Saꞌawyꞌi Wuat Tesaronika 5:1-28
5 Tuut aru Iesui maꞌato yt watikuap i karapeĩ putꞌok e hamuat sio iꞌaman motpe sio aat pe hap koꞌi ti yt urutuwan kuap i ewowi.
2 Yt urutuwan kuap i ehewowi katupono yt uwe i ikuap aikotã yt uwe i seroꞌok e hat ikuap wãtym muat. Miꞌi hap ewy kahato Iesui uut hap yt uwe i ikuap.
3 Miꞌi turan ti aru miitꞌin teꞌeroꞌe toꞌope -Yt kat i wyti poꞌog hoꞌopot hap iꞌatuꞌe aru. Yt eweikenꞌẽ teiꞌo iꞌatuꞌe katupono waku pe raꞌyn watoineꞌen iꞌatuꞌe maꞌato yt pywo pe i. Katupono hupiꞌa rakat haryporia ete watikuap imepyt haty hap meremo putꞌok e tuwete hap ewy meremo putꞌok e hamuat ikahuro hap eꞌat imoma hap eꞌat meremo putꞌok e. Yt uwe i aru tuwemig kuap i aru mekewat eꞌat pe.
4 Maꞌato ariãty ewy watoineꞌen aito pote ariãty hot pe ti raꞌyn watoineꞌen huut turan mote yt aimogyt kuap i. Hẽtyhot pe watoineꞌen mote watikuap taꞌyn putꞌok e irane mekewat ikahuro hap eꞌat pe. Maꞌato iꞌypyryp mepytꞌin neꞌi aito pote ti iꞌypyryp we ti raꞌyn watoineꞌen huut turan. Miꞌi hawyi get haria ewy watopyhuꞌat pote mekewat eꞌat pe aimogyt kahato katupono mekewat eꞌat pe iꞌypyryp we ieineꞌen haria iꞌatuminug saꞌag hap koꞌi heremo raꞌyn.
5 Maꞌato ariãty mepytꞌin no watopyhuꞌat aito pote ihatꞌok mepytꞌin sese wo raꞌyn aito katupono watopyhuꞌat Iesui ehay wywo. Miꞌi pote aito yt iꞌypyryp mepytꞌin wo hin i katupono yt watunug neran i raꞌyn saꞌag.
6 Taꞌi aito Iesui uut hap kape watehaꞌat kahato. Yt naku i get haria ewy neꞌi watoineꞌen huut hap owakai iraniaꞌin ewy.
7 Taꞌi get haria wãtym muo teꞌeroket kahato. Iꞌewyte mahy u haria iꞌatumopẽꞌã miꞌiria wãtym muo tukupteꞌen.
8 Maꞌato aito hẽtyhot puo ahewyry yt kat i aimopẽꞌã hap mywo. Waku watopyhuꞌat aikotã suraraꞌin ewy katupono suraraꞌin ipag taꞌatupotiꞌa tote iheg nakat moryꞌa pupi taꞌatuꞌauka hap. Miꞌi hap ewy waku watomohey Iesui hawyi iꞌewyte watoꞌopowyro waku aiwoꞌokyꞌe hap ete. Karãpe Iesui mohey hatno watoineꞌen iꞌewyte miitꞌin kyꞌe hatno pote ti surara ipotiꞌa tote iheg nakat ewy watoineꞌen. Iꞌewyte suraraꞌin ipag taꞌatuesapeu iheg nakat taꞌatuꞌahot hap pupi hap ewy waku watoineꞌen. Uheꞌywytꞌin uheinytꞌin waku watehaꞌat kahato Ahehakyeraꞌat hat yatypiat aheineꞌen hap kyewi. Miꞌi hap ewy ti waku watehaꞌat kahato surara akag sokpe iheg nakat ewy.
9 Tupana aiꞌairo yt aiꞌapiheg hamuat i maꞌato ahehakyeraꞌat hamo.
10 Iesui ikuꞌuro aiꞌapiheg hap u hamo. Miꞌi tupono karãpe huut turan watuwat hupi sio watoineꞌen map haria wo raꞌyn mekewat eꞌat pe sio ahehãite te watuwat hupi.
11 Miꞌi tupono ti waku watoꞌomoesaika watoꞌomowepiit tuut aru Iesui aiꞌe hap ete. Taꞌi atikuap taꞌyn eipe miꞌi hap nug haria raꞌyn are. Miꞌi yn uruikyꞌesat poꞌog.
