Saꞌawyꞌi Wuat Peteru 1:1-25
1 Uito ti Peteru Aipotypot Iesui eropat hat sese uito. Uito ti Iesui mipoꞌoro miitꞌin muꞌe hanuat ihay moherep hat uito are.
Uiwyriaꞌin Iesui mohey haria mesup uimiwan Iesui etiat atipoꞌoro ehewowi aikope aikope eweikupteꞌen mesuwat yi wato hap oktan are. Atipoꞌoro einapin hamuat ehewowi tama Puntu puaria iꞌewyte yi Karasia puaria kape. Atipoꞌoro wy uiꞌe hap yi Kapatusia totiaria kape iꞌewyte yi wato Asia puaria kape iꞌewyte yi Pitinia puaria kape. Mesuwat sehay miwan miat atipoꞌoro ehewowi uiwyriaꞌin torannia imohey haria kape aikope aikope eweikupteꞌen hap kape. Saꞌawyꞌi aitoria yne watukupteꞌen tawa wato Ierusarẽi me maꞌato mesup ahewanikaptia aimohan mohan kahato aiꞌatuꞌuka hamo mesuwat yi wato hap oktan are. Miꞌi pote atipoꞌoro ehewowi uimiwan uipotmuꞌeria aikope aikope wesytpok hap ewywuaria hap kape uimiwan atipoꞌoro.
2 Saꞌawyꞌi sese ti Aiꞌywot atipy piat Tupana aiꞌairo Tosaꞌyru sese eropat hanuaria wo. Mesuwat yi eꞌyian mete Tupana aikuap kahato yt uwe i te aitoria mesuwarotiaria pykai aikuap yne. Pywo ti rat saꞌawyꞌi Tupana toꞌe tuwepe -Meiũran ti aru atipoꞌoro Uhaꞌyru sese wuatꞌi miitꞌin uiminug koꞌi Potypot nuat e tuwepe. Uwe uwe aru topyhuꞌat Uhaꞌyru mohey haria wo miꞌiria ti aru uimimoewaku koꞌi wo tukupteꞌen. Katupono Uhaꞌyru suu wo atiꞌatumoewaku miꞌiria hawyi Uipaꞌãu Wakuat atum iꞌatupiit piat ieineꞌen hanuat e Tupana tuwepe nimo te yt kat i te tutunug ne turan. -Miꞌi hawyi Uipaꞌãu yne iꞌatupiit puo atopag iꞌatumoewaku hamo e ahepe. Miꞌi hawyi atikyꞌesat kahato imohey haria imikyꞌesat yne nug haria wo hap etiat atikyꞌesat. Miꞌi hap atikyꞌesat e Tupana Aiꞌywot koro saꞌawyꞌi sese atipy piat pe.
3 Saꞌawyꞌi Aipotypot Iesui ikuꞌuro hawyi Tupana timoieineꞌen guꞌuro pyi. Saꞌawyꞌi yt watomohey hin i aikuꞌuro hawywiat aheineꞌen i hamuat hap. Maꞌato mesup koitywy watomohey kahato kat pote Aiꞌywot Tupana tihep taꞌyn Aikaꞌiwat ikuꞌuro hap kaipyi. Miꞌi pote koitywy -Waku kahato En Tupana. Poꞌog wakuat torannia kai urutoꞌe kat pote egyiꞌat kahato uruepe. Urukyꞌe kahato En. Poꞌog poꞌog torannia miitꞌin kai urukyꞌe hat En katupono etihep taꞌyn urukaꞌiwat hyp hawyi urutoꞌe.
4 Waku kahato En Tupana katupono koitywy urutukupteꞌen esaꞌyruꞌin esakiꞌytꞌin. Miꞌi pote ewywo irane urutukupteꞌen wuatꞌi eꞌat pe aru atipy pe eꞌyat pe. Miꞌi tote urutukupteꞌen kat pote esaꞌyruꞌin esakiꞌytꞌin uruto pote. Uruekat atipy piat yt tuweityk kuap i. Yt tuwepik pik kuap i. Yt ikahuro kuap i katupono iheg me toineꞌen aiꞌyat pe atipy piat Tupana urutoꞌe.
