Saꞌawyꞌi Wuat Kurintiu 9:1-27
9 Taꞌi uito Pauru Tupana emiit sese imipoꞌoro tehay moherep hamuat. Yt kat i uiweteweru hap miitꞌin po pe pote areineꞌen Iesui emiit no yn. Yt uwe i uipyhyp kuap kat pote yt uwe po pe i areineꞌen. Yt uwe i toꞌe kuap uhepe -Etum uhepe mekewat eweterut hap hawyi waku ereto Tupana ehay moherep hamo yt taꞌatuꞌe kuap i katupono yt kat i atipuru miitꞌin kaipyi pote. Aikaꞌiwat Iesui uinug tomipoꞌoro tehay moherep hamuat. Mekewat eꞌat pe araꞌakasa Iesui uheha wo hawyi Aikaꞌiwat uipoꞌoro ehewowi tehay moherep hamo. Miꞌi hawyi Aikaꞌiwat mohey haria eweikupteꞌen uhehay upi.
2 Miꞌi hap kaipyi eweikuap Tupana uipoꞌoro hap. Maꞌato iraniaꞌin yt ipywo i Tupana uipoꞌoro hap maꞌato eipe eweipywo katupono uiwẽ pyi Aikaꞌiwat Iesui aimoieineꞌen hat uhehay pyi einug ipakup takaria wo. Mesup koitywy eweikupteꞌen Iesui mohey haria wẽtup miit ewy iwywo eweikupteꞌen. Miꞌi kaipyi eweimohey Tupana potpoꞌoro wuat areineꞌen hap.
3 Tukupteꞌen maꞌato -Pauru yt Tupana mipoꞌoro ewy hin i iꞌatuꞌe. Yt mekewat 12 ok takaria ewy hin i iꞌatuꞌe toꞌope maꞌato miꞌiria atiwesat -Uito rat Tupana mipoꞌoro sese are.
4 Areineꞌen Iesui potpoꞌororia 12 ok takaria ewywuat uito areꞌe. Miꞌi pote atikyꞌesat pote waku atunug iꞌatuminug ewywuat are. Atikyꞌesat pote waku atipoꞌoro uimimuꞌeria uipoi hamo katupono Iesui potmuꞌeria 12 ok takaria saꞌup taꞌatupuẽti taꞌatumimuꞌeria miium kaipyi. Uito Pauru iꞌewyte atikyꞌesat miꞌu eikai pote waku ahẽtup saꞌup eipo pywiat eimuꞌe hamuat wen maꞌato -Atikyꞌesat eimimuꞌe hap saꞌup uipoi ro yt areꞌe hin i ehepe.
5 Aikaꞌiwat potmuꞌe Peteru iharyꞌi rakat toineꞌen iꞌewyte Aikaꞌiwat Iesui ywyt Tiaku iꞌewyte toineꞌen iharyꞌi. Miꞌiria tuwat iꞌatuꞌaito wywo iꞌatuewyry hap upi Tupana ehay moherep hamo maꞌato uito yt kat i uheharyꞌi miꞌiria ewy maꞌato atikyꞌesat pote waku atat uheharyꞌi.
6 Aiwy Panape iꞌewyte uito urupotpap kahato urupo wo aimiꞌu kyiꞌat hamo ahesokpe kyiꞌat hamo miꞌi tã.
7 Suraraꞌin ni mesuwat yi tote tenuk kahato topoꞌoro hat surara akag kaipyi. Toineꞌen iꞌatuesurara akag miium iꞌatuesokpe iꞌatuewyry hamuat. Yt iꞌatupotpap hin i taꞌatupo wo mekewat kyiꞌat hamo. Maꞌato uruto uruwewiat urupotpap kaipyi urutenuk hap toineꞌen. Go nug haria yt miꞌi tã hin i katupono taꞌatumikoi kaipyi teꞌerenuk. Taꞌatumikoi ypia kaipyi teꞌeresapo u raꞌyn. Iꞌewyte taꞌatuhũria emi hy kaipyi teꞌerenuk. Iꞌatupotpap hap ti miꞌiria poi hamo toineꞌen. Maꞌato uito iꞌewyte Tupana ehay moherep hat Panape yt miꞌiria ewy hin i urutukupteꞌen.
