Typuatꞌi Kurintiu 12:1-21
12 Uiwyriaꞌin tawa Kurintiu piaria uiminug wakuat koꞌi yt atimoherep teran i ehepe maꞌato iraniaꞌin miꞌi tã yn taꞌatunug. Miꞌi hawyi yt ahenoi uhepiat waku nug hap pote yt uimotypot hin i. Pyno ahenoi uhepiat waku nug hap pote yt uiweꞌeg hin i. Eimaꞌat haria eimuꞌe haria -Uruto poꞌog wuatꞌi kai iꞌatuꞌe katupono Tupana ehay kahato uruepe urumuꞌetu iꞌatuꞌe. Maꞌato uito poꞌog are. Yt uiweꞌeg hin i mio tã areꞌe maꞌato uheha wo araꞌakasa kahato Aikaꞌiwat.
2 Saꞌawyꞌi 14 anu eꞌyian mete uheha wo araꞌakasa aikope Tupana toineꞌen hap kape. Wẽtup eꞌat pe uhehay Tupana wywo mesuwe. Miꞌi turan putꞌok e kahato Aikaꞌiwat Paꞌãu uhete. Miꞌi hawyi uhereto atipy kape waikiru ekuekai. Yt atikuap i sio uipiit wywo uhereto sio uipaꞌãu yn maꞌato uherokosap atipy kape. Atikuap kahato mesuwat uiꞌe hap pywo kahato kat pote araꞌakasa pote uheha wywo.
3 Pyno areꞌe i raꞌyn yt atikuap sio uipiit wywo areto atipy kape sio yt. Miꞌi hap Tupana yn ikuap.
4 Saꞌawyꞌi areto ywyhig ekuekai. Miꞌi hawyi waikiru sakpo Tupana Paꞌãu uherokosap Tupana eiam sese kape. Ikahu kahato itote aikotã Tupana mikoi gaꞌapy ewy itote. Atikuap sehay yt miitꞌin mikuap oktan i sehay ikahu kahato. -Pyno ahenoi aru mesuwat sehay ikahu rakat miitꞌin yi totiaria pe are Tupana pe maꞌato uiwesat -Iꞌatupusu yt putꞌok e i ikahu hap moherep hamo e uhepe.
5 Pyno araꞌakasa yt uwe i te akasa hap kape. Miꞌi hawyi uito poꞌog atikuap torannia kai wen maꞌato -Uito poꞌog yt areꞌe i. Poꞌog waku areꞌe -Uhewaku hap yt putꞌok e hin i Uikaꞌiwat ewaku hap ete. Yt karãpe i uhewaku hap putꞌok e Uikaꞌiwat ewaku hap ete paĩ. Maꞌato uhewaku hap uimoti rẽ uiwanetup hawe.
6 Yt naku i areꞌe -Uito Iesui mohey poꞌog torannia kawiat are. Pywo kahato uito areꞌe kuap maꞌato yt kat hamo i areꞌe mio tã are. Areꞌe mio tã pote yt uiweꞌeg hin i. Miꞌi pote karãpe areꞌe teran tuereto hawyi arewanetup hawyi yt naku i arewanetup. Yt uiweꞌeg hin i areꞌe mio tã pote uiwanetup hawe. Yt naku i kahato miitꞌin uinug Tupana are uiwepe. Uhewaku hap waku miitꞌin teꞌeruwanetup uhowowi uito taꞌatuꞌewywuat rẽ hap are uiwepe. Waku uikuap aikotã uhewaku hap oktan maꞌato yt naku i uinug poꞌog.
Iꞌahuu Hap Toineꞌen Pauru Piit Ete
7 Uhewaku hap kai araꞌakasa Tupana ieineꞌen hap hawyi Tupana toꞌe uhepe -Pyno eraꞌakasa yne raꞌyn mio mehin e. Areineꞌen kahato erenug poꞌog ewato hap kai tet pupi e uhepe. Arekenꞌẽ ereꞌe aru -Uito poꞌog iraniaꞌin kai kat pote araꞌakasa raꞌyn atipy sese uito ereꞌe aru eꞌe hap pupi e. Miꞌi pote woromowatetup woromohit iraniaꞌin pyꞌasetpe. Atum aru epe epoharaꞌi hap aikotã eꞌahuu hap ewy haty kahato miꞌi e Tupana uhepe. Miꞌi hawyi Tupana e hap ewy putꞌok e uhete ahiag kaipyi uiꞌahuu hap uiwemowato hap monik hamuat.
