Typuatꞌi Kurintiu 10:1-18
10 Uito ti eimuꞌe hat sese saꞌawyꞌi wuat. Haꞌawyte Tupana uipoꞌoro ehewowi. Miꞌi turan worohoꞌonapin perupꞌi puo aikotã Aikaꞌiwat Iesui ainapin hap ewy aikyꞌe hap wywo. Saꞌawyꞌi ihakyꞌeꞌi hakyꞌeꞌi rakatno uito areineꞌen eipyꞌasetpe turan poꞌog yi kape. Maꞌato koitywy areineꞌen pya eikai. Miꞌi pote worohoꞌonapin uimiwan me haty wo uiwemotypot wywo.
2 Uimohit kahato iraniaꞌin eipyꞌasetpiaria. -Pauru yt Tupana mipoꞌoro hin i eweiꞌe. Ahekat koꞌi kyewi neꞌi aimuꞌe eweiꞌe. Eheso sese rakaria eipe yt areꞌe teran i miꞌiria pe iꞌatuewa pe. Miꞌi pote miwan me yn areꞌe iꞌatuepe. Eiweꞌeg wo o are. Mio tã eweiꞌe motꞌi pote eheso are aru ehowa pe. Uiwyriaꞌin tawa Kurintiu piaria ahẽtup ehupi uipyꞌa pyi haty wo yt uimohit reiꞌo ehehay wo.
3 Taꞌi eiꞌewywuat rẽ uito ipuꞌi rakat ikag nakat rẽ. Maꞌato uhesaika hap yt tuut i uipiit kaipyi. Tupana Paꞌãu kaipywiat rat neꞌi wyti uhesaika hap toineꞌen. Miꞌi kaipyi neꞌi wyti uhesaika ahiag uuka hamo.
4 Aito imohey haria watoineꞌen aikotã surara koꞌi ewy. Maꞌato aiporyꞌa koꞌi tuweupiat raꞌyn. Yt mesuwarotiat wuꞌuka hap ewywuat i katupono poꞌog poꞌog hesaika iꞌatukai. Miꞌi koꞌi wywo Tupana aipowyro kahato miꞌi koꞌi yt naku i nug hat akit hamo. Aiminug saꞌag koꞌi aikotã wanikaptia ewy topyhuꞌat.
5 -Uito poꞌog iraniaꞌin kai e hat yt tuwanetup kuap kuap i Tupana kape. Miꞌi hawyi Tupana topyhuꞌat yt Tupana wo hin i. Aiwanetup saꞌag hap topyhuꞌat Tupana ete. Maꞌato Tupana aimoesaika miꞌi wanetup saꞌag hap pun hamo. Miꞌi hawyi Aikaꞌiwat Iesui yn toineꞌen aiwanetup hawe Aiporekuat no. Miꞌi hawyi Aikaꞌiwat ehay yn aiwanetup hawe. Iꞌewyte aiwanetup hap aheha wywo Aikaꞌiwat timohãpyk kuap yne.
6 Maꞌato yt watikyꞌesat i aimohãpyk hap pote miꞌi hawyi Aikaꞌiwat Iesui aiꞌapiheg katupono toikuap kahato aiwanetup hap koꞌi. Toikuap kahato eipe Kurintiu piaria sio uimohit hap eiwanetup hap sio yt. Miꞌi pote eiweꞌeg wo o are.
7 Tukupteꞌen aipyꞌasetpe -Uruto Aikaꞌiwat Iesui emiit sese e haria. Miꞌiria pe urutoꞌe -Eipe Iesui emiit sese pote miꞌi pote eweikuap meremo uruto eiꞌewywuaria te hap. Eiwehaꞌat ro urueko kape miꞌi hawyi eweikuap uruto Aikaꞌiwat eropat haria sio sese hap.
8 Haꞌawyte Tupana uruꞌairo uruepiat eimuꞌe hamo iꞌewyte eiꞌapykok hamo. Yt aremoti hin i Tupana piat uiꞌairo hap ete are aat kaꞌap. Maꞌato tukupteꞌen eipyꞌasetpe yt ikyꞌesat i areꞌe -Tupana uruꞌairo eiꞌapykok hamo are hap. Maꞌato Tupana tiꞌairo uruto. Toikuap eikyꞌe hap yn uruto hap. Yt kat i eimaꞌat hap urukai hap toikuap. Toikuap Tupana ehay etiat eimotag hap eimuꞌe tehay etiat hap. Miꞌi pote uruꞌairo uruepiat eiꞌapykok hamo.
9 Uiwyriaꞌin yt eweikenꞌẽ uipupiat hamuat i pote mesuwat miwan atipoꞌoro. Yt atipoꞌoro mesuwat miwan maꞌato ehewowi miitꞌin mohit hamuat neꞌi.