8 Pyno ahenoi wẽtup ehepe Tupana ehay kaipyi.
9 Mio tã e Tupana saꞌawyꞌi wuat miwan me Muisei wẽ pyi ihay -Yt naku i watikytyt aihũ Wewato ahup ipotpap turan e. Yt naku i watiwẽpoꞌi poꞌi neꞌi awati iãꞌỹi akit akit turan e. Yt naku i miꞌi turan watiwẽpoꞌi poꞌi neꞌi. Waku tenuk awati ehaꞌok topy wuat turan topotpap popuo aihũ Wewato ahup e Tupana Muisei pe ainapin hawe. Pyno Tupana tuwanetup kahato aihũ hesyꞌat hap kape.
10 Maꞌato topotpap nug haria topotpoꞌororia poi hamuat ete uruesyꞌat pote uruipoi hap ete mio tã e Tupana. -Waku watipoi aihũria taꞌatupotpap nug hap popuo iꞌewyte waku watipoi aipotpap nug haria e. Iꞌewyte aikotã ikoi hat ewy iꞌewyte iꞌatunug hat ewy taꞌatumikoi kaipyi teꞌerenuk kahato. Miꞌi hap ewy huut hap kape iꞌatupotpap. Taꞌatuhekatup haype aikotã iꞌatag tomikoi hepama hap ewy.
11 Karãpe watikoi mani hawyi waku watunug uꞌi ahemani iꞌok hawyi. Miꞌi hap ewy kahato waku aimikoi Tupana ehay kaipyi watenuk eimuꞌe hap Tupana ehay etiat saꞌup kaipyi waku urutenuk hap ewy e. Niatpo kahato mani koi hap maꞌato itag hawyi uꞌi kahato watipuẽti aipotpap saꞌawyꞌi wuat kai. Miꞌi hap ewywuat kahato eimuꞌe hap Tupana ehay koi hap.
12 Iraniaꞌin eimuꞌe haria eweipoi kahato. Maꞌato -Yt karãpe i urupoi ro urutoꞌe ehepe. Eweikuap kat pote pyno ahenoi ehepe. Yt uruikyꞌesat i eiꞌe hap eiwanetup hawe -Aimiꞌu kyewi neꞌi aimuꞌe ahekat kyewi neꞌi aimuꞌe sehay wakuat ete Pauru Panape eweiꞌe hap. Miꞌi pote urupotpap aat kaꞌap urupo wo urusaꞌup puẽti hamo. Uruhoꞌopot kahato yat sokpe kawiat nug hap ete urumiꞌu kyiꞌat hamo yt uruikyꞌesat i eiꞌokpe tote urutenuk haype pote.
13 Saꞌawyꞌi wuaria Tupana motypot yat piaria paꞌi koꞌi teꞌerenuk miitꞌin miium kaipyi iꞌatuhũ Tupana kapiat iꞌatumiwuk kapiat ete. Teꞌerenuk taꞌatuhep ipuꞌi kãꞌã mekewat nu kawiat aihũ wuk hap eiam kaipyi teꞌerenuk hamo. Paꞌi koꞌi miꞌi tã saꞌawyꞌi taꞌatupuẽti taꞌatumiꞌu.
14 Miꞌi hap ewy Tupana ainapin mesup -Eweipoi ro eimuꞌe haria e. Eweimoꞌẽ emiꞌu uhehay wakuat moherep haria pe uimikyꞌesat oktan e Tupana.
