Typuatꞌi Kurintiu 11:1-33
11 Pyno worohoꞌokyry teran kurin miꞌi pote eweiwanetup to aikotã yt uiweꞌeg i hap kape hesoꞌok takat ewy.
2 Uiwyriaꞌin tawa Kurintiu piaria areineꞌen eiꞌywot ewy. Eipe eweikupteꞌen uhakiꞌyt ewy yt karãpiat heꞌaito i te rakat ewy. Aikaꞌiwat Iesui toineꞌen aikotã uhakiꞌyt ehaytuwy ewy. Miꞌi pote uhehayꞌywyi kahato ehete. Yt atikyꞌesat i iraniaꞌin neꞌi eꞌaito wo. Atikyꞌesat Iesui yn eꞌaito wo. Taꞌi uhehayꞌywyi kahato ehete aikotã Tupana ihayꞌywyi hap ewy aikotã eꞌywot ewy areineꞌen uhakiꞌyt are.
3 Saꞌawyꞌi sese ahiag timaꞌat mana Ewa moiꞌok wẽ pyi. Tehay wo totekyi Tupana kaipyi. Miꞌi hap ewy hap pupi arekenꞌẽ kahato. Arekenꞌẽ kahato ahiag tihep eipe Aikaꞌiwat Iesui po pyi hap pupi. Aikaꞌiwat Iesui mohey hap yn ahehakyeraꞌat kuap. Miꞌi pote wẽtup mohey hap yn toineꞌen Tupana kape.
4 Uimogyt kahato eipe katupono eweimohey yne miitꞌin mienoi koꞌi. Putꞌok e wẽtup ok itote hawyi wẽtup Iesui etiat eimuꞌe yt uruepiat eimuꞌe hap ewy hin i. Miꞌi hawyi -Pywo eweiꞌe kahato. Eꞌe hap ewy eweiꞌe tope. Miꞌi hawyi putꞌok e wẽtup i raꞌyn hawyi toꞌe ehepe -Atum neran wẽtup paꞌãu ehepe. Miꞌi hawyi -Waku mehin waku mimi eweiꞌe tope yt eiweꞌeg hin i. Miꞌi hawyi putꞌok e wẽtup ok wẽtup ehay enoi hat yt Aikaꞌiwat Iesui wakuat ewy hin i. Miꞌi hawyi -Pywo eweiꞌe miꞌi pote uimogyt sese eipe katupono -Pywo eweiꞌe yne eimuꞌe haria pe. Miꞌi pote eiweꞌeg wo o are ehepe.
5 -Tupana mipoꞌoro sese uruto iꞌatuꞌe ehepe eimuꞌe hamo. Urupoꞌoro uruto poꞌog Tupana mipoꞌoro Pauru kai iꞌatuꞌe. Iꞌatueso kahato neꞌi katupono areineꞌen Iesui miꞌairo sese ipotpoꞌororia 12 ok takaria ewywuat areineꞌen are.
6 -Pauru ehay yt ikahu hin i iꞌatuꞌe. Maꞌato miꞌiria pe Pywo are uhehay yt ikahu i eiwat ewy maꞌato uhehay hesaika kahato einapin Tupana weꞌeg hap etiat hamo. Yne apo eiꞌe hap atiwesat kuap yne. Miꞌi hap uiweꞌeg hap Tupana kaipyi eweikuap kahato raꞌyn.
7 Haꞌawytepyi te mesup te worohoꞌomuꞌe eipe sehay wakuat Iesui etiat. Yt wẽtup mo i worohoꞌomuꞌe haꞌup ete. Miꞌi hawyi -Pauru piat aimuꞌe hap yt kat hamo i atum haꞌup kat pote yt ihay se i pote eweiꞌe. Taꞌi uimohit kahato uhegyiꞌat hap ete. Yt kat hamo i aremohit eipyꞌasetpe. Poꞌog waku haꞌup ete aru worohoꞌomuꞌe miꞌi hawyi uimotypot haria wo eweikupteꞌen.