8 Miꞌi hawyi satꞌe iꞌe hap uhete haty are. -Tupana haty kahato are. Etihep to uipiit pyi uimosoꞌopot hap are. Maꞌato -Yt e Tupana uhepe. Miꞌi hawyi tokosap motꞌi hawyi ahẽtup i maꞌato yt e te wy hawyi tokosap mio tã ne hawyi ahẽtup i maꞌato yt e te wy.
9 Miꞌi hawyi toꞌe Tupana uhepe -Yt karãpe i atihep epiit piat eꞌahuu hap e. Yt karãpe i epiit hesaika i raꞌyn maꞌato miꞌi pykai waku ereineꞌen. Maꞌato miꞌi pykai yt karãpe i woroꞌatoiat en. Yt karãpe i yt worokyꞌe i raꞌyn e. Karãpe iraniaꞌin teꞌeraꞌakasa esaika hap kapiat hawyi teꞌeroꞌe -Yt topiit kaipyi i Pauru hesaika hap iꞌatuꞌe maꞌato Tupana imoesaika. Miꞌi pote epiit yt hesaika i hap kaipyi uimotypot sese hap topyhuꞌat e Tupana uhepe.
10 -Pyno atikyꞌesat eꞌe hap Tupana are. Atikyꞌe emikyꞌesat ewy. Waku kahato uipiit perup hap sio emotypot hap topyhuꞌat miꞌi kaipyi. Taꞌi waku Tupana uhesaika hap yt tuut i uipiit kaipyi. Miꞌi pote yt aremohey kuap i uipiit esaika hap ete. Miꞌi hawyi aru poꞌog hesaika saꞌawyꞌi wuat kai rakatno areineꞌen katupono Esaꞌyru emipoꞌoro uruporekuat nuat yn uimoesaika tesaika sese hap wywo. Poꞌog poꞌog uhesaika saꞌawyꞌi wuat kai are Tupana pe. Miꞌi hawyi koitywy uipiit yt uhesaika i hap uimowepiit kahato kat pote miꞌi pykai poꞌog uhesaika saꞌawyꞌi wuat kai. Yt uipiit kaipyi i uhesaika hap maꞌato Aikaꞌiwat esaika hap kaipyi uhesaika. Karãpe putꞌok e miitꞌin miat uimohit hap iꞌewyte uhatek hap putꞌok e turan poꞌog uimowepiit hap atipuẽti. Karãpe yt imohey i haria uhatyꞌi hatyꞌi iꞌewyte karãpe yt kat i ikahu uhete Iesui mohey hatno areineꞌen mote iꞌewyte miꞌi hap eꞌat pe uiwesaika kahato te yt uhesaika hin i pykai katupono uimoesaika kahato miꞌi hap eꞌat pe Aikaꞌiwat Iesui tesaika hap wywo. Miꞌi pote uiwepiit kahato.
11 Uiwyriaꞌin tawa Kurintiu piaria yt uimotypot hin i Tupana mikyꞌesat ewy kat pote saꞌawyꞌi Tupana uiꞌairo tehay wakuat moherep ehepiat hamo. Iesui potpoꞌororia 12 ok takaria ewywuat sese areineꞌen. Miꞌiria wakuat sese ewywuat areineꞌen Iesui potpoꞌoro wo. Uito wakuat miꞌiria ewywuat are. Yt uiweꞌeg hin i areꞌe mio tã are maꞌato uimohit pote mio tã are.
