Typuatꞌi Kurintiu 13:1-14
13 Uiwyriaꞌin tawa Kurintiu piaria areto i raꞌyn ehewowi ehepiok hamo. Saꞌawyꞌi areto typua raꞌyn koran wuat areto hawyi myẽꞌym mo raꞌyn areto. Saꞌawyꞌi Tupana toꞌe miwan me -Yt naku i eiwemohit wẽtup ok okpe wo. Miꞌi ti minug yt naku i eweiꞌe eiwoꞌope yt eweikuap i te sio tutunug pywo sio yt hap yt eiweikuap i te pykai e. Yt eweimohey teiꞌo meremo wẽtup ok yn taꞌakasa wẽtup ok minug saꞌag kapiat hat e. Maꞌato myẽꞌym ok teꞌeraꞌakasa wẽtup ok minug saꞌag kapiat hawyi waku eweikay kay saꞌawyꞌi wẽtup ok. Miꞌi hawyi waku wẽtup ok eweikay kay. Miꞌi hawyi wẽtup i raꞌyn eweikay kay miꞌiria henoi hamo. Miꞌi hawyi taꞌatuhenoi teꞌeraꞌakasa hap iꞌewyte taꞌatukuap kahato pywo hap toꞌoꞌewyꞌewy taꞌatuhenoi pote waku eweimohey. Maꞌato yt toꞌoꞌewyꞌewy i taꞌatuhenoi pote yt naku i eweimohey e. Maꞌato yt eweipuẽti myẽꞌym ok pote waku eweimohey typy ok toꞌoehay ewy taꞌatuhenoi pote e Tupana miwan me saꞌawyꞌi te.
2 Saꞌawyꞌi akasa haria henoi uhepe iminug saꞌag koꞌi areineꞌen eipyꞌasetpe turan. Miꞌi hawyi araꞌaipok hawyi taꞌatuhenoi i raꞌyn uhepe. Miꞌi hawyi taꞌatuhenoi uhepe typua raꞌyn. Meiũran aru araꞌaipok i raꞌyn ehewowi miꞌi hawyi taꞌatuhenoi uhepe myẽꞌym mo raꞌyn iminug saꞌag taꞌatuhenoi toꞌoꞌewyꞌewy miꞌi hawyi atimohey raꞌyn. Miꞌi hawyi worohoꞌoꞌapiheg naꞌyn. Saꞌawyꞌi eiweꞌeg wo o are. Miꞌi hawyi araꞌaipok hawyi areꞌe i -Eweiꞌatoiat ro eiminug saꞌag koꞌi koitywy. Worohoꞌoꞌapiheg aru yt eweitoiat i pote are ehepe. Koitywy myẽꞌym mo raꞌyn worohoꞌoꞌewaĩ. Yt areineꞌen i eipyꞌasetpe wen maꞌato eiweꞌeg wo o worohoꞌoꞌapiheg aru. Yt uipohep hin i eiꞌapiheg hap ete haty eweiꞌe pykai.
3 Toineꞌen eipyꞌasetpe -Yt uruikuap i Pauru sio Aipotypot mipoꞌoro sio yt watikuap i sio Iesui wẽ pyi sio yt. Eiweꞌeg wo o katupono Aipotypot wẽ wo kahato areineꞌen hesaika kahato. Aikaꞌiwat eiꞌapiheg kuap. Taꞌi eiꞌapiheg haty wo uhehay kaipyi areꞌe hawyi.
4 Taꞌatuꞌauka Aikaꞌiwat turan yt kat i toꞌe paa e neꞌi. Yt toimoherep hin i tesaika hap. Yt toiꞌatupoepyk hin i. Yt kat i hesaika hap ikuꞌuro turan maꞌato Tupana timoieineꞌen i tesaika wo. Koitywy Tupana esaika hap yne eiam topyhuꞌat. Saꞌawyꞌi urutukupteꞌen eipyꞌasetpe turan aikotã Aikaꞌiwat ikuꞌuro turan yt hesaika hin i turanuat ewy watopyhuꞌat. Maꞌato meiũran urutaꞌaipok ewowi hesaika rakaria ewy urutukupteꞌen maꞌato Tupana esaika hap urupiit pe. Eiweꞌeg wo o Tupana eiꞌapiheg kuap kahato.
5 Waku eweiꞌe eipyꞌa pe sio -Uito Tupana Saꞌyru mohey hat sese sio yt waku eweiꞌe. Waku watikuap kahato aipyꞌa pe sio Tupana saꞌyruꞌin sese uito sio iꞌewyte sio Tupana sakiꞌytꞌin sese uito sio yt hap. Maꞌato yt eweikuap i te pote eiweꞌeg wo o. Yt naku i watopyhuꞌat piku piku koꞌi ewy neꞌi yt iꞌywot wekuap takaria i ewywuaria wo neꞌi. -Uruikuap kahato Tupana uruꞌywot sese hap. Uruikuap Iesui mohey haria sese uruto hap.