8 Haꞌawyte worohoꞌomuꞌe aat kaꞌap yt kat saꞌup ete i maꞌato eweikuap uwe tum eimuꞌe hap saꞌup. Pyno ahenoi ehepe. Iraniaꞌin Iesui mohey haria aikope aikope teꞌeruwaꞌatunug hap kaipyi miꞌiria tipoꞌoro uhowowi eimuꞌe hamuat saꞌup. Areineꞌen seroꞌok e hat ewy katupono iꞌatuwat iꞌatusaꞌup kaipyi areineꞌen eipyꞌasetpe. Yt kat i ewetum uhepe.
9 Yt karãpe i areineꞌen neran ahẽtup hẽtup kat koꞌi kat koꞌi eikaipyi teran. Saꞌawyꞌi areineꞌen eipyꞌasetpe turan uiwekaipyi arenuk. Miꞌi hawyi uhesyꞌat eipyꞌasetpiat areineꞌen turan tõꞌẽ kahato imohey haria yi Masetunia piaria uhowowi kat koꞌi kat koꞌi taꞌatumiium koꞌi erut hamo. Miꞌi kaipyi areineꞌen eipyꞌasetpe yt kat i ahẽtup ehepe. Iꞌewyte yt ahẽtup i aru ehepe.
10 Uiwanetup hawe -Waku kahato atiꞌatumuꞌe yt kat saꞌup ete i. Miꞌi pote yt kat i ahẽtup uimimuꞌeria koꞌi kaipyi. Yt areineꞌen i eiꞌokpe tote yi Asia pe areineꞌen eipyꞌasetpe turan. Yt uheso hin i karãpe areꞌe yt kat saꞌup ete i worohoꞌomuꞌe are ehepe. Iꞌewyte Aikaꞌiwat Iesui tikuap yt uheso i hap kat pote toineꞌen uipyꞌa pe.
11 Miꞌi hawyi iraniaꞌin teꞌeroꞌe eipyꞌasetpe toꞌope uruetiat. -Pauru yt aikyꞌe i miꞌi pote yt toikyꞌesat aikaipyi kat koꞌi kat koꞌi. Pywo ti rat Tupana tikuap worohoꞌokyꞌe kahato uhepiat hap.
12 Eweikuap kat pote yt ahẽtup i eikai eimuꞌe hap saꞌup. Pyno ahenoi ehepe. Tukupteꞌen eipyꞌasetpe -Eimuꞌe haria Pauru ewy kahato iꞌatuꞌe ehepe maꞌato yt pywo pe i katupono ehekat koꞌi kyewi yn eimuꞌe. Waku apo eweiꞌe iꞌatuepe -Eipe Pauru ewy eweiꞌe pykai kat pote ewehẽtup haꞌup urukaipyi eweiꞌe o iꞌatuepe. Miꞌi hawyi yt eiwesat kuap i kat pote yt uiꞌewy i pote. Miꞌi pote yt karãpe i ahẽtup eikaipyi haꞌup. Yt urusaipepiaria hin i miꞌiria.
13 -Pyno Tupana mipoꞌororia sese uruto iꞌatuꞌe ehepe maꞌato yt pywo pe i iꞌatuꞌe ehepe miꞌi tã maꞌato eimaꞌat reran haype. Taꞌi teꞌeruwepoꞌoro eiꞌakag wo teꞌeroꞌe hamo -Taꞌi 12 ok takaria ewywuat koꞌi uruto iꞌatuꞌe. Aikaꞌiwat Iesui potmuꞌeria koꞌi uruto iꞌatuꞌe eimaꞌat reran haype. Iesui urupoꞌoro ehewowi iꞌatuꞌe ehepe yt pywo pe i iꞌatueso neꞌi.