5 Tupana pywo ti rat En yn uruehakyeraꞌat kuap hat ereineꞌen. Koitywy uruto emepytꞌin pote uruꞌapykok hat kahato En Tupana. Esaika kahato En. Uruimohey kahato En. Meiũran aru yne miitꞌin tikuap uruimohey kahato En hap uruehakyeraꞌat Hat En hap. Miꞌi pote urutukupteꞌen aikotã hekat kahato rakat ewy katupono epowatꞌyp yne tukupteꞌen urupo pe Tupana. Hekat rakat En ewy urutukupteꞌen. Yt uruiꞌatoiat hin i aru katupono urumoesaika raꞌyn Epaꞌãu wo. Miꞌi pote yt wẽtup ok i uruto hoꞌowasat rakaria wo urutoꞌe ewowi Tupana.
6 Urumowepiit kahato En. Miꞌi pote urutuwehum kahato ewowi Tupana. Uruhoꞌopot kahato wen mesuwe maꞌato yt motꞌi i. Uruhoꞌopot hap uruipuẽti tuereto maꞌato tokosap aru urutoꞌe. Uruiãꞌãg kahato ahiag. Urumoꞌarotꞌi kahato ahiag. Uruiãꞌãg kahato urusatek hap wywo urutoꞌe Tupana pe.
7 Uiwyriaꞌin waku ahoꞌopot hap katupono miꞌi kaipyi Tupana tikuap tomohey sese sio yt haria aito are. Mesuwarotiat miitꞌin tikat kahato mekewat nu mehit rakat hekat kahato rakat kawiat uru e hap het rakat. Maꞌato iꞌytyk kahato iꞌatumipuẽti yi puat pote. Miꞌi hawyi taꞌatupag aria pe hawyi ihywop taꞌyn hawyi iꞌytyk hap toto yne. Miꞌi hawyi imehit hawyi ikahu kahato mekewat nu uru kawiat. Miꞌi hap ewy kahato aito uruwyriaꞌin are. Uito ti Peteru uhepiat hoꞌopot hap uhatek hap miitꞌin mikyryꞌi hap aria ewy iꞌytyk uhepiat hap ewy hep hamuat. Miꞌi hawyi poꞌog hesaika rakat areineꞌen Tupana motypot hamuat. Wahoꞌopot turan mekewat Tupana motypot hap Tupana kapiat aiwehum hap poꞌog poꞌog aimoesaika saꞌawyꞌi wuat kai are. Meiũran aru Aikaꞌiwat Aipotypot Iesui tuut mesuwat yi kape tuut Morekuat nuat hamo. Miꞌi hap eꞌat pe ti aru aitoria watukupteꞌen imehit rakaria ewy aikotã mekewat uru mehit hap ewy are. Kat pote wahoꞌopot hap kaipyi waku pe raꞌyn watoineꞌen. Miꞌi hawyi aikotã hekat rakaria ewywuaria wo watoineꞌen mekewat nu imehit rakat ewy watoineꞌen mekewat eꞌat pe aru Iesui uut hap eꞌat pe ti aru. Miꞌi hap eꞌat pe urumowepiit kahato mesuwarotiat uruepiat hoꞌopot hap katupono yt uruiꞌatoiat hin i Iesui mohey uruepiat hap urusatek pykai uruꞌahyk ahyk pykai iꞌewyte urupyhik pykai uruꞌatuꞌuka pykai are.
8 Taꞌi atikuap kahato Iesui uito katupono araꞌakasa uito maꞌato eiperia yt eweiꞌakasa i eheha wo Aikaꞌiwat Iesui. Maꞌato yt eweiꞌakasa pykai i eweimohey kahato raꞌyn. Miꞌi hawyi eimowepiit hap kahato toineꞌen imohey hap kaipyi. Mekewat wepiit hap Iesui tum tomohey hap kaipyi. Waku kahato mekewat. Yt watimoherep kuap i miitꞌin me Iesui piat aimowepiit sese hap. Ahowapy kahato Iesui motypot hap wywo miꞌi pote aimowepiit kahato poꞌog torannia kai. Yt heremo i maꞌato aipyꞌa pe toineꞌen aimikyꞌe sese aimimohey Iesui are.
9 Saꞌawyꞌi woꞌowyꞌinug Iesui mohey hap ete. Koitywy watomohey te. Mukiꞌite ti aru watomohey te. Saꞌawyꞌi watomohey hawyi ahehakyeraꞌat aipyꞌa aipiit piat aiwanetup hap yne toiehakyeraꞌat. Meiũran aru wuatꞌi eꞌat pe ahehakyeraꞌat hap toineꞌen katupono mekewat eꞌat pe heremo kahato Tupana miium saꞌawyꞌi wuat ahepiat ahehakyeraꞌat hamuat are.
