Typuatꞌi Kurintiu 1:1-24
1 Uito ti Pauru are. Uiwyriaꞌin Iesui mohey haria tawa Kurintiu piaria yi Akaia piaria. Eiperia ti Tupana mimowaku koꞌi raꞌyn tewaku hap wuat koꞌi. Uito ti Iesui potpoꞌoro Pauru e hap het rakat are. Saꞌawyꞌi Tupana toꞌe uhepe -Woroꞌairo en Uhaꞌyru moherep miitꞌin muat hamuat e. Koitywy atipoꞌoro ehewowi uimiwan aikope aikope eiwaꞌatunug Tupana motypot hamo are. Iꞌewyte toineꞌen meiũpe aheywyt aikywyt sese Timoteu are. Miꞌi ti uipowyro mesuwat uhehay wan hap ete.
2 Mio tã are Tupana pe -Etiꞌatupoityro kahato o emohey haria Esaꞌyru mohey haria tawa Kurintiu piaria are. Ereineꞌen o egyiꞌat kahato rakat iꞌatuepiat hat wo. Etunug o miꞌiria woꞌowese haria wo. Tupana are En ni uruꞌywot sese are. Emipoꞌoro uruporekuat nuat ti Iesui Esaꞌyru set upi wyti ahẽtup.
3 Urutuwehum ewowi Tupana. Waku kahato En Tupana katupono etipoꞌoro raꞌyn Iesui uruewawi. Koitywy emepytꞌin sese uruto are. Waku kahato En uruꞌywot. Uruhoꞌopot turan urukawiatno kahato hat En. Uruehakyꞌeꞌi kahato wuatꞌi eꞌat pe are.
4 Uruetupana are karãpe urusatek turan uruꞌywot kahato ereineꞌen haty hap etimonik kahato hamo. Uruhoꞌopot turan iꞌewyte urunapin urukyꞌe hap wywo. Waku kahato Tupana katupono karãpe uruwyriaꞌin hatek hap putꞌok e miꞌi turan uruiꞌatunapin kuap iꞌatukyꞌe hap wywo. Aikotã urunapin hoꞌopot turan miꞌi hap ewy urutunug aikotã urumowepiit ehay wo hap ewy urutoꞌe ewowi Tupana are.
5 Aipotypot Iesui tikuap kahato hoꞌopot hap koꞌi poꞌog torannia kai toikuap are. Uruto urutukupteꞌen iwywo wẽtup miit ewy yn uruhoꞌopot kahato wy. Miꞌi turan urukawiatno kahato hat pote toikuap kahato hoꞌopot hap pote. Yt wẽtup i yt toikuap i. Torannia toikuap kat pote tohãꞌãg yne raꞌyn. Miꞌi pote tohatyꞌu kuap yne aikyꞌe haype.
6 Koitywy mesuwarotiaria urusatyꞌi satyꞌi kahato raꞌyn mesuwe katupono uruhenoi raꞌyn Iesui etiat waĩꞌiꞌatuꞌe pykai. Miꞌi pote koitywy Tupana miehakyeraꞌat koꞌi wo eweikupteꞌen. Uruꞌapiheg kahato pote eipowyro haria wo urutukupteꞌen mote are. Maꞌato urusatyꞌi satyꞌi hap kaipyi eipowyro haria urutukupteꞌen.
7 Maꞌato urusatyꞌi satyꞌi turan Tupana urukawiatno urusatyꞌi satyꞌi hap oktan. Miꞌi pote poꞌog hesaika rakaria wo urutopyhuꞌat eipowyro hamuat ehepiat hoꞌopot hap ete. Miꞌi hawyi karãpe ehatyꞌi hatyꞌi Iesui mohey haria eipe pote miꞌi hawyi uruepiat hoꞌopot hap kape eiwatetup yn naꞌyn. Miꞌi hawyi -Waku wahoꞌopot aimuꞌe haria ewy eweiꞌe eiwewowi. Miꞌi hawyi wẽtup miit piit ewy yn hoꞌopot haria wo watoineꞌen are. Miꞌi pote watikuap yne hoꞌopot hap koꞌi are. Miꞌi hawyi wahupit kuap yne are. Miꞌi hawyi yt uwe i aito imohey hap atoiat haria ahatyꞌi hatyꞌi kahato pykai.
8 Uiwyriaꞌin tawa Kurintiu piaria wẽtup yn wyti aimimohey. Miꞌi pote atimoherep teran ehepe aikotã saꞌawyꞌi wahoꞌopot eheꞌyi Asia totiat hap. Atikyꞌesat eweikuap miꞌi hap ete. Katupono karãpe ewehoꞌopot turan mono erakue eweiꞌe yn naꞌyn. Taꞌi uruhoꞌopot kahato itote aikotã ahakpuat ipotyi rakat wahupit hap ewy yt wahupit kuap i. Miꞌi hap ewy yt uruhupit kuap i poꞌog eheꞌyi Asia tote uruhoꞌopot hap. -Taꞌi aikuꞌuro raꞌyn keĩ mesup paĩ urutoꞌe yn urutoꞌope itote.
