.
11 Maꞌato eweitoiat pote ereineꞌen o eweran kahato raꞌyn yt heꞌaito i rakatno yt ihary i rakatno e. Miꞌi hawyi etikyꞌesat eꞌaito emiꞌatoiat pote etat i emiꞌatoiat. Yt naku i kahato weharyꞌi atoiat hat no eweikupteꞌen uhytꞌiꞌin e.
12 Karãpe eharyꞌi yt Iesui mohey hat wo i toineꞌen maꞌato o yt etoiat neꞌi teiꞌo kat pote ekyꞌesat hap toĩ ikai pote yt etoiat reiꞌo e. Yt naku i miꞌi tã etunug e.
13 Eꞌaito yt Iesui mohey hat i pykai yt etoiat teiꞌo miꞌi kat pote ekyꞌesat hap toĩ ikai pote.
14 Watomohey Iesui hawyi yt naku i watoiat aheꞌaito aheharyꞌi saꞌawyꞌi wuat yt Iesui mohey hat i pote. Waku wahẽtup kahato Tupana pe aheꞌaito aheharyꞌi ehakyeraꞌat hamo katupono aheꞌaito aheharyꞌi toineꞌen yt pya hin i Tupana kai katupono Tupana Paꞌãu eiam kahato aito pote. Waku aiwywo toineꞌen Iesui mohey haria aito pote. Waku watoineꞌen aheꞌaito wywo aheharyꞌi wywo katupono wahenoi tuereto miꞌiria pe Iesui mohey hap iꞌewyte aimepytꞌin ahakiꞌytꞌin ahaꞌyruꞌin yt pya hin i Tupana ehay aiwẽ pywiat kai. Miꞌi pote miꞌiria yt pya hin i tomohey hawyi Tosaꞌyru moherep haria aito pote.
15 Maꞌato eharyꞌi eꞌaito etoiat teran kahato yt imohey hat i pote yt he i tuete Iesui mohey epiat hap pote miꞌi hawyi pyno waku eweiꞌe eꞌaito pe eharyꞌi pe etoiat teran me -Yt naku i uiꞌatoiat mimi mana yt atikyꞌesat i maꞌato uiꞌatoiat teran mote uiꞌatoiat maꞌato yt uimikyꞌesat ewy hin i ereꞌe o e. Katupono yt naku i watuꞌuka yn yt aiwoꞌoꞌewy i imohey hap ete e. Tupana yt tikyꞌesat i aiwuꞌuka aheꞌaito wywo aheharyꞌi wywo hap maꞌato toikyꞌesat kahato aiwoꞌokyꞌe aiwoꞌowese hap yn e.
16 Waku kahato watoineꞌen aheharyꞌi wywo aheꞌaito wywo hap. Eharyꞌi eꞌaito yt Iesui mohey hatno i pykai waku ereineꞌen ne o iwywo e. Yt naku i watoiat aheharyꞌi aheꞌaito yt Iesui mohey hat i pote. Waku aiwoꞌowese hap wywo aiwoꞌokyꞌe hap wywo watekyi aheꞌaito aheharyꞌi Iesui kape imohey hamuat. Pyno waku pe watukupteꞌen aheharyꞌi aheꞌaito wywo paa aiꞌe hap wywo pote meiũran ti aru Iesui mohey haria wo teꞌeropyhuꞌat ahehay waku pe hawe. Iesui mohey haria sese watukupteꞌen pote watikyꞌe kuap aheharyꞌi aheꞌaito Iesui kape imohey hamuat. Miꞌi hawyi aiwese hap kaipyi ahepiat Iesui kuap hap kaipyi watiꞌatuekyi kuap aheharyꞌi aheꞌaito Iesui mohey hap kape.
17 Mesup ti koitywy Tupana aiꞌairo Aikaꞌiwat emiit sese wo. Waku kahato watoineꞌen. Maꞌato miꞌi pykai aikotã saꞌawyꞌi watoineꞌen hap ewy te. Saꞌawyꞌi Iuteu ywania aito pote mesup te Iuteu ywania watoineꞌen e. Saꞌawyꞌi tapyiꞌa ywania watoineꞌen iꞌewyte mesup te tapyiꞌa wo watoineꞌen. Saꞌawyꞌi watoineꞌen wẽtup ok eropat hatno pote watomohey Iesui hawyi miꞌi hap ewy te topyhuꞌat rẽ mesup koitywy heropat hat watoineꞌen ne. Miꞌi pote worohoꞌonapin neran eipe Iesui mohey haria pakup koꞌi Tupana miꞌairo pakup koꞌi. -Eweimohey Iesui hawyi waku eweikupteꞌen no aikotã watoineꞌen watimohey Iesui hap eꞌat pe aiꞌairo hap eꞌat pe hap ewy waku watukupteꞌen ne.