10 Saꞌawyꞌi sese aheꞌyian miaria Tupana ehay moherep haria henoi kahato aikotã aru Tupana topyhuꞌat hegyiꞌat kahato wuatꞌi ywania piat hap ete iꞌatuehay. Aikotã aikotã aru tutunug hap ete iꞌatuꞌe Iesui etiat. Taꞌatumoherep kahato aikotã Tupana ahehakyeraꞌat hap. Taꞌatukuap teran sese saꞌawyꞌi maꞌato iꞌypyryp hap ewy taꞌatukuap. Maꞌato taꞌatumikuap oktan taꞌatumoherep Tupana Paꞌãu kaipyi ahepe Iesui uut hap etiat katupono miwan myi saꞌawyꞌi wuaria imoherep Tupana yn mikuap koꞌi sehay are.
11 Kat eꞌat pe aru Aipotypot Iesui tuut e hap kape teꞌeruwanetup kahato taꞌatukat kahato. Taꞌi saꞌawyꞌi wuaria Tupana ehay moherep haria iꞌatuehay kahato Aikaꞌiwat Paꞌãu mimoherep koꞌi ete. Taꞌi taꞌatumoherep yian mete aikotã aru Aipotypot ikuꞌuro hoꞌopot hap rakirẽ hamuat koꞌi taꞌatuwan kahato miwan me. Iꞌewyte taꞌatuwan kahato Tupana Paꞌãu kaipyi aikotã me Aipotypot wuatꞌi miitꞌin potypot no topyhuꞌat hamuat koꞌi taꞌatuwan are.
12 Aikotã iꞌatumuꞌetu wuat ewy Tupana Paꞌãu timoherep iꞌatuepe aikotã aru Aipotypot tokuꞌuro hap eꞌyian mete toineꞌen hap koꞌi aikotã tuwẽtem guꞌuro pyi hap taꞌatukuap kahato Tupana Paꞌãu kaipyi. Miꞌi hawyi putꞌok e mekewat eꞌat pe hawyi uruepe topotmuꞌeria sese pe tuwemoherep taꞌyn Aipotypot. Miꞌi hawyi uruimoherep taꞌyn ehepe iꞌatuꞌe hap ewywuat saꞌawyꞌi wuat Tupana ehay moherep haria e hap ewywuat. Urutaꞌakasa yne iꞌatuꞌe hap ewywuat Aikaꞌiwat moherep hap. Urutaꞌakasa yne miꞌi hawyi mesup uruimoherep yne Iesui etiat ehepe uruꞌakasa hap koꞌi. Uruimoherep kahato uruehay wywo Iesui etiat Tupana Paꞌãu urupiit piat uruwanetup hap koꞌi. Uruimoherep mesuwat sehay wakuat Iesui etiat kat pote urutaꞌakasa raꞌyn Tupana Mipoꞌoro atipy kaipywiat. Koitywy uruikuap Tupana miehakyeraꞌat koꞌi wuat aito hap. Mekewat atipy piaria teꞌeruwanetup kahato kat pote saꞌawyꞌi yt uruimohey hin i maꞌato mesup uruimohey raꞌyn. Saꞌawyꞌi yt Tupana kape hin i uruwanetup hap. Koitywy Tupana kape yn naꞌyn uruwanetup hap. Miꞌi hap ete atipy piaria teꞌeruwanetup kahato. Taꞌatukuap teran haype maꞌato yt taꞌatukuap i kat pote mesup Tupana miehakyeraꞌat koꞌi wuat raꞌyn mesup uruto are.
Waku Aiwanetup Hap Tupana Kape Yn Toineꞌen
13 Uiwyriaꞌin meiũran ti aru Tupana tipoꞌoro Aiporekuat nuat. Tuwemoherep mesuwat yi tote i raꞌyn wuatꞌi ehamo. Miꞌi pote waku aiwanetup hap Ahehakyeraꞌat hat kape yn watuwanetup. Yt naku i aiwanetup hap kowoꞌi kowoꞌi neꞌi. Waku wahekatup kahato Aipotypot huut hap kape iwemoherep hap kape katupono mekewat eꞌat pe tuut irane Ahehakyeraꞌat hat. Miꞌi hawyi iwese kahato ahete hegyiꞌat kahato ahepe tomohey haria aito pote. Miꞌi pote waku aikotã watopag aiweꞌok kytyt hap aipiit ete ahesokpe moheg hamo miꞌi hap ewy waku watimoheg kahato aiwanetup hap Iesui kape yn hap ewy are ehepe uiwyriaꞌin. Uito ti Peteru are.