6 Atikyꞌesat kahato eweikuap uruto Tupana Saꞌyru mipoꞌoro koꞌi sese hap. -Yt heso rakaria i waku eweiꞌe kuap uruetiat.
7 Tupana are -Etihep to tawa Kurintiu piaria iꞌatueko saꞌag myi iꞌatuminug saꞌag po pyi are. Yt urutuwat teran i iꞌatuewowi epiat iꞌatuꞌapiheg hap nug uruepiat hamo are. Yt uruimoherep teran i esaika hap iꞌatuꞌapiheg hamo neꞌi. Iraniaꞌin itote yt urumohey i emipoꞌoro uruto hap. Etunug miꞌiria taꞌatumohey uruto emipoꞌoro sese iꞌatuꞌe hamo. Yt naku i uruiꞌatuꞌapiheg miꞌiria esaika wo are Tupana pe mesuwe.
8 Uruto Tupana miꞌairo sese tehay pywo piat moherep ehepiat hamo. Yt uheso i rat. Pywo rat uruꞌe hap. Maꞌato -Yt pywo rakat i rat eweiꞌe pote yt eweimohit kuap i urumienoi kat pote Tupana mipoꞌoro koꞌi sese uruto. Poꞌog waku eweiꞌe -Pywo kahato eiꞌe hap waku eweiꞌe. Pywo eweiꞌe hawyi poꞌog esaika hap topyhuꞌat katupono pywo e haria sok wo watukupteꞌen.
9 Uruikyꞌesat kahato eweikupteꞌen waku rakaria Tupana ewywuaria wo hap. Urumowepiit kahato karãpe eweikupteꞌen hesaika kahato rakaria wo imohey hap ete. Miꞌi hawyi poꞌog urunapin haria ewy. Miꞌi hap eꞌat pe urumowepiit kahato.
10 Atikyꞌesat kahato ehehãite imohey hap ete putꞌok uiꞌe turan. Hãpyk Tupana eko ewy hap atikyꞌesat. Miꞌi pote worohoꞌonapin miwan me yt areineꞌen i te eipyꞌasetpiat turan. Poꞌog waku uiwanetup hawe worohoꞌonapin miwan me aiwoꞌoꞌewa piat hap kai. Kat pote atiꞌairo kuap uiꞌe hap. Miꞌi hawyi yt kat i uhehay uimiwan me eimohit hap. Yt karãpe i worohoꞌomohit teran eipe. Worohoꞌomotag yn neran Aikaꞌiwat mohey hap ete. Katupono saꞌawyꞌi Tupana tum uhepe tesaika hap tomohey haria napin uhepiat hamo iꞌatumoesaika imoheg hap etiat hamo.
Kuekatu Hap Toipoꞌoro
11 Uiwyriaꞌin uhekatuwyria kuekatu atipoꞌoro ehewowi. Toran naꞌyn uimiwan mesuwe. Waku pe eweikupteꞌen. Yt kat i iꞌaparap ehepiat hap eheineꞌen hap ete hap wywo eweikupteꞌen. Wẽtup ok miit ewywuat eweikupteꞌen imohey hap ete. Eiwoꞌomowepiit ro eiwoꞌopowyro hap ete woꞌowese hap ete. Miꞌi ewy ewetunug pote eiwepiit kahato katupono Tupana wuatꞌi kyꞌe hat toineꞌen eipyꞌasetpe eimowepiit sese hamo.
12 -Pyno eiwehytꞌok to mehinꞌin manaꞌin eweiꞌe o imohey haria pe ewepiit hap wywo. Aikotã Aikaꞌiwat ewy yne mesuwarotiaria Aikaꞌiwat mohey haria ipoꞌoro kuekatu ehewowi.
13 -Urukaꞌiwat sese Iesui etiꞌatukyꞌe kahato tawa Kurintiu piaria emohey haria. Yt iꞌatuewaku hap kaipyi ereineꞌen egyiꞌat iꞌatuepiat rakatno maꞌato iꞌatukyꞌe haype. Tupana are waure wo ereineꞌen iꞌatuminug saꞌag kai. Etiꞌatukyꞌe miꞌiria yt kat upi i. Tupana Paꞌãu are ewyꞌinug tawa Kurintiu piaria Esaꞌyru mohey haria wywo. Etunug miꞌiria aikotã wẽtup ok miit ewy yn ahẽtup Tupana. Waku are. Mio tã ewy yn ahẽtup Tupana pe ehepiat uiwyriaꞌin Iesui mohey haria tawa Kurintiu piaria etiat.
14 Toran naꞌyn uiꞌe hap miwan miat. Uito ti Tupana mipoꞌoro sese Pauru.
