Typuatꞌi Kurintiu 3:1-18
3 Tukupteꞌen iraniaꞌin Iesui mohey haria mipoꞌoro koꞌi. Miꞌiria po pe miwan taꞌatuereko taꞌatupoꞌoro haria miium -Waku kahato miꞌi miit urumipoꞌoro eimuꞌe hamo iꞌatuꞌe mekewat miwan note wen maꞌato uito ti yt iraniaꞌin mipoꞌoro hin i katupono yt uwe mipoꞌoro i uito are. Maꞌato uruto Tupana mipoꞌoro eimuꞌe hamo iꞌatuꞌe katupono miwan ete -Uruto waku poꞌog waku eimuꞌe hamo e mesuwat miwan me iꞌatuꞌe ahepe. Eiwatetup o mesuwat miwan kape hawyi eweikuap uruto poꞌog eimuꞌe e hamuat hap iꞌatuꞌe ahepe. Maꞌato uito ti Pauru are. Tupana yn uipoꞌoro ehewowi saꞌawyꞌi. Yt karãpe i aterut wẽtup ywania kaipyi miwan -Poꞌog waku eimuꞌe hamo e hat iraniaꞌin miitꞌin minug koꞌi. Maꞌato iraniaꞌin yt uruꞌewy hin i.
2 Yt uikyꞌesat i eikaipyi -Pauruꞌin Tupana mipoꞌoro aimuꞌe hamo e hap. Eweikuap kat pote. Pyno ahenoi ehepe koitywy eweikupteꞌen Iesui mohey haria uruepiat eimuꞌe hap kaipyi. Koitywy urukuap taꞌyn Aikaꞌiwat ewy raꞌyn uruto. Miꞌi hawyi eipe wy Aikaꞌiwat ewywuat eweikupteꞌen katupono uruimotag eipe hap ewy uruiꞌatumuꞌe eipe. Miꞌi hawyi karãpe teꞌerahaꞌat uruewawi miꞌi hawyi taꞌatukuap Tupana mipoꞌoro koꞌi sese uruto hap. Miꞌi pote eipe miwan ewy eweikupteꞌen -Pauruꞌin Tupana mipoꞌoro e hamo. Maꞌato mesuwat miwan yt popera pe i maꞌato toineꞌen eipyꞌa pe eiwanetup hawe yne miitꞌin imowẽpap hap ewy. Miꞌi hawyi mesuwat miwan ewywuat eiminug wakuat kapiat teꞌerahaꞌat hawyi eimoehay moehay hap ewy. Taꞌi miꞌiria Tupana mipoꞌoro koꞌi Pauruꞌin potmuꞌeria miꞌiria iꞌatuꞌe.
3 -Taꞌi eipe waku urumuꞌe hamo miwan ewy eweikupteꞌen iꞌatuꞌe. Aikotã miwan saꞌawyꞌi wuat timoherep kahato yne Aipotypot Iesui etiat. Miꞌi hap ewy eweimoherep miitꞌin me Tupana mipoꞌoro Eipotypot Iesui etiat. Yt aipo wuat minug popera etiat pyi i. Yt miwan nu etiat kawiat pyi i. Maꞌato wẽtup miwan ewywuat Tupana Paꞌãu kaipywiat miwan eiwanetup hap eipyꞌa pywiat kaipywiat wo. Miꞌi hawyi wuatꞌi miitꞌin timowẽpap kuap. Katupono aiminug koꞌi wakuat ihay Aipotypot moherep hat ete yn. Katupono aiminug wakuat timoherep kahato Iesui topyhuꞌat Aikaꞌiwat no hap etiat miwan ewy.
4 Pyno pywo ti uruikuap kahato Tupana uruꞌairo tehay moherep hamuat. Tupana toꞌe uruepe -Eipe uimiꞌairo uhehay moherep miitꞌin muat hamuat e.
5 Tupana miꞌairo uruto tehay moherep hamuat. Miꞌi pykai yt karãpe i urutoꞌe -Uruto poꞌog Tupana uruꞌairo yt urutoꞌe i. Iꞌewyte -Uruto poꞌog imohey haria iraniaꞌin kai pote Tupana uruꞌairo hap yt urutoꞌe hin i. Yt miꞌi tã ahehay hin i katupono uruesaika hap Tupana ehay moherep hamuat yt tuut i uruesaika hap kaipyi. Maꞌato Tupana urumoesaika tesaika hap kaipyi tomikyꞌesat nug hamuat. Tupana Paꞌãu tum tesaika hap uruepe. Yt uruwekaipyi hin i tuut uruesaika hap.