18 Iuteu ywania ereineꞌen saꞌawyꞌi pote ereineꞌen Iuteu ywania te. Yt naku i etoiat eꞌywania etimohey Iesui hawyi Tupana ekay kay tuwewawiat hawyi. Wẽtup ywania ereineꞌen saꞌawyꞌi pote pyno yt naku i eweiꞌe -Mesup uito Iesui mohey hat pote waku atoiat uiꞌywania iꞌewyte iꞌatueko koꞌi yt naku i kahato mio tã watoꞌe. Tupana aikay kay tuwewowiat hawyi waku watoineꞌen aipiit ewy aipotpap hap ewy aikay kay hap eꞌat pe ewy waku.
19 Yt naku i watuwemusin ãpy sokpe tek Iuteuria eko ewy neꞌi watimohey Iesui hawyi e. Waku watoineꞌen aiꞌywania ewy yn.
20 Watomohey Iesui hawyi waku watoineꞌen ne aimiit kawiatno saꞌawyꞌi hap eꞌat kai e. Yt naku i watoiat aheꞌyi aipotpap aiko aheꞌaito aheharyꞌi watomohey hawyi. Waku watoineꞌen ne aikotã Tupana aikay kay hap eꞌat pe hap ewy. Waku watukupteꞌen ne aipotpap hap wywo. Miitꞌin emiit no watoineꞌen pote waku watoineꞌen ne miitꞌin emiit no te maꞌato poꞌog waku saꞌawyꞌi kai. Yt naku i watoiat aikaꞌiwaria ahetuꞌisaria aiwyriaꞌin koꞌi Iesui watomohey hawyi.
21 Aikaꞌiwaria yt nakuaria i pykai waku watoineꞌen iꞌatuwywo te iꞌatueropat hamuat. Yt kat i aikaꞌiwat pote pyno waku watoineꞌen ne aiweran aipotpap nug hap ewywuat maꞌato waku yne miitꞌin emiit no hat ewy watopyhuꞌat yne miitꞌin powyro hat no. Aiweteweru hap iwato pote iwato te topyhuꞌat watomohey hawyi. Waku watikat aiweteweru hap tum yne hamuat. Miꞌi hawyi watum yne aiweteweru hap mesuwarotiaria pe hawyi Aikaꞌiwat Atipy piat eropat hatno poꞌog no watopyhuꞌat.
22 Wuatꞌi eropat haria wo watoineꞌen Aipotypot Iesui aikay kay turan miꞌi hawyi wuatꞌi eropat hat no watoineꞌen ne maꞌato waku Iesui eropat hatno watopyhuꞌat miitꞌin eropat hap upi. Iꞌewyte miitꞌin akag wo watoineꞌen Iesui aikay kay turan hawyi waku miitꞌin akag wo rẽ watopyhuꞌat maꞌato waku Iesui eropat hatno te watopyhuꞌat miitꞌin akag aito pykai.
23 Katupono Aikyiꞌat Iesui Tupana watno. Iwato kahato saꞌup tutum aikyiꞌat temiitꞌin nuat hamo. Miꞌi pote yt naku i watopyhuꞌat yt naku i nug hap eko saꞌag eropat haria wo neꞌi e.
24 Uiwyriaꞌin uheinytꞌin yt naku i aheko waku rakat watoiat katupono saꞌawyꞌi Tupana aikay kay tuwewawi turan aiꞌywania eko waku aheko waku iꞌatu kahato aiminug waku hap ewy. Yt naku i watoiat aiꞌywania eko watimohey Iesui hawyi. Miꞌi pote waku watoineꞌen ne aheko wakuap nug haria wo Iesui watimohey hawyi.
Poꞌog Niatpo Tupana Ehay Moherep Hap Ereineꞌen Eiwoꞌokyiꞌat Hap Hawyi
25 Worohoꞌonapin neran kurum iwasu koꞌi iꞌewyte piꞌã makuptia koꞌi yt heꞌaito i te rakaria yt iwary i te rakaria. Yt iharyꞌi rakat i uito pote woronapin Tupana ehay uiwanetup hawiat oktan ahenoi.