15 Maꞌato saꞌawyꞌi eimuꞌe turan yt atikat i uipoi hamuat. Yt kat i saꞌup atikat. Eimuꞌe hap saꞌup yt atikyꞌesat i te. Koitywy atunug mesuwat uimiwan yt kat i ahẽtup eikaipyi mesuwat uimiwan me. Yt atikyꞌesat i saꞌup eikaipyi eimuꞌe hap saꞌup. Poꞌog waku uikuꞌuro areineꞌen yt eimipoi i wywo te areineꞌen. Yt atikyꞌesat i ekat. Yt kat i uheso hap uhehay ete. Eweimoꞌẽ uhepe pote koitywy yt atikat i te paĩ.
16 Atiꞌatumuꞌe kahato miitꞌin Iesui etiat maꞌato yt uimimuꞌeria ekat kyewi i atiꞌatumuꞌe miꞌiria iꞌewyte yt uimotypot hap kyewi i atiꞌatumuꞌe miitꞌin. Eweikuap apo kat pote atiꞌatumuꞌe miitꞌin Iesui ete hap. Pyno ahenoi ehepe Iesui uipoꞌoro miitꞌin muꞌe hamo miꞌi pote atiꞌatumuꞌe wuatꞌi ywania Iesui uipoꞌoro hap ewy. Iesui ehay ikahu rakat ete yt atiꞌatumuꞌe i miitꞌin mote Tupana miꞌapiheg wo areineꞌen aru.
17 Iꞌewyte yt arepoꞌoro i Iesui ehay moherep hamo yt uimikyꞌesat ewy hin i. Maꞌato uipoꞌoro hat mikyꞌesat ewy worohoꞌomuꞌe. Maꞌato arepoꞌoro neꞌi pote miꞌi hawyi atikyꞌesat saꞌup eikaipyi. Maꞌato yt atikyꞌesat i saꞌup eikai katupono yt uipoꞌoro i eipe. Maꞌato Tupana uipoꞌoro yt uimikyꞌesat ewy hin i maꞌato -Etunug o e Tupana uhepe pote worohoꞌomuꞌe. Miꞌi atunug mote uimohey Tupana inug hap ete.
18 Yt haꞌup kyewi i worohoꞌomuꞌe paĩ. Uhaꞌup sese ti ehepiat Tupana kuap hap. Yt eikat kyewi i maꞌato worohoꞌomuꞌe. Yt ekat kyewi i atimoherep ehepe Iesui etiat ikahu rakat sehay. Atikyꞌesat haꞌup eikai uipotpap saꞌup Tupana ehay wakuat moherep hap saꞌup pote waku ahẽtup Tupana wanetup hawe maꞌato yt ahẽtup i te miꞌi hap ete.
19 Yt uwe i uikyiꞌat kuap saꞌup mo are. Yt uwe i -Urumuꞌe ro urumikyꞌesat ewywuat pote saꞌup iwato urutum epe Pauru e haria. Uito ti Tupana mikyiꞌat uito are. Tupana po pyi yn arenuk teren. Yt kat i miitꞌin wanetup hap uikai maꞌato Tupana wanetup hap wywo yn worohoꞌomuꞌe are. Yt kat i eikat kyewi hap wywo worohoꞌomuꞌe. Uito areineꞌen wuatꞌi miitꞌin eropat hat katupono atekyi teran wuatꞌi miitꞌin Iesui kape pote.
20 Atiꞌatuekyi teran kahato uiwyriaꞌin Iuteuria Iesui mohey hap hamo. Miꞌi pote iꞌatupyꞌasetpe areineꞌen Iuteu ywania wo -Uito ti Iuteu yn areꞌe iꞌatuepe. Miꞌi hawyi iꞌatueko Iuteuria eko nug hat areineꞌen iꞌatupyꞌasetpiat areineꞌen turan. Iꞌewyte karãpe areineꞌen Muisei mienoi moherep haria pyꞌasetpe miꞌi hawyi atimoherep Iesui iꞌatuepe Muisei miwan kaipyi. Muisei ainapin hap nug hat ewy areineꞌen miꞌiria pyꞌasetpe iꞌatuekyi Iesui kape.
