Typuatꞌi Kurintiu 4:1-18
4 Miꞌi pote watiꞌatumuꞌe kahato wuatꞌi ywania sehay wakuat Iesui etiat. Katupono Tupana Paꞌãu hegyiꞌat hap kaipyi aiꞌairo towẽ wo. Yt ahewaku hap kaipyi i aiꞌairo miꞌi nug hamo. Ahehakyꞌeꞌi pote aikyꞌe. Miꞌi pote aiꞌairo tehay sytpok hamo. Miꞌi pote yt karãpe i waure watoꞌe ihay sytpok hap ete. Tupana Paꞌãu aimoesaika miꞌi nug hamo.
2 Iraniaꞌin taꞌatuhenoi saꞌag Tupana ehay miitꞌin maꞌat hamo maꞌato aito watimoherep Tupana ehay aikotã toꞌe hap ewy. Yt wahenoi i aikotã iraniaꞌin miitꞌin maꞌat haria ewywuaria henoi hap ewy. Tupana toꞌe hap ewy watoꞌe. Miꞌi hawyi miitꞌin tikuap Tupana ehay pywo piat moherep haria aito hap iꞌewyte Tupana aikuap. Miꞌi hawyi yt aiwemaꞌat hap wywo i wahenoi pywo piat yn wahenoi pote.
3 Maꞌato yt watimoherep Iesui etiat muap Tupana kapiat pote yt taꞌatukuap hin i. Miꞌi hawyi aimimuꞌeria yt ikuap takaria i wo tukupteꞌen. Yt naku i yt wahenoi i katupono yt wahenoi i hawyi tuwat aria kape yt taꞌatukuap i Tupana etiat pote.
4 Pyno yt imohey i haria mesuwarotiaria hoꞌowasat rakaria wo teꞌeropyhuꞌat. Ahiag topyhuꞌat iꞌatuetupana wo. Miꞌi hawyi karãpe wahenoi sehay wakuat aikotã Tupana tipoꞌoro Tosaꞌyru Aiporekuat no hap etiat iꞌewyte karãpe watimoherep yne Iesui etiat Tupana moherep hat sese etiat Tupana ewywuat rakat miꞌi hap etiat wahenoi turan -Yt eweimohey teiꞌo miꞌi. Yt eweimohey teiꞌo miꞌi e ahiag iꞌatuwanetup hawe yt toikyꞌesat i miꞌiria teꞌeropyhuꞌat Iesui haria pote. Ahiag iꞌatuewa hik hap ewy iꞌatuete yt toikyꞌesat i Iesui kapiat iꞌatuꞌakasa hap pote.
5 Yt watuwemotypot i ahehay wo miitꞌin miat wahenoi turan. -Eheropat haria uruto watoꞌe katupono Iesui emiit uruto pote watoꞌe. Miꞌi hawyi Iesui yn Aiꞌakag watoꞌe. Miꞌi yn Tupana tipoꞌoro Aiporekuat no. Miꞌi yn aimimotypot sese watoꞌe. -Eheropat haria yn waku watoꞌe wahenoi Iesui etiat turan.
6 Saꞌawyꞌi sese iꞌypyryp sese turan Tupana toꞌe -Ereineꞌen no hẽtyhot hap e. Miꞌi hawyi toineꞌen naꞌyn hẽtyhot hap. Koitywy miꞌi hap ewy tutunug aiwanetup hawe. Aipotypot Iesui Tupana eꞌariãty ewywuat toineꞌen. Karãpe watomohey Iesui hawyi Tupana heremo topyhuꞌat aiwanetup hawe -Worokuap kahato En mesup Tupana watoꞌe. Esaꞌyru En wẽtup miit ewy yn watoꞌe. Koitywy watikuap ewaku hap watoꞌe.
Pauru Esaika Hap Tupana Kaipyi Tuut
7 Tupana Paꞌãu eiam kahato aito. Miꞌi pote ahesaika kahato Tupana ehay moherep hamo. Pyno yt ahesaika hin i pykai ahehay Iesui etiat hesaika kahato katupono aito heiam yi kawiat ewywuat watopyhuꞌat pykai Tupana Paꞌãu aipytꞌat nug kahato. Miꞌi hawyi woity rakat mehit rakat koꞌi kawiat ewywuat watopyhuꞌat. Miꞌi hawyi meremo miitꞌin tikuap ahesaika hap toineꞌen Tupana Paꞌãu kaipyi hap yt aipiit yi kawiat kaipyi i.
8 Iesui ehay moherep haria aito pote miitꞌin mikyryꞌi hamo watoineꞌen aikope aikope ahewyry hap upi. Maꞌato miꞌi pykai yt aiꞌakit kuap i kat pote uruhoꞌopot aimoma teran maꞌato yt aimoma kuap i.
9 Aiꞌatoiat mesuwarotiaria aiꞌakag wuaria kahato maꞌato yt waure wo hin i aiwanetup hawe imohey hap ete.
10 Aiꞌauka aru aikotã Aikaꞌiwat Iesui taꞌatuꞌauka hap ewy watoꞌe. Aikotã taꞌatukuasa Iesui iꞌauka hamo hap ewy aimohan aiꞌauka hamo watoꞌe. Yt watikuap i aikuꞌuro hap sio mesup mukiꞌite watoꞌe. Maꞌato miꞌi pykai yt watoiat hin i imohey hap watoꞌe. Maꞌato miꞌi pykai wahenoi ahewanikaptia pe aimimohey Iesui etiat. Miꞌi pote -Pywo ti rat iꞌatuꞌe. Iesui tuwẽtem guꞌuro pyi hap watikuap taꞌyn iꞌatuꞌe. Pywo ti rat katupono heremo toineꞌen iꞌatupiit pe iꞌatuꞌe ahewanikaptia.