26 Mesuwat eꞌat pe miitꞌin aikat kahato aiꞌauka teran haype Iesui mohey haria aito pote. Niatpo kahato aheineꞌen hap. Miꞌi pote areꞌe uiwanetup hap. Yt eweikyꞌesat i eharyꞌi eiwary pote waku eweikupteꞌen uiꞌewy katupono iraniaꞌin iꞌatupyꞌahak kahato ahete ahaty hatyꞌi kahato hatek takaria ewy Iro pote aito. Miꞌi pote niatpo kahato aheharyꞌi aheꞌaito koitywy.
27 Maꞌato -Atikyꞌesat kahato uheꞌaito uheharyꞌi eweiꞌe pote pyno waku eharyꞌi etat kurum waku eꞌaito etat piꞌã areꞌe maꞌato yt eweiꞌe i pote waku yt etikat reiꞌo eꞌaito eharyꞌi hawyi waku uito ewy ereineꞌen areꞌe. Ewetat pote yt eweiꞌatoiat teiꞌo eꞌaito eharyꞌi hoꞌopot hap eꞌat pe katupono ahatek hap eꞌat mesup tawa Kurintiu piaria aiꞌauka teran haype pote.
28 Maꞌato epakup te ereineꞌen mote waku etikat eharyꞌi eꞌaito Tupana mikyꞌesat ewy. Maꞌato -Yt atikat teran i wẽtup ok uheharyꞌi saꞌawyꞌi wuat uheꞌaito saꞌawyꞌi wuat uruhoꞌopot kahato eꞌat mesup pote eweiꞌe pote pyno waku pe eweikupteꞌen Tupana wanetup hawe. Maꞌato etat eharyꞌi eꞌaito kurum iwasu makuptia en mote iꞌewyte waku pe eweikupteꞌen Tupana wanetup hawe e. Waku yne are. Mio miitꞌin aiꞌauka teran mote niatpo kahato aheꞌaito aheharyꞌi watikat. Maꞌato etat pote waku maꞌato niatpo kahato aru etipuẽti ehoꞌopat hap mesup eꞌat pe turan.
29 Uheinytꞌin uiwyꞌok koꞌi yt pya hin i Aikaꞌiwat aipok hap. Yt watikuap i kat eꞌat pe huut hap maꞌato tuut irane hap watikuap. Waku watikyꞌe kahato aheꞌaito aheharyꞌi maꞌato miꞌi pykai waku poꞌog watunug Tupana mikyꞌesat ewy aheꞌaito aheharyꞌi mikyꞌesat koꞌi kai. Waku watikyꞌe Tupana koran aikotã Iesui mohey haria yt heꞌaito i te rakat yt iwary i te rakat ewy.
30 Eiweꞌeg wo o ehekareꞌen wywo katupono yne mesuwarotiat ahekat yt toineꞌen motꞌi i. Karãpe watat ipakup takat ahekareꞌen hawyi yt naku i watoꞌe aipyꞌa pe -Mio uito poꞌog iraniaꞌin kai katupono uhekat poꞌog ikahu iraniaꞌin kai yt naku i watoꞌe. Waku watuwehum Tupana miium kape wen maꞌato yt naku i watomohey neiꞌo ahekat. Tupana kape yn waku watuwehum ahekat aipo pe hawyi. Waku watunug Tupana mikyꞌesat ewy sio imikyꞌesat aimikyꞌesat sio yt sio imikyꞌesat aimowepiit sio yt. Waku watunug imikyꞌesat sio watuwak sio yt katupono aiwak hap tokosap hawyi poꞌog aimowepiit hap toineꞌen.
31 Yt naku i mesuwarotiat kape yn watuwanetup aat kaꞌap katupono tuweityk meremo aimowepiit hap aheꞌaito hap aiwary hap aimikyiꞌat koꞌi ahekareꞌen koꞌi topap topap yne maꞌato aiminug Tupana kapiat toineꞌen motꞌi rakat yn waku aiwanetup hap aimowepiit hap. Yt tuweityk kuap takat i.
32 Iesui mohey haria yt heꞌaito rakaria i yt iwary rakaria i teꞌeruwanetup aat kaꞌap taꞌatukaꞌiwat Iesui potpap nug hap kape taꞌatukaꞌiwat mowepiit hap kape yn. Waku miꞌiria ewy watoineꞌen poꞌog poꞌog mesuwe.