9 Yi Asia piaria uruꞌauka irane mesup sio mukiꞌite urutoꞌe yn uruwanetup hawe itote. -Pyno yt watuwehakyeraꞌat kuap i aikuꞌuro hap po pyi urutoꞌe yn itote urutoꞌope. Taꞌi Tupana yn keĩ aihep kuap aiꞌauka teran haria po pyi urutoꞌe itote uruwoꞌope. Tupana yn aihep kuap aiꞌauka hanuaria po pyi urutoꞌe saꞌawyꞌi eheꞌyi Asia tote urutuwat Iesui ehay moherep hamuat turan.
10 Maꞌato yt uruꞌauka kuap i ehetama piaria katupono Tupana uruehakyeraꞌat uruewanikaptia po pyi itote urumohakyꞌeꞌi moehakyꞌeꞌi turan. Iꞌewyte urutuwehakyeraꞌat uruꞌauka irane turan yne eꞌat pe.
11 Uiwyriaꞌin tawa Kurintiu piaria ewehẽtup o Tupana kape urupowyro Iesui ehay moherep hamo. Miꞌi tã ewetunug mote Tupana urupowyro emiẽtup oktan. Miꞌi hawyi waku pe urutukupteꞌen urupoityro emiẽtup oktan hawyi aru eweikuap taꞌyn Tupana piat urupoityro hap. Miꞌi hawyi eiwepiit kahato hap topyhuꞌat katupono Tupana tum naꞌyn eimiẽtup hap oktan. -Etipoityro Pauruꞌin eweiꞌe ro Tupana pe urukawiatno.
Hãpyk Kahato Pauruꞌin Tukupteꞌen Tawa Kurintiu Piaria Pyꞌasetpe
12 Yt karãpe i uruiꞌatumaꞌat eipe tawa Kurintiu piaria. Poꞌog hãpyk torannia kai hap ewy urutukupteꞌen eipyꞌasetpe. Tupana motypot hap yn urutunug itote. Yt uruweꞌeg hap kaipyi i urupotpap ehehamo maꞌato Tupana urumoweꞌeg hap kaipyi uruimotypot Tupana miitꞌin pyꞌasetpe. Yt uruhepap hap kaipyi i maꞌato Tupana tum uruepe tegyiꞌat hap tomisepap nug kuap hamo hawyi hesaika hap wywo uruimoherep wakuat itote saꞌawyꞌi. Miꞌi pote uruminug ete Tupana urupowyro hap kaipyi uruimotypot Tupana itote saꞌawyꞌi. Miꞌi hawyi miitꞌin teꞌeruwehum kahato Tupana kape. Yt uruewawi i maꞌato Tupana kape yn teꞌeruwehum uruminug wakuat upi. Miꞌi hawyi Tupana kape teꞌeruwehum hawyi urumowepiit kahato kat pote uruminug kaipyi Tupana motypot hamo urutukupteꞌen mote.
13 Iꞌewyte yt eimaꞌat hap i uruipoꞌoro miwan ehewowi are. Urumiwan uruehay ewy ti raꞌyn waku pe yn toineꞌen. Yt uruiwan i typy sehay ehewowi. Yt kat i ehekat kyewi uruipoꞌoro urumiwan ehewowi hap. Taꞌi heremo kahato urumiwan wuatꞌi mikuap kahato hap ewy. Yt kat i wẽtup sehay ipuo toineꞌen urumiwan me. Yt kat i eimaꞌat hap urumiwan me toineꞌen. Miꞌi pote heremo yne uimiwan are.
14 Koitywy urumohey ran are kat pote yt urukuap kahato i te pote. Miꞌi pote urumohit tuereto ehehay wo. Atikyꞌesat kahato urukuap sese hap. Waku watuwekuap aiwoꞌoꞌewy ewy hawyi aiwoꞌomowepiit hap toineꞌen are. Karãpe mekewat eꞌat pe putꞌok e mekewat Aipotypot Iesui toineꞌen mesuwarote Morekuat Koro wo hap eꞌat pe uimowepiit kahato haria eweipyhuꞌat are. Katupono -Miꞌiria uipotmuꞌeria sese uimiekyi koꞌi tawa Kurintiu kaipywiaria are aru Iesui pe. Taꞌi worohoꞌomoherep eipe Iesui kape huut hap eꞌat pe are. Miꞌi hap eꞌat pe aru waku -Taꞌi Pauru ti urumuꞌe hat saꞌawyꞌi wuat waku eweiꞌe mekewat eꞌat pe Aikaꞌiwat pe are. Miꞌi hap ewy urutukupteꞌen itote woꞌomowepiit hanuaria wo.
15 Saꞌawyꞌi eipap kahato uhehay upi miꞌi pote -Araꞌaipok i raꞌyn iꞌatumuꞌe hamo paĩ are uipyꞌa pyi. Saꞌawyꞌi -Areto i raꞌyn tawa Kurintiu piaria kape are.