12 Saꞌawyꞌi areineꞌen eipyꞌasetpiat turan Tupana timoherep kahato uipiit pyi tesaika hap. Toikyꞌesat kahato eipe eweikuap uito imipoꞌoro sese hap tehay sese moherep hamuat. Miꞌi pote tutunug kahato uipiit pyi yt miitꞌin mikuap koꞌi e. Ehehamo toimoherep kahato kat koꞌi kat koꞌi sepap Tupana yn inug kuap hap koꞌi miitꞌin mowanetup kahato hamo waku nug hap koꞌi ete. Miꞌi koꞌi kapiat eweiꞌakasa hawyi eweiꞌe -Pauru ti Tupana mipoꞌoro ahowawiat aimuꞌe tehay wakuat etiat hamo eweiꞌe eiwoꞌope. Karãpe eweiꞌakasa yt uhesaika hap kape i hawyi eweiꞌe uhepiat pe -Pywo ti rat Pauru Tupana mipoꞌoro sese katupono toimoherep Pauru piit pyi yt hesaika i pykai eweiꞌe.
13 Uiwyriaꞌin tawa Kurintiu piaria worohoꞌokyꞌe kahato eipe aikotã atiꞌatukyꞌe iraniaꞌin Iesui mohey haria aikope aikope gupteꞌen haria hap ewy worohoꞌopowyro eipe. Yt uwe i poꞌog eiwoꞌoꞌewy ewy. Maꞌato iraniaꞌin tum ehepe taꞌatumiium koꞌi. Saꞌawyꞌi ewetum kat koꞌi kat koꞌi maꞌato waĩꞌare neꞌi. Yt areineꞌen neran i eiꞌokpe tote. Uhekat kaipyi arenuk hawyi eimopyꞌahak hatno areineꞌen. Pyno yt uiwepyi i waure wo o eweikupteꞌen uhepiat eimopyꞌahak hap kai.
Pauru Toto Teran Iꞌatuewowi
14 Pyno areto i raꞌyn ehewowi ehepiok hamo. Saꞌawyꞌi areto typua raꞌyn koran wuat areto hawyi myẽꞌym mo raꞌyn areto. Maꞌato putꞌok are eipyꞌasetpe turan yt atikyꞌesat i areineꞌen eiꞌokpe tote. Arenuk uhekat kaipyi aikotã saꞌawyꞌi areꞌe hap ewy. Eweikuap kat pote pyno ahenoi. Yt atikyꞌesat hin i ehekareꞌen koꞌi. Maꞌato worohoꞌokyꞌesat eipe aikotã uhaꞌyruꞌin uhakiꞌytꞌin hap ewy. Aikotã yt naku i wahẽtup ahaꞌyruꞌin ahakiꞌytꞌin me miꞌi kareꞌen koꞌi. Miꞌi hap ewy yt ahẽtup i ehepe. Waku poꞌog eiꞌywotꞌin iꞌewyte tutum kareꞌen koꞌi hap ewy.
15 Worohoꞌokyꞌe kahato eipe aikotã uhaꞌyruꞌin uhakiꞌytꞌin sese ewy worohoꞌokyꞌe. Aikotã eiꞌywot ewy areineꞌen paĩ are. Taꞌi uimiꞌat uiko kaipyi uimiereko kaipyi worohoꞌopoi hap ewy atunug itote. Taꞌi areineꞌen eipyꞌasetpe eimuꞌe Iesui etiat haype yt kat saꞌup i ete worohoꞌomuꞌe katupono eiꞌywot ewy areineꞌen. Uipoi ro yt areꞌe hin i katupono aikotã aiꞌywotꞌin yt karãpe i -Eweium no saꞌup uhepe hawyi worohoꞌopoi yt iꞌatuꞌe i. Uito ti ety ewy pote atiꞌatumoma yne uhekat ehepe eipowyro hamo worohoꞌokyꞌe kahato haype. Maꞌato miꞌi pykai yt uikyꞌe hin i eipe. Poꞌog poꞌog neꞌi yi kape uikyꞌe hap worokyꞌe poꞌog poꞌog pykai are. Maꞌato miꞌi pykai poꞌog poꞌog atum aru ehepe uimepytꞌin eipe pote.
16 Yt areineꞌen neran hin i eiꞌokpe tote iꞌewyte yt areineꞌen neran i ehekareꞌen kaipyi neꞌi. Iraniaꞌin eipyꞌasetpiaria teꞌeroꞌe uhepiat -Pauru yt sẽtup sẽtup e hat hin i iꞌatuꞌe. Maꞌato eiweꞌeg wo o katupono eimaꞌat kuap kahato. Towese hap wywo wyti einug teropat haria wo hawyi ehekat yne totat towatno iꞌatuꞌe ehepe uhewanikaptia.