Waku Aiwoꞌomuꞌe Haria Motypot Hanuaria Watoineꞌen
12 Uhytꞌiꞌin eweiꞌatumotypot o eimuꞌe haria eipyꞌasetpiaria. Mio tã urutoꞌe uruwese popuo. Yt eweiꞌatumohit neꞌi teiꞌo aiꞌapykok haria katupono Tupana minug aiꞌakag wuat ainapin hanuaria. Iꞌewyte aiporeroto muap hãpyk takat kapiat haria.
13 Waku aimuꞌe haria kyꞌe haria wo watukupteꞌen. Waku iꞌatumotypot haria wo watukupteꞌen. Iꞌewyte watoꞌowese kahato aiwoꞌope.
14 Maꞌato toineꞌen eipyꞌasetpe motpap pupiat woꞌoksep hat neꞌi pote waku waĩꞌeweiꞌe miꞌi hat pe merup upiat neꞌi myhuꞌat hat pe. Iꞌewyte waku ti watimoꞌokpipokꞌi ihay kenꞌẽ tehay hamuat rakat. Iꞌewyte waku watiꞌykesat imohey hap etiat yt hesaika i rakat. Iꞌewyte waku aiperupꞌi yn wuatꞌi miitꞌin ete.
15 Iꞌewyte yt naku i nug ehetiat haria o yt eweiꞌatupoepyk teiꞌo. Miꞌi hawyi ti waku watikat aikotã miat waku watunug wakuat aiwoꞌope hap yn naꞌyn. Maꞌato yt Iesui mohey haria kape yn i wyti mio tã are maꞌato yne miitꞌin me.
16 Yne eꞌat pe waku watuwehum Tupana kape.
17 Iꞌewyte yne eꞌat pe wahẽtup Tupana kape yt ikahuro i hamuat hap.
18 Iꞌewyte yne eꞌat pe -Waku kahato En Tupana watoꞌe sio hoꞌopot pote sio ahehãite pote. Miꞌi tã yne eꞌat pe waku watunug katupono miꞌi tã hap Tupana tikyꞌesat Iesui mohey haria tunug hap.
19 Yt naku i waĩ watoꞌe Tupana Paꞌãu miat aimuꞌe turan.
20 Iꞌewyte yt naku i watuwekyryꞌi neꞌi aimuꞌe wẽtup ok Tupana Paꞌãu kaipywiat turan.
21 Karãpe wẽtup ok aimuꞌe turan waku watuwanetup -Tupana e hap ewy sio waku watoꞌe aiwanetup hawe. Ipaꞌãu kaipyi pote waku watoꞌe yt pote watiꞌairo hawyi waku yt nakuat i watipun.
22 Ipotyi kahato ti aheko saꞌag. Pyno miꞌi waku watoiat yne.
23 -Tupana etiꞌatupowyro o uruwyriaꞌin itotiaria. Etiꞌatumoperupꞌi wakuap nug hamo are. Uruikyꞌesat tawa Tesaronika piaria emohey haria wuatꞌi kupteꞌen hap. Etiꞌatumopakupꞌi iꞌatuwanetup pakup i hamo are. Miꞌi hawyi yt kat i iꞌatuwanetup saꞌag hap kapiat hap uruikyꞌesat uruꞌywot urutoꞌe. Uruikyꞌesat miꞌiria ewatno yn hap urutoꞌe. Miꞌi tã etunug mote ti aru karãpe Esaꞌyru emipoꞌoro uut turan yt kat i iꞌatuminug saꞌag huut turan etipuẽti aru urutoꞌe yn Tupana pe.
24 Yt karãpe i Tupana aiꞌatoiat. Saꞌawyꞌi aikay kay towatno. Mio toineꞌen aiwywo wuatꞌi eꞌat pe toꞌoꞌewy ainug.
25 Uruwyriaꞌin ewehẽtup o Tupana ewowi urupowyro hamuat.
26 Mesuwat uhekuekatu atipoꞌoro torannia Iesui mohey haria itotiaria kape. Waku watoꞌahiꞌypysat tuereto aiwoꞌokyꞌe hap moherep hamo.
27 Mesuwat urumiwan me uruhenoi Aikaꞌiwat Iesui etiat. Miꞌi tupono eweimowẽpap to mesuwat mienoi yne Iesui mohey haria pe.
28 Toran naꞌyn urumiwan. -Iesui ereineꞌen kahato Morekuat no tawa Tesaronika piaria emohey haria pyꞌasetpe. Etum neꞌen neꞌi iꞌatuepe poꞌog poꞌog egyiꞌat hap. Miꞌi yn uruhẽtup Aikaꞌiwat pe ekawiatno.