33 Maꞌato iwary rakat tuwemowepiit hap kape yn tuwanetup toꞌyat tomiꞌu tesokpe hap kape yn tuwanetup hawyi.
34 Karãpe tuwanetup teran Tupana potpap kape turan toineꞌen typy iwanetup hap Tupana mowepiit hap iꞌewyte teharyꞌi mowepiit hap. Yt heꞌaito rakat i yt iwary rakat i Iesui mohey hat Tokaꞌiwat potpap hap kape yn tuwanetup. Toikyꞌesat topiit Tupana watnuat yn. Toikyꞌesat aiwanetup Tupana kapiat hap yn iꞌewyte Tupana Paꞌãu mikyꞌesat yn toikyꞌesat. Maꞌato heꞌaito kahato rakat iwary kahato rakat tuwanetup aikotã aikotã aru atimowepiit uheꞌaito uiwary toꞌe hap kape yn tuwanetup tomiꞌu kape toꞌyat kape tomepytꞌin kape aat kaꞌap hap ewy tuwanetup.
35 Poꞌog waku aheꞌaito kahato aheharyꞌi kahato hap. Worohoꞌonapin neran eipowyro hamo. Atikyꞌesat kahato watunug Tupana mikyꞌesat ewy hap poꞌog torannia mikyꞌesat nug hap kai. Miꞌi pote miꞌi hap ete sio ereineꞌen eꞌaito sio yt rakatno sio ereineꞌen iwary rakatno sio yt rakatno atikyꞌesat eipe atipy piat eropat haria sese yt kat i eipyhyp Aipotypot potpap nug hap ete haria wo.
36 Pyno mesup worohoꞌonapin neran eipe. Ehaytuwy haryporia ihainia kawiat eiwoꞌokyꞌesat pote waku etat eharyꞌi wo eꞌaito wo. Maꞌato -Ahoꞌopot kahato mesup yt kat i aiꞌyat i yt kat i aiko i yt kat i aimiꞌu eweiꞌe eiwoꞌope pote -Waku poꞌog yt watoꞌokyiꞌat i te katupono hoꞌopot hap eꞌat mesup katupono aito Iesui mohey haria pote miitꞌin mikyryꞌi haria wo watopyhuꞌat. Pyno waku watoineꞌen yt iwary i rakatno yt heꞌaito rakatno i mesup waku eweiꞌe eiwoꞌope. Miꞌi hawyi waku eweikupteꞌen yt iwary i rakat ewy yt heꞌaito i rakat ewy. Meiũran maꞌato eiwoꞌokyiꞌat teran mote pyno waku eiwoꞌokyiꞌat eiwoꞌokokaꞌat e Tupana. Miꞌi hawyi waku eweikupteꞌen heꞌaito iwary rakatno Iesui mohey haria eipe pote.
37 Pyno -Yt karãpe i uheharyꞌi e hat yt toikyꞌesat i pote waku yt iwary i topyhuꞌat e. Miꞌi hat yt iꞌaparap i Tupana pe katupono toiꞌakit kuap topiit mikyꞌesat.
38 Waku aheharyꞌi aheꞌaito. Waku watuwehum Tupana pe aheꞌaito aheharyꞌi miium hap ete. Iꞌewyte yt kat i aheꞌaito pote yt kat i aheharyꞌi pote miꞌi hap iꞌewyte waku watuwehum Tupana pe katupono uito ewy eweikupteꞌen mote. Uiwanetup hawe poꞌog waku uito ewy katupono wahewyry kahato Tupana ehay moherep hamo. Uito ti Pauru.
39 Manaꞌin uhytꞌiꞌin waku eꞌaito eharyꞌi wẽtup ok kahato yn ikuꞌuro hap kape e. Maꞌato ikuꞌuro hawyi yt uwe watno i raꞌyn ereineꞌen neran mote waku maꞌato etikyꞌesat ipakup hawyi waku etat wẽtup ok emikyꞌesat Iesui mohey hat yt heꞌaito rakat i ewywuat Iesui mohey hat yn waku yt iwary rakat i yt heꞌaito rakat i waku etat e.
40 Maꞌato uiwanetup hawe waku poꞌog manaꞌin hiwu wo eweikupteꞌen eweikyꞌesat pote. Tupana Paꞌãu tuwanetup iꞌewyte uiwanetup hap ewy hap yt atikuap i maꞌato mio tã areꞌe uiwanetup hawyi Tupana yt toꞌe i waku hiwu tukupteꞌen hiwu wo yt e i te atikuap teran pykai.
