Saꞌawyꞌi Wuat Tesaronika 4:1-18
4 Uruwyriaꞌin koitywy uruhẽtup kahato ehupi poꞌog poꞌog Tupana mowepiit haria wo eweikupteꞌen hap Iesui mikyꞌesat ewy kahato. Uruikuap taꞌyn ti koitywy Tupana mowepiit haria wo raꞌyn eweikupteꞌen. Miꞌi tã raꞌyn pykai ti uruhẽtup poꞌog poꞌog ne.
2 Iꞌewyte yt waureꞌeweiꞌe teiꞌo Iesui kaipywiat einapin uruepiat hap ete.
3 Pyno koitywy uruhenoi teran ehepe kat som Tupana tikyꞌesat watunug hap. Yt toikyꞌesat i ti wuatꞌi haryporiaꞌin wywuat hap iꞌewyte wuatꞌi ihainiaꞌin wywuat yt aiweꞌeg i hap ti yt toikyꞌesat i. Waku iweꞌeg kahato rakaria wo toikyꞌesat aheineꞌen hap.
4 Tupana tikyꞌesat wyti wẽtup ok wywo yn aheꞌaito hap iwary hap toikyꞌesat iweꞌeg kahato rakaria aito pote. Miꞌi tã watunug pote miitꞌin mimotypot no watoineꞌen.
5 Maꞌato iraniaꞌin yt Tupana kuap i haria ti iꞌatuewaire ewaire hap yn taꞌatunug. Maꞌato aito ti yt toikyꞌesat hin i miꞌiria ewywuat aheineꞌen hap.
6 Yt naku i kahato ti watipohari aiwy iharyꞌi ete paĩ urutoꞌe saꞌawyꞌi te ehepe. Iꞌewyte wy koitywy yt eweimaꞌat reiꞌo wẽtup ok haryporia imoewaire hamo urutoꞌe haty wo katupono miꞌi tã watunug pote Tupana miꞌapiheg wo watukupteꞌen paĩ.
7 Tupana yt tikyꞌesat hin i ti yt iweꞌeg i rakaria wo aheineꞌen hap maꞌato toꞌewywuat ahewaku hap yn toikyꞌesat.
8 Ipaꞌãu weꞌeg kahato rakat aimuꞌe hamuat. Miꞌi tupono uwe uwe topotmaꞌatꞌi maꞌatꞌi haryporiaꞌin ihainiaꞌin wywo yt tuweꞌeg i haype. Miꞌi hat topyhuꞌat Tupana ehay pun hatno. Iꞌewyte miitꞌin maꞌat hat miꞌi.
Waku Iesui Mohey Haria Ewy Watoineꞌen Motpap Hap Ete
9 Nimo pyi te mesup te Tupana eimuꞌe kahato aikotã eiwoꞌokyꞌe hamuat hap ete. Miꞌi tupono ipotmuꞌeria wo raꞌyn eweikupteꞌen koitywy. Miꞌi tupono yt kat no kuap i raꞌyn poꞌog worohoꞌomuꞌe woꞌokyꞌe hap ete mesuwat uimiwan me katupono eiwoꞌokyꞌe kuap kahato raꞌyn.
10 Iesui mohey haria wuatꞌi tawa Masetunia piaria ikuap yne raꞌyn woꞌokyꞌe hap eikaipyi. Miꞌi tupono ti uruhẽtup poꞌog ehepe eiwoꞌokyꞌe hap miitꞌin kyꞌe hap.
11 Uiwyriaꞌin worohoꞌonapin pywuat sehay wo. Woꞌoeremopusu haria wo yt naku i aito watukupteꞌen. Waku teꞌen aipotpap kaipyi aimiꞌu ahekareꞌen aikotã urutoꞌe saꞌawyꞌi hap ewy waku watoiat yne aiperup hap koꞌi urutoꞌe.
12 Miꞌi hawyi ipotpap kahato rakaria wo eweikupteꞌen are. Miꞌi pote ti aru meiũran -Taꞌi waku kahato miꞌiria iꞌatuꞌe Iesui mohey haria. Waku kahato miꞌiria iꞌatuꞌe iraniaꞌin. Eipo minug kaipyi mio tã iꞌatuꞌe. Yt eweikupteꞌen neiꞌo iraniaꞌin okpe tote neꞌi iꞌatuekareꞌen iꞌatumiꞌu etiatno neꞌi maꞌato motpap haria wo eweikupteꞌen. Yt sẽtup i sẽtup i e haria wo teiꞌo eweikupteꞌen are.
13 Uruwyriaꞌin uruikyꞌesat eweikuap kahato pywuat sehay aikotã ikuꞌuro rakaria tukupteꞌen hamuat hap. Yt uruikyꞌesat i eweikupteꞌen Iesui mohey ran haria wo neꞌi katupono taꞌatuwy kuꞌuro pote toꞌokakꞌi kahato -Yt karãpe i raꞌyn aru wataꞌakasa aiwy kape taꞌatuehaype.
14 Maꞌato aito ti watomohey kahato raꞌyn karãpe Iesui tokuꞌuro hawyi toineꞌen pakup i hap. Iꞌewyte watomohey kahato raꞌyn karãpe Tupana tuut hamuat Iesui wywo iꞌewyte map haria imohey haria tõꞌẽ tõꞌẽ Iesui upi atipy kaipyi hap watomohey kahato raꞌyn aito.
15 Pyno mio tã e Tupana henoi map haria etiat tomohey haria etiat -Taꞌi ariot i ti aru yt ihãite rakaria kape yn i maꞌato map haria uimohey haria kape wy ariot. Miꞌi hawyi toꞌopype ateropoꞌok e Tupana.
16 Pyno Aikaꞌiwat sese ti aru taꞌapyk atipy kaipyi miꞌi hawyi atipy piaria esurara akag ti aru ihay pirik kahato. Miꞌi turan ti aru hu huꞌe akuara wato pyi mekewat huut hap enoi hamo. Miꞌi turan ti aru mekewat Iesui mohey haria ikuꞌuro rakaria Tupana tiꞌatuporenoꞌẽ yne yne aiꞌam hap eꞌyian mete.
17 Miꞌi hawyi aito ihãite te rakaria ahytmoi tomimoieineꞌen guꞌuro pywiat haria wywo. Miꞌi hawyi ti aru wataꞌam aiwoꞌopype howa kape huut turan ywyhig kape. Miꞌi hawyi itote watoꞌopuẽti ywaiti pe.
18 Pyno waku watoꞌomowepiit aiwoꞌope aheineꞌen pakup i hap ete urutoꞌe ehepe Pauruꞌin.