6 Tupana Paꞌãu wakuat yn aimoweꞌeg kuap tehay wakuat moherep hamuat. Saꞌawyꞌi wuat sehay waĩꞌe hap koꞌi Tupana henoi Iuteuria kape. Waku kahato miꞌiria maꞌato yt aimohãpyk kuap i Tupana wanetup hawe. Katupono yt watunug kuap i yne miꞌi koꞌi. Maꞌato sehay pakup Iesui etiat wo Tupana Paꞌãu aimoieineꞌen kuap. Iraniaꞌin iwẽpap kuap kahato Tupana ehay. Maꞌato yt taꞌatuhẽtup i Tupana Paꞌãu me -Uimuꞌe ro kat som ereꞌe mesuwe hap kuap hamo yt iꞌatuꞌe i. Teꞌeruwanetup mesuwat miwan Tupana etiat -Atimowẽpap kuap hawyi ahehakyeraꞌat raꞌyn iꞌatuꞌe yn. Tupana miwan etiat ahehakyeraꞌat kuap iꞌatuꞌe toꞌope. Miꞌi hawyi taꞌatumowẽpap kahato ahut ewy yt taꞌatukuap i taꞌatupyꞌa pe pykai. Miꞌi hawyi ikuꞌuro rakat ewy tukupteꞌen Tupana ehay ete. Kat pote sehay yn taꞌatukuap pote. Maꞌato Tupana Paꞌãu wakuat yt aimuꞌe i miꞌi hap ewy neꞌi. Katupono Tupana Paꞌãu aimuꞌe aipyꞌa pe aiwanetup hawe aimuꞌe kahato tehay ete. Miꞌi hawyi aimoieineꞌen weꞌeg tehay wo miwan kaipyi.
7 Saꞌawyꞌi Tupana tunug tehay nu ete sehay wakuat kahato. Miꞌi hawyi aseꞌi Muisei terut mekewat miwan Isareu ywania kape. Miꞌi hawyi aseꞌi Muisei Ewa hẽtyhot kahato tuut turan toterut mekewat miwan turan. Maꞌato yt hẽtyhot motꞌi i howa wẽtup ewaty hap ewy yn. Saꞌawyꞌi hẽtyhot kahato miitꞌin yt teꞌerahaꞌat kuap i. Miꞌi hawyi yne eꞌat pe hẽtyhot yi kape teꞌen teꞌen. Saꞌawyꞌi Tupana tum tomiwan miat Isareu ywania piat turan -Pyno miꞌi miwan e hap ewetunug mote waku pe eweikupteꞌen Tupana wanetup hawe iꞌatuꞌe. Miꞌi hawyi -Urutunug aru iꞌatuꞌe. Maꞌato yt taꞌatunug i hap yn topyhuꞌat. -Pyno eipe Tupana miꞌapiheg koꞌi wo eweikupteꞌen e Muisei.
8 Koitywy Tupana Paꞌãu toꞌe ehepe -Eweimohey Uhaꞌyru pote worohoꞌoehakyeraꞌat e. Miꞌi e hap poꞌog ikahu saꞌawyꞌi wuat nu totiat hap kai.
9 Saꞌawyꞌi wuat ainapin hap aiꞌapiheg hap topyhuꞌat. Miꞌi koꞌi -Ewetunug e hap koꞌi waku yne wen maꞌato yt aimohãpyk kuap i ainapin hamo waku pykai. Yt watunug i te hap hawyi aiꞌauka hap topyhuꞌat. Maꞌato koitywy -Worohoꞌomohãpyk eipe e Tupana. Atum ehepe Uipaꞌãu ehepe poꞌog ikahu saꞌawyꞌi wuat kai e.
10 Saꞌawyꞌi wuat aimuꞌe hap ikahu maꞌato mesuwat aimuꞌe hap ipakup takat poꞌog ikahu saꞌawyꞌi wuat kai waku sese hap ewy. Yt kat i poꞌog wakuat ikai. Miꞌi hawyi mekewat saꞌawyꞌi wuat ipotꞌi sehay woꞌonapin hap waku te wen maꞌato watikyꞌesat poꞌog ipakup i miꞌi pote poꞌog waku.
11 Ainapin saꞌawyꞌi wuat hap Muisei Ewa hẽtyhot hap ewy topyhuꞌat. Yne eꞌat pe yt hẽtyhot i yi kape teꞌen teꞌen hap ewy saꞌawyꞌi wuat. Maꞌato Tupana ehay pakup topyhuꞌat yne eꞌat pe hẽtyhot poꞌog poꞌog kat pote Tupana ehay pakup pote.