11 Ahehay Iesui etiat pote aipyhyp teran aikotã aiꞌauka hamo. Taꞌatuꞌauka Aikaꞌiwat. Miꞌi hap ewy teran ahete taꞌatunug neran. Miꞌi turan watimoherep yne Iesui toineꞌen hap ete.
12 Pyno aiꞌauka aru watoꞌe maꞌato aipotpap taꞌyn wuatꞌi ywania muꞌe hap ete. Miꞌi hap ewy urutunug saꞌawyꞌi eipyꞌasetpe. Miꞌi pote Aikaꞌiwat mimoieineꞌen koꞌi wo eweikupteꞌen mesup.
13 Saꞌawyꞌi morekuat Tawi toꞌe -Woromohey sese En Tupana. Miꞌi pote atimoherep En wuatꞌi miitꞌin me uhehay wo. Yt atoiat kuap i uhepiat emohey hap e morekuat Tawi. Miꞌi ewywuat kahato aito imohey hap ete. -Uruimohey sese En Tupana. Miꞌi pote uruimoherep En wuatꞌi miitꞌin me watoꞌe. Yt uruatoiat kuap i En watoꞌe.
14 Taꞌi koitywy watikuap kahato raꞌyn Tupana tihep Aikaꞌiwat guꞌuro pyi hap etiat. Miꞌi hawyi toimoieineꞌen i ikuꞌuro hawyi. Miꞌi hap watikuap kahato are. Iꞌewyte aito watikuap kahato meiũran aru Aikaꞌiwat Iesui aihep guꞌuro pywiat aimoieineꞌen wuatꞌi eꞌat piat hamo Tosaꞌyru mohey haria aito pote. Aimoieineꞌen hawyi aru aito ahereto Toꞌywot kape aikope toineꞌen hap kape. Mio tã e aru miꞌi hawyi -Papai meimuẽwaria uimohey sese haria e aru. Miꞌi hawyi aru wẽtup miit ewy watoineꞌen itote.
15 Saꞌawyꞌi eipyꞌasetpe urutukupteꞌen turan miitꞌin mimosoꞌopot koꞌi wo uruto uruiꞌatumuꞌe eipe Iesui etiat pote. Miꞌi hawyi uruepiat hoꞌopot hap kaipyi eweikupteꞌen pywo e haria wo typyꞌi raꞌyn. Miꞌi hap kaipyi koitywy miitꞌin poꞌog poꞌog Tupana kapiat wehum haria wo tukupteꞌen. -Egyiꞌat kahato Tupana eweiꞌe. Yt uwe i eꞌewy hegyiꞌat hap eweiꞌe. Uruimotypot wuat waku rakat. Uruhewaku En eweiꞌe itote poꞌog poꞌog saꞌawyꞌi kai. Koitywy Tupana topyhuꞌat eimimotypot no raꞌyn uruepiat hoꞌopot kahato eimuꞌe hamuat rakirẽ.
Tupana Iꞌatumoesaika Hamuat
16 Karãpe urutaꞌakasa ehepiat imohey hap kapiat hawyi urutoꞌe -Pyno waku poꞌog wahoꞌopot iraniaꞌin muꞌe Iesui etiat hamo urutoꞌe. Maꞌato koitywy urupiit yt hesaika kahato i saꞌawyꞌi wuat ewy maꞌato miꞌi pykai poꞌog uruesaika saꞌawyꞌi wuat kai urupyꞌa pe uruwanetup hawe Tupana esaika hap poꞌog uruete saꞌawyꞌi kai katupono Tupana Paꞌãu urumopakup kahato Iesui ehay moherep hamo wuatꞌi eꞌat pe. Miꞌi pote yt uruiꞌatoiat hin i sehay wakuat etiat miitꞌin muꞌe hap.
17 Pyno iraniaꞌin Tupana ehay yt kyꞌesat i haria urusatyꞌi satyꞌi kahato urumosoꞌopot kahato mesuwe. Maꞌato aheineꞌen turan yn aimosoꞌopot kuap. Miꞌi hawyi poꞌog yt kat i taꞌatunug kuap maꞌato yt watoineꞌen motꞌi i mesuwarote. Miꞌi hawyi watoineꞌen motꞌi wuatꞌi eꞌat pe hap tote. Miꞌi hawyi atipy pe aru watoꞌe -Taꞌi wahoꞌopot kahato yi tote miitꞌin muꞌe hamuat turan. Maꞌato koitywy waku aiwanetup hawe ahepiat hoꞌopot hap watoꞌe. Katupono ahepiat hoꞌopot hap kaipyi iꞌatu kahato Tupana motypot haria nug mesuwiat hamo watoꞌe aru atipy pe.
18 Pyno yt naku i watuwanetup ahepiat hoꞌopot hap mesuwarotiat kape koran wuat kape yn. Poꞌog waku watuwanetup aimowepiit hap atipy piat hap kape aikotã aru aimowepiit wuatꞌi eꞌat pe hap kape. Maꞌato koitywy yt heremo i te miꞌi. Katupono ahepiat hoꞌopot porap i hap heremo kahato koran aiwanetup hawe. Pyno poꞌog waku watuwanetup ahepiat hoꞌopot hap eꞌyian mete aikotã aru hap kape. Taꞌi yt pya hin i wyti aimowepiit hamuat wuatꞌi eꞌat piat hap eꞌat watoꞌe. Ahepiat hoꞌopot porapꞌi hawyi tokosap aru pote meremo watoꞌe.
