Typuatꞌi Kurintiu 2:1-17
2 Uiwyriaꞌin worohoꞌokyꞌe kahato eipe. Miꞌi pote yt areto i ehewowi maꞌato areto pote worohoꞌomohit hawyi eiꞌarot hap topyhuꞌat. Saꞌawyꞌi areto ehewowi hawyi worohoꞌomohit kahato eipe. Miꞌi hawyi paa eweiꞌe kahato. Miꞌi hawyi areꞌe uiwanetup hawe -Koitywy yt atunug neran i poꞌog are uiwepe.
2 Worohoꞌomohit eipe hawyi uwe apo uimowepiit haria. Worohoꞌomohit hawyi paa eweiꞌe. Miꞌi hawyi yt uwe i raꞌyn uimowepiit hanuaria miꞌi rẽ. Miꞌi hawyi yt naku i areto mesup katupono worohoꞌomohit eipe hawyi worohoꞌomoꞌarot kahato eipe. Miꞌi hawyi yt woꞌomowepiit haria wo i watoineꞌen.
3 Miꞌi pote atipoꞌoro miwan ehewowi. Pyno eweimohãpyk eiminug saꞌag koꞌi. Miꞌi hawyi areto kuap ehewowi are uimiwan me. Katupono areto turan ewetunug saꞌag ne miꞌi hawyi yt kat i uimowepiit ehepiat hap. Miꞌi pote atipoꞌoro miwan ehewowi uheꞌyianmete katupono worohoꞌomohey eipe. Atikuap ewetunug uhepiat einapin hap koꞌi hamuat. Pywo ti rat yt karãpe i uiwepiit yt eiwepiit i pote.
4 Mekewat uimiwan saꞌawyꞌi wuat pe worohoꞌonapin haty wo -Eiminug saꞌag eweitoiat ro. Arewak kahato popuo atiwan miꞌi miwan ehewowi. Yt atikyꞌesat i uimiwan me eimopyꞌahak hap katupono worohoꞌokyꞌe kahato eipe poꞌog torannia kai. Miꞌi pote haty kahato uipyꞌa pe iꞌewyte uiwanetup hawe worohoꞌonapin eiminug saꞌag etiat turan.
5 Saꞌawyꞌi wuat urumiwan me worohoꞌonapin. Mekewat eipyꞌasetpiat Iesui mohey hat toꞌywot eharyꞌi wywuat waire nug hat. Miꞌi hawyi eiwemoti kahato toineꞌen eiwy ok eipyꞌasetpiat iꞌaparap turan wuat worohoꞌonapin mote. Iꞌewyte uito aremoti miꞌi hap ete are. Maꞌato yt eiꞌewy i pote yt uhehamo i pote miꞌi pote yt worohoꞌomohit teran i poꞌog miꞌi hap ete neꞌi. Maꞌato atunug poꞌog pote poꞌog eiꞌarot kat pote poꞌog worohoꞌomohit pote.
6 Miꞌi hawyi eiwemoti te kahato iꞌewyte miꞌi miit tuwemoti ti te. Pyno waku aipo hep taꞌyn iꞌapiheg hap ete.
7 Pyno waku waure wo raꞌyn watoineꞌen. Pyno waku watunug aiwy sese wo raꞌyn. Maꞌato yt pote meiũran iꞌarot sese hap topyhuꞌat aikotã iꞌauka hap ewy.
8 Pyno ahẽtup uipyꞌa pe ehupi uiwyriaꞌin eweiꞌe i ro tope -Uruikyꞌe kahato en uhyt mimi eweiꞌe i ro iꞌaparap hat pe kat pote totiat raꞌyn tominug saꞌag pote.
9 Saꞌawyꞌi wuat uimiwan me areꞌe -Eweiꞌapiheg no eipyꞌasetpiat mekewat toꞌywot eharyꞌi wywuat saꞌag nug hat. Miꞌi tã are ehepe saꞌawyꞌi ehãꞌãg hamo sio uhehay upi eweikupteꞌen sio yt hap kuap hamo.
10 Koitywy waku waure wo eweikupteꞌen iminug saꞌag kai. Waure wo eweikupteꞌen pote iꞌewyte uito waure wo areineꞌen. Miꞌi hawyi waku waure wo watoꞌe Aikaꞌiwat Iesui e. Miꞌi hawyi iꞌewyte Aikaꞌiwat toineꞌen waure wo raꞌyn. Miꞌi hawyi aiwoꞌokyꞌe hap sese toineꞌen i raꞌyn.
11 Waure wo watoineꞌen hawyi aikotã wẽtup ok miit ewy yn aiwoꞌope watoineꞌen. Miꞌi hawyi ahiag yt aimaꞌat kuap i. Iꞌewyte yt aipatꞌok patꞌok kuap i kat pote ahiag inug neran aipatꞌok patꞌok hap. Toikyꞌesat kahato aiwoꞌosytpok hap yn.