17 Mio tã iꞌatuꞌe iꞌatueso kahato neꞌi uhepiat pe. Karania wo uhemiit atipoꞌoro ehewowi yt wẽtup mo i eimaꞌat ehekareꞌen kyewi are. Mio tã e haria pe yt karãpe i atipoꞌoro wẽtup ok uhemiit ehekareꞌen ẽtup hamo.
18 Saꞌawyꞌi atipoꞌoro mehin Titu ehewowi wẽtup ok imohey hat wywo. Miꞌi hawyi tuwat raꞌyn eikyꞌe haype. Yt karãpe i mehin Titu ehekat toikyꞌesat. Katupono mehin Titu hawyi uito urutukupteꞌen wẽtup miit ewy yn urutukupteꞌen wẽtup wanetup hap yn uruto. Uito worohoꞌokyꞌe iꞌewyte mehin Titu eikyꞌe aikotã worohoꞌokyꞌe hap ewy te eikyꞌe. Uhaipepiat sese miꞌi. Uheko ewy te iꞌewyte miꞌi yt karãpe i eimaꞌat.
19 Yt karãpe i eipyꞌasetpe urutukupteꞌen turan paa urutoꞌe -Watiꞌatumaꞌat miꞌiria yt urutoꞌe i. Yt urueso i rat iꞌewyte Tupana tikuap yt urueso i hap. Iꞌewyte Aikaꞌiwat Iesui tikuap yt urueso i hap. Katupono yne uruminug koꞌi eimoesaika imohey hap etiat hamo. Miꞌi pote yt urueso i.
20 Pyno areto i raꞌyn wyti ehewowi aikotã itotiat hap kuap hamo. Arekenꞌẽ kahato putꞌok uiꞌe turan eiwuꞌuka hap pupi. Yt worohoꞌopuẽti teran i yt eiwoꞌowese i turan neꞌi. Maꞌato worohoꞌopuẽti eiwoꞌoehay ewaĩ ewaĩ turan neꞌi pote arekenꞌẽ kahato areineꞌen eiꞌapiheg hatno neꞌi tet pupi. Yt naku i worohoꞌopuẽti eiwoꞌoehaꞌywyi ehekat koꞌi etiat turan neꞌi. Iꞌewyte eiwoꞌope eimopyꞌahak turan neꞌi yt naku i worohoꞌopuẽti yt eiwoꞌowesat i eiwoꞌope turan neꞌi. Iꞌewyte yt naku i eiwoꞌoewa pe eiwoꞌowese maꞌato eiwoꞌoꞌokpe wo ehehay saꞌag hap ete turan neꞌi worohoꞌopuẽti hap. Yt naku i worohoꞌopuẽti eiwoꞌoweukaꞌi turan neꞌi. Iꞌewyte eiwoꞌohoiro hoiro turan neꞌi. Arekenꞌẽ wuꞌuka hap etiat -Uito poꞌog eikai eiꞌe turan neꞌi.
21 Uiwyriaꞌin arekenꞌẽ te wyti uiwanetup hawe aikotã aru eweikupteꞌen areto turan hap pupi. Yt worohoꞌopuẽti teran i ehewaire waire turan neꞌi. Miꞌi tã ewetunug putꞌok are turan neꞌi pote aremoti sese Tupana ehamo. -Tupana yt areto teran i. Yt atiꞌatupuẽti teran i tawa Kurintiu piaria Esaꞌyru mohey haria iꞌatuewaire waire turan neꞌi katupono uimoti te hap sese topyhuꞌat. Miꞌi hawyi arewak uiwy sese ikuꞌuro hap ewy. Tupana atikyꞌesat taꞌatuꞌatoiat yne toꞌopiit kyꞌesat hap koꞌi yt naku i hap koꞌi. Tupana yt atikyꞌesat i areto emohey haria Kurintiu piaria kape uimohit hap yn itote turan uimoti te hap yn pote are Tupana pe.
