Typuatꞌi Iuwãu 1:1-13
1 Koitywy aseꞌi pot areineꞌen uiporo kahato raꞌyn mote. Mesuwat uimiwan atipoꞌoro ewowi mana. Waku sese kahato en katupono saꞌawyꞌi Tupana eꞌairo temiit sese wo. Kuekatu atipoꞌoro uimikyꞌe koꞌi kape emepytꞌin kape. Pywo ti rat worohoꞌokyꞌe kahato eiperia. Yt uito yn i eikyꞌe maꞌato yne yne Iesui kuap haria eikyꞌe kahato wy Iesui pywo e hap ewy eikyꞌe urutoria.
2 Tupana ehay pywuat sese eiam kahato aito mana. Miꞌi hawyi yt karamuat i watiwaure mekewat pywuat e hap katupono toineꞌen aru wuatꞌi eꞌat pe aikai.
3 Miꞌi hawyi ahẽtup kahato Aiꞌywot atipy piat kape iꞌewyte Haꞌyru Aipotypot kape -Etum no uruepe egyiꞌat hap. Urukyꞌe ro yt kat saꞌup i are. Uruehakyꞌeꞌi pote etum no urukyꞌe hap yt kat saꞌup i are. Urunug o woꞌowese haria wo are. Iꞌewyte urunug sehay pywuat kyꞌesat haria wo. Iꞌewyte woꞌokyꞌe haria wo are aat kaꞌap ahẽtup Aiꞌywot kape.
Eiperia Uimowepiit Haria Wo Eweikupteꞌen
4 Mana emepytꞌin koꞌi uimowepiit kahato haria tukupteꞌen katupono pywuat sehay upiaria kahato miꞌiria. Mekewat saꞌawyꞌi wuat Aiꞌywot ainapin hap sese nug haria miꞌiria.
5 Pyno ahenoi i raꞌyn epe mana mekewat saꞌawyꞌi wuat Tupana piat ainapin hap sese. Mio tã e -Waku eiwoꞌokyꞌe yne e. Yt ipakup i raꞌyn wen maꞌato atiwan ne ewowi uimikyꞌe kahato en mote.
6 Pyno waku yne saꞌawyꞌi wuat ainapin hap aimikuap oktan waku watunug. Karapeĩ areꞌe ehepe -Toꞌiro watoꞌokyꞌe iꞌewyte areꞌe ehepe -Watunug yne yianmiat ainapin hap aimikuap oktan meimewat saꞌawyꞌi wuat miꞌi pote woꞌokyꞌe haria wo raꞌyn watoineꞌen.
7 Taꞌi typyꞌi kahato ti mesuwarotiaria aimaꞌatꞌi maꞌatꞌi hanuaria. Wẽtup sehay wuat aimaꞌat reran haype -Iesui ti yt miit kawiat i iꞌatuꞌe saꞌag. Tupana yt tuwemoherep miit no iꞌatuꞌe reran haype. Aikaꞌiwat ewanikaptia ti miꞌiria.
8 Waku aiweꞌeg wo o miꞌiria pupi katupono taꞌatukyꞌesat kahato watuwat iꞌatuehay upi. Watuwat miꞌiria ehay upi pote watoiat raꞌyn aimimohey Iesui etiat. Iꞌatuehay upi watuwat hawyi yt naku i pe watopyhuꞌat. Yt kat i aipotpap hap saꞌup topyhuꞌat Tupana kaipyi. Miꞌiria ehay -Iesui ti yt miit puꞌi kawiat i yn iꞌatuꞌe ahepe. Tupana yt tuwepuꞌi nug i iꞌatuꞌe ahepe saꞌag. Miꞌi hawyi watuwat iꞌatuehay upi hawyi yt kat i saꞌup toineꞌen aru Tupana kaipyi mekewat eꞌat pe mekewat aipotpap saꞌup.
9 Yt naku i wahenoi iraniaꞌin me aiwanetup hap yt Aipotypot Iesui e hap ewy i. Miꞌi tã watunug mote yt Tupana watnuat i watopyhuꞌat. Maꞌato miitꞌin watiꞌatumuꞌe Iesui e hap ewy imienoi ewy miꞌi pote toineꞌen Iꞌywot Haꞌyru aipyꞌa pe.
10 Miꞌi hawyi putꞌok e wẽtup ok aimuꞌe hat hawyi -Taꞌi wẽtup kawiat ti Iesui yt aipiit ewywuat i Iesui iꞌatuꞌe saꞌag. Miꞌiria putꞌok e aiꞌyat okenꞌypyke hawyi -Waĩ yt ereke teiꞌo waku watoꞌe tope.
11 Maꞌato -Tupana epowyro ereꞌe pote miꞌi hawyi meiẽwat miit saꞌag ewy raꞌyn iwy ok wo raꞌyn erepyhuꞌat.
12 Iꞌatu kahato ti atiwan neran ewowi mana maꞌato waku ahenoi miꞌi koꞌi uiwẽ pyi areineꞌen ewywo hawyi. Maꞌato yt atunug neran koitywy uhehay uimiwan me. Areto teran ewowi mana hawyi miꞌi tote ahenoi uhehay sese epe mana. Iꞌewyte waku ehenoi ehay uhepe aiwoꞌoewa pe. Miꞌi hap eꞌat pe uimowepiit hap sese toineꞌen.
13 Pyno kuekatu atipoꞌoro ewowi mana. Iꞌewyte ekypyꞌyt mepytꞌin tipoꞌoro ewowi kuekatu. Waku raꞌyn uimiwan toran naꞌyn.