14 Pywo ti rat waku aito Tupana mepytꞌin no watukupteꞌen aikotã Aiꞌywot mikyꞌesat ewy yn waku watunug are. Waku iꞌywot kahato rakat ewy watoineꞌen Saꞌawyꞌi watukupteꞌen aikotã piku piku koꞌi ewy yt iꞌywot rakaria ewywuat i watoineꞌen aito uiwyriaꞌin. Maꞌato watunug mesuwarotiaria ainapin hap ewy yn pote saꞌag koꞌi upi yn watuwat. Watunug saꞌawyꞌi wuat aimikyꞌesat ewy pote yt watunug kuap Aiꞌywot atipy piat mikyꞌesat ewy hin i are. Miꞌi hawyi mekewat eꞌat pe yt weꞌeg hin i haria wo watopyhuꞌat. Aipiit mikyꞌesat koꞌi aiwuk kahato yne yt naku i nug ahepiat hap koꞌi. Maꞌato mesup Aiꞌywot toineꞌen naꞌyn. Miꞌi hawyi yt piku piku koꞌi ewy i raꞌyn aito. Miꞌi pote waku Aiꞌywot atipy piat mikyꞌesat ewy yn waku watunug are.
15 Aiꞌywot atipy piat waku sese rakat. Yt kat i hin i iꞌaparap hap Tupana kaipyi. Miꞌi tupono waku aito Aiꞌywot Tupana ewaku hap ewy waku watunug mesuwarote aheineꞌen turan are.
16 Katupono saꞌawyꞌi Tupana toꞌe -Uiat uiminug koꞌi wyti hãpyk yne e. Yt karãpe i atiꞌaparap Uito Tupana pote. Miꞌi pote atikyꞌesat kahato eiperia uiꞌewywuaria wo e Tupana saꞌawyꞌi tomiwan me.
17 Pyno eipe wyti Tupana sakiꞌytꞌin Tupana saꞌyruꞌin eipe miꞌi pote iꞌewyte Tupana wywuat ihay rakaria wo eipe pote pyno waku eiweꞌeg kahato mesuwarote eiminug saꞌag koꞌi pupi iꞌaparap ehepiat hap koꞌi pupi are. Kat pote meiũran Aiꞌywot Tupana tiꞌatuꞌapiheg kahato yt naku i nug haria sio aitoria hekat rakaria sio yt sio aitoria miitꞌin akag koꞌi sio yt sio aitoria ikuap kahato rakaria sio yt are. Mekewat eꞌat pe Tupana tiꞌatuꞌapiheg miitꞌin iꞌatuminug saꞌag upi. Toimoherep yne aiminug saꞌag koꞌi. Yt toimotypot hin i aiminug saꞌag miitꞌin akag aito pykai. Miꞌi pote ti waku aiweꞌeg wo kahato ahepiat iꞌaparap hap pupi are.
18 Miꞌi tupono waku watikoho kahato aiminug saꞌag koꞌi Aikaꞌiwat suu wo. Waku watimoweityk yne aiminug saꞌag koꞌi are. Ahekat yt ahehakyeraꞌat kuap i kat pote ahekat yt toineꞌen motꞌi i pote. Meiũran ahekat ipyyp iꞌytyk topyhuꞌat aikotã ahewahi aiminug imehit rakat ewy parata kawiat uru kawiat ewy. Porap neꞌi imehit maꞌato meiũran yt ikahu i hap ewy raꞌyn topyhuꞌat. Miꞌi koꞌi wo yt watikyiꞌat kuap i aheineꞌen wuatꞌi eꞌat piat hamuat hap are. Uiwyriaꞌin saꞌawyꞌi wuaria aiꞌywania aiꞌywotꞌin tikyiꞌat teran wuatꞌi eꞌat piat taꞌatuieineꞌen hamuat hap. Kat pote taꞌatunug neran Tupana mowepiit hamuat taꞌatuesokpe ete taꞌatumiꞌu ete taꞌatueko ete maꞌato yt putꞌok e hin i muap Tupana kapiat ete. Koitywy watikuap yt miꞌi kaipyi i ahehakyeraꞌat hap aheineꞌen wuatꞌi eꞌat piat hamuat hap are.
19 Koitywy watikuap taꞌyn mekewat saꞌup iwatoꞌin nakat kaipyi ahehakyeraꞌat hap. Taꞌi Iesui Aipotypot suu kaipyi yn ahehakyeraꞌat hap. Koitywy watikuap taꞌyn Aikaꞌiwat ikuꞌuro aikotã saꞌawyꞌi wuaria tiꞌauka taꞌatuhũria Kuteiru hap ewy. Iꞌatuhũria ikahuria kahato rakat yt kat i ipiit ete saꞌag hap ewy ikytsig kahato rakat taꞌatuꞌauka Tupana mowepiit hamo hap ewy Aikaꞌiwat Aipotypot ikuꞌuro. Miꞌi hawyi huu taꞌat yne itote Tupana kapiat ahehakyeraꞌat hap saꞌup mo are.