Taꞌatuhenoi Raꞌyn Tupana Ehay Yt Kat i Iꞌatuwemoti Hap Upi
12 Tupana ehay pakup Iesui etiat watomohey kahato katupono yt karãpe i yi kape poꞌog poꞌog neꞌi. Miꞌi pote wahenoi Tupana ehay yne miitꞌin me yt kat i aiwemoti popuo.
13 Saꞌawyꞌi Muisei tuwemoti kahato kat pote Tupana ẽtyhot hap howa etiat ikahuro poꞌog poꞌog yne eꞌat pe. Toto hap ete tuwemoti. Miꞌi hawyi tuwewa suwy sokpe wo. Yt toikyꞌesat i miitꞌin teꞌerahaꞌat hasep hepap mo ariãty hap kape. Miꞌi hawyi Iuteuria Isareu ywania yt teꞌeraꞌakasa i Tupana ẽtyhot hap howa etiat. Yt teꞌeraꞌakasa kuap i hasep hap kape sokpe iꞌãuka hap pote.
14 Miꞌi hawyi Iuteuria ywania tukupteꞌen mesup te. Taꞌatumoherep kahato Tupana ehay Muisei miwan saꞌawyꞌi wuat maꞌato yt taꞌatukuap pykai i yt heremo i hap ewy pote. Katupono Muisei tiwan Iesui etiat Tupana Mipoꞌoro Aiporekuat nuat etiat huut hap eꞌyian mete. Iuteuria timohey Iesui hawyi heremo taꞌatukuap uwe etiat Muisei tiwan hap. Mesup te maꞌato yt taꞌatumohey i te Iesui raꞌyn hap.
15 Miꞌi hawyi karãpe taꞌatumowẽpap Muisei miwan yt heremo hin i. Muisei aimuꞌe hap watunug mote Tupana ahehakyeraꞌat kuap iꞌatuꞌe toꞌope maꞌato miꞌi e hap iꞌatuesokpe ewy toineꞌen iꞌatuewa ete hap ewy. Yt iꞌatuehapytig i hap ewy. Sokpe iꞌatuewa suwy hap ewy pote yt heremo i ahehakyeraꞌat hap Iesui mikyiꞌat yt kat saꞌup i hap. Iesui yn Muisei minapin yne nug hat pote miꞌi yn ahehakyeraꞌat kuap hat.
16 Maꞌato mesup karãpe wẽtup ok Iuteu ywania tuwemorem Tupana Mipoꞌoro Iꞌatuporekuat nuat Iesui kape imohey hamo miꞌi hat meremo uwe ete Muisei tiwan hap toikuap taꞌyn. Miꞌi hawyi iꞌatuewa etiat sokpe ewywuat yt kat i hawyi heremo kahato iꞌatuwanetup hawe.
17 Tupana Paꞌãu aimuꞌe kahato. Tomiwan ete toimoherep kahato Tupana ahepe. Tomiwan myi toimoherep kahato Tosaꞌyru e hap. Miꞌi hawyi yt uwe i aimaꞌat kuap Tupana ehay ete. Saꞌawyꞌi miwan yt watikuap kuap i kat pote yt kat i Tupana Paꞌãu aipiit pe pote. Koitywy heremo ahepe pote waku pe watoineꞌen Tupana Paꞌãu toineꞌen ahepe hawyi.
18 Aito Iesui mohey haria Muisei ewywuat kahato Tupana motypot hap hẽtyhot hap maꞌato yt ikuꞌuro i ahowa ete Muisei wat ewy. Katupono ahowa Tupana Ewa yꞌy Ewa ete hap ewy Tupana Paꞌãu aimoẽtyhot kahato wuatꞌi eꞌat pe. Yt hasep hin i Muisei Ewa ewy. Miꞌi hawyi Tupana kahu hap ahepe topyhuꞌat. Ipaꞌãu heremo ahete Tupana Mipoꞌoro Aikaꞌiwat nuat Paꞌãu heremo ahete. Pyno yne eꞌat poꞌog wakuat watopyhuꞌat hap ewy Tupana Paꞌãu hẽtyhot hap ete. Miꞌi hawyi yne eꞌat watimoherep poꞌog poꞌog Tupana Paꞌãu. Katupono Tupana ewywuat poꞌog poꞌog watopyhuꞌat yt kat i sokpe ahowa suwy hap ewy maꞌato Tupana iꞌãuka yt kat i ahowa ete. Ikahu kahato Tupana Paꞌãu ahete are uimimuꞌeria uito Pauru.