14 Nimo pyi te ahiag timaꞌat kuap miitꞌin. Tuwemoherep miitꞌin me hẽtyhot hap ewy -Uito Tupana mipoꞌoro tehay moherep ehepiat hamuat e yt pywo pe i. Iꞌewyte ahiag emiit koꞌi aikotã taꞌatukaꞌiwat ewy tukupteꞌen eipyꞌasetpe uiꞌe hap ewy.
15 Ahiag mepytꞌin koꞌi aikotã taꞌatuꞌywot ewy tukupteꞌen. Aimaꞌat kuap toꞌywot ewy. Iꞌatuwẽ pyi -Uruto waku nug haria kahato iꞌatuꞌe. Maꞌato iꞌatuminug yt iꞌatuehay ewy hin i tuwẽtem. Miꞌi pote meremo yt watikuap i sio aimaꞌat sio yt hap maꞌato meiũran watikuap. Iꞌatuꞌapiheg hap eꞌat pe Tupana timoherep wuatꞌi ehamo iꞌatuminug saꞌag koꞌi. Miꞌi hap eꞌat pe iꞌatuꞌapiheg hap putꞌok e iꞌatuminug saꞌag hap oktan.
16 -Pauru ti yt iweꞌeg i sese rakat iꞌatuꞌe. Uruto poꞌog iꞌatuꞌe. Are paĩ yt karãpe i areꞌe -Uito poꞌog are. Maꞌato areꞌe teran pote areꞌe kuap. Pyno ipoityꞌi ete aremowato kuap areꞌe teran iraniaꞌin ewy pote maꞌato ahenoi hawyi yt uiweꞌeg hin i hat ewy areineꞌen. Maꞌato iꞌewyte areꞌe hawyi waure wo o eweikupteꞌen uiꞌe hap ete yt iweꞌeg i rakat areineꞌen pote.
17 Karãpe ahenoi uiminug wakuat ete yt uiweꞌeg hin i katupono Tupana yt tikyꞌesat i watuwemotypot hap.
18 Maꞌato eipyꞌasetpiaria eimuꞌe haria teꞌeruwemotypot yn taꞌatuehay wywo -Uruto poꞌog torannia kawiat Tupana mipoꞌoro koꞌi iꞌatuꞌe. Yt pywo hin i are -Uito poꞌog eikai. Yt uiweꞌeg hin i mio tã are. Maꞌato iꞌatuꞌe hap ewy areꞌe yt iweꞌeg i rakat ewy.
19 Uiwyriaꞌin Kurintiu piaria -Aito poꞌog aiweꞌeg kahato torannia kai eweiꞌe eiwoꞌope. Mio tã eweiꞌe kat pote eweikyꞌesat eimaꞌat reran haria yt iꞌatuweꞌeg i rakaria. Yt eiweꞌeg hin i miꞌi tã ewetunug mote.
20 -Eipotpap to uruemiitno yt kat saꞌup ete i iꞌatuꞌe ehepe haty wo. Miꞌi hawyi -Urutunug eiꞌe hap ewy mehinꞌin mimiꞌin eweiꞌe eimaꞌat haria pe. Yt eiweꞌeg hin i katupono ehekat koꞌi yne taꞌatusat. Ihakyꞌeꞌi rakaria wo eweikupteꞌen eimuꞌe hap saꞌup mo ewetum yne hawyi. -Uruto poꞌog eikai iꞌatuꞌe hawyi -Pywo eweiꞌe ehowa petek turan eimohit hamo. Miꞌi taꞌatunug yne ehete pykai eipe -Uruꞌapykok haria akag eweiꞌe. Urumuꞌe haria sese eipe eweiꞌe iꞌatuepe yt eiweꞌeg hin i.
21 Uito yt miꞌi tã hin i areineꞌen eipyꞌasetpe turan. Eimotypot hat areineꞌen. Worohoꞌomoꞌẽ aikotã eiwy sese ewy. Miꞌi pykai uimohit uhehay ete. Yt karãpe i atunug kuap iꞌatuminug ehetiat ewy. Uhesaika hap yt putꞌok e i miꞌi saꞌag nug hamo. Yt teꞌerokenꞌẽ hin i teꞌeruwemotypot hamo. Pyno ahãꞌãg iꞌewyte uhewaku hap moherep hamo.