16 Miꞌi hawyi areto i raꞌyn yi Masetunia piaria kape. Miꞌi kaipyi ariot i raꞌyn tawa Kurintiu kape i areꞌe uiwepe saꞌawyꞌi. Atiꞌatumuꞌe areto hamo iꞌewyte iꞌatumowepiit hamo areto i raꞌyn tawa Kurintiu piaria kape. Miꞌi hawyi areꞌe arewanetup -Waku urupowyro yi Iuteu ywania hatek takaria uruekat wywo areꞌe uiwepe. Waku Kurintiu piaria uipowyro muap upi mekewat Iuteu kapiat uito hap saꞌup ete tawa Kurintiu piaria pe are arewanetup hawe.
17 Miꞌi uiꞌe hap ete ahenoi yne saꞌawyꞌi ehepe uimiwan me uiwyriaꞌin. -Areto ehewowi are uimiwan me. Maꞌato yt areto hin i ehewowi uiꞌe hap ewy hawyi -Kat pote som yt tuut i ahowawi eweiꞌe eiwoꞌope. Aimaꞌat i maꞌat i teran haype neꞌi eweiꞌe uhepiat pe. Pauru ti heso apo ahepe eweiꞌe eiwoꞌope are. Yt tutunug i toꞌe hap ewy apo eweiꞌe ewoꞌope uhetiat.
18 Uiwyriaꞌin yt naku i mio tã eweiꞌe neꞌi kat pote uito atunug yne uiꞌe hap ewywuat koꞌi uito are. Taꞌi urutunug aru uruꞌe hap ewy katupono urutukupteꞌen neran Tupana ewywuat pywuat rakaria urutoꞌe uruwoꞌope.
19 Saꞌawyꞌi mehin Sira mehin Timoteu iꞌewyte uito urutuwat ehewowi eimuꞌe hamo. Miꞌi hawyi itote uruiꞌatumuꞌe kahato aikotã Tupana tipoꞌoro Tosaꞌyru hap etiatno. Tupana motypot haria wo yn uruiꞌatumuꞌe eipe. Yt kat i urueso hap wywo uruiꞌatumuꞌe eipe. Miꞌi hap eꞌat pe urutunug aru urutoꞌe pote urutunug uruꞌe hap ewy. Yt typy sehay wywo hin i uruiꞌatumuꞌe saꞌawyꞌi eipe Iesui etiat uruhenoi raꞌyn.
20 Saꞌawyꞌi sese Tupana henoi yian mete miwan me yne Tosaꞌyru etiat aikotã aru tutunug hap etiat tohenoi miwan me. Miꞌi hawyi toipoꞌoro raꞌyn Tosaꞌyru Aiporekuat nuat. Putꞌok e hawyi -Papai e atunug neran yne eꞌe hap ewywuat e. Eꞌe hap koꞌi yne atunug aru e. Eꞌe hap ewywuat hap atunug neran e. Miꞌi hawyi Iesui tunug yne Toꞌywot e hap -Atunug aru toꞌe hawyi tutunug yne. Miꞌi pote karãpe urutoꞌe -Urutunug aru urutoꞌe hawyi urutunug uruꞌe hap ewy. Aikotã Aikaꞌiwat ewy Tupana mikyꞌesat ewy urutunug neran uruꞌe hap ewy. -Taꞌi yt urutunug i aru miꞌi tã urutoꞌe miꞌi pote yt urutunug i uruꞌe hap ewy Tupana Saꞌyru e hap ewy. Miꞌi tã urutunug neran Tupana motypot hamo.
21 Koitywy Tupana ainug Tosaꞌyru ewywuaria ahehay wuat. Tehay moherep hamo wẽtup piit ewy watoineꞌen Haꞌyru wywo. Katupono aito watomohey Aipotypot Iesui. Tupana aimoesaika Tosaꞌyru Paꞌãu wo hawyi Haꞌyru ewy watopyhuꞌat.
22 Aikotã watiwan ahet ahekareꞌen ete ahet -Mesuwat ri uiat e hap. Miꞌi hap ewy wyti watomohey Haꞌyru raꞌyn hawyi Tupana tum Tosaꞌyru Paꞌãu ahepe hawyi Ipaꞌãu set topyhuꞌat ahete. Mio tã e -Tupana watnuat miꞌi miit e hamuat wuatꞌi miitꞌin me hap ewywuat. Yt karãpe i hawyi wẽtup ok watno miꞌi hat topyhuꞌat e hamo hap ewy.
23 Taꞌi yt uheso i are. Tupana tikuap yt heso i rakat uito. -Tupana are etomoherep yt uheso i hap are uiwyriaꞌin Kurintiu piaria pe Tupana are. Saꞌawyꞌi areto aru ehewowi wen maꞌato yt areto i. Eweikuap apo kat pote yt areto i pyno ahenoi ehepe. Aikotã aiꞌywot yt aiꞌapiheg teran i hap ewy ti areineꞌen pykai yt areto i eiꞌapiheg hamo.
24 Kat pote Eikaꞌiwat sese yt uruto i. Miꞌi hawyi areꞌe uiwanetup hawe -Pyno yt kat hamo i areto are. Kat pote poꞌog waku eweikupteꞌen Eikaꞌiwat sese po pe hawyi yt areto i eiꞌapiheg hamo are.