20 Saꞌawyꞌi sese Tupana toꞌe tuwepe. Mesuwat yi yt kat i te turan Tupana toꞌe -Atipoꞌoro aru Uhaꞌyru wuatꞌi ywania minug saꞌag saꞌup mo e nimo sese turan. Koitywy tuwemoherep taꞌyn ikuꞌuro raꞌyn Tupana Saꞌyru. Aihũ Kuteiru ewy ikuꞌuro. Gaꞌatpo eꞌat ikuꞌuro raꞌyn Aikaꞌiwat. Howapy hap eꞌat pe hap ewy ikuꞌuro are.
21 Miꞌi pote mesup yt niatpo hin i watomohey Tupana aipyꞌa pe kat pote uruehamo Aikaꞌiwat toihep guꞌuro pyi. Miꞌi hawyi Tupana toꞌe itote wuatꞌi ehamo -Miitꞌin Ehakyeraꞌat hanuat Miꞌi Miit e. Miꞌi pote koitywy Iesui yn watomohey ahehakyeraꞌat hamo. Waku watoꞌe tope -Uruimohey En yn Iesui uruehakyeraꞌat hanuat waku watoꞌe Iesui pe are.
22 Uiwyriaꞌin karãpe Aipotypot suu topyhuꞌat aheha ete aipy ete aiwanetup hawe aipiit ete miꞌi hawyi ikytsig kahato rakat ewy topyhuꞌat aikai. Yt saꞌawyꞌi wuat aiminug saꞌag koꞌi ewywuat hin i. Miꞌi hawyi waku watunug yne Tupana mimoherep tomikyꞌesat koꞌi pywuat koꞌi waku watunug. Yt watunug kuap i wen maꞌato Tupana Paꞌãu aimoesaika kahato mekewat pywuat sehay nug hamo are. Waku Tupana Paꞌãu ainug miitꞌin kyꞌe sese haria wo yt kat i aheso hap aipyꞌa piat miitꞌin kyꞌe hap wywo maꞌato aipyꞌa pyi miitꞌin kyꞌe sese hap yne ahesaika hap wywo. Waku watiꞌatukyꞌe miitꞌin Tupana Paꞌãu aimoesaika hap kaipyi are.
23 Kat pote aito Tupana saꞌyruꞌin sese Tupana sakiꞌytꞌin sese ewy aitoria katupono Tupana Paꞌãu aity ewy aimoherep pakup i raꞌyn. Saꞌawyꞌi aimoherep haria aity aiꞌywot. Aipiit nug hap taꞌatunug mekewat toꞌupiꞌa kaipyi mekewat iãꞌỹi kaipyi ainug. Miꞌi ti waku kahato wen maꞌato yt toineꞌen motꞌi i aipiit. Aikotã aipiit nug haria ewy aikuꞌuro neꞌi are. Meiũran ikuꞌuro raꞌyn iꞌatuminug aipiit maꞌato aiwemoherep pakup i hap Tupana kaipywiat mekewat hãꞌỹi Tupana ehay aity aiꞌywot ewy topyhuꞌat. Miꞌi ti ainug wuatꞌi eꞌat piat aimoieineꞌen hamuat. Yt karãpe i ikahuro Tupana ehay maꞌato toineꞌen wuatꞌi eꞌat pe. Miꞌi kaipyi aiwemoherep hawyi watoineꞌen wuatꞌi eꞌat pe are.
24 Maꞌato aito ti ipuꞌi kawiat. Aipiit aimikoi ewy katupono meiũran ti aru ipotꞌi hawyi igag naꞌyn hawyi ikuꞌuro. Aimimotypot mesuwarotiat aikotã ipohyt ewy ikahu kahato saꞌawyꞌi maꞌato meiũran taꞌat raꞌyn hawyi yt ikahu i raꞌyn hap ewy topyhuꞌat. Miꞌi hap ewy watoineꞌen mesuwarote aimikoi ewy ipohyt ewy are.
25 Maꞌato Tupana e hap wuatꞌi eꞌat pe toineꞌen. Yt aimikoi i yt pohyt potꞌi rakat i ewy Tupana ehay. Sehay wakuat tuwemoherep wuatꞌi miitꞌin me. Miꞌi tã ti sehay wakuat atimoherep ehepe uiwyriaꞌin are.