12 Saꞌawyꞌi areto tawa Turate kape mekewat sehay wakuat moherep hamo. Aikotã Tupana tipoꞌoro Tosaꞌyru Eiporekuat nuat sehay wakuat moherep hamuat. Taꞌi ahiag uipyhyp teran wen maꞌato Tupana tunug muap tehay wakuat moherep hamo. Weꞌokenhyp hap ewy itote maꞌato Tupana tiꞌokenhypꞌok taꞌyn uhepe tehay enoi hamo.
13 Itote turan atikat kahato aheywyt Titu katupono atikuap teran iwẽ pyi aikotã aikotã eweikupteꞌen hap koꞌi. Atikat aat kaꞌap maꞌato yt atipuẽti i hawyi uiꞌarot kahato areineꞌen itote. -Kat pote yt tuut i Titu are yn uiwepe. Miꞌi hawyi areꞌe itotiaria pe -Pyno areto raꞌyn yi Masetunia kape are miꞌi hawyi areto raꞌyn.
Pauru Tuwehum Kahato Tupana Motpap Hap Ete
14 Koitywy areꞌe Tupana pe -Uhetupana arehum kahato ewowi are. Waku puo uruikyꞌesat karãpe urutuwat aikowo aikowo Esaꞌyru moherep hamo are. Miꞌi turan urupowyro kahato miꞌi nug hamuat are. Miitꞌin uipyhyp pykai arehum ewowi Tupana kat pote uinug surara ewy poꞌog uhewanikap koꞌi kawiat hesaika rakatno ehay wakuat moherep wuatꞌi miitꞌin piat hamo are. Waĩ iꞌatuꞌe pykai taꞌatukuap ehay wakuat hawyi -Waku kahato miꞌi iꞌatuꞌe aikotã mohag ikamhig se rakat ewy ehay iꞌatuꞌe are. -Waku kahato En Tupana are.
15 Pywo ti rat uiwyriaꞌin Tupana mowepiit hat sese Aikaꞌiwat Iesui. Miꞌi hap ewy Tupana mowepiit haria aito kat pote Iesui eiam watopyhuꞌat mesuwarote. Aikaꞌiwat ikamhig sese rakat ewy toineꞌen aipiit pe hawyi yne ikuap ikamhig sese hap upi Tupana aikuap. Iꞌewyte iraniaꞌin yt imohey i te haria hoꞌowasat rakaria ikuap ikamhig se aipiit piat hap upi hap ewy.
16 Iraniaꞌin ahehay Iesui etiat taꞌatukuap hawyi maꞌato yt taꞌatumohey i miꞌi pote -Yt naku i iꞌatuꞌe katupono ahehay taꞌatukuap hawyi -Pywo iꞌatuꞌe teꞌeruwepe -Urukuꞌuro hawyi Tupana uruꞌapiheg urukuꞌuro hap kape iꞌatuꞌe teꞌeruwepe. Miꞌi pote uruehay yt ikamhig se i rakat ewy paĩ. Yt taꞌatumohey i pote ikuꞌuro rakat nem hap ewy topyhuꞌat uruehay upi are. Maꞌato iraniaꞌin imohey haria pe ahehay Iesui etiat hawyi -Waku kahato aikotã ikamhig se hap ewy topyhuꞌat. Urutukupteꞌen wuatꞌi eꞌat pe iꞌatuꞌe uruehay taꞌatukuap hawyi are. Miꞌi pote aiwat aiweꞌeg hap yt putꞌok e i iraniaꞌin muꞌe Aikaꞌiwat etiat hamo yt taꞌatukyꞌesat i pote. Waku Tupana piat aimoweꞌeg hap kaipyi yn watiꞌatumuꞌe iraniaꞌin tawa koꞌi.
17 Tukupteꞌen Tupana ehay moherep haria maꞌato yt pywo pe i rakaria. Yt Tupana kyꞌe hap wywuat sese haria i aimuꞌe maꞌato ahekat kyewi neꞌi -Mio tã e Tupana iꞌatuꞌe maꞌato yt miꞌi tã e hin i pykai taꞌatuꞌywyk neꞌi. Maꞌato ahehay mio tã watoꞌe -Tupana tipoꞌoro raꞌyn Tosaꞌyru ahehakyeraꞌat hamo watoꞌe. Miꞌi pote waku watunug Iesui Aiporekuat no watoꞌe aipyꞌa pyi watoꞌe. Urukaꞌiwat mowepiit hamo yn uruiꞌatumuꞌe miitꞌin koꞌi.