10 Iraniaꞌin eipyꞌasetpe yt uikyꞌe i haria -Pywo ti rat Pauru aiꞌapiheg kahato tomiwan me iꞌatuꞌe. Eweikuap kat pote iꞌatuꞌe. Tokenꞌẽ kahato aipyꞌasetpe toꞌe ahepiat hamo iꞌatuꞌe. Yt ipoityꞌi hin i iꞌewyte yt ihay se hin i aimuꞌe turan iꞌatuꞌe.
11 Eiweꞌeg wo o uwe uwe eipyꞌasetpiat toꞌe mio tã e urumohit haria. Urutoꞌe kuap ehowa pe aikotã urumiwan me hap ewy. Eiwatetup miꞌi hap kape katupono uruiꞌapiheg kuap.
12 Tukupteꞌen eipyꞌasetpe -Aito poꞌog iraniaꞌin kai iꞌatuꞌe toꞌope haria. Maꞌato uruto yt iꞌatuꞌewywuat hin i koꞌi urutoꞌe. -Uruto poꞌog eikai iꞌatuꞌe teꞌeruwanetup ahepiat pe. Miꞌi tã wanetup haria yt iꞌatuweꞌeg hin i katupono toꞌope toꞌoꞌakasa hap kaipyi teꞌeroꞌe -Uito poꞌog iꞌatuꞌe teꞌeruwanetup hawe. Yt iꞌatuweꞌeg hin i katupono yt teꞌeruwanetup hin i sio iꞌatuewaku hap putꞌok e sio yt Aikaꞌiwat ewaku hap oktan hap kape.
Wakuat Kahato Topyhuꞌat Pauru Mienoi Hap Kaipyi
13 Uruto eiꞌapykok haria pykai yt karãpe i urutoꞌe uruwanetup hawe -Uruto poꞌog eikai yt urutoꞌe i iraniaꞌin eipyꞌasetpiaria -Uruto poꞌog e haria ewy. Tupana uruꞌairo eheropat haria ewy yn. Yne uruewaku hap koꞌi uruepiat sepap hap koꞌi yt kat i tuwẽtem uruwekaipyi neꞌi.
14 Saꞌawyꞌi Tupana urupoꞌoro ehewowi. Tomipoꞌoro Tosaꞌyru Aiporekuat nuat ehay wakuat moherep hamo. Miꞌi hawyi urutoꞌe ehewowi iꞌe hap ewy. Yt uruiwaure hin i eipe pykai urutuwat wẽtup ywania kape.
15 Aikope aikope Tupana urupoꞌoro miꞌi hap kape yn urutuwat. Yt karãpe i uruipohari iraniaꞌin potmuꞌe neꞌi urupotmuꞌe wo. Iraniaꞌin teꞌeroꞌe ehepe -Eipe uruimuꞌe Pauruꞌin eꞌyian mete iꞌatuꞌe ehepe urupohari teran haype. -Eheso eweiꞌe o miꞌiria pe. Ehehãite sese Iesui mohey hap ete hawyi -Pauruꞌin uruꞌapykok haria eweiꞌe. Mio tã eweiꞌe hawyi uruto yt kat hamo i raꞌyn urutoꞌe i. Miꞌi hawyi wẽtup ywania kape urutuwat yt ikuap i te haria kape.
16 Uiwyriaꞌin tawa Kurintiu piaria iꞌatu kahato te iraniaꞌin ywania yt taꞌatukuap i te Iesui etiaria. Miꞌiria tukupteꞌen eheꞌyi ehetawa ekuekai poꞌog poꞌog pya wẽtup hy ete. Miꞌi pote urutuwat teran yt taꞌatukuap i te sehay wakuat Iesui etiat haria kape. Aikope yt uwe i te toto hap kape. Miꞌi kape watuwat pote yt uwe i itote teꞌeroꞌe ahepe -Kat pote urumimuꞌeria eweipohari teran neꞌi yt iꞌatuꞌe kuap i ahepe watuwat yt ikuap i te haria kape hawyi.
17 Aikotã Tupana toꞌe miwan me hap ewy. -Karãpe worohoꞌopowyro kahato wakuat nug hap ete miꞌi hawyi yt naku i eweiꞌe -Uito atunug uhesaika hap wywo uipo wo uito poꞌog kahato pote yt naku i mio tã eweiꞌe neꞌi e. Poꞌog waku eweiꞌe -Tupana esaika hap wywo atunug waku eweiꞌe e miwan me.
18 Yt naku i watoꞌe -Uito poꞌog Tupana eropat hat sese paĩ yt naku i watoꞌe. Poꞌog waku wahekatup Tupana kaipyi -En uheropat hat sese e hap. Miꞌi hap eꞌat pe yne ikuap Tupana wẽ kaipyi Tupana emiit sese hap. Miꞌi hap eꞌat pe imimotypot no watoineꞌen are uito eimuꞌe hat Pauru.