22 -Uruto poꞌog iꞌatuꞌe. Uruikuap Iuteuria pusu iꞌatuehay potꞌi iꞌatuꞌe. Uito poꞌog atikuap kat pote uipusu sese pote. -Aseꞌi Isareu emiariruꞌin sese uruto iꞌatuꞌe. Uito iꞌewyte Isareu ywania te wy are. Urueꞌaseꞌi saꞌawyꞌi wuat eimiariru sese koꞌi uruto iꞌatuꞌe. Iꞌewyte uito Aparãu saipepiat sese wy are.
23 -Uruto Aikaꞌiwat Iesui eropat haria sese iꞌatuꞌe. Maꞌato uito poꞌog iꞌatukai are. Mio tã pote yt iweꞌeg i rakat miꞌiria wemowato haria ewywuat areineꞌen. Yt uiweꞌeg hin i maꞌato pywo pe areꞌe poꞌog Aikaꞌiwat emiit areineꞌen iꞌatukai. Uito poꞌog iꞌatukai uipotpap. Yt uwe i uhete putꞌok e Aikaꞌiwat potpap nug hap ete. Yt uiweꞌeg hin i mio tã are maꞌato pywo pe areꞌe. Morekuaria uipyhyp poꞌog miꞌiria kai uhehay Iesui etiat pyhyp teran haype. Yt atikuap karania wo uiꞌahyk ahyk itote yt taꞌatukyꞌesat uhehay Iesui etiat pote. Uiꞌatoiat uikuꞌuro turan karania wo.
24 Saꞌawyꞌi areto Tupana ehay moherep hap upi turan uito uiꞌahyk ahyk kahato Iuteuria yt mohey i haria 5 wo uiꞌahyk ahyk. Pywo ti rat 39 wo uiꞌape ete woꞌoꞌahyk hap 9 haity saꞌag kahato rakatno uikuꞌuro hap kape. Miꞌi hap ewy 5 tawa pe Iuteuria tunug uhete.
25 Haty kahato uhete uiꞌahyk ahyk hap wiaꞌyp mo. Myẽꞌym mo Humanuꞌin tunug uhete hawyi uiꞌatoiat. Wẽtup eꞌat pe uimak mak nu koꞌi wo uiꞌauka hamo. Uhewyry yꞌy wato totiat yara wato puat turan myẽꞌym wo yara wato uito hap ywytu uato tiꞌapymin nu ete pikꞌe yne. Miꞌi hawyi yꞌy wato pe areineꞌen wẽtup ewãtym iꞌewyte wẽtup eꞌat yꞌy wato ihy pya kahato rakat pe.
26 Uhero kahato uhewyry kahato Tupana ehay moherep hamuat pote. Ahoꞌopot kahato muap upi yꞌy upi ihy esaika kahato pote. Seroꞌok e haria uiꞌauka teran yne uhewyry hap upi Aikaꞌiwat ehay moherep hamuat turan. Iꞌewyte uiꞌauka teran Iuteuria. Iꞌewyte iraniaꞌin ywania uiꞌauka teran. Tawa wato piaria uikat uiꞌauka hamo. Niatpo kahato uhewyry hap atipuẽti. Arekenꞌẽ kahato areto gaꞌapy koro kapiat turan sio uikuꞌuro sio yt. Yꞌy wato uipoharaꞌi kahato areto sakpo turan. Muap upi teꞌeroꞌe uhepe -Uruto Iesui mohey haria iꞌatuꞌe maꞌato yt pywo pe i uimaꞌat reran uiꞌauka hamo neꞌi.