21 Karãpe iraniaꞌin ywania pyꞌasetpe areineꞌen miꞌi hawyi iraniaꞌin ywania eko wakuat ewy atunug. Areineꞌen miꞌiria ewywuat. Areineꞌen wẽtup ywania pyꞌasetpe pote yt atunug i uiꞌywania Iuteuria eko ewy maꞌato iꞌatueko wakuat yne rakat atunug. Miꞌi hap atunug katupono miꞌiria atikyꞌesat kahato Iesui mohey haria torannia hap. Miꞌi hap yn atunug Iesui kapiat miitꞌin ekyi hamo.
22 Karapeĩ areineꞌen Iesui mohey haria yt hesaika rakaria i te tokpe miꞌi hawyi paa e hat areineꞌen eiꞌewy uito areꞌe iꞌatumoesaika imohey hap ete hamo. Miꞌi kai ahoꞌosat Iesui mohey hanuaria.
23 Atiꞌatumuꞌe kahato miꞌiria Iesui ehay wakuat ete. Iꞌatuwyriaꞌin wo areineꞌen iꞌatumuꞌe hamo. Miꞌi hap ahenoi yne hawyi Tupana mipoityro wo miꞌiria tukupteꞌen iꞌewyte uito.
24 Ahetama puo tukupteꞌen woꞌoiãꞌãg haria mesuwat seput hap ete uwe poꞌog ihyha hap kuap hamo. Iꞌatu kahato teput toꞌoꞌewyꞌewy maꞌato wẽtup yn poꞌog ihyha hat yn topyhuꞌat morekuat miium saꞌup sat hat no. Pyno waku watuweput hãpyk kahato mekewat morekuat miium saꞌup sat hamo.
25 Woꞌoiãꞌãg haria seput haria saꞌawyꞌi taꞌatupiitmoesaika kahato. Yne eꞌat pe teput aat iꞌatuhyha hamo. Miꞌi hawyi wẽtup topyhuꞌat poꞌog torannia kai hawyi miꞌi hat pe morekuat tum toꞌakag painug hap ewywuat -Miꞌi seput hat poꞌog e hamo. Ahetama puo morekuat tum toꞌakag painug hap mohyt kawiat poꞌog seput kuap hat pe. Wẽtup eꞌat hawyi igag naꞌyn. Miꞌi hap ewy Tupana tum aru ahepe aipainug hap aiꞌakag totiat maꞌato miꞌi ti yt igag i rakat toineꞌen. Wuatꞌi eꞌat piat ikahu rakat sese.
26 Miꞌi hap ewy waku watomohey hãpyk kahato Aipotypot Iesui haty wo. Uito Pauru surara ewywuat ipiit heg nakat ewywuat mekewat woꞌoꞌahyk ahyk hat ewywuat hãpyk kahato uito. Atuuka aikotã ikuap kahato hat hepap hat uuka hap ewy yt arekyry popuo i atuuka.
27 Ahetama puo watoꞌoꞌiãꞌãg wuꞌuka hap ete. Miꞌi watunug aat pote watuwemoesaika kahato aipiit. Yt mikyꞌesat ewy i haty hap maꞌato watimopokuap aipiit. Miꞌi hat ewy areineꞌen uito. Maꞌato Tupana ehay moherep hap ete uipiit yt ipap i pykai atunug. Karãpe wẽtup ok yi kai neꞌi raꞌyn watuꞌuka hap ete miꞌi hawyi tuwemoti. Maꞌato uito miꞌi hat ewy yt areineꞌen neran i Tupana ehay moherep hap ete. Areineꞌen neran poꞌog hesaika rakat ewy. Miꞌi hap ewy karãpe areꞌe iraniaꞌin me -Toꞌiro waku Iesui upi watuwat areꞌe maꞌato miꞌi pykai yt areto i Iesui upi pote uito iꞌewyte aremoti. Waĩꞌare uipiit mikyꞌesat saꞌag ete yt atikyꞌesat i Uipoꞌoro hat toꞌe uhepe aru -Saꞌag nug hat en e hap yt atikyꞌesat hin i aru Iesui e hap. Uito ti uipiit mikyꞌesat monik hat Pauru.