27 Uhero kahato uhewyry kahato pote uhatyꞌi kahato. Karania ewãtym neꞌi yt areket kuap i kat pote arekenꞌẽ kahato sio uiket kai uiꞌauka. Iꞌewyte uhesyꞌat kahato areineꞌen yt kat i miꞌu pote. Areꞌyꞌutui kahato maꞌato yt kat i yꞌy areto yahig wato ekuekai turan. Karania eꞌat yt kat i atuꞌu. Uhenaꞌak kahato wywo uhewyry yt kat i uheꞌog yt kat i uhesokpe koꞌi uimosakup hamo.
28 Pywo ti rat ahoꞌopot kahato Iesui ehay sytpok hamuat hap upi. Uiꞌakagꞌaia kahato uhewyry hap upi. Arewanetup kahato iraniaꞌin imohey haria iraniaꞌin tawa piaria kape sio taꞌatumohey te sio yt hap kape sio tuꞌuka toꞌope sio yt sio iꞌatuehãite sio yt hap koꞌi kape yn arewanetup. Uhehatꞌat iꞌatukyꞌewi. Yne eꞌat yne iꞌatuꞌapykok hatno areineꞌen uiwanetup hawe uipyꞌa pe. Atikyꞌesat iꞌatuehay Iesui mohey hap ete yn uiwanetup hap.
29 Karãpe wẽtup ok Iesui mohey hat iꞌaparap miꞌi hawyi ahatyꞌu kahato uhete haty kahato. Areto teran ipowyro heraꞌaipok Tupana kapiat hamo. Karãpe wẽtup ok Iesui mohey hat totiat iraniaꞌin towyriaꞌin imohey haria wẽtup ok iꞌatupyꞌasetpiat ihay saꞌag tuete pote miꞌi hawyi areto teran meremo woꞌowese hap nug yt iwese rakat i wywuat hamo.
30 Taꞌi -Uruto poꞌog Pauru kai iꞌatuꞌe eimuꞌe haria. Miꞌiria yt atiꞌatuwesat teran i wen maꞌato atiꞌatuwesat. Wuatꞌi ete poꞌog areineꞌen iꞌatukai maꞌato uhehay yt iweꞌeg i rakat ewy. Yt karãpe i ahenoi teran uhewaku hap miꞌiria ewy. Poꞌog waku ahenoi miitꞌin me aikotã uhewaku hap yt putꞌok e hin i Aikaꞌiwat Iesui ewaku hap ete. Miꞌi hap poꞌog waku ahenoi miitꞌin me. Waku yt hesoꞌok takat ewy i uhehay uito are.
31 -Tupana waku kahato En. Wuatꞌi eꞌat pe etikuap aikotã ahoꞌopot Esaꞌyru ehay moherep hamuat. Etikuap yt uheso i mesuwat uimiwan me hap. Esaꞌyru Aikaꞌiwat iꞌewyte ikuap yt uheso i hap.
32 Yt uheso i saꞌawyꞌi areineꞌen tawa Tamaku pe turan. Toineꞌen itote morekuat Areta. Miꞌi ti ipoꞌoro tesuraraꞌin uiꞌapiheg hamo. Miꞌi hawyi suraraꞌin tipyhyp yne tawa wato pyhyp hap yi pype koꞌi uipyhyp hamo. Miꞌi hawyi tawa ewato iheg me toineꞌen. Yt arẽtem kuap i.
33 Miꞌi turan areꞌe -Uiꞌauka aru are. Maꞌato uiwyriaꞌin uhehakyeraꞌat. Eraꞌapyk meiũwat yrysakag wato pe iꞌatuꞌe. Miꞌi hawyi ywaiti pyi uimoꞌapyk tawa wato pyhyp hap ekuekai haity ete yi kape. Getap hit ywaiti piat kaipyi okenꞌypy hit kaipyi yi kape. Miꞌi hawyi morekuat Areta esuraraꞌin yt uipuẽti hin i. Yt uheso i rat. Tupana tikuap yt uheso i hap. Miꞌi hap kaipyi eweikuap yt uito eimuꞌe haria ewy i hap uito ti Pauru.
